𑁧𑁦. 𑀬𑀲𑁄𑀥𑀭𑀸𑀧𑀫𑀼𑀔𑀅𑀝𑁆𑀞𑀸𑀭𑀲𑀪𑀺𑀓𑁆𑀔𑀼𑀦𑀻𑀲𑀳𑀲𑁆𑀲𑀅𑀧𑀤𑀸𑀦𑀁

𑁪𑁨𑁬. ‘‘𑀅𑀝𑁆𑀞𑀸𑀭𑀲𑀲𑀳𑀲𑁆𑀲𑀸𑀦𑀺, 𑀪𑀺𑀓𑁆𑀔𑀼𑀦𑀻 𑀲𑀓𑁆𑀬𑀲𑀫𑁆𑀪𑀯𑀸;

𑀬𑀲𑁄𑀥𑀭𑀸𑀧𑀫𑀼𑀔𑀸𑀦𑀺, 𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀼𑀁.

𑁪𑁨𑁭. ‘‘𑀅𑀝𑁆𑀞𑀸𑀭𑀲𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸 𑀳𑁄𑀦𑁆𑀢𑀺 𑀫𑀳𑀺𑀤𑁆𑀥𑀺𑀓𑀸;

𑀯𑀦𑁆𑀤𑀦𑁆𑀢𑀻 𑀫𑀼𑀦𑀺𑀦𑁄 𑀧𑀸𑀤𑁂, 𑀆𑀭𑁄𑀘𑁂𑀦𑁆𑀢𑀺 𑀬𑀣𑀸𑀩𑀮𑀁.

𑁪𑁨𑁮. ‘‘‘𑀚𑀸𑀢𑀺 𑀔𑀻𑀡𑀸 𑀚𑀭𑀸 𑀩𑁆𑀬𑀸𑀥𑀺, 𑀫𑀭𑀡𑀜𑁆𑀘 𑀫𑀳𑀸𑀫𑀼𑀦𑀺;

𑀅𑀦𑀸𑀲𑀯𑀁 𑀧𑀤𑀁 𑀲𑀦𑁆𑀢𑀁, 𑀅𑀫𑀢𑀁 𑀬𑀸𑀫 𑀦𑀸𑀬𑀓.

𑁪𑁨𑁯. ‘‘‘𑀔𑀮𑀺𑀢𑀜𑁆𑀘𑁂 𑀧𑀼𑀭𑁂 𑀅𑀢𑁆𑀣𑀺, 𑀲𑀩𑁆𑀩𑀸𑀲𑀫𑁆𑀧𑀺 𑀫𑀳𑀸𑀫𑀼𑀦𑀺;

𑀅𑀧𑀭𑀸𑀥𑀫𑀚𑀸𑀦𑀦𑁆𑀢𑀻, 𑀔𑀫 𑀅𑀫𑁆𑀳𑀁 𑀯𑀺𑀦𑀸𑀬𑀓.

𑁪𑁩𑁦. ‘‘‘𑀇𑀤𑁆𑀥𑀺𑀜𑁆𑀘𑀸𑀧𑀺 𑀦𑀺𑀤𑀲𑁆𑀲𑁂𑀣, 𑀫𑀫 𑀲𑀸𑀲𑀦𑀓𑀸𑀭𑀺𑀓𑀸;

𑀧𑀭𑀺𑀲𑀸𑀦𑀜𑁆𑀘 𑀲𑀩𑁆𑀩𑀸𑀲𑀁, 𑀓𑀗𑁆𑀔𑀁 𑀙𑀺𑀦𑁆𑀤𑀣 𑀬𑀸𑀯𑀢𑀸.

𑁪𑁩𑁧. ‘‘‘𑀬𑀲𑁄𑀥𑀭𑀸 𑀫𑀳𑀸𑀯𑀻𑀭, 𑀫𑀦𑀸𑀧𑀸 𑀧𑀺𑀬𑀤𑀲𑁆𑀲𑀦𑀸;

𑀲𑀩𑁆𑀩𑀸 𑀢𑀼𑀬𑁆𑀳𑀁 𑀫𑀳𑀸𑀯𑀻𑀭, 𑀅𑀕𑀸𑀭𑀲𑁆𑀫𑀺𑀁 𑀧𑀚𑀸𑀧𑀢𑀺.

