𑁮. 𑀬𑀲𑁄𑀥𑀭𑀸𑀣𑁂𑀭𑀻𑀅𑀧𑀤𑀸𑀦𑀁

𑁩𑁧𑁪. 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀭𑀫𑁆𑀫𑁂, 𑀇𑀤𑁆𑀥𑁂 𑀭𑀸𑀚𑀕𑀳𑁂 𑀧𑀼𑀭𑁂;

𑀧𑀩𑁆𑀪𑀸𑀭𑀫𑁆𑀳𑀺 𑀯𑀭𑁂𑀓𑀫𑁆𑀳𑀺, 𑀯𑀲𑀦𑁆𑀢𑁂 𑀦𑀭𑀦𑀸𑀬𑀓𑁂.

𑁩𑁧𑁫. 𑀯𑀲𑀦𑁆𑀢𑀺𑀬𑀸 𑀢𑀫𑁆𑀳𑀺 𑀦𑀕𑀭𑁂, 𑀭𑀫𑁆𑀫𑁂 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂;

𑀬𑀲𑁄𑀥𑀭𑀸𑀪𑀺𑀓𑁆𑀔𑀼𑀦𑀺𑀬𑀸, 𑀏𑀯𑀁 𑀆𑀲𑀺 𑀯𑀺𑀢𑀓𑁆𑀓𑀺𑀢𑀁.

𑁩𑁧𑁬. ‘‘𑀲𑀼𑀤𑁆𑀥𑁄𑀤𑀦𑁄 𑀫𑀳𑀸𑀭𑀸𑀚𑀸, 𑀕𑁄𑀢𑀫𑀻 𑀘 𑀧𑀚𑀸𑀧𑀢𑀻;

𑀅𑀪𑀺𑀜𑁆𑀜𑀸𑀢𑀸 𑀫𑀳𑀸𑀣𑁂𑀭𑀸, 𑀣𑁂𑀭𑀺𑀬𑁄 𑀘 𑀫𑀳𑀺𑀤𑁆𑀥𑀺𑀓𑀸.

𑁩𑁧𑁭. ‘‘𑀲𑀦𑁆𑀢𑀺𑀁 𑀕𑀢𑀸𑀯 𑀆𑀲𑀼𑀁 𑀢𑁂, 𑀤𑀻𑀧𑀘𑁆𑀘𑀻𑀯 𑀦𑀺𑀭𑀸𑀲𑀯𑀸;

𑀮𑁄𑀓𑀦𑀸𑀣𑁂 𑀥𑀭𑀦𑁆𑀢𑁂𑀯, 𑀅𑀳𑀫𑁆𑀧𑀺 𑀘 𑀲𑀺𑀯𑀁 𑀧𑀤𑀁.

𑁩𑁧𑁮. ‘‘𑀕𑀫𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀧𑀲𑁆𑀲𑀦𑁆𑀢𑀻 𑀆𑀬𑀼𑀫𑀢𑁆𑀢𑀦𑁄;

𑀧𑀲𑁆𑀲𑀺𑀢𑁆𑀯𑀸 𑀆𑀬𑀼𑀲𑀗𑁆𑀔𑀸𑀭𑀁, 𑀢𑀤𑀳𑁂𑀯 𑀔𑀬𑀁 𑀕𑀢𑀁.

𑁩𑁧𑁯. ‘‘𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀓𑀲𑁆𑀲𑀫𑀸;

𑀧𑀼𑀭𑀓𑁆𑀔𑀢𑀸 𑀪𑀺𑀓𑁆𑀔𑀼𑀦𑀻𑀪𑀺, 𑀲𑀢𑁂𑀳𑀺 𑀲𑀳𑀲𑁆𑀲𑁂𑀳𑀺 𑀲𑀸 [𑀲𑀳 𑀧𑀜𑁆𑀘𑀳𑀺 (𑀲𑀻. 𑀧𑀻.)].

𑁩𑁨𑁦. ‘‘𑀫𑀳𑀺𑀤𑁆𑀥𑀺𑀓𑀸 𑀫𑀳𑀸𑀧𑀜𑁆𑀜𑀸, 𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺;

𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀲𑀢𑁆𑀣𑀼𑀦𑁄 𑀘𑀓𑁆𑀓𑀮𑀓𑁆𑀔𑀡𑁂;

𑀦𑀺𑀲𑀺𑀦𑁆𑀦𑀸 𑀏𑀓𑀫𑀦𑁆𑀢𑀫𑁆𑀳𑀺, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁩𑁨𑁧. ‘‘‘𑀅𑀝𑁆𑀞𑀲𑀢𑁆𑀢𑀢𑀺𑀯𑀲𑁆𑀲𑀸𑀳𑀁, 𑀧𑀘𑁆𑀙𑀺𑀫𑁄 𑀯𑀢𑁆𑀢𑀢𑁂 𑀯𑀬𑁄 [𑀧𑀘𑁆𑀙𑀺𑀫𑀸 𑀯𑀢𑁆𑀢𑀬𑀺 𑀯𑀬𑀸 (𑀲𑁆𑀬𑀸.)];

𑀧𑀩𑁆𑀪𑀸𑀭𑀫𑁆𑀳𑀺 𑀅𑀦𑀼𑀧𑁆𑀧𑀢𑁆𑀢𑀸, 𑀆𑀭𑁄𑀘𑁂𑀫𑀺 𑀫𑀳𑀸𑀫𑀼𑀦𑀺.

𑁩𑁨𑁨. ‘‘‘𑀧𑀭𑀺𑀧𑀓𑁆𑀓𑁄 𑀯𑀬𑁄 𑀫𑀬𑁆𑀳𑀁, 𑀧𑀭𑀺𑀢𑁆𑀢𑀁 𑀫𑀫 𑀚𑀻𑀯𑀺𑀢𑀁;

𑀧𑀳𑀸𑀬 𑀯𑁄 𑀕𑀫𑀺𑀲𑁆𑀲𑀸𑀫𑀺, 𑀓𑀢𑀁 𑀫𑁂 𑀲𑀭𑀡𑀫𑀢𑁆𑀢𑀦𑁄.

