𑁭. 𑀪𑀤𑁆𑀤𑀓𑀸𑀧𑀺𑀮𑀸𑀦𑀻𑀣𑁂𑀭𑀻𑀅𑀧𑀤𑀸𑀦𑀁

𑁨𑁪𑁪. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽 [𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸 (𑀲𑀻. 𑀧𑀻.)];

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

𑁨𑁪𑁫. ‘‘𑀢𑀤𑀸𑀳𑀼 𑀳𑀁𑀲𑀯𑀢𑀺𑀬𑀁, 𑀯𑀺𑀤𑁂𑀳𑁄 𑀦𑀸𑀫 𑀦𑀸𑀫𑀢𑁄 [𑀦𑀸𑀫𑀓𑁄 (𑀲𑁆𑀬𑀸. 𑀧𑀻.)];

𑀲𑁂𑀝𑁆𑀞𑀻 𑀧𑀳𑀽𑀢𑀭𑀢𑀦𑁄, 𑀢𑀲𑁆𑀲 𑀚𑀸𑀬𑀸 𑀅𑀳𑁄𑀲𑀳𑀁.

𑁨𑁪𑁬. ‘‘𑀓𑀤𑀸𑀘𑀺 𑀲𑁄 𑀦𑀭𑀸𑀤𑀺𑀘𑁆𑀘𑀁, 𑀉𑀧𑁂𑀘𑁆𑀘 𑀲𑀧𑀭𑀺𑀚𑁆𑀚𑀦𑁄;

𑀥𑀫𑁆𑀫𑀫𑀲𑁆𑀲𑁄𑀲𑀺 𑀩𑀼𑀤𑁆𑀥𑀲𑁆𑀲, 𑀲𑀩𑁆𑀩𑀤𑀼𑀓𑁆𑀔𑀪𑀬𑀧𑁆𑀧𑀳𑀁 [𑀤𑀼𑀓𑁆𑀔𑀓𑁆𑀔𑀬𑀸𑀯𑀳𑀁 (𑀲𑁆𑀬𑀸.)].

𑁨𑁪𑁭. ‘‘𑀲𑀸𑀯𑀓𑀁 𑀥𑀼𑀢𑀯𑀸𑀤𑀸𑀦𑀁, 𑀅𑀕𑁆𑀕𑀁 𑀓𑀺𑀢𑁆𑀢𑁂𑀲𑀺 𑀦𑀸𑀬𑀓𑁄;

𑀲𑀼𑀢𑁆𑀯𑀸 𑀲𑀢𑁆𑀢𑀸𑀳𑀺𑀓𑀁 𑀤𑀸𑀦𑀁, 𑀤𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀢𑀸𑀤𑀺𑀦𑁄.

𑁨𑁪𑁮. ‘‘𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁;

𑀲 𑀳𑀸𑀲𑀬𑀦𑁆𑀢𑁄 𑀧𑀭𑀺𑀲𑀁, 𑀢𑀤𑀸 𑀳𑀺 𑀦𑀭𑀧𑀼𑀗𑁆𑀕𑀯𑁄.

𑁨𑁪𑁯. ‘‘𑀲𑁂𑀝𑁆𑀞𑀺𑀦𑁄 𑀅𑀦𑀼𑀓𑀫𑁆𑀧𑀸𑀬, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣;

‘𑀮𑀘𑁆𑀙𑀲𑁂 𑀧𑀢𑁆𑀣𑀺𑀢𑀁 𑀞𑀸𑀦𑀁, 𑀦𑀺𑀩𑁆𑀩𑀼𑀢𑁄 𑀳𑁄𑀳𑀺 𑀧𑀼𑀢𑁆𑀢𑀓.

𑁨𑁫𑁦. ‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁨𑁫𑁧. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁨𑁫𑁨. ‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑁄 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀫𑁂𑀢𑁆𑀢𑀘𑀺𑀢𑁆𑀢𑁄 𑀧𑀭𑀺𑀘𑀭𑀺, 𑀧𑀘𑁆𑀘𑀬𑁂𑀳𑀺 𑀯𑀺𑀦𑀸𑀬𑀓𑀁.