𑁪𑁩𑁨. ‘‘‘𑀣𑀻𑀦𑀁 𑀲𑀢𑀲𑀳𑀲𑁆𑀲𑀸𑀦𑀁, 𑀦𑀯𑀼𑀢𑀻𑀦𑀁 𑀙𑀤𑀼𑀢𑁆𑀢𑀭𑀺;

𑀅𑀕𑀸𑀭𑁂 𑀢𑁂 𑀫𑀬𑀁 𑀯𑀻𑀭, 𑀧𑀸𑀫𑁄𑀓𑁆𑀔𑀸 𑀲𑀩𑁆𑀩𑀸 𑀇𑀲𑁆𑀲𑀭𑀸.

𑁪𑁩𑁩. ‘‘‘𑀭𑀽𑀧𑀸𑀘𑀸𑀭𑀕𑀼𑀡𑀽𑀧𑁂𑀢𑀸, 𑀬𑁄𑀩𑁆𑀩𑀦𑀝𑁆𑀞𑀸 𑀧𑀺𑀬𑀁𑀯𑀤𑀸;

𑀲𑀩𑁆𑀩𑀸 𑀦𑁄 𑀅𑀧𑀘𑀸𑀬𑀦𑁆𑀢𑀺, 𑀤𑁂𑀯𑀢𑀸 𑀯𑀺𑀬 𑀫𑀸𑀦𑀼𑀲𑀸.

𑁪𑁩𑁪. ‘‘‘𑀅𑀝𑁆𑀞𑀸𑀭𑀲𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸 𑀲𑀸𑀓𑀺𑀬𑀲𑀫𑁆𑀪𑀯𑀸;

𑀬𑀲𑁄𑀥𑀭𑀸𑀲𑀳𑀲𑁆𑀲𑀸𑀦𑀺, 𑀧𑀸𑀫𑁄𑀓𑁆𑀔𑀸 𑀇𑀲𑁆𑀲𑀭𑀸 𑀢𑀤𑀸.

𑁪𑁩𑁫. ‘‘‘𑀓𑀸𑀫𑀥𑀸𑀢𑀼𑀫𑀢𑀺𑀓𑁆𑀓𑀫𑁆𑀫, 𑀲𑀡𑁆𑀞𑀺𑀢𑀸 𑀭𑀽𑀧𑀥𑀸𑀢𑀼𑀬𑀸;

𑀭𑀽𑀧𑁂𑀦 𑀲𑀤𑀺𑀲𑀸 𑀦𑀢𑁆𑀣𑀺, 𑀲𑀳𑀲𑁆𑀲𑀸𑀦𑀁 𑀫𑀳𑀸𑀫𑀼𑀦𑀺.

𑁪𑁩𑁬. ‘‘‘𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀇𑀤𑁆𑀥𑀺𑀁 𑀤𑀲𑁆𑀲𑀁𑀲𑀼 𑀲𑀢𑁆𑀣𑀼𑀦𑁄;

𑀦𑁂𑀓𑀸 𑀦𑀸𑀦𑀸𑀯𑀺𑀥𑀸𑀓𑀸𑀭𑀸, 𑀫𑀳𑀸𑀇𑀤𑁆𑀥𑀻𑀧𑀺 𑀤𑀲𑁆𑀲𑀬𑀼𑀁.

𑁪𑁩𑁭. ‘‘‘𑀘𑀓𑁆𑀓𑀯𑀸𑀴𑀲𑀫𑀁 𑀓𑀸𑀬𑀁, 𑀲𑀻𑀲𑀁 𑀉𑀢𑁆𑀢𑀭𑀢𑁄 𑀓𑀼𑀭𑀼;

𑀉𑀪𑁄 𑀧𑀓𑁆𑀔𑀸 𑀤𑀼𑀯𑁂 𑀤𑀻𑀧𑀸, 𑀚𑀫𑁆𑀩𑀼𑀤𑀻𑀧𑀁 𑀲𑀭𑀻𑀭𑀢𑁄.

𑁪𑁩𑁮. ‘‘‘𑀤𑀓𑁆𑀔𑀺𑀡𑀜𑁆𑀘 𑀲𑀭𑀁 𑀧𑀺𑀜𑁆𑀙𑀁, 𑀦𑀸𑀦𑀸𑀲𑀸𑀔𑀸 𑀢𑀼 𑀧𑀢𑁆𑀢𑀓𑀸;

𑀘𑀦𑁆𑀤𑀜𑁆𑀘 𑀲𑀽𑀭𑀺𑀬𑀜𑁆𑀘𑀓𑁆𑀔𑀺, 𑀫𑁂𑀭𑀼𑀧𑀩𑁆𑀩𑀢𑀢𑁄 𑀲𑀺𑀔𑀁.