𑁩𑁨𑁩. ‘‘‘𑀯𑀬𑀫𑁆𑀳𑀺 𑀧𑀘𑁆𑀙𑀺𑀫𑁂 𑀓𑀸𑀮𑁂, 𑀫𑀭𑀡𑀁 𑀉𑀧𑀭𑀼𑀤𑁆𑀥𑀢𑀺;

𑀅𑀚𑁆𑀚𑀭𑀢𑁆𑀢𑀺𑀁 𑀫𑀳𑀸𑀯𑀻𑀭, 𑀧𑀸𑀧𑀼𑀡𑀺𑀲𑁆𑀲𑀸𑀫𑀺 𑀦𑀺𑀩𑁆𑀩𑀼𑀢𑀺𑀁.

𑁩𑁨𑁪. ‘‘‘𑀦𑀢𑁆𑀣𑀺 𑀚𑀸𑀢𑀺 𑀚𑀭𑀸 𑀩𑁆𑀬𑀸𑀥𑀺, 𑀫𑀭𑀡𑀜𑁆𑀘 𑀫𑀳𑀸𑀫𑀼𑀦𑁂;

𑀅𑀚𑀭𑀸𑀫𑀭𑀡𑀁 𑀧𑀼𑀭𑀁, 𑀕𑀫𑀺𑀲𑁆𑀲𑀸𑀫𑀺 𑀅𑀲𑀗𑁆𑀔𑀢𑀁.

𑁩𑁨𑁫. ‘‘‘𑀬𑀸𑀯𑀢𑀸 𑀧𑀭𑀺𑀲𑀸 𑀦𑀸𑀫, 𑀲𑀫𑀼𑀧𑀸𑀲𑀦𑁆𑀢𑀺 𑀲𑀢𑁆𑀣𑀼𑀦𑁄;

𑀅𑀧𑀭𑀸𑀥𑀫𑀚𑀸𑀦𑀦𑁆𑀢𑀻 [𑀲𑀘𑁂 𑀫𑁂𑀢𑁆𑀣𑀺 (𑀲𑀻.), 𑀧𑀚𑀸𑀦𑀦𑁆𑀢𑀻 (𑀓.)], 𑀔𑀫𑀦𑁆𑀢𑀁 𑀲𑀫𑁆𑀫𑀼𑀔𑀸 𑀫𑀼𑀦𑁂.

𑁩𑁨𑁬. ‘‘‘𑀲𑀁𑀲𑀭𑀺𑀢𑁆𑀯𑀸 𑀘 𑀲𑀁𑀲𑀸𑀭𑁂, 𑀔𑀮𑀺𑀢𑀜𑁆𑀘𑁂 𑀫𑀫𑀁 𑀢𑀬𑀺;

𑀆𑀭𑁄𑀘𑁂𑀫𑀺 𑀫𑀳𑀸𑀯𑀻𑀭, 𑀅𑀧𑀭𑀸𑀥𑀁 𑀔𑀫𑀲𑁆𑀲𑀼 𑀫𑁂’.

𑁩𑁨𑁭. ‘‘𑀲𑀼𑀢𑁆𑀯𑀸𑀦 𑀯𑀘𑀦𑀁 𑀢𑀲𑁆𑀲𑀸, 𑀫𑀼𑀦𑀺𑀦𑁆𑀤𑁄 𑀇𑀤𑀫𑀩𑁆𑀭𑀯𑀺;

‘𑀓𑀺𑀫𑀼𑀢𑁆𑀢𑀭𑀁 𑀢𑁂 𑀯𑀓𑁆𑀔𑀸𑀫𑀺, 𑀦𑀺𑀩𑁆𑀩𑀸𑀦𑀸𑀬 𑀯𑀚𑀦𑁆𑀢𑀺𑀬𑀸.

𑁩𑁨𑁮. ‘‘‘𑀇𑀤𑁆𑀥𑀺𑀜𑁆𑀘𑀸𑀧𑀺 𑀦𑀺𑀤𑀲𑁆𑀲𑁂𑀳𑀺, 𑀫𑀫 𑀲𑀸𑀲𑀦𑀓𑀸𑀭𑀺𑀓𑁂;

𑀧𑀭𑀺𑀲𑀸𑀦𑀜𑁆𑀘 𑀲𑀩𑁆𑀩𑀸𑀲𑀁, 𑀓𑀗𑁆𑀔𑀁 𑀙𑀺𑀦𑁆𑀤𑀲𑁆𑀲𑀼 𑀬𑀸𑀯𑀢𑀸’.

𑁩𑁨𑁯. ‘‘𑀲𑀼𑀢𑁆𑀯𑀸 𑀢𑀁 𑀫𑀼𑀦𑀺𑀦𑁄 𑀯𑀸𑀘𑀁, 𑀪𑀺𑀓𑁆𑀔𑀼𑀦𑀻 𑀲𑀸 𑀬𑀲𑁄𑀥𑀭𑀸;

𑀯𑀦𑁆𑀤𑀺𑀢𑁆𑀯𑀸 𑀫𑀼𑀦𑀺𑀭𑀸𑀚𑀁 𑀢𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁩𑁩𑁦. ‘‘‘𑀬𑀲𑁄𑀥𑀭𑀸 𑀅𑀳𑀁 𑀯𑀻𑀭, 𑀅𑀕𑀸𑀭𑁂 𑀢𑁂 𑀧𑀚𑀸𑀧𑀢𑀺;

𑀲𑀸𑀓𑀺𑀬𑀫𑁆𑀳𑀺 𑀓𑀼𑀮𑁂 𑀚𑀸𑀢𑀸, 𑀇𑀢𑁆𑀣𑀺𑀅𑀗𑁆𑀕𑁂 𑀧𑀢𑀺𑀝𑁆𑀞𑀺𑀢𑀸.

