𑁧. 𑀬𑀲𑀯𑀢𑀻𑀧𑀫𑀼𑀔𑀅𑀝𑁆𑀞𑀸𑀭𑀲𑀪𑀺𑀓𑁆𑀔𑀼𑀦𑀻𑀲𑀳𑀲𑁆𑀲𑀅𑀧𑀤𑀸𑀦𑀁

𑁧. ‘‘𑀪𑀯𑀸 𑀲𑀩𑁆𑀩𑁂 𑀧𑀭𑀺𑀓𑁆𑀔𑀻𑀡𑀸, 𑀪𑀯𑀸 𑀲𑀦𑁆𑀢𑀺 𑀯𑀺𑀫𑁄𑀘𑀺𑀢𑀸;

𑀲𑀩𑁆𑀩𑀸𑀲𑀯𑀸 𑀘 𑀦𑁄 𑀦𑀢𑁆𑀣𑀺, 𑀆𑀭𑁄𑀘𑁂𑀫 𑀫𑀳𑀸𑀫𑀼𑀦𑁂.

𑁨. ‘‘𑀧𑀼𑀭𑀺𑀫𑀁 𑀓𑀼𑀲𑀮𑀁 𑀓𑀫𑁆𑀫𑀁 [𑀧𑀭𑀺𑀓𑀫𑁆𑀫𑀜𑁆𑀘 𑀓𑀼𑀲𑀮𑀁 (𑀲𑁆𑀬𑀸.)], 𑀬𑀁 𑀓𑀺𑀜𑁆𑀘𑀺 𑀲𑀸𑀥𑀼𑀧𑀢𑁆𑀣𑀺𑀢𑀁;

𑀧𑀭𑀺𑀪𑁄𑀕𑀫𑀬𑀁 𑀤𑀺𑀦𑁆𑀦𑀁, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑁂.

𑁩. ‘‘𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀲𑀸𑀯𑀓𑀸𑀦𑀜𑁆𑀘 𑀧𑀢𑁆𑀣𑀺𑀢𑀁 [𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀜𑁆𑀘 (𑀲𑀻. 𑀓.)];

𑀧𑀭𑀺𑀪𑁄𑀕𑀫𑀬𑀁 𑀤𑀺𑀦𑁆𑀦𑀁, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑁂.

𑁪. ‘‘𑀉𑀘𑁆𑀘𑀦𑀻𑀘𑀫𑀬𑀁 𑀓𑀫𑁆𑀫𑀁, 𑀪𑀺𑀓𑁆𑀔𑀽𑀦𑀁 𑀲𑀸𑀥𑀼𑀧𑀢𑁆𑀣𑀺𑀢𑀁;

𑀉𑀘𑁆𑀘𑀸𑀓𑀼𑀮𑀧𑀭𑀺𑀓𑀫𑁆𑀫𑀁, 𑀓𑀢𑀫𑁂𑀢𑀁 𑀫𑀳𑀸𑀫𑀼𑀦𑁂 [𑀓𑀢𑀫𑁆𑀳𑁂𑀳𑀺 𑀫𑀳𑀸𑀫𑀼𑀦𑁂 (𑀲𑁆𑀬𑀸. 𑀧𑀻.)].

𑁫. ‘‘𑀢𑁂𑀦𑁂𑀯 𑀲𑀼𑀓𑁆𑀓𑀫𑀽𑀮𑁂𑀦, 𑀘𑁄𑀤𑀺𑀢𑀸 𑀓𑀫𑁆𑀫𑀲𑀫𑁆𑀧𑀤𑀸;

𑀫𑀸𑀦𑀼𑀲𑀺𑀓𑀫𑀢𑀺𑀓𑁆𑀓𑀦𑁆𑀢𑀸, 𑀚𑀸𑀬𑀺𑀁𑀲𑀼 𑀔𑀢𑁆𑀢𑀺𑀬𑁂 𑀓𑀼𑀮𑁂.

𑁬. ‘‘𑀉𑀧𑁆𑀧𑀢𑁆𑀢𑁂 𑀘 𑀓𑀢𑁂 𑀓𑀫𑁆𑀫𑁂, 𑀚𑀸𑀢𑀺𑀬𑀸 𑀯𑀸𑀧𑀺 𑀏𑀓𑀢𑁄;

𑀧𑀘𑁆𑀙𑀺𑀫𑁂 𑀏𑀓𑀢𑁄 𑀚𑀸𑀢𑀸, 𑀔𑀢𑁆𑀢𑀺𑀬𑀸 𑀓𑀼𑀮𑀲𑀫𑁆𑀪𑀯𑀸.

𑁭. ‘‘𑀭𑀽𑀧𑀯𑀢𑀻 𑀪𑁄𑀕𑀯𑀢𑀻, 𑀮𑀸𑀪𑀲𑀓𑁆𑀓𑀸𑀭𑀧𑀽𑀚𑀺𑀢𑀸;

𑀅𑀦𑁆𑀢𑁂𑀧𑀼𑀭𑁂 𑀫𑀳𑀸𑀯𑀻𑀭, 𑀤𑁂𑀯𑀸𑀦𑀁 𑀯𑀺𑀬 𑀦𑀦𑁆𑀤𑀦𑁂.

𑁮. ‘‘𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀅𑀕𑀸𑀭𑀫𑁆𑀳𑀸, 𑀧𑀩𑁆𑀩𑀚𑀺𑀫𑁆𑀳𑀦𑀕𑀸𑀭𑀺𑀬𑀁;

𑀓𑀢𑀺𑀧𑀸𑀳𑀁 𑀉𑀧𑀸𑀤𑀸𑀬, 𑀲𑀩𑁆𑀩𑀸 𑀧𑀢𑁆𑀢𑀸𑀫𑁆𑀳 𑀦𑀺𑀩𑁆𑀩𑀼𑀢𑀺𑀁.

𑁯. ‘‘𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀉𑀧𑀦𑁂𑀦𑁆𑀢𑀺 𑀩𑀳𑀽 𑀅𑀫𑁆𑀳𑁂, 𑀲𑀤𑀸 𑀲𑀓𑁆𑀓𑀢𑀧𑀽𑀚𑀺𑀢𑀸.

𑁧𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀅𑀫𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑀻𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫 𑀅𑀦𑀸𑀲𑀯𑀸.

𑁧𑁧. ‘‘𑀲𑁆𑀯𑀸𑀕𑀢𑀁 𑀯𑀢 𑀦𑁄 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀬𑀲𑀯𑀢𑀻𑀧𑀫𑀼𑀔𑀸𑀦𑀺 𑀔𑀢𑁆𑀢𑀺𑀬𑀓𑀜𑁆𑀜𑀸𑀪𑀺𑀓𑁆𑀔𑀼𑀦𑀺𑀬𑁄 𑀅𑀝𑁆𑀞𑀸𑀭𑀲𑀲𑀳𑀲𑁆𑀲𑀸𑀦𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀬𑀲𑀯𑀢𑀻𑀧𑀫𑀼𑀔𑀅𑀝𑁆𑀞𑀸𑀭𑀲𑀪𑀺𑀓𑁆𑀔𑀼𑀦𑀻𑀲𑀳𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.