𑁪𑁩𑁯. ‘‘‘𑀘𑀓𑁆𑀓𑀯𑀸𑀴𑀕𑀺𑀭𑀺𑀁 𑀢𑀼𑀡𑁆𑀟𑀁, 𑀚𑀫𑁆𑀩𑀼𑀭𑀼𑀓𑁆𑀔𑀁 𑀲𑀫𑀽𑀮𑀓𑀁;

𑀩𑀻𑀚𑀫𑀸𑀦𑀸 𑀉𑀧𑀸𑀕𑀦𑁆𑀢𑁆𑀯𑀸, 𑀯𑀦𑁆𑀤𑀦𑁆𑀢𑀻 𑀮𑁄𑀓𑀦𑀸𑀬𑀓𑀁.

𑁪𑁪𑁦. ‘‘‘𑀳𑀢𑁆𑀣𑀺𑀯𑀡𑁆𑀡𑀁 𑀢𑀣𑁂𑀯𑀲𑁆𑀲𑀁, 𑀧𑀩𑁆𑀩𑀢𑀁 𑀚𑀮𑀥𑀺𑀁 𑀢𑀣𑀸;

𑀘𑀦𑁆𑀤𑀜𑁆𑀘 𑀲𑀽𑀭𑀺𑀬𑀁 𑀫𑁂𑀭𑀼𑀁, 𑀲𑀓𑁆𑀓𑀯𑀡𑁆𑀡𑀜𑁆𑀘 𑀤𑀲𑁆𑀲𑀬𑀼𑀁.

𑁪𑁪𑁧. ‘‘‘𑀬𑀲𑁄𑀥𑀭𑀸 𑀫𑀬𑀁 𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀸𑀫 𑀘𑀓𑁆𑀔𑀼𑀫;

𑀢𑀯 𑀘𑀺𑀭𑀧𑀪𑀸𑀯𑁂𑀦, 𑀦𑀺𑀧𑁆𑀨𑀦𑁆𑀦𑀸 𑀦𑀭𑀦𑀸𑀬𑀓.

𑁪𑁪𑁨. ‘‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫 𑀫𑀳𑀸𑀫𑀼𑀦𑁂.

𑁪𑁪𑁩. ‘‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁪𑁪𑁪. ‘‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀅𑀫𑁆𑀳𑀁 𑀫𑀳𑀸𑀯𑀻𑀭, 𑀉𑀧𑁆𑀧𑀦𑁆𑀦𑀁 𑀢𑀯 𑀲𑀦𑁆𑀢𑀺𑀓𑁂.

𑁪𑁪𑁫. ‘‘‘𑀧𑀼𑀩𑁆𑀩𑀸𑀦𑀁 𑀮𑁄𑀓𑀦𑀸𑀣𑀸𑀦𑀁, 𑀲𑀗𑁆𑀕𑀫𑀁 𑀦𑁄 𑀦𑀺𑀤𑀲𑁆𑀲𑀺𑀢𑀁;

𑀅𑀥𑀺𑀓𑀸𑀭𑀸 𑀩𑀳𑀽 𑀅𑀫𑁆𑀳𑀁, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑁂.

𑁪𑁪𑁬. ‘‘‘𑀬𑀁 𑀅𑀫𑁆𑀳𑀁 𑀧𑀽𑀭𑀺𑀢𑀁 𑀓𑀫𑁆𑀫𑀁, 𑀓𑀼𑀲𑀮𑀁 𑀲𑀭𑀲𑁂 𑀫𑀼𑀦𑁂;

𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀧𑀼𑀜𑁆𑀜𑀸𑀦𑀼𑀧𑀘𑀺𑀢𑀸𑀦𑀺 𑀦𑁄.

𑁪𑁪𑁭. ‘‘‘𑀅𑀪𑀩𑁆𑀩𑀝𑁆𑀞𑀸𑀦𑁂 𑀯𑀚𑁆𑀚𑁂𑀢𑁆𑀯𑀸, 𑀯𑀸𑀭𑀬𑀺𑀫𑁆𑀳 𑀅𑀦𑀸𑀘𑀭𑀁;

𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀘𑀢𑁆𑀢𑀸𑀦𑀺 𑀚𑀻𑀯𑀺𑀢𑀸𑀦𑀺 𑀦𑁄 [𑀲𑀜𑁆𑀘𑀢𑁆𑀢𑀁 𑀚𑀻𑀯𑀺𑀢𑀫𑁆𑀧𑀺 𑀦𑁄 (𑀲𑁆𑀬𑀸.)].

