𑁪. 𑀲𑀺𑀗𑁆𑀕𑀸𑀮𑀫𑀸𑀢𑀼𑀣𑁂𑀭𑀻𑀅𑀧𑀤𑀸𑀦𑀁

𑁮𑁨. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

𑁮𑁩. ‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀚𑀸𑀢𑀸𑀫𑀘𑁆𑀘𑀓𑀼𑀮𑁂 𑀅𑀳𑀼𑀁;

𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂, 𑀇𑀤𑁆𑀥𑁂 𑀨𑀻𑀢𑁂 𑀫𑀳𑀤𑁆𑀥𑀦𑁂.

𑁮𑁪. ‘‘𑀧𑀺𑀢𑀼𑀦𑀸 𑀲𑀳 𑀕𑀦𑁆𑀢𑁆𑀯𑀸𑀦, 𑀫𑀳𑀸𑀚𑀦𑀧𑀼𑀭𑀓𑁆𑀔𑀢𑀸;

𑀥𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀲𑀼𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁮𑁫. ‘‘𑀧𑀩𑁆𑀩𑀚𑀺𑀢𑁆𑀯𑀸𑀦 𑀓𑀸𑀬𑁂𑀦, 𑀧𑀸𑀧𑀓𑀫𑁆𑀫𑀁 𑀯𑀺𑀯𑀚𑁆𑀚𑀬𑀺𑀁;

𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀆𑀚𑀻𑀯𑀁 𑀧𑀭𑀺𑀲𑁄𑀥𑀬𑀺𑀁.

𑁮𑁬. ‘‘𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀥𑀫𑁆𑀫𑁂 𑀘, 𑀲𑀗𑁆𑀖𑁂 𑀘 𑀢𑀺𑀩𑁆𑀩𑀕𑀸𑀭𑀯𑀸;

𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂 𑀬𑀼𑀢𑁆𑀢𑀸, 𑀩𑀼𑀤𑁆𑀥𑀤𑀲𑁆𑀲𑀦𑀮𑀸𑀮𑀲𑀸 [𑀩𑀼𑀤𑁆𑀥𑀤𑀲𑁆𑀲𑀦𑀲𑀸𑀮𑀬𑀸 (𑀲𑁆𑀬𑀸.)].

𑁮𑁭. ‘‘𑀅𑀕𑁆𑀕𑀁 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀁, 𑀅𑀲𑁆𑀲𑁄𑀲𑀺𑀁 𑀪𑀺𑀓𑁆𑀔𑀼𑀦𑀺𑀁 𑀢𑀤𑀸;

𑀢𑀁 𑀞𑀸𑀦𑀁 𑀧𑀢𑁆𑀣𑀬𑀺𑀢𑁆𑀯𑀸𑀦, 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀅𑀧𑀽𑀭𑀬𑀺𑀁.

𑁮𑁮. ‘‘𑀢𑀢𑁄 𑀫𑀁 𑀲𑀼𑀕𑀢𑁄 𑀆𑀳, 𑀓𑀭𑀼𑀡𑀸𑀦𑀼𑀕𑀢𑀸𑀲𑀬𑁄;

‘𑀬𑀲𑁆𑀲 𑀲𑀤𑁆𑀥𑀸 𑀢𑀣𑀸𑀕𑀢𑁂, 𑀅𑀘𑀮𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸;

𑀲𑀻𑀮𑀜𑁆𑀘 𑀬𑀲𑁆𑀲 𑀓𑀮𑁆𑀬𑀸𑀡𑀁, 𑀅𑀭𑀺𑀬𑀓𑀦𑁆𑀢𑀁 𑀧𑀲𑀁𑀲𑀺𑀢𑀁.

𑁮𑁯. ‘‘‘𑀲𑀗𑁆𑀖𑁂 𑀧𑀲𑀸𑀤𑁄 𑀬𑀲𑁆𑀲𑀢𑁆𑀣𑀺, 𑀉𑀚𑀼𑀪𑀽𑀢𑀜𑁆𑀘 𑀤𑀲𑁆𑀲𑀦𑀁;

𑀅𑀤𑀮𑀺𑀤𑁆𑀤𑁄𑀢𑀺 𑀢𑀁 𑀆𑀳𑀼, 𑀅𑀫𑁄𑀖𑀁 𑀢𑀲𑁆𑀲 𑀚𑀻𑀯𑀺𑀢𑀁.

