𑁯. 𑀬𑀲𑁄𑀥𑀭𑀸𑀧𑀫𑀼𑀔𑀤𑀲𑀪𑀺𑀓𑁆𑀔𑀼𑀦𑀻𑀲𑀳𑀲𑁆𑀲𑀅𑀧𑀤𑀸𑀦𑀁

𑁪𑁧𑁧. ‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂;

𑀤𑀻𑀧𑀗𑁆𑀓𑀭𑁄 𑀦𑀸𑀫 𑀚𑀺𑀦𑁄, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄.

𑁪𑁧𑁨. ‘‘𑀤𑀻𑀧𑀗𑁆𑀓𑀭𑁄 𑀫𑀳𑀸𑀯𑀻𑀭𑁄, 𑀯𑀺𑀬𑀸𑀓𑀸𑀲𑀺 𑀯𑀺𑀦𑀸𑀬𑀓𑁄;

𑀲𑀼𑀫𑁂𑀥𑀜𑁆𑀘 𑀲𑀼𑀫𑀺𑀢𑁆𑀢𑀜𑁆𑀘, 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀢𑀁.

𑁪𑁧𑁩. ‘‘𑀲𑀤𑁂𑀯𑀓𑀜𑁆𑀘 𑀧𑀲𑁆𑀲𑀦𑁆𑀢𑁄, 𑀯𑀺𑀘𑀭𑀦𑁆𑀢𑁄 𑀲𑀤𑁂𑀯𑀓𑀁;

𑀢𑁂𑀲𑀁 𑀧𑀓𑀺𑀢𑁆𑀢𑀦𑁂 𑀅𑀫𑁆𑀳𑁂, 𑀉𑀧𑀕𑀫𑁆𑀫 𑀲𑀫𑀸𑀕𑀫𑀁.

𑁪𑁧𑁪. ‘‘𑀅𑀫𑁆𑀳𑀁 𑀲𑀩𑁆𑀩𑀧𑀢𑀺 𑀳𑁄𑀳𑀺 [𑀲𑀩𑁆𑀩𑀸 𑀧𑀢𑀻 𑀳𑁄𑀦𑁆𑀢𑀺 (𑀧𑀻.)], 𑀅𑀦𑀸𑀕𑀢𑀲𑀫𑀸𑀕𑀫𑁂;

𑀲𑀩𑁆𑀩𑀸𑀯 𑀢𑀼𑀬𑁆𑀳𑀁 𑀪𑀭𑀺𑀬𑀸, 𑀫𑀦𑀸𑀧𑀸 𑀧𑀺𑀬𑀯𑀸𑀤𑀺𑀓𑀸.

𑁪𑁧𑁫. ‘‘𑀤𑀸𑀦𑀁 𑀲𑀻𑀮𑀫𑀬𑀁 𑀲𑀩𑁆𑀩𑀁, 𑀪𑀸𑀯𑀦𑀸 𑀘 𑀲𑀼𑀪𑀸𑀯𑀺𑀢𑀸;

𑀤𑀻𑀖𑀭𑀢𑁆𑀢𑀜𑁆𑀘 𑀦𑁄 [𑀤𑀻𑀖𑀭𑀢𑁆𑀢𑀫𑀺𑀤𑀁 (𑀲𑁆𑀬𑀸. 𑀓.)] 𑀲𑀩𑁆𑀩𑀁, 𑀧𑀭𑀺𑀘𑁆𑀘𑀢𑁆𑀢𑀁 𑀫𑀳𑀸𑀫𑀼𑀦𑁂.

𑁪𑁧𑁬. ‘‘𑀕𑀦𑁆𑀥𑀁 𑀯𑀺𑀮𑁂𑀧𑀦𑀁 𑀫𑀸𑀮𑀁, 𑀤𑀻𑀧𑀜𑁆𑀘 𑀭𑀢𑀦𑀸𑀫𑀬𑀁;

𑀬𑀁𑀓𑀺𑀜𑁆𑀘𑀺 𑀧𑀢𑁆𑀣𑀺𑀢𑀁 𑀲𑀩𑁆𑀩𑀁, 𑀧𑀭𑀺𑀘𑁆𑀘𑀢𑁆𑀢𑀁 𑀫𑀳𑀸𑀫𑀼𑀦𑀺.