𑁩𑁩𑁧. ‘‘‘𑀣𑀻𑀦𑀁 𑀲𑀢𑀲𑀳𑀲𑁆𑀲𑀸𑀦𑀁, 𑀦𑀯𑀼𑀢𑀻𑀦𑀁 𑀙𑀤𑀼𑀢𑁆𑀢𑀭𑀺;

𑀅𑀕𑀸𑀭𑁂 𑀢𑁂 𑀅𑀳𑀁 𑀯𑀻𑀭, 𑀧𑀸𑀫𑁄𑀓𑁆𑀔𑀸 𑀲𑀩𑁆𑀩𑀸 𑀇𑀲𑁆𑀲𑀭𑀸.

𑁩𑁩𑁨. ‘‘‘𑀭𑀽𑀧𑀸𑀘𑀸𑀭𑀕𑀼𑀡𑀽𑀧𑁂𑀢𑀸, 𑀬𑁄𑀩𑁆𑀩𑀦𑀝𑁆𑀞𑀸 𑀧𑀺𑀬𑀁𑀯𑀤𑀸;

𑀲𑀩𑁆𑀩𑀸 𑀫𑀁 𑀅𑀧𑀘𑀸𑀬𑀦𑁆𑀢𑀺, 𑀤𑁂𑀯𑀢𑀸 𑀯𑀺𑀬 𑀫𑀸𑀦𑀼𑀲𑀸.

𑁩𑁩𑁩. ‘‘‘𑀓𑀜𑁆𑀜𑀸𑀲𑀢𑀲𑀳𑀲𑁆𑀲𑀧𑀫𑀼𑀔𑀸, 𑀲𑀓𑁆𑀬𑀧𑀼𑀢𑁆𑀢𑀦𑀺𑀯𑁂𑀲𑀦𑁂;

𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀢𑀸, 𑀤𑁂𑀯𑀢𑀸 𑀯𑀺𑀬 𑀦𑀦𑁆𑀤𑀦𑁂.

𑁩𑁩𑁪. ‘‘‘𑀓𑀸𑀫𑀥𑀸𑀢𑀼𑀫𑀢𑀺𑀓𑁆𑀓𑀫𑁆𑀫 [𑀓𑀸𑀫𑀥𑀸𑀢𑀼𑀫𑀢𑀺𑀓𑁆𑀓𑀦𑁆𑀢𑀸 (𑀲𑀻. 𑀲𑁆𑀬𑀸. 𑀧𑀻. 𑀓.)], 𑀲𑀡𑁆𑀞𑀺𑀢𑀸 𑀭𑀽𑀧𑀥𑀸𑀢𑀼𑀬𑀸;

𑀭𑀽𑀧𑁂𑀦 𑀲𑀤𑀺𑀲𑀸 𑀦𑀢𑁆𑀣𑀺, 𑀞𑀧𑁂𑀢𑁆𑀯𑀸 𑀮𑁄𑀓𑀦𑀸𑀬𑀓𑀁.

𑁩𑁩𑁫. ‘‘‘𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀇𑀤𑁆𑀥𑀺𑀁 𑀤𑀲𑁆𑀲𑁂𑀲𑀺 𑀲𑀢𑁆𑀣𑀼𑀦𑁄;

𑀦𑁂𑀓𑀸 𑀦𑀸𑀦𑀸𑀯𑀺𑀥𑀸𑀓𑀸𑀭𑀸, 𑀫𑀳𑀸𑀇𑀤𑁆𑀥𑀻𑀧𑀺 𑀤𑀲𑁆𑀲𑀬𑀻 [𑀏𑀯𑀫𑀸𑀤𑀻𑀦𑀺 𑀯𑀢𑁆𑀯𑀸𑀦, 𑀉𑀧𑀢𑀺𑀢𑁆𑀯𑀸𑀦 𑀅𑀫𑁆𑀩𑀭𑀁; 𑀇𑀤𑁆𑀥𑀻 𑀅𑀦𑁂𑀓𑀸 𑀤𑀲𑁆𑀲𑁂𑀲𑀺, 𑀩𑀼𑀤𑁆𑀥𑀸𑀦𑀼𑀜𑁆𑀜𑀸 𑀬𑀲𑁄𑀥𑀭𑀸; (𑀲𑀻.)].

𑁩𑁩𑁬. ‘‘‘𑀘𑀓𑁆𑀓𑀯𑀸𑀴𑀲𑀫𑀁 𑀓𑀸𑀬𑀁, 𑀲𑀻𑀲𑀁 𑀉𑀢𑁆𑀢𑀭𑀢𑁄 𑀓𑀼𑀭𑀼;

𑀉𑀪𑁄 𑀧𑀓𑁆𑀔𑀸 𑀤𑀼𑀯𑁂 𑀤𑀻𑀧𑀸, 𑀚𑀫𑁆𑀩𑀼𑀤𑀻𑀧𑀁 𑀲𑀭𑀻𑀭𑀢𑁄.

𑁩𑁩𑁭. ‘‘‘𑀤𑀓𑁆𑀔𑀺𑀡𑀜𑁆𑀘 𑀲𑀭𑀁 𑀧𑀺𑀜𑁆𑀙𑀁, 𑀦𑀸𑀦𑀸𑀲𑀸𑀔𑀸 𑀢𑀼 𑀧𑀢𑁆𑀢𑀓𑀸;

𑀘𑀦𑁆𑀤𑀜𑁆𑀘 𑀲𑀽𑀭𑀺𑀬𑀜𑁆𑀘𑀓𑁆𑀔𑀺, 𑀫𑁂𑀭𑀼𑀧𑀩𑁆𑀩𑀢𑀢𑁄 𑀲𑀺𑀔𑀁.