𑁨𑁫𑁩. ‘‘𑀲𑀸𑀲𑀦𑀁 𑀚𑁄𑀢𑀬𑀺𑀢𑁆𑀯𑀸𑀦, 𑀲𑁄 𑀫𑀤𑁆𑀤𑀺𑀢𑁆𑀯𑀸 𑀓𑀼𑀢𑀺𑀢𑁆𑀣𑀺𑀬𑁂;

𑀯𑁂𑀦𑁂𑀬𑁆𑀬𑀁 𑀯𑀺𑀦𑀬𑀺𑀢𑁆𑀯𑀸 𑀘, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁫𑁪. ‘‘𑀦𑀺𑀩𑁆𑀩𑀼𑀢𑁂 𑀢𑀫𑁆𑀳𑀺 𑀮𑁄𑀓𑀕𑁆𑀕𑁂, 𑀧𑀽𑀚𑀦𑀢𑁆𑀣𑀸𑀬 𑀲𑀢𑁆𑀣𑀼𑀦𑁄;

𑀜𑀸𑀢𑀺𑀫𑀺𑀢𑁆𑀢𑁂 𑀲𑀫𑀸𑀦𑁂𑀢𑁆𑀯𑀸, 𑀲𑀳 𑀢𑁂𑀳𑀺 𑀅𑀓𑀸𑀭𑀬𑀺.

𑁨𑁫𑁫. ‘‘𑀲𑀢𑁆𑀢𑀬𑁄𑀚𑀦𑀺𑀓𑀁 𑀣𑀽𑀧𑀁, 𑀉𑀩𑁆𑀩𑀺𑀤𑁆𑀥𑀁 𑀭𑀢𑀦𑀸𑀫𑀬𑀁;

𑀚𑀮𑀦𑁆𑀢𑀁 𑀲𑀢𑀭𑀁𑀲𑀺𑀁𑀯, 𑀲𑀸𑀮𑀭𑀸𑀚𑀁𑀯 𑀨𑀼𑀮𑁆𑀮𑀺𑀢𑀁.

𑁨𑁫𑁬. ‘‘𑀲𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀺, 𑀧𑀸𑀢𑀺𑀬𑁄 [𑀘𑀸𑀢𑀺𑀬𑁄 (𑀲𑁆𑀬𑀸.)] 𑀢𑀢𑁆𑀣 𑀓𑀸𑀭𑀬𑀺;

𑀦𑀴𑀕𑁆𑀕𑀻 𑀯𑀺𑀬 𑀚𑁄𑀢𑀦𑁆𑀢𑀻 [𑀚𑁄𑀢𑀦𑁆𑀢𑁂 (𑀲𑁆𑀬𑀸. 𑀧𑀻.)], 𑀭𑀢𑀦𑁂𑀳𑁂𑀯 𑀲𑀢𑁆𑀢𑀳𑀺.

𑁨𑁫𑁭. ‘‘𑀕𑀦𑁆𑀥𑀢𑁂𑀮𑁂𑀦 𑀧𑀽𑀭𑁂𑀢𑁆𑀯𑀸, 𑀤𑀻𑀧𑀸𑀦𑀼𑀚𑁆𑀚𑀮𑀬𑀻 𑀢𑀳𑀺𑀁;

𑀧𑀽𑀚𑀦𑀢𑁆𑀣𑀸𑀬 [𑀧𑀽𑀚𑀢𑁆𑀣𑀸𑀬 (𑀲𑀻. 𑀓.)] 𑀫𑀳𑁂𑀲𑀺𑀲𑁆𑀲, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀺𑀦𑁄.

𑁨𑁫𑁮. ‘‘𑀲𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀺, 𑀧𑀼𑀡𑁆𑀡𑀓𑀼𑀫𑁆𑀪𑀸𑀦𑀺 𑀓𑀸𑀭𑀬𑀺;

𑀭𑀢𑀦𑁂𑀳𑁂𑀯 𑀧𑀼𑀡𑁆𑀡𑀸𑀦𑀺, 𑀧𑀽𑀚𑀦𑀢𑁆𑀣𑀸𑀬 𑀫𑀳𑁂𑀲𑀺𑀦𑁄.