𑁪𑁪𑁮. ‘‘‘𑀦𑁂𑀓𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀪𑀭𑀺𑀬𑀢𑁆𑀣𑀸𑀬𑀤𑀸𑀲𑀺 𑀦𑁄;

𑀦 𑀢𑀢𑁆𑀣 𑀯𑀺𑀫𑀦𑀸 𑀳𑁄𑀫, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑁂.

𑁪𑁪𑁯. ‘‘‘𑀦𑁂𑀓𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀉𑀧𑀓𑀸𑀭𑀸𑀬𑀤𑀸𑀲𑀺 𑀦𑁄;

𑀦 𑀢𑀢𑁆𑀣 𑀯𑀺𑀫𑀦𑀸 𑀳𑁄𑀫, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑁂.

𑁪𑁫𑁦. ‘‘‘𑀦𑁂𑀓𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀪𑁄𑀚𑀦𑀢𑁆𑀣𑀸𑀬𑀤𑀸𑀲𑀺 𑀦𑁄;

𑀦 𑀢𑀢𑁆𑀣 𑀯𑀺𑀫𑀦𑀸 𑀳𑁄𑀫, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑁂.

𑁪𑁫𑁧. ‘‘‘𑀦𑁂𑀓𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀚𑀻𑀯𑀺𑀢𑀸𑀦𑀺 𑀘𑀚𑀺𑀫𑁆𑀳𑀲𑁂 [𑀘𑀚𑀺𑀫𑁆𑀳 𑀦𑁄 (𑀧𑀻. 𑀓.)];

𑀪𑀬𑀫𑁄𑀓𑁆𑀔𑀁 𑀓𑀭𑀺𑀲𑁆𑀲𑀸𑀫, 𑀚𑀻𑀯𑀺𑀢𑀸𑀦𑀺 𑀘𑀚𑀺𑀫𑁆𑀳𑀲𑁂.

𑁪𑁫𑁨. ‘‘‘𑀅𑀗𑁆𑀕𑀕𑀢𑁂 𑀅𑀮𑀗𑁆𑀓𑀸𑀭𑁂, 𑀯𑀢𑁆𑀣𑁂 𑀦𑀸𑀦𑀸𑀯𑀺𑀥𑁂 𑀩𑀳𑀽;

𑀇𑀢𑁆𑀣𑀺𑀪𑀡𑁆𑀟𑁂 𑀦 𑀕𑀽𑀳𑀸𑀫, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑁂.

𑁪𑁫𑁩. ‘‘‘𑀥𑀦𑀥𑀜𑁆𑀜𑀧𑀭𑀺𑀘𑁆𑀘𑀸𑀕𑀁, 𑀕𑀸𑀫𑀸𑀦𑀺 𑀦𑀺𑀕𑀫𑀸𑀦𑀺 𑀘;

𑀔𑁂𑀢𑁆𑀢𑀁 𑀧𑀼𑀢𑁆𑀢𑀸 𑀘 𑀥𑀻𑀢𑀸 𑀘, 𑀧𑀭𑀺𑀘𑁆𑀘𑀢𑁆𑀢𑀸 𑀫𑀳𑀸𑀫𑀼𑀦𑁂.

𑁪𑁫𑁪. ‘‘‘𑀳𑀢𑁆𑀣𑀻 𑀅𑀲𑁆𑀲𑀸 𑀕𑀯𑀸 𑀘𑀸𑀧𑀺, 𑀤𑀸𑀲𑀺𑀬𑁄 𑀧𑀭𑀺𑀘𑀸𑀭𑀺𑀓𑀸;

𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀧𑀭𑀺𑀘𑁆𑀘𑀢𑁆𑀢𑀁 𑀅𑀲𑀗𑁆𑀔𑀺𑀬𑀁.

𑁪𑁫𑁫. ‘‘‘𑀬𑀁 𑀅𑀫𑁆𑀳𑁂 𑀧𑀝𑀺𑀫𑀦𑁆𑀢𑁂𑀲𑀺, 𑀤𑀸𑀦𑀁 𑀤𑀲𑁆𑀲𑀸𑀫 𑀬𑀸𑀘𑀓𑁂;

𑀯𑀺𑀫𑀦𑀁 𑀦𑁄 𑀦 𑀧𑀲𑁆𑀲𑀸𑀫, 𑀤𑀤𑀢𑁄 𑀤𑀸𑀦𑀫𑀼𑀢𑁆𑀢𑀫𑀁.