𑁯𑁦. ‘‘‘𑀢𑀲𑁆𑀫𑀸 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀧𑀲𑀸𑀤𑀁 𑀥𑀫𑁆𑀫𑀤𑀲𑁆𑀲𑀦𑀁;

𑀅𑀦𑀼𑀬𑀼𑀜𑁆𑀚𑁂𑀣 𑀫𑁂𑀥𑀸𑀯𑀻, 𑀲𑀭𑀁 𑀩𑀼𑀤𑁆𑀥𑀸𑀦 [𑀩𑀼𑀤𑁆𑀥𑀸𑀦𑀼𑀲𑀸𑀲𑀦𑀁 (𑀲𑀻.), 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 (𑀲𑁆𑀬𑀸.)] 𑀲𑀸𑀲𑀦𑀁’.

𑁯𑁧. ‘‘𑀢𑀁 𑀲𑀼𑀢𑁆𑀯𑀸𑀳𑀁 𑀧𑀫𑀼𑀤𑀺𑀢𑀸, 𑀅𑀧𑀼𑀘𑁆𑀙𑀺𑀁 𑀧𑀡𑀺𑀥𑀺𑀁 𑀫𑀫;

𑀢𑀤𑀸 𑀅𑀦𑁄𑀫𑁄 𑀅𑀫𑀺𑀢𑁄, 𑀩𑁆𑀬𑀸𑀓𑀭𑀺𑀢𑁆𑀣 𑀯𑀺𑀦𑀸𑀬𑀓𑁄;

‘𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀓𑀮𑁆𑀬𑀸𑀡𑀻, 𑀮𑀘𑁆𑀙𑀲𑁂 𑀢𑀁 𑀲𑀼𑀧𑀢𑁆𑀣𑀺𑀢𑀁.

𑁯𑁨. ‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁯𑁩. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀑𑀭𑀲𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸;

𑀲𑀺𑀗𑁆𑀕𑀸𑀮𑀓𑀲𑁆𑀲 [𑀲𑀺𑀕𑀸𑀮𑀓𑀲𑁆𑀲 (𑀲𑀻. 𑀧𑀻.)] 𑀫𑀸𑀢𑀸𑀢𑀺, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀺𑀓𑀸’.

𑁯𑁪. ‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑀸 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀫𑁂𑀢𑁆𑀢𑀘𑀺𑀢𑁆𑀢𑀸 𑀧𑀭𑀺𑀘𑀭𑀺𑀁, 𑀧𑀝𑀺𑀧𑀢𑁆𑀢𑀻𑀳𑀺 𑀦𑀸𑀬𑀓𑀁.

𑁯𑁫. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁯𑁬. ‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀕𑀺𑀭𑀺𑀩𑁆𑀩𑀚𑀧𑀼𑀭𑀼𑀢𑁆𑀢𑀫𑁂;

𑀚𑀸𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀨𑀻𑀢𑁂, 𑀫𑀳𑀸𑀭𑀢𑀦𑀲𑀜𑁆𑀘𑀬𑁂.

𑁯𑁭. ‘‘𑀧𑀼𑀢𑁆𑀢𑁄 𑀲𑀺𑀗𑁆𑀕𑀸𑀮𑀓𑁄 𑀦𑀸𑀫, 𑀫𑀫𑀸𑀲𑀺 𑀯𑀺𑀧𑀣𑁂 𑀭𑀢𑁄;

𑀤𑀺𑀝𑁆𑀞𑀺𑀕𑀳𑀦𑀧𑀓𑁆𑀔𑀦𑁆𑀤𑁄, 𑀤𑀺𑀲𑀸𑀧𑀽𑀚𑀦𑀢𑀧𑁆𑀧𑀭𑁄.

𑁯𑁮. ‘‘𑀦𑀸𑀦𑀸𑀤𑀺𑀲𑀸 𑀦𑀫𑀲𑁆𑀲𑀦𑁆𑀢𑀁 [𑀦𑀫𑀲𑁆𑀲𑀢𑀺 (𑀲𑁆𑀬𑀸.)], 𑀧𑀺𑀡𑁆𑀟𑀸𑀬 𑀦𑀕𑀭𑀁 𑀯𑀚𑀁;

𑀢𑀁 𑀤𑀺𑀲𑁆𑀯𑀸 𑀑𑀯𑀤𑀻 𑀩𑀼𑀤𑁆𑀥𑁄, 𑀫𑀕𑁆𑀕𑁂 𑀞𑀢𑁆𑀯𑀸 𑀯𑀺𑀦𑀸𑀬𑀓𑁄.