𑁩𑁩𑁮. ‘‘‘𑀘𑀓𑁆𑀓𑀯𑀸𑀮𑀕𑀺𑀭𑀺𑀁 𑀢𑀼𑀡𑁆𑀟𑀁, 𑀚𑀫𑁆𑀩𑀼𑀭𑀼𑀓𑁆𑀔𑀁 𑀲𑀫𑀽𑀮𑀓𑀁;

𑀩𑀻𑀚𑀫𑀸𑀦𑀸 𑀉𑀧𑀸𑀕𑀦𑁆𑀢𑁆𑀯𑀸, 𑀯𑀦𑁆𑀤𑀦𑁆𑀢𑀻 𑀮𑁄𑀓𑀦𑀸𑀬𑀓𑀁.

𑁩𑁩𑁯. ‘‘‘𑀳𑀢𑁆𑀣𑀺𑀯𑀡𑁆𑀡𑀁 𑀢𑀣𑁂𑀯𑀲𑁆𑀲𑀁, 𑀧𑀩𑁆𑀩𑀢𑀁 𑀚𑀮𑀥𑀺𑀁 𑀢𑀣𑀸;

𑀘𑀦𑁆𑀤𑀺𑀫𑀁 𑀲𑀽𑀭𑀺𑀬𑀁 𑀫𑁂𑀭𑀼𑀁, 𑀲𑀓𑁆𑀓𑀯𑀡𑁆𑀡𑀜𑁆𑀘 𑀤𑀲𑁆𑀲𑀬𑀺.

𑁩𑁪𑁦. ‘‘‘𑀬𑀲𑁄𑀥𑀭𑀸 𑀅𑀳𑀁 𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀘𑀓𑁆𑀔𑀼𑀫;

𑀲𑀳𑀲𑁆𑀲𑀮𑁄𑀓𑀥𑀸𑀢𑀽𑀦𑀁, 𑀨𑀼𑀮𑁆𑀮𑀧𑀤𑁆𑀫𑁂𑀦 𑀙𑀸𑀤𑀬𑀺.

𑁩𑁪𑁧. ‘‘‘𑀩𑁆𑀭𑀳𑁆𑀫𑀯𑀡𑁆𑀡𑀜𑁆𑀘 𑀫𑀸𑀧𑁂𑀢𑁆𑀯𑀸, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀲𑀼𑀜𑁆𑀜𑀢𑀁;

𑀬𑀲𑁄𑀥𑀭𑀸 𑀅𑀳𑀁 𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀘𑀓𑁆𑀔𑀼𑀫.

𑁩𑁪𑁨. ‘‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫𑀺 𑀫𑀳𑀸𑀫𑀼𑀦𑀺.

𑁩𑁪𑁩. ‘‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁩𑁪𑁪. ‘‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑀬𑁆𑀳𑀁 𑀫𑀳𑀸𑀯𑀻𑀭, 𑀉𑀧𑁆𑀧𑀦𑁆𑀦𑀁 𑀢𑀯 𑀲𑀦𑁆𑀢𑀺𑀓𑁂.

𑁩𑁪𑁫. ‘‘‘𑀧𑀼𑀩𑁆𑀩𑀸𑀦𑀁 𑀮𑁄𑀓𑀦𑀸𑀣𑀸𑀦𑀁, 𑀲𑀗𑁆𑀕𑀫𑀁 𑀢𑁂 𑀦𑀺𑀤𑀲𑁆𑀲𑀺𑀢𑀁 [𑀲𑀼𑀤𑀲𑁆𑀲𑀺𑀢𑀁 (𑀲𑁆𑀬𑀸. 𑀧𑀻. 𑀓.)];

𑀅𑀥𑀺𑀓𑀸𑀭𑀁 𑀩𑀳𑀼𑀁 𑀫𑀬𑁆𑀳𑀁, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑁂.

𑁩𑁪𑁬. ‘‘‘𑀬𑀁 𑀫𑀬𑁆𑀳𑀁 𑀧𑀽𑀭𑀺𑀢𑀁 𑀓𑀫𑁆𑀫𑀁, 𑀓𑀼𑀲𑀮𑀁 𑀲𑀭𑀲𑁂 𑀫𑀼𑀦𑁂;

𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀧𑀼𑀜𑁆𑀜𑀁 𑀉𑀧𑀘𑀺𑀢𑀁 𑀫𑀬𑀸.

𑁩𑁪𑁭. ‘‘‘𑀅𑀪𑀩𑁆𑀩𑀝𑁆𑀞𑀸𑀦𑁂 𑀯𑀚𑁆𑀚𑁂𑀢𑁆𑀯𑀸, 𑀯𑀸𑀭𑀬𑀺𑀢𑁆𑀯𑀸 𑀅𑀦𑀸𑀘𑀭𑀁;

𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀲𑀜𑁆𑀘𑀢𑁆𑀢𑀁 𑀚𑀻𑀯𑀺𑀢𑀁 𑀫𑀬𑀸.

𑁩𑁪𑁮. ‘‘‘𑀦𑁂𑀓𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀪𑀭𑀺𑀬𑀢𑁆𑀣𑀸𑀬𑀤𑀸𑀲𑀺 𑀫𑀁;

𑀦 𑀢𑀢𑁆𑀣 𑀯𑀺𑀫𑀦𑀸 𑀳𑁄𑀫𑀺, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑀺.

𑁩𑁪𑁯. ‘‘‘𑀦𑁂𑀓𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀉𑀧𑀓𑀸𑀭𑀸𑀬𑀤𑀸𑀲𑀺 𑀫𑀁;

𑀦 𑀢𑀢𑁆𑀣 𑀯𑀺𑀫𑀦𑀸 𑀳𑁄𑀫𑀺, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑀺.

𑁩𑁫𑁦. ‘‘‘𑀦𑁂𑀓𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀪𑁄𑀚𑀦𑀢𑁆𑀣𑀸𑀬𑀤𑀸𑀲𑀺 𑀫𑀁;

𑀦 𑀢𑀢𑁆𑀣 𑀯𑀺𑀫𑀦𑀸 𑀳𑁄𑀫𑀺, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑀺.