𑁪𑁫𑁬. ‘‘‘𑀦𑀸𑀦𑀸𑀯𑀺𑀥𑀁 𑀩𑀳𑀼𑀁 𑀤𑀼𑀓𑁆𑀔𑀁, 𑀲𑀁𑀲𑀸𑀭𑁂 𑀘 𑀩𑀳𑀼𑀩𑁆𑀩𑀺𑀥𑁂;

𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀅𑀦𑀼𑀪𑀼𑀢𑁆𑀢𑀁 𑀅𑀲𑀗𑁆𑀔𑀺𑀬𑀁.

𑁪𑁫𑁭. ‘‘‘𑀲𑀼𑀔𑀧𑁆𑀧𑀢𑁆𑀢𑀸𑀦𑀼𑀫𑁄𑀤𑀸𑀫, 𑀦 𑀘 𑀤𑀼𑀓𑁆𑀔𑁂𑀲𑀼 𑀤𑀼𑀫𑁆𑀫𑀦𑀸;

𑀲𑀩𑁆𑀩𑀢𑁆𑀣 𑀢𑀼𑀮𑀺𑀢𑀸 𑀳𑁄𑀫, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑁂.

𑁪𑁫𑁮. ‘‘‘𑀅𑀦𑀼𑀫𑀕𑁆𑀕𑁂𑀦 𑀲𑀫𑁆𑀩𑀼𑀤𑁆𑀥𑁄, 𑀬𑀁 𑀥𑀫𑁆𑀫𑀁 𑀅𑀪𑀺𑀦𑀻𑀳𑀭𑀺;

𑀅𑀦𑀼𑀪𑁄𑀢𑁆𑀯𑀸 𑀲𑀼𑀔𑀁 𑀤𑀼𑀓𑁆𑀔𑀁, 𑀧𑀢𑁆𑀢𑁄 𑀩𑁄𑀥𑀺𑀁 𑀫𑀳𑀸𑀫𑀼𑀦𑁂.

𑁪𑁫𑁯. ‘‘‘𑀩𑁆𑀭𑀳𑁆𑀫𑀤𑁂𑀯𑀜𑁆𑀘 𑀲𑀫𑁆𑀩𑀼𑀤𑁆𑀥𑀁, 𑀕𑁄𑀢𑀫𑀁 𑀮𑁄𑀓𑀦𑀸𑀬𑀓𑀁;

𑀅𑀜𑁆𑀜𑁂𑀲𑀁 𑀮𑁄𑀓𑀦𑀸𑀣𑀸𑀦𑀁, 𑀲𑀗𑁆𑀕𑀫𑀁 𑀢𑁂𑀳𑀺 𑀦𑁄 𑀩𑀳𑀽.

𑁪𑁬𑁦. ‘‘‘𑀅𑀥𑀺𑀓𑀸𑀭𑀁 𑀩𑀳𑀼𑀁 𑀅𑀫𑁆𑀳𑁂, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑁂;

𑀕𑀯𑁂𑀲𑀢𑁄 𑀩𑀼𑀤𑁆𑀥𑀥𑀫𑁆𑀫𑁂, 𑀫𑀬𑀁 𑀢𑁂 𑀧𑀭𑀺𑀘𑀸𑀭𑀺𑀓𑀸.

𑁪𑁬𑁧. ‘‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂;

𑀤𑀻𑀧𑀗𑁆𑀓𑀭𑁄 𑀫𑀳𑀸𑀯𑀻𑀭𑁄, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄.

𑁪𑁬𑁨. ‘‘‘𑀧𑀘𑁆𑀘𑀦𑁆𑀢𑀤𑁂𑀲𑀯𑀺𑀲𑀬𑁂, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁;

𑀢𑀲𑁆𑀲 𑀆𑀕𑀫𑀦𑀁 𑀫𑀕𑁆𑀕𑀁, 𑀲𑁄𑀥𑁂𑀦𑁆𑀢𑀺 𑀢𑀼𑀝𑁆𑀞𑀫𑀸𑀦𑀲𑀸.

𑁪𑁬𑁩. ‘‘‘𑀢𑁂𑀦 𑀓𑀸𑀮𑁂𑀦 𑀲𑁄 𑀆𑀲𑀺, 𑀲𑀼𑀫𑁂𑀥𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀫𑀕𑁆𑀕𑀜𑁆𑀘 𑀧𑀝𑀺𑀬𑀸𑀤𑁂𑀲𑀺, 𑀆𑀬𑀢𑁄 𑀲𑀩𑁆𑀩𑀤𑀲𑁆𑀲𑀺𑀦𑁄.