𑁨𑁫𑁯. ‘‘𑀫𑀚𑁆𑀛𑁂 𑀅𑀝𑁆𑀞𑀝𑁆𑀞𑀓𑀼𑀫𑁆𑀪𑀻𑀦𑀁, 𑀉𑀲𑁆𑀲𑀺𑀢𑀸 𑀓𑀜𑁆𑀘𑀦𑀕𑁆𑀖𑀺𑀬𑁄;

𑀅𑀢𑀺𑀭𑁄𑀘𑀦𑁆𑀢𑀺 𑀯𑀡𑁆𑀡𑁂𑀦, 𑀲𑀭𑀤𑁂𑀯 𑀤𑀺𑀯𑀸𑀓𑀭𑁄.

𑁨𑁬𑁦. ‘‘𑀘𑀢𑀼𑀤𑁆𑀯𑀸𑀭𑁂𑀲𑀼 𑀲𑁄𑀪𑀦𑁆𑀢𑀺, 𑀢𑁄𑀭𑀡𑀸 𑀭𑀢𑀦𑀸𑀫𑀬𑀸;

𑀉𑀲𑁆𑀲𑀺𑀢𑀸 𑀨𑀮𑀓𑀸 𑀭𑀫𑁆𑀫𑀸, 𑀲𑁄𑀪𑀦𑁆𑀢𑀺 𑀭𑀢𑀦𑀸𑀫𑀬𑀸.

𑁨𑁬𑁧. ‘‘𑀯𑀺𑀭𑁄𑀘𑀦𑁆𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 [𑀧𑀭𑀺𑀓𑁆𑀔𑀸𑀬𑁄 (𑀲𑁆𑀬𑀸.)], 𑀅𑀯𑀝𑀁𑀲𑀸 𑀲𑀼𑀦𑀺𑀫𑁆𑀫𑀺𑀢𑀸;

𑀉𑀲𑁆𑀲𑀺𑀢𑀸𑀦𑀺 𑀧𑀝𑀸𑀓𑀸𑀦𑀺, 𑀭𑀢𑀦𑀸𑀦𑀺 𑀯𑀺𑀭𑁄𑀘𑀭𑁂.

𑁨𑁬𑁨. ‘‘𑀲𑀼𑀭𑀢𑁆𑀢𑀁 𑀲𑀼𑀓𑀢𑀁 𑀘𑀺𑀢𑁆𑀢𑀁, 𑀘𑁂𑀢𑀺𑀬𑀁 𑀭𑀢𑀦𑀸𑀫𑀬𑀁;

𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦, 𑀲𑀲𑀜𑁆𑀛𑁄𑀯 [𑀲𑀲𑀚𑁆𑀛𑀸𑀯 (𑀲𑁆𑀬𑀸. 𑀓.), 𑀲𑀲𑀜𑁆𑀚𑀸𑀯 (𑀧𑀻.)] 𑀤𑀺𑀯𑀸𑀓𑀭𑁄.

𑁨𑁬𑁩. ‘‘𑀣𑀽𑀧𑀲𑁆𑀲 𑀯𑁂𑀤𑀺𑀬𑁄 𑀢𑀺𑀲𑁆𑀲𑁄, 𑀳𑀭𑀺𑀢𑀸𑀮𑁂𑀦 𑀧𑀽𑀭𑀬𑀺;

𑀏𑀓𑀁 𑀫𑀦𑁄𑀲𑀺𑀮𑀸𑀬𑁂𑀓𑀁, 𑀅𑀜𑁆𑀚𑀦𑁂𑀦 𑀘 𑀏𑀓𑀺𑀓𑀁.