𑁩𑁫𑁧. ‘‘‘𑀦𑁂𑀓𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀚𑀻𑀯𑀺𑀢𑀸𑀦𑀺 𑀧𑀭𑀺𑀘𑁆𑀘𑀚𑀺𑀁;

𑀪𑀬𑀫𑁄𑀓𑁆𑀔𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀤𑀤𑀸𑀫𑀺 𑀫𑀫 𑀚𑀻𑀯𑀺𑀢𑀁.

𑁩𑁫𑁨. ‘‘‘𑀅𑀗𑁆𑀕𑀕𑀢𑁂 [𑀅𑀗𑁆𑀕𑁂 𑀏𑀯𑀁 (𑀓.)] 𑀅𑀮𑀗𑁆𑀓𑀸𑀭𑁂, 𑀯𑀢𑁆𑀣𑁂 𑀦𑀸𑀦𑀸𑀯𑀺𑀥𑁂 𑀩𑀳𑀽;

𑀇𑀢𑁆𑀣𑀺𑀫𑀡𑁆𑀟𑁂 𑀦 𑀕𑀽𑀳𑀸𑀫𑀺, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑀺.

𑁩𑁫𑁩. ‘‘‘𑀥𑀦𑀥𑀜𑁆𑀜𑀧𑀭𑀺𑀘𑁆𑀘𑀸𑀕𑀁, 𑀕𑀸𑀫𑀸𑀦𑀺 𑀦𑀺𑀕𑀫𑀸𑀦𑀺 𑀘;

𑀔𑁂𑀢𑁆𑀢𑀁 𑀧𑀼𑀢𑁆𑀢𑀸 𑀘 𑀥𑀻𑀢𑀸 𑀘, 𑀧𑀭𑀺𑀘𑁆𑀘𑀢𑁆𑀢𑀸 𑀫𑀳𑀸𑀫𑀼𑀦𑀺.

𑁩𑁫𑁪. ‘‘‘𑀳𑀢𑁆𑀣𑀻 𑀅𑀲𑁆𑀲𑀸 𑀕𑀯𑀸 𑀘𑀸𑀧𑀺, 𑀤𑀸𑀲𑀺𑀬𑁄 𑀧𑀭𑀺𑀘𑀸𑀭𑀺𑀓𑀸;

𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀧𑀭𑀺𑀘𑁆𑀘𑀢𑁆𑀢𑀸 𑀅𑀲𑀗𑁆𑀔𑀺𑀬𑀸.

𑁩𑁫𑁫. ‘‘‘𑀬𑀁 𑀫𑀬𑁆𑀳𑀁 𑀧𑀝𑀺𑀫𑀦𑁆𑀢𑁂𑀲𑀺 [𑀧𑀢𑀺𑀫𑀦𑁆𑀢𑁂𑀲𑀺 (𑀲𑀻.)], 𑀤𑀸𑀦𑀁 𑀤𑀲𑁆𑀲𑀸𑀫𑀺 𑀬𑀸𑀘𑀓𑁂;

𑀯𑀺𑀫𑀦𑀁 𑀫𑁂 𑀦 𑀧𑀲𑁆𑀲𑀸𑀫𑀺, 𑀤𑀤𑀢𑁄 𑀤𑀸𑀦𑀫𑀼𑀢𑁆𑀢𑀫𑀁.

𑁩𑁫𑁬. ‘‘‘𑀦𑀸𑀦𑀸𑀯𑀺𑀥𑀁 𑀩𑀳𑀼𑀁 𑀤𑀼𑀓𑁆𑀔𑀁, 𑀲𑀁𑀲𑀸𑀭𑁂 𑀘 𑀩𑀳𑀼𑀩𑁆𑀩𑀺𑀥𑁂;

𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀅𑀦𑀼𑀪𑀼𑀢𑁆𑀢𑀁 𑀅𑀲𑀗𑁆𑀔𑀺𑀬𑀁.

𑁩𑁫𑁭. ‘‘‘𑀲𑀼𑀔𑀧𑁆𑀧𑀢𑁆𑀢𑀸𑀦𑀼𑀫𑁄𑀤𑀸𑀫𑀺, 𑀦 𑀘 𑀤𑀼𑀓𑁆𑀔𑁂𑀲𑀼 𑀤𑀼𑀫𑁆𑀫𑀦𑀸;

𑀲𑀩𑁆𑀩𑀢𑁆𑀣 𑀢𑀼𑀮𑀺𑀢𑀸 𑀳𑁄𑀫𑀺, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑀺.

𑁩𑁫𑁮. ‘‘‘𑀅𑀦𑀼𑀫𑀕𑁆𑀕𑁂𑀦 𑀲𑀫𑁆𑀩𑀼𑀤𑁆𑀥𑁄, 𑀬𑀁 𑀥𑀫𑁆𑀫𑀁 𑀅𑀪𑀺𑀦𑀻𑀳𑀭𑀺;

𑀅𑀦𑀼𑀪𑁄𑀢𑁆𑀯𑀸 𑀲𑀼𑀔𑀁 𑀤𑀼𑀓𑁆𑀔𑀁, 𑀧𑀢𑁆𑀢𑁄 𑀩𑁄𑀥𑀺𑀁 𑀫𑀳𑀸𑀫𑀼𑀦𑀺.

𑁩𑁫𑁯. ‘‘‘𑀩𑁆𑀭𑀳𑁆𑀫𑀤𑁂𑀯𑀜𑁆𑀘 𑀲𑀫𑁆𑀩𑀼𑀤𑁆𑀥𑀁, 𑀕𑁄𑀢𑀫𑀁 𑀮𑁄𑀓𑀦𑀸𑀬𑀓𑀁;

𑀅𑀜𑁆𑀜𑁂𑀲𑀁 𑀮𑁄𑀓𑀦𑀸𑀣𑀸𑀦𑀁, 𑀲𑀗𑁆𑀕𑀫𑀁 𑀢𑁂 𑀩𑀳𑀼𑀁 𑀫𑀬𑀸.