𑁪𑁬𑁪. ‘‘‘𑀢𑁂𑀦 𑀓𑀸𑀮𑁂𑀦 𑀅𑀳𑀼𑀫𑁆𑀳, 𑀲𑀩𑁆𑀩𑀸 𑀩𑁆𑀭𑀸𑀳𑁆𑀫𑀡𑀲𑀫𑁆𑀪𑀯𑀸;

𑀣𑀮𑀽𑀤𑀚𑀸𑀦𑀺 𑀧𑀼𑀧𑁆𑀨𑀸𑀦𑀺, 𑀆𑀳𑀭𑀺𑀫𑁆𑀳 𑀲𑀫𑀸𑀕𑀫𑀁.

𑁪𑁬𑁫. ‘‘‘𑀢𑀲𑁆𑀫𑀺𑀁 𑀲𑁄 𑀲𑀫𑀬𑁂 𑀩𑀼𑀤𑁆𑀥𑁄, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀬𑀲𑁄;

𑀯𑀺𑀬𑀸𑀓𑀸𑀲𑀺 𑀫𑀳𑀸𑀯𑀻𑀭𑁄, 𑀇𑀲𑀺𑀫𑀼𑀕𑁆𑀕𑀢𑀫𑀸𑀦𑀲𑀁.

𑁪𑁬𑁬. ‘‘‘𑀘𑀮𑀢𑀻 𑀭𑀯𑀢𑀻 𑀧𑀼𑀣𑀯𑀻, 𑀲𑀗𑁆𑀓𑀫𑁆𑀧𑀢𑀺 𑀲𑀤𑁂𑀯𑀓𑁂;

𑀢𑀲𑁆𑀲 𑀓𑀫𑁆𑀫𑀁 𑀧𑀓𑀺𑀢𑁆𑀢𑁂𑀦𑁆𑀢𑁂, 𑀇𑀲𑀺𑀫𑀼𑀕𑁆𑀕𑀢𑀫𑀸𑀦𑀲𑀁.

𑁪𑁬𑁭. ‘‘‘𑀤𑁂𑀯𑀓𑀜𑁆𑀜𑀸 𑀫𑀦𑀼𑀲𑁆𑀲𑀸 𑀘, 𑀫𑀬𑀜𑁆𑀘𑀸𑀧𑀺 𑀲𑀤𑁂𑀯𑀓𑀸;

𑀦𑀸𑀦𑀸𑀧𑀽𑀚𑀦𑀻𑀬𑀁 𑀪𑀡𑁆𑀟𑀁, 𑀧𑀽𑀚𑀬𑀺𑀢𑁆𑀯𑀸𑀦 𑀧𑀢𑁆𑀣𑀬𑀼𑀁.

𑁪𑁬𑁮. ‘‘‘𑀢𑁂𑀲𑀁 𑀩𑀼𑀤𑁆𑀥𑁄 𑀯𑀺𑀬𑀸𑀓𑀸𑀲𑀺, 𑀚𑁄𑀢𑀺𑀤𑀻𑀧 𑀲𑀦𑀸𑀫𑀓𑁄;

𑀅𑀚𑁆𑀚 𑀬𑁂 𑀧𑀢𑁆𑀣𑀺𑀢𑀸 𑀅𑀢𑁆𑀣𑀺, 𑀢𑁂 𑀪𑀯𑀺𑀲𑁆𑀲𑀦𑁆𑀢𑀺 𑀲𑀫𑁆𑀫𑀼𑀔𑀸.

𑁪𑁬𑁯. ‘‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀦𑁄 𑀩𑀼𑀤𑁆𑀥𑁄 𑀯𑀺𑀬𑀸𑀓𑀭𑀺;

𑀢𑀁 𑀯𑀸𑀘𑀫𑀦𑀼𑀫𑁄𑀤𑁂𑀦𑁆𑀢𑀸, 𑀏𑀯𑀁𑀓𑀸𑀭𑀻 𑀅𑀳𑀼𑀫𑁆𑀳 𑀦𑁄.

𑁪𑁭𑁦. ‘‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀲𑀼𑀓𑀢𑀲𑁆𑀲, 𑀢𑀲𑁆𑀲 𑀘𑀺𑀢𑁆𑀢𑀁 𑀧𑀲𑀸𑀤𑀬𑀼𑀁;

𑀤𑁂𑀯𑀫𑀸𑀦𑀼𑀲𑀺𑀓𑀁 𑀬𑁄𑀦𑀺𑀁, 𑀅𑀦𑀼𑀪𑁄𑀢𑁆𑀯𑀸 𑀅𑀲𑀗𑁆𑀔𑀺𑀬𑀁.