𑁯𑁯. ‘‘𑀢𑀲𑁆𑀲 𑀤𑁂𑀲𑀬𑀢𑁄 𑀥𑀫𑁆𑀫𑀁, 𑀧𑀦𑀸𑀤𑁄 𑀯𑀺𑀫𑁆𑀳𑀬𑁄 𑀅𑀳𑀼;

𑀤𑁆𑀯𑁂𑀓𑁄𑀝𑀺𑀦𑀭𑀦𑀸𑀭𑀻𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁧𑁦𑁦. ‘‘𑀢𑀤𑀸𑀳𑀁 𑀧𑀭𑀺𑀲𑀁 𑀕𑀦𑁆𑀢𑁆𑀯𑀸, 𑀲𑀼𑀢𑁆𑀯𑀸 𑀲𑀼𑀕𑀢𑀪𑀸𑀲𑀺𑀢𑀁;

𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁧𑁦𑁧. ‘‘𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀩𑀼𑀤𑁆𑀥𑀤𑀲𑁆𑀲𑀦𑀮𑀸𑀮𑀲𑀸;

𑀅𑀦𑀼𑀲𑁆𑀲𑀢𑀺𑀁 𑀢𑀁 𑀪𑀸𑀯𑁂𑀢𑁆𑀯𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁦𑁨. ‘‘𑀤𑀲𑁆𑀲𑀦𑀢𑁆𑀣𑀸𑀬 𑀩𑀼𑀤𑁆𑀥𑀲𑁆𑀲, 𑀲𑀩𑁆𑀩𑀤𑀸 𑀘 𑀯𑀚𑀸𑀫𑀳𑀁;

𑀅𑀢𑀺𑀢𑁆𑀢𑀸𑀬𑁂𑀯 𑀧𑀲𑁆𑀲𑀸𑀫𑀺, 𑀭𑀽𑀧𑀁 𑀦𑀬𑀦𑀦𑀦𑁆𑀤𑀦𑀁.

𑁧𑁦𑁩. ‘‘𑀲𑀩𑁆𑀩𑀧𑀸𑀭𑀫𑀺𑀲𑀫𑁆𑀪𑀽𑀢𑀁, 𑀮𑀓𑁆𑀔𑀻𑀦𑀺𑀮𑀬𑀦𑀁 𑀯𑀭𑀁;

𑀭𑀽𑀧𑀁 𑀲𑀩𑁆𑀩𑀲𑀼𑀪𑀸𑀓𑀺𑀡𑁆𑀡𑀁, 𑀅𑀢𑀺𑀢𑁆𑀢𑀸 𑀯𑀺𑀳𑀭𑀸𑀫𑀳𑀁.

𑁧𑁦𑁪. ‘‘𑀚𑀺𑀦𑁄 𑀢𑀲𑁆𑀫𑀺𑀁 𑀕𑀼𑀡𑁂 𑀢𑀼𑀝𑁆𑀞𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁;

𑀲𑀺𑀗𑁆𑀕𑀸𑀮𑀓𑀲𑁆𑀲 𑀬𑀸 𑀫𑀸𑀢𑀸, 𑀅𑀕𑁆𑀕𑀸 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀺𑀓𑀸 [𑀲𑀁𑀖𑀯𑀺𑀫𑀼𑀢𑁆𑀢𑀺𑀓𑀸 (𑀧𑀻.), 𑀫𑀫𑀸𑀥𑀺𑀫𑀼𑀢𑁆𑀢𑀺𑀓𑀸 (𑀓.)].

𑁧𑁦𑁫. ‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫𑀺 𑀫𑀳𑀸𑀫𑀼𑀦𑀺.

𑁧𑁦𑁬. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁧𑁦𑁭. ‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑀫 𑀫𑀳𑀸𑀯𑀻𑀭, 𑀉𑀧𑁆𑀧𑀦𑁆𑀦𑀁 𑀢𑀯 𑀲𑀦𑁆𑀢𑀺𑀓𑁂.

𑁧𑁦𑁮. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁧𑁦𑁯. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁧𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀲𑀺𑀗𑁆𑀕𑀸𑀮𑀫𑀸𑀢𑀸 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀺𑀗𑁆𑀕𑀸𑀮𑀫𑀸𑀢𑀼𑀣𑁂𑀭𑀺𑀬𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.