𑁩𑁬𑁦. ‘‘‘𑀅𑀥𑀺𑀓𑀸𑀭𑀁 𑀩𑀳𑀼𑀁 𑀫𑀬𑁆𑀳𑀁, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑀺;

𑀕𑀯𑁂𑀲𑀢𑁄 𑀩𑀼𑀤𑁆𑀥𑀥𑀫𑁆𑀫𑁂, 𑀅𑀳𑀁 𑀢𑁂 𑀧𑀭𑀺𑀘𑀸𑀭𑀺𑀓𑀸.

𑁩𑁬𑁧. ‘‘‘𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑀺𑀬𑁂;

𑀤𑀻𑀧𑀗𑁆𑀓𑀭𑁄 𑀫𑀳𑀸𑀯𑀻𑀭𑁄, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄.

𑁩𑁬𑁨. ‘‘‘𑀧𑀘𑁆𑀘𑀦𑁆𑀢𑀤𑁂𑀲𑀯𑀺𑀲𑀬𑁂, 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁;

𑀢𑀲𑁆𑀲 𑀆𑀕𑀫𑀦𑀁 𑀫𑀕𑁆𑀕𑀁, 𑀲𑁄𑀥𑁂𑀦𑁆𑀢𑀺 𑀢𑀼𑀝𑁆𑀞𑀫𑀸𑀦𑀲𑀸.

𑁩𑁬𑁩. ‘‘‘𑀢𑁂𑀦 𑀓𑀸𑀮𑁂𑀦 𑀲𑁄 𑀆𑀲𑀺, 𑀲𑀼𑀫𑁂𑀥𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀫𑀕𑁆𑀕𑀜𑁆𑀘 𑀧𑀝𑀺𑀬𑀸𑀤𑁂𑀲𑀺, 𑀆𑀬𑀢𑁄 [𑀆𑀬𑀢𑀁 (𑀲𑀻.)] 𑀲𑀩𑁆𑀩𑀤𑀲𑁆𑀲𑀺𑀦𑁄.

𑁩𑁬𑁪. ‘‘‘𑀢𑁂𑀦 𑀓𑀸𑀮𑁂𑀦𑀳𑀁 𑀆𑀲𑀺𑀁, 𑀓𑀜𑁆𑀜𑀸 𑀩𑁆𑀭𑀸𑀳𑁆𑀫𑀡𑀲𑀫𑁆𑀪𑀯𑀸;

𑀲𑀼𑀫𑀺𑀢𑁆𑀢𑀸𑀦𑀸𑀫 𑀦𑀸𑀫𑁂𑀦, 𑀉𑀧𑀕𑀘𑁆𑀙𑀺𑀁 𑀲𑀫𑀸𑀕𑀫𑀁.

𑁩𑁬𑁫. ‘‘‘𑀅𑀝𑁆𑀞 𑀉𑀧𑁆𑀧𑀮𑀳𑀢𑁆𑀣𑀸𑀦𑀺, 𑀧𑀽𑀚𑀦𑀢𑁆𑀣𑀸𑀬 𑀲𑀢𑁆𑀣𑀼𑀦𑁄;

𑀆𑀤𑀸𑀬 𑀚𑀦𑀲𑀁𑀫𑀚𑁆𑀛𑁂, 𑀅𑀤𑁆𑀤𑀲𑀁 𑀇𑀲𑀺 𑀫𑀼𑀕𑁆𑀕𑀢𑀁.

𑁩𑁬𑁬. ‘‘‘𑀘𑀺𑀭𑀸𑀦𑀼𑀕𑀢𑀁 𑀤𑀬𑀺𑀢𑀁 [𑀘𑀺𑀭𑀸𑀦𑀼𑀧𑀭𑀺 𑀆𑀲𑀻𑀦𑀁 (𑀲𑀻.)], 𑀅𑀢𑀺𑀓𑁆𑀓𑀦𑁆𑀢𑀁 𑀫𑀦𑁄𑀳𑀭𑀁;

𑀤𑀺𑀲𑁆𑀯𑀸 𑀢𑀤𑀸 𑀅𑀫𑀜𑁆𑀜𑀺𑀲𑁆𑀲𑀁, 𑀲𑀨𑀮𑀁 𑀚𑀻𑀯𑀺𑀢𑀁 𑀫𑀫.

𑁩𑁬𑁭. ‘‘‘𑀧𑀭𑀓𑁆𑀓𑀫𑀁 𑀢𑀁 𑀲𑀨𑀮𑀁, 𑀅𑀤𑁆𑀤𑀲𑀁 𑀇𑀲𑀺𑀦𑁄 𑀢𑀤𑀸;

𑀧𑀼𑀩𑁆𑀩𑀓𑀫𑁆𑀫𑁂𑀦 𑀲𑀫𑁆𑀩𑀼𑀤𑁆𑀥𑁂, 𑀘𑀺𑀢𑁆𑀢𑀜𑁆𑀘𑀸𑀧𑀺 𑀧𑀲𑀻𑀤𑀺 𑀫𑁂.

𑁩𑁬𑁮. ‘‘‘𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺𑀁, 𑀇𑀲𑁂 𑀉𑀕𑁆𑀕𑀢𑀫𑀸𑀦𑀲𑁂;

𑀤𑁂𑀬𑁆𑀬𑀁 𑀅𑀜𑁆𑀜𑀁 𑀦 𑀧𑀲𑁆𑀲𑀸𑀫𑀺, 𑀤𑁂𑀫𑀺 𑀧𑀼𑀧𑁆𑀨𑀸𑀦𑀺 𑀢𑁂 𑀇𑀲𑀺.