𑁪𑁭𑁧. ‘‘‘𑀲𑀼𑀔𑀤𑀼𑀓𑁆𑀔𑁂𑀦𑀼𑀪𑁄𑀢𑁆𑀯𑀸𑀦, 𑀤𑁂𑀯𑁂𑀲𑀼 𑀫𑀸𑀦𑀼𑀲𑁂𑀲𑀼 𑀘;

𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀚𑀸𑀢𑀸𑀫𑁆𑀳 𑀲𑀸𑀓𑀺𑀬𑁂 𑀓𑀼𑀮𑁂.

𑁪𑁭𑁨. ‘‘‘𑀭𑀽𑀧𑀯𑀢𑀻 𑀪𑁄𑀕𑀯𑀢𑀻, 𑀬𑀲𑀲𑀻𑀮𑀯𑀢𑀻 𑀢𑀢𑁄;

𑀲𑀩𑁆𑀩𑀗𑁆𑀕𑀲𑀫𑁆𑀧𑀤𑀸 𑀳𑁄𑀫, 𑀓𑀼𑀮𑁂𑀲𑀼 𑀅𑀪𑀺𑀲𑀓𑁆𑀓𑀢𑀸.

𑁪𑁭𑁩. ‘‘‘𑀮𑀸𑀪𑀁 𑀲𑀺𑀮𑁄𑀓𑀁 𑀲𑀓𑁆𑀓𑀸𑀭𑀁, 𑀮𑁄𑀓𑀥𑀫𑁆𑀫𑀲𑀫𑀸𑀕𑀫𑀁;

𑀘𑀺𑀢𑁆𑀢𑀜𑁆𑀘 𑀤𑀼𑀓𑁆𑀔𑀺𑀢𑀁 𑀦𑀢𑁆𑀣𑀺, 𑀯𑀲𑀸𑀫 𑀅𑀓𑀼𑀢𑁄𑀪𑀬𑀸.

𑁪𑁭𑁪. ‘‘‘𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑁂 𑀢𑀤𑀸;

𑀔𑀢𑁆𑀢𑀺𑀬𑀸𑀦𑀁 𑀧𑀼𑀭𑁂 𑀯𑀻𑀭 [𑀢𑀸𑀲𑀁 (𑀲𑁆𑀬𑀸.)], 𑀉𑀧𑀓𑀸𑀭𑀜𑁆𑀘 𑀦𑀺𑀤𑁆𑀤𑀺𑀲𑀺.

𑁪𑁭𑁫. ‘‘‘𑀉𑀧𑀓𑀸𑀭𑀸 𑀘 𑀬𑀸 𑀦𑀸𑀭𑀻, 𑀬𑀸 𑀘 𑀦𑀸𑀭𑀻 𑀲𑀼𑀔𑁂 𑀤𑀼𑀔𑁂;

𑀅𑀢𑁆𑀣𑀓𑁆𑀔𑀸𑀬𑀻 𑀘 𑀬𑀸 𑀦𑀸𑀭𑀻, 𑀬𑀸 𑀘 𑀦𑀸𑀭𑀻𑀦𑀼𑀓𑀫𑁆𑀧𑀺𑀓𑀸.

𑁪𑁭𑁬. ‘‘‘𑀥𑀫𑁆𑀫𑀁 𑀘𑀭𑁂 𑀲𑀼𑀘𑀭𑀺𑀢𑀁, 𑀦 𑀦𑀁 𑀤𑀼𑀘𑁆𑀘𑀭𑀺𑀢𑀁 𑀘𑀭𑁂;

𑀥𑀫𑁆𑀫𑀘𑀸𑀭𑀻 𑀲𑀼𑀔𑀁 𑀲𑁂𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

𑁪𑁭𑁭. ‘‘‘𑀅𑀕𑀸𑀭𑀁 𑀯𑀺𑀚𑀳𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀫𑁆𑀳𑀦𑀕𑀸𑀭𑀺𑀬𑀁;

𑀅𑀟𑁆𑀠𑀫𑀸𑀲𑁂 𑀅𑀲𑀫𑁆𑀧𑀢𑁆𑀢𑁂, 𑀘𑀢𑀼𑀲𑀘𑁆𑀘𑀁 𑀨𑀼𑀲𑀺𑀫𑁆𑀳 𑀦𑁄.

𑁪𑁭𑁮. ‘‘‘𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀉𑀧𑀦𑁂𑀦𑁆𑀢𑀺 𑀩𑀳𑀽 𑀅𑀫𑁆𑀳𑁂, 𑀲𑀸𑀕𑀭𑀲𑁆𑀲𑁂𑀯 𑀊𑀫𑀺𑀬𑁄.