𑁨𑁬𑁪. ‘‘𑀧𑀽𑀚𑀁 𑀏𑀢𑀸𑀤𑀺𑀲𑀁 𑀭𑀫𑁆𑀫𑀁, 𑀓𑀸𑀭𑁂𑀢𑁆𑀯𑀸 𑀯𑀭𑀯𑀸𑀤𑀺𑀦𑁄;

𑀅𑀤𑀸𑀲𑀺 𑀤𑀸𑀦𑀁 𑀲𑀗𑁆𑀖𑀲𑁆𑀲, 𑀬𑀸𑀯𑀚𑀻𑀯𑀁 𑀬𑀣𑀸𑀩𑀮𑀁.

𑁨𑁬𑁫. ‘‘𑀲𑀳𑀸𑀯 𑀲𑁂𑀝𑁆𑀞𑀺𑀦𑀸 𑀢𑁂𑀦, 𑀢𑀸𑀦𑀺 𑀧𑀼𑀜𑁆𑀜𑀸𑀦𑀺 𑀲𑀩𑁆𑀩𑀲𑁄;

𑀬𑀸𑀯𑀚𑀻𑀯𑀁 𑀓𑀭𑀺𑀢𑁆𑀯𑀸𑀦, 𑀲𑀳𑀸𑀯 𑀲𑀼𑀕𑀢𑀺𑀁 𑀕𑀢𑀸.

𑁨𑁬𑁬. ‘‘𑀲𑀫𑁆𑀧𑀢𑁆𑀢𑀺𑀬𑁄𑀦𑀼𑀪𑁄𑀢𑁆𑀯𑀸𑀦, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀙𑀸𑀬𑀸 𑀯𑀺𑀬 𑀲𑀭𑀻𑀭𑁂𑀦, 𑀲𑀳 𑀢𑁂𑀦𑁂𑀯 𑀲𑀁𑀲𑀭𑀺𑀁.

𑁨𑁬𑁭. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀯𑀺𑀧𑀲𑁆𑀲𑀻 𑀦𑀸𑀫 𑀦𑀸𑀬𑀓𑁄;

𑀉𑀧𑁆𑀧𑀚𑁆𑀚𑀺 𑀘𑀸𑀭𑀼𑀤𑀲𑁆𑀲𑀦𑁄, 𑀲𑀩𑁆𑀩𑀥𑀫𑁆𑀫𑀯𑀺𑀧𑀲𑁆𑀲𑀓𑁄.

𑁨𑁬𑁮. ‘‘𑀢𑀤𑀸𑀬𑀁 𑀩𑀦𑁆𑀥𑀼𑀫𑀢𑀺𑀬𑀁, 𑀩𑁆𑀭𑀸𑀳𑁆𑀫𑀡𑁄 𑀲𑀸𑀥𑀼𑀲𑀫𑁆𑀫𑀢𑁄;

𑀅𑀟𑁆𑀠𑁄 𑀲𑀦𑁆𑀢𑁄 𑀕𑀼𑀡𑁂𑀦𑀸𑀧𑀺 [𑀲𑀢𑁆𑀣𑀸𑀕𑀫𑁂𑀦𑀸𑀲𑀺 (𑀲𑀻.)], 𑀥𑀦𑁂𑀦 𑀘 𑀲𑀼𑀤𑀼𑀕𑁆𑀕𑀢𑁄.

𑁨𑁬𑁯. ‘‘𑀢𑀤𑀸𑀧𑀺 𑀢𑀲𑁆𑀲𑀸𑀳𑀁 𑀆𑀲𑀺𑀁, 𑀩𑁆𑀭𑀸𑀳𑁆𑀫𑀡𑀻 𑀲𑀫𑀘𑁂𑀢𑀲𑀸;

𑀓𑀤𑀸𑀘𑀺 𑀲𑁄 𑀤𑀺𑀚𑀯𑀭𑁄, 𑀲𑀗𑁆𑀕𑀫𑁂𑀲𑀺 𑀫𑀳𑀸𑀫𑀼𑀦𑀺𑀁.