𑁩𑁬𑁯. ‘‘‘𑀧𑀜𑁆𑀘𑀳𑀢𑁆𑀣𑀸 𑀢𑀯 𑀳𑁄𑀦𑁆𑀢𑀼, 𑀢𑀬𑁄 𑀳𑁄𑀦𑁆𑀢𑀼 𑀫𑀫𑀁 𑀇𑀲𑁂;

𑀢𑁂𑀦 𑀲𑀤𑁆𑀥𑀺𑀁 𑀲𑀫𑀸 𑀳𑁄𑀦𑁆𑀢𑀼, 𑀩𑁄𑀥𑀢𑁆𑀣𑀸𑀬 𑀢𑀯𑀁 𑀇𑀲𑁂’.

𑀘𑀢𑀼𑀢𑁆𑀣𑀁 𑀪𑀸𑀡𑀯𑀸𑀭𑀁.

𑁩𑁭𑁦. ‘‘𑀇𑀲𑀺 𑀕𑀳𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺, 𑀆𑀕𑀘𑁆𑀙𑀦𑁆𑀢𑀁 𑀫𑀳𑀸𑀬𑀲𑀁;

𑀧𑀽𑀚𑁂𑀲𑀺 𑀚𑀦𑀲𑀁𑀫𑀚𑁆𑀛𑁂, 𑀩𑁄𑀥𑀢𑁆𑀣𑀸𑀬 𑀫𑀳𑀸𑀇𑀲𑀺.

𑁩𑁭𑁧. ‘‘𑀧𑀲𑁆𑀲𑀺𑀢𑁆𑀯𑀸 𑀚𑀦𑀲𑀁𑀫𑀚𑁆𑀛𑁂, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺;

𑀯𑀺𑀬𑀸𑀓𑀸𑀲𑀺 𑀫𑀳𑀸𑀯𑀻𑀭𑁄, 𑀇𑀲𑀺 𑀫𑀼𑀕𑁆𑀕𑀢𑀫𑀸𑀦𑀲𑀁.

𑁩𑁭𑁨. ‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺;

𑀫𑀫 𑀓𑀫𑁆𑀫𑀁 𑀯𑀺𑀬𑀸𑀓𑀸𑀲𑀺, 𑀉𑀚𑀼𑀪𑀸𑀯𑀁 𑀫𑀳𑀸𑀫𑀼𑀦𑀺.

𑁩𑁭𑁩. ‘‘‘𑀲𑀫𑀘𑀺𑀢𑁆𑀢𑀸 𑀲𑀫𑀓𑀫𑁆𑀫𑀸, 𑀲𑀫𑀓𑀸𑀭𑀻 𑀪𑀯𑀺𑀲𑁆𑀲𑀢𑀺;

𑀧𑀺𑀬𑀸 𑀳𑁂𑀲𑁆𑀲𑀢𑀺 𑀓𑀫𑁆𑀫𑁂𑀦, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀇𑀲𑀺 [𑀫𑀳𑀸𑀇𑀲𑁂 (𑀲𑁆𑀬𑀸.)].

𑁩𑁭𑁪. ‘‘‘𑀲𑀼𑀤𑀲𑁆𑀲𑀦𑀸 𑀲𑀼𑀧𑀺𑀬𑀸 𑀘, 𑀫𑀦𑀸𑀧𑀸 𑀧𑀺𑀬𑀯𑀸𑀤𑀺𑀦𑀻;

𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀯𑀺𑀳𑀭𑀺𑀲𑁆𑀲𑀢𑀺 𑀇𑀤𑁆𑀥𑀺𑀓𑀸.

𑁩𑁭𑁫. ‘‘‘𑀬𑀣𑀸𑀧𑀺 𑀪𑀡𑁆𑀟𑀲𑀸𑀫𑀼𑀕𑁆𑀕𑀁, 𑀅𑀦𑀼𑀭𑀓𑁆𑀔𑀢𑀺 𑀲𑀸𑀫𑀺𑀦𑁄;

𑀏𑀯𑀁 𑀓𑀼𑀲𑀮𑀥𑀫𑁆𑀫𑀸𑀦𑀁, 𑀅𑀦𑀼𑀭𑀓𑁆𑀔𑀺𑀲𑁆𑀲𑀢𑁂 𑀅𑀬𑀁.

𑁩𑁭𑁬. ‘‘‘𑀢𑀲𑁆𑀲 𑀢𑁂 [𑀢𑀲𑁆𑀲 𑀢𑀁 (𑀲𑁆𑀬𑀸.)] 𑀅𑀦𑀼𑀓𑀫𑁆𑀧𑀦𑁆𑀢𑀻, 𑀧𑀽𑀭𑀬𑀺𑀲𑁆𑀲𑀢𑀺 𑀧𑀸𑀭𑀫𑀻;

𑀲𑀻𑀳𑁄𑀯 𑀧𑀜𑁆𑀚𑀭𑀁 𑀪𑁂𑀢𑁆𑀯𑀸 [𑀳𑀺𑀢𑁆𑀯𑀸 (𑀲𑁆𑀬𑀸.), 𑀳𑁂𑀢𑁆𑀯𑀸 (𑀧𑀻.)], 𑀧𑀸𑀧𑀼𑀡𑀺𑀲𑁆𑀲𑀢𑀺 𑀩𑁄𑀥𑀺𑀬𑀁’.

𑁩𑁭𑁭. ‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀫𑀁 𑀩𑀼𑀤𑁆𑀥𑁄 𑀯𑀺𑀬𑀸𑀓𑀭𑀻;

𑀢𑀁 𑀯𑀸𑀘𑀁 𑀅𑀦𑀼𑀫𑁄𑀤𑁂𑀦𑁆𑀢𑀻, 𑀏𑀯𑀁𑀓𑀸𑀭𑀻 𑀪𑀯𑀺𑀁 𑀅𑀳𑀁.

𑁩𑁭𑁮. ‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀲𑀼𑀓𑀢𑀲𑁆𑀲, 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀤𑁂𑀯𑀫𑀦𑀼𑀲𑁆𑀲𑀓𑀁 𑀬𑁄𑀦𑀺𑀁, 𑀅𑀦𑀼𑀪𑁄𑀢𑁆𑀯𑀸 𑀅𑀲𑀗𑁆𑀔𑀺𑀬𑀁.