𑁪𑁭𑁯. ‘‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀅𑀫𑁆𑀳𑀁 [𑀫𑀬𑁆𑀳𑀁 (𑀲𑁆𑀬𑀸.), 𑀅𑀫𑁆𑀳𑀸𑀓𑀁 (𑀓.)], 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑀻𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫 𑀅𑀦𑀸𑀲𑀯𑀸.

𑁪𑁮𑁦. ‘‘‘𑀲𑁆𑀯𑀸𑀕𑀢𑀁 𑀯𑀢 𑀦𑁄 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁮𑁧. ‘‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’.

𑁪𑁮𑁨. ‘‘𑀏𑀯𑀁 𑀩𑀳𑀼𑀯𑀺𑀥𑀁 𑀤𑀼𑀓𑁆𑀔𑀁, 𑀲𑀫𑁆𑀧𑀢𑁆𑀢𑀻 𑀘 𑀩𑀳𑀼𑀩𑁆𑀩𑀺𑀥𑀸;

𑀯𑀺𑀲𑀼𑀤𑁆𑀥𑀪𑀸𑀯𑀁 𑀲𑀫𑁆𑀧𑀢𑁆𑀢𑀸, 𑀮𑀪𑀸𑀫 𑀲𑀩𑁆𑀩𑀲𑀫𑁆𑀧𑀤𑀸.

𑁪𑁮𑁩. ‘‘𑀬𑀸 𑀤𑀤𑀦𑁆𑀢𑀺 𑀲𑀓𑀢𑁆𑀢𑀸𑀦𑀁, 𑀧𑀼𑀜𑁆𑀜𑀢𑁆𑀣𑀸𑀬 𑀫𑀳𑁂𑀲𑀺𑀦𑁄;

𑀲𑀳𑀸𑀬𑀲𑀫𑁆𑀧𑀤𑀸 𑀳𑁄𑀦𑁆𑀢𑀺, 𑀦𑀺𑀩𑁆𑀩𑀸𑀦𑀧𑀤𑀫𑀲𑀗𑁆𑀔𑀢𑀁.

𑁪𑁮𑁪. ‘‘𑀧𑀭𑀺𑀓𑁆𑀔𑀻𑀡𑀁 𑀅𑀢𑀻𑀢𑀜𑁆𑀘, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀸𑀕𑀢𑀁;

𑀲𑀩𑁆𑀩𑀓𑀫𑁆𑀫𑀫𑁆𑀧𑀺 𑀦𑁄 𑀔𑀻𑀡𑀁, 𑀧𑀸𑀤𑁂 𑀯𑀦𑁆𑀤𑀸𑀫 𑀘𑀓𑁆𑀔𑀼𑀫.

𑁪𑁮𑁫. ‘‘𑀦𑀺𑀩𑁆𑀩𑀸𑀦𑀸𑀬 𑀯𑀤𑀦𑁆𑀢𑀻𑀦𑀁, 𑀓𑀺𑀁 𑀯𑁄 𑀯𑀓𑁆𑀔𑀸𑀫 𑀉𑀢𑁆𑀢𑀭𑀺;

𑀲𑀦𑁆𑀢𑀲𑀗𑁆𑀔𑀢𑀤𑁄𑀲𑀜𑁆𑀳𑀺, 𑀧𑀧𑁆𑀧𑁄𑀣 [𑀲𑀦𑁆𑀢𑀲𑀗𑁆𑀔𑀢𑀤𑁄𑀲𑁄 𑀬𑁄, 𑀧𑀚𑁆𑀚𑁄𑀢𑀁 (𑀲𑁆𑀬𑀸. 𑀧𑀻. 𑀓.)] 𑀅𑀫𑀢𑀁 𑀧𑀤𑀁’’.

𑀇𑀢𑁆𑀣𑀁 𑀲𑀼𑀤𑀁 𑀬𑀲𑁄𑀥𑀭𑀸𑀧𑀫𑀼𑀔𑀸𑀦𑀺 𑀅𑀝𑁆𑀞𑀸𑀭𑀲𑀪𑀺𑀓𑁆𑀔𑀼𑀦𑀻𑀲𑀳𑀲𑁆𑀲𑀸𑀦𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀬𑀲𑁄𑀥𑀭𑀸𑀧𑀫𑀼𑀔𑀅𑀝𑁆𑀞𑀸𑀭𑀲𑀪𑀺𑀓𑁆𑀔𑀼𑀦𑀻𑀲𑀳𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀓𑀼𑀡𑁆𑀟𑀮𑀓𑁂𑀲𑀻𑀯𑀕𑁆𑀕𑁄 𑀢𑀢𑀺𑀬𑁄.