𑁪𑁧𑁭. ‘‘𑀅𑀜𑁆𑀜𑀁 𑀯𑀸𑀧𑀺 𑀓𑀢𑀁 𑀓𑀫𑁆𑀫𑀁, 𑀧𑀭𑀺𑀪𑁄𑀕𑀜𑁆𑀘 𑀫𑀸𑀦𑀼𑀲𑀁;

𑀤𑀻𑀖𑀭𑀢𑁆𑀢𑀜𑁆𑀳𑀺 𑀦𑁄 𑀲𑀩𑁆𑀩𑀁, 𑀧𑀭𑀺𑀘𑁆𑀘𑀢𑁆𑀢𑀁 𑀫𑀳𑀸𑀫𑀼𑀦𑀺.

𑁪𑁧𑁮. ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀩𑀳𑀼𑀁 𑀧𑀼𑀜𑁆𑀜𑀫𑁆𑀧𑀺 𑀦𑁄 𑀓𑀢𑀁;

𑀇𑀲𑁆𑀲𑀭𑀫𑀦𑀼𑀪𑁄𑀢𑁆𑀯𑀸𑀦, 𑀲𑀁𑀲𑀭𑀺𑀢𑁆𑀯𑀸 𑀪𑀯𑀸𑀪𑀯𑁂.

𑁪𑁧𑁯. ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀲𑀓𑁆𑀬𑀧𑀼𑀢𑁆𑀢𑀦𑀺𑀯𑁂𑀲𑀦𑁂;

𑀦𑀸𑀦𑀸𑀓𑀼𑀮𑀽𑀧𑀧𑀦𑁆𑀦𑀸𑀬𑁄, 𑀅𑀘𑁆𑀙𑀭𑀸 𑀓𑀸𑀫𑀯𑀡𑁆𑀡𑀺𑀦𑀻.

𑁪𑁨𑁦. ‘‘𑀮𑀸𑀪𑀕𑁆𑀕𑁂𑀦 𑀬𑀲𑀁 𑀧𑀢𑁆𑀢𑀸, 𑀧𑀽𑀚𑀺𑀢𑀸 𑀲𑀩𑁆𑀩𑀲𑀓𑁆𑀓𑀢𑀸;

𑀮𑀸𑀪𑀺𑀬𑁄 𑀅𑀦𑁆𑀦𑀧𑀸𑀦𑀸𑀦𑀁, 𑀲𑀤𑀸 𑀲𑀫𑁆𑀫𑀸𑀦𑀺𑀢𑀸 𑀫𑀬𑀁.

𑁪𑁨𑁧. ‘‘𑀅𑀕𑀸𑀭𑀁 𑀧𑀚𑀳𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀫𑁆𑀳𑀦𑀕𑀸𑀭𑀺𑀬𑀁;

𑀅𑀟𑁆𑀠𑀫𑀸𑀲𑁂 𑀅𑀲𑀫𑁆𑀧𑀢𑁆𑀢𑁂, 𑀲𑀩𑁆𑀩𑀸 𑀧𑀢𑁆𑀢𑀸𑀫𑁆𑀳 𑀦𑀺𑀩𑁆𑀩𑀼𑀢𑀺𑀁.

𑁪𑁨𑁨. ‘‘𑀮𑀸𑀪𑀺𑀬𑁄 𑀅𑀦𑁆𑀦𑀧𑀸𑀦𑀸𑀦𑀁, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀉𑀧𑁂𑀦𑁆𑀢𑀺 𑀧𑀘𑁆𑀘𑀬𑀸 𑀲𑀩𑁆𑀩𑁂, 𑀲𑀤𑀸 𑀲𑀓𑁆𑀓𑀢𑀧𑀽𑀚𑀺𑀢𑀸.

𑁪𑁨𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀅𑀫𑁆𑀳𑀁…𑀧𑁂… 𑀯𑀺𑀳𑀭𑀸𑀫 𑀅𑀦𑀸𑀲𑀯𑀸.

𑁪𑁨𑁪. ‘‘𑀲𑁆𑀯𑀸𑀕𑀢𑀁 𑀯𑀢 𑀦𑁄 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁨𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀬𑀲𑁄𑀥𑀭𑀸𑀧𑀫𑀼𑀔𑀸𑀦𑀺 𑀤𑀲𑀪𑀺𑀓𑁆𑀔𑀼𑀦𑀻𑀲𑀳𑀲𑁆𑀲𑀸𑀦𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀬𑀲𑁄𑀥𑀭𑀸𑀧𑀫𑀼𑀔𑀤𑀲𑀪𑀺𑀓𑁆𑀔𑀼𑀦𑀻𑀲𑀳𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.