𑁩𑁭𑁯. ‘‘𑀲𑀼𑀔𑀤𑀼𑀓𑁆𑀔𑁂𑀦𑀼𑀪𑁄𑀢𑁆𑀯𑀸𑀳𑀁, 𑀤𑁂𑀯𑁂𑀲𑀼 𑀫𑀸𑀦𑀼𑀲𑁂𑀲𑀼 𑀘;

𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀅𑀚𑀸𑀬𑀺𑀁 𑀲𑀸𑀓𑀺𑀬𑁂 𑀓𑀼𑀮𑁂.

𑁩𑁮𑁦. ‘‘𑀭𑀽𑀧𑀯𑀢𑀻 𑀪𑁄𑀕𑀯𑀢𑀻, 𑀬𑀲𑀲𑀻𑀮𑀯𑀢𑀻 𑀢𑀢𑁄;

𑀲𑀩𑁆𑀩𑀗𑁆𑀕𑀲𑀫𑁆𑀧𑀤𑀸 𑀳𑁄𑀫𑀺, 𑀓𑀼𑀮𑁂𑀲𑀼 𑀅𑀪𑀺𑀲𑀓𑁆𑀓𑀢𑀸.

𑁩𑁮𑁧. ‘‘𑀮𑀸𑀪𑀁 𑀲𑀺𑀮𑁄𑀓𑀁 𑀲𑀓𑁆𑀓𑀸𑀭𑀁, 𑀮𑁄𑀓𑀥𑀫𑁆𑀫𑀲𑀫𑀸𑀕𑀫𑀁;

𑀘𑀺𑀢𑁆𑀢𑀜𑁆𑀘 𑀤𑀼𑀓𑁆𑀔𑀺𑀢𑀁 𑀦𑀢𑁆𑀣𑀺, 𑀯𑀲𑀸𑀫𑀺 𑀅𑀓𑀼𑀢𑁄𑀪𑀬𑀸.

𑁩𑁮𑁨. ‘‘𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑁂 𑀢𑀤𑀸;

𑀔𑀢𑁆𑀢𑀺𑀬𑀸𑀦𑀁 𑀧𑀼𑀭𑁂 𑀯𑀻𑀭, 𑀉𑀧𑀓𑀸𑀭𑀜𑁆𑀘 𑀦𑀺𑀤𑁆𑀤𑀺𑀲𑀺.

𑁩𑁮𑁩. ‘‘𑀉𑀧𑀓𑀸𑀭𑀸 𑀘 𑀬𑀸 𑀦𑀸𑀭𑀻, 𑀬𑀸 𑀘 𑀦𑀸𑀭𑀻 𑀲𑀼𑀔𑁂 𑀤𑀼𑀔𑁂;

𑀅𑀢𑁆𑀣𑀓𑁆𑀔𑀸𑀬𑀻 𑀘 𑀬𑀸 𑀦𑀸𑀭𑀻, 𑀬𑀸 𑀘 𑀦𑀸𑀭𑀻𑀦𑀼𑀓𑀫𑁆𑀧𑀺𑀓𑀸.

𑁩𑁮𑁪. ‘‘𑀧𑀜𑁆𑀘𑀓𑁄𑀝𑀺𑀲𑀢𑀸 𑀩𑀼𑀤𑁆𑀥𑀸, 𑀦𑀯𑀓𑁄𑀝𑀺𑀲𑀢𑀸𑀦𑀺 𑀘;

𑀏𑀢𑁂𑀲𑀁 𑀤𑁂𑀯𑀤𑁂𑀯𑀸𑀦𑀁, 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺𑀁.

𑁩𑁮𑁫. ‘‘𑀅𑀥𑀺𑀓𑀸𑀭𑀁 𑀫𑀳𑀸 [𑀲𑀤𑀸 (𑀧𑀻.) 𑀏𑀯𑀫𑀼𑀧𑀭𑀺𑀧𑀺] 𑀫𑀬𑁆𑀳𑀁, 𑀥𑀫𑁆𑀫𑀭𑀸𑀚 𑀲𑀼𑀡𑁄𑀳𑀺 𑀫𑁂;

𑀏𑀓𑀸𑀤𑀲𑀓𑁄𑀝𑀺𑀲𑀢𑀸, 𑀩𑀼𑀤𑁆𑀥𑀸 𑀤𑁆𑀯𑀸𑀤𑀲 𑀓𑁄𑀝𑀺𑀬𑁄 [𑀳𑁄𑀦𑁆𑀢𑀺 𑀮𑁄𑀓𑀕𑁆𑀕𑀦𑀸𑀬𑀓𑀸 (𑀲𑀻. 𑀲𑁆𑀬𑀸.), 𑀧𑀡𑁆𑀡𑀸𑀓𑁄𑀝𑀺𑀲𑀢𑀸𑀦𑀺 𑀘 (𑀧𑀻.)].

𑁩𑁮𑁬. ‘‘𑀏𑀢𑁂𑀲𑀁 𑀤𑁂𑀯𑀤𑁂𑀯𑀸𑀦𑀁, 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑀬𑀺𑀁;

𑀅𑀥𑀺𑀓𑀸𑀭𑀁 𑀫𑀳𑀸 𑀫𑀬𑁆𑀳𑀁, 𑀥𑀫𑁆𑀫𑀭𑀸𑀚 𑀲𑀼𑀡𑁄𑀳𑀺 𑀫𑁂.

𑁩𑁮𑁭. ‘‘‘𑀯𑀻𑀲𑀓𑁄𑀝𑀺𑀲𑀢𑀸 𑀩𑀼𑀤𑁆𑀥𑀸, 𑀢𑀺𑀁𑀲𑀓𑁄𑀝𑀺𑀲𑀢𑀸𑀦𑀺 𑀘;