𑁨𑁭𑁦. ‘‘𑀦𑀺𑀲𑀺𑀦𑁆𑀦𑀁 𑀚𑀦𑀓𑀸𑀬𑀫𑁆𑀳𑀺, 𑀤𑁂𑀲𑁂𑀦𑁆𑀢𑀁 𑀅𑀫𑀢𑀁 𑀧𑀤𑀁;

𑀲𑀼𑀢𑁆𑀯𑀸 𑀥𑀫𑁆𑀫𑀁 𑀧𑀫𑀼𑀤𑀺𑀢𑁄, 𑀅𑀤𑀸𑀲𑀺 𑀏𑀓𑀲𑀸𑀝𑀓𑀁.

𑁨𑁭𑁧. ‘‘𑀖𑀭𑀫𑁂𑀓𑁂𑀦 𑀯𑀢𑁆𑀣𑁂𑀦, 𑀕𑀦𑁆𑀢𑁆𑀯𑀸𑀦𑁂𑀢𑀁 𑀲 𑀫𑀩𑁆𑀭𑀯𑀺 [𑀫𑀫𑀩𑁆𑀭𑀯𑀺 (𑀲𑀻. 𑀲𑁆𑀬𑀸. 𑀧𑀻.)];

‘𑀅𑀦𑀼𑀫𑁄𑀤 𑀫𑀳𑀸𑀧𑀼𑀜𑁆𑀜𑀁 [𑀫𑀳𑀸𑀧𑀜𑁆𑀜𑁂 (𑀲𑀻.), 𑀫𑀳𑀸𑀧𑀼𑀜𑁆𑀜𑁂 (𑀲𑁆𑀬𑀸. 𑀓.)], 𑀤𑀺𑀦𑁆𑀦𑀁 𑀩𑀼𑀤𑁆𑀥𑀲𑁆𑀲 𑀲𑀸𑀝𑀓𑀁’.

𑁨𑁭𑁨. ‘‘𑀢𑀤𑀸𑀳𑀁 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀅𑀦𑀼𑀫𑁄𑀤𑀺𑀁 𑀲𑀼𑀧𑀻𑀡𑀺𑀢𑀸 [𑀲𑀼𑀯𑀺𑀤𑀺𑀢𑀸 (𑀲𑁆𑀬𑀸.), 𑀲𑀼𑀧𑀻𑀢𑀺𑀬𑀸 (𑀓.)];

‘𑀲𑀼𑀤𑀺𑀦𑁆𑀦𑁄 𑀲𑀸𑀝𑀓𑁄 𑀲𑀸𑀫𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄’.

𑁨𑁭𑁩. ‘‘𑀲𑀼𑀔𑀺𑀢𑁄 𑀲𑀚𑁆𑀚𑀺𑀢𑁄 𑀳𑀼𑀢𑁆𑀯𑀸, 𑀲𑀁𑀲𑀭𑀦𑁆𑀢𑁄 𑀪𑀯𑀸𑀪𑀯𑁂;

𑀩𑀸𑀭𑀸𑀡𑀲𑀺𑀧𑀼𑀭𑁂 𑀭𑀫𑁆𑀫𑁂, 𑀭𑀸𑀚𑀸 𑀆𑀲𑀺 𑀫𑀳𑀻𑀧𑀢𑀺.

𑁨𑁭𑁪. ‘‘𑀢𑀤𑀸 𑀢𑀲𑁆𑀲 𑀫𑀳𑁂𑀲𑀻𑀳𑀁, 𑀇𑀢𑁆𑀣𑀺𑀕𑀼𑀫𑁆𑀩𑀲𑁆𑀲 𑀉𑀢𑁆𑀢𑀫𑀸;

𑀢𑀲𑁆𑀲𑀸𑀢𑀺 𑀤𑀬𑀺𑀢𑀸 [𑀢𑀲𑁆𑀲𑀸𑀯𑀺 𑀤𑀼𑀢𑀺𑀬𑀺𑀓𑀸 (𑀲𑁆𑀬𑀸.)] 𑀆𑀲𑀺𑀁, 𑀧𑀼𑀩𑁆𑀩𑀲𑁆𑀦𑁂𑀳𑁂𑀦 𑀪𑀢𑁆𑀢𑀼𑀦𑁄 [𑀘𑀼𑀢𑁆𑀢𑀭𑀺 (𑀲𑁆𑀬𑀸. 𑀧𑀻. 𑀓.)].

𑁨𑁭𑁫. ‘‘𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑁂 𑀢𑁂 [𑀲𑁄 (𑀲𑀻. 𑀲𑁆𑀬𑀸. 𑀧𑀻.)], 𑀅𑀝𑁆𑀞 𑀧𑀘𑁆𑀘𑁂𑀓𑀦𑀸𑀬𑀓𑁂;

𑀤𑀺𑀲𑁆𑀯𑀸 𑀧𑀫𑀼𑀤𑀺𑀢𑁄 𑀳𑀼𑀢𑁆𑀯𑀸, 𑀤𑀢𑁆𑀯𑀸 𑀧𑀺𑀡𑁆𑀟𑀁 𑀫𑀳𑀸𑀭𑀳𑀁.

𑁨𑁭𑁬. ‘‘𑀧𑀼𑀦𑁄 𑀦𑀺𑀫𑀦𑁆𑀢𑀬𑀺𑀢𑁆𑀯𑀸𑀦, 𑀓𑀢𑁆𑀯𑀸 𑀭𑀢𑀦𑀫𑀡𑁆𑀟𑀧𑀁;

𑀓𑀫𑁆𑀫𑀸𑀭𑁂𑀳𑀺 𑀓𑀢𑀁 𑀧𑀢𑁆𑀢𑀁 [𑀓𑀢𑀁 𑀙𑀢𑁆𑀢𑀁 (𑀲𑀻.), 𑀓𑀢𑀫𑀝𑁆𑀞𑀁 (𑀲𑁆𑀬𑀸.)], 𑀲𑁄𑀯𑀡𑁆𑀡𑀁 𑀯𑀢 𑀢𑀢𑁆𑀢𑀓𑀁.

𑁨𑁭𑁭. ‘‘𑀲𑀫𑀸𑀦𑁂𑀢𑁆𑀯𑀸𑀦 𑀢𑁂 𑀲𑀩𑁆𑀩𑁂, 𑀢𑁂𑀲𑀁 𑀤𑀸𑀦𑀫𑀤𑀸𑀲𑀺 𑀲𑁄;

𑀲𑁄𑀡𑁆𑀡𑀸𑀲𑀦𑁂 𑀧𑀯𑀺𑀝𑁆𑀞𑀸𑀦𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁨𑁭𑁮. ‘‘𑀢𑀫𑁆𑀧𑀺 𑀤𑀸𑀦𑀁 𑀲𑀳𑀸𑀤𑀸𑀲𑀺𑀁, 𑀓𑀸𑀲𑀺𑀭𑀸𑀚𑁂𑀦𑀳𑀁 𑀢𑀤𑀸;

𑀧𑀼𑀦𑀸𑀳𑀁 𑀩𑀸𑀭𑀸𑀡𑀲𑀺𑀬𑀁, 𑀚𑀸𑀢𑀸 𑀓𑀸𑀲𑀺𑀓𑀕𑀸𑀫𑀓𑁂.

𑁨𑁭𑁯. ‘‘𑀓𑀼𑀝𑀼𑀫𑁆𑀩𑀺𑀓𑀓𑀼𑀮𑁂 𑀨𑀻𑀢𑁂, 𑀲𑀼𑀔𑀺𑀢𑁄 𑀲𑁄 𑀲𑀪𑀸𑀢𑀼𑀓𑁄;

𑀚𑁂𑀝𑁆𑀞𑀲𑁆𑀲 𑀪𑀸𑀢𑀼𑀦𑁄 𑀚𑀸𑀬𑀸, 𑀅𑀳𑁄𑀲𑀺𑀁 𑀲𑀼𑀧𑀢𑀺𑀩𑁆𑀩𑀢𑀸.

𑁨𑁮𑁦. ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦, 𑀓𑀦𑀺𑀬𑀲𑁆𑀲 𑀫𑀫 𑀪𑀢𑁆𑀢𑀼𑀦𑁄 [𑀪𑀢𑁆𑀢𑀼𑀓𑀦𑀺𑀬𑀲𑁄 (𑀲𑁆𑀬𑀸.)];

𑀪𑀸𑀕𑀦𑁆𑀦𑀁 𑀢𑀲𑁆𑀲 𑀤𑀢𑁆𑀯𑀸𑀦, 𑀆𑀕𑀢𑁂 𑀢𑀫𑁆𑀳𑀺 𑀧𑀸𑀯𑀤𑀺𑀁.

𑁨𑁮𑁧. ‘‘𑀦𑀸𑀪𑀺𑀦𑀦𑁆𑀤𑀺𑀢𑁆𑀣 𑀲𑁄 𑀤𑀸𑀦𑀁, 𑀢𑀢𑁄 𑀢𑀲𑁆𑀲 𑀅𑀤𑀸𑀲𑀳𑀁;

𑀉𑀔𑀸 [𑀩𑀼𑀤𑁆𑀥𑀸 (𑀲𑁆𑀬𑀸.)] 𑀆𑀦𑀺𑀬 𑀢𑀁 𑀅𑀦𑁆𑀦𑀁, 𑀧𑀼𑀦𑁄 𑀢𑀲𑁆𑀲𑁂𑀯 𑀲𑁄 𑀅𑀤𑀸.

𑁨𑁮𑁨. ‘‘𑀢𑀤𑀦𑁆𑀦𑀁 𑀙𑀟𑁆𑀟𑀬𑀺𑀢𑁆𑀯𑀸𑀦, 𑀤𑀼𑀝𑁆𑀞𑀸 𑀩𑀼𑀤𑁆𑀥𑀲𑁆𑀲𑀳𑀁 𑀢𑀤𑀸;

𑀧𑀢𑁆𑀢𑀁 𑀓𑀮𑀮𑀧𑀼𑀡𑁆𑀡𑀁 𑀢𑀁, 𑀅𑀤𑀸𑀲𑀺𑀁 𑀢𑀲𑁆𑀲 𑀢𑀸𑀤𑀺𑀦𑁄.

𑁨𑁮𑁩. ‘‘𑀤𑀸𑀦𑁂 𑀘 𑀕𑀳𑀡𑁂 𑀘𑁂𑀯, 𑀅𑀧𑀘𑁂 𑀧𑀤𑀼𑀲𑁂𑀧𑀺 𑀘;

𑀲𑀫𑀘𑀺𑀢𑁆𑀢𑀫𑀼𑀔𑀁 𑀤𑀺𑀲𑁆𑀯𑀸, 𑀢𑀤𑀸𑀳𑀁 𑀲𑀁𑀯𑀺𑀚𑀺𑀁 𑀪𑀼𑀲𑀁.

𑁨𑁮𑁪. ‘‘𑀧𑀼𑀦𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀲𑁄𑀥𑀬𑀺𑀢𑁆𑀯𑀸 𑀲𑀼𑀕𑀦𑁆𑀥𑀺𑀦𑀸;

𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀽𑀭𑁂𑀢𑁆𑀯𑀸, 𑀲𑀖𑀢𑀁 𑀲𑀓𑁆𑀓𑀭𑀁 𑀅𑀤𑀁.

𑁨𑁮𑁫. ‘‘𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀸𑀫𑀺, 𑀲𑀼𑀭𑀽𑀧𑀸 𑀳𑁄𑀫𑀺 𑀤𑀸𑀦𑀢𑁄;

𑀩𑀼𑀤𑁆𑀥𑀲𑁆𑀲 𑀅𑀧𑀓𑀸𑀭𑁂𑀦, 𑀤𑀼𑀕𑁆𑀕𑀦𑁆𑀥𑀸 𑀯𑀤𑀦𑁂𑀦 𑀘.

𑁨𑁮𑁬. ‘‘𑀧𑀼𑀦 𑀓𑀲𑁆𑀲𑀧𑀯𑀻𑀭𑀲𑁆𑀲, 𑀦𑀺𑀥𑀸𑀬𑀦𑁆𑀢𑀫𑁆𑀳𑀺 𑀘𑁂𑀢𑀺𑀬𑁂;

𑀲𑁄𑀯𑀡𑁆𑀡𑀁 𑀇𑀝𑁆𑀞𑀓𑀁 𑀯𑀭𑀁, 𑀅𑀤𑀸𑀲𑀺𑀁 𑀫𑀼𑀤𑀺𑀢𑀸 𑀅𑀳𑀁.

𑁨𑁮𑁭. ‘‘𑀘𑀢𑀼𑀚𑁆𑀚𑀸𑀢𑁂𑀦 𑀕𑀦𑁆𑀥𑁂𑀦, 𑀦𑀺𑀘𑀬𑀺𑀢𑁆𑀯𑀸 𑀢𑀫𑀺𑀝𑁆𑀞𑀓𑀁;

𑀫𑀼𑀢𑁆𑀢𑀸 𑀤𑀼𑀕𑁆𑀕𑀦𑁆𑀥𑀤𑁄𑀲𑀫𑁆𑀳𑀸, 𑀲𑀩𑁆𑀩𑀗𑁆𑀕𑀲𑀼𑀲𑀫𑀸𑀕𑀢𑀸.

𑁨𑁮𑁮. ‘‘𑀲𑀢𑁆𑀢𑀧𑀸𑀢𑀺𑀲𑀳𑀲𑁆𑀲𑀸𑀦𑀺, 𑀭𑀢𑀦𑁂𑀳𑁂𑀯 𑀲𑀢𑁆𑀢𑀳𑀺;

𑀓𑀸𑀭𑁂𑀢𑁆𑀯𑀸 𑀖𑀢𑀧𑀽𑀭𑀸𑀦𑀺, 𑀯𑀝𑁆𑀝𑀻𑀦𑀺 [𑀯𑀝𑁆𑀝𑀻𑀬𑁄 (𑀲𑀻.)] 𑀘 𑀲𑀳𑀲𑁆𑀲𑀲𑁄.

𑁨𑁮𑁯. ‘‘𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀤𑀻𑀧𑁂𑀢𑁆𑀯𑀸, 𑀞𑀧𑀬𑀺𑀁 𑀲𑀢𑁆𑀢𑀧𑀦𑁆𑀢𑀺𑀬𑁄;

𑀧𑀽𑀚𑀦𑀢𑁆𑀣𑀁 𑀮𑁄𑀓𑀦𑀸𑀣𑀲𑁆𑀲, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁨𑁯𑁦. ‘‘𑀢𑀤𑀸𑀧𑀺 𑀢𑀫𑁆𑀳𑀺 𑀧𑀼𑀜𑁆𑀜𑀫𑁆𑀳𑀺, 𑀪𑀸𑀕𑀺𑀦𑀻𑀬𑀺 𑀯𑀺𑀲𑁂𑀲𑀢𑁄;

𑀧𑀼𑀦 𑀓𑀸𑀲𑀻𑀲𑀼 𑀲𑀜𑁆𑀚𑀸𑀢𑁄, 𑀲𑀼𑀫𑀺𑀢𑁆𑀢𑀸 𑀇𑀢𑀺 𑀯𑀺𑀲𑁆𑀲𑀼𑀢𑁄.

𑁨𑁯𑁧. ‘‘𑀢𑀲𑁆𑀲𑀸𑀳𑀁 𑀪𑀭𑀺𑀬𑀸 𑀆𑀲𑀺𑀁, 𑀲𑀼𑀔𑀺𑀢𑀸 𑀲𑀚𑁆𑀚𑀺𑀢𑀸 𑀧𑀺𑀬𑀸;

𑀢𑀤𑀸 𑀧𑀘𑁆𑀘𑁂𑀓𑀫𑀼𑀦𑀺𑀦𑁄, 𑀅𑀤𑀸𑀲𑀺𑀁 𑀖𑀦𑀯𑁂𑀞𑀦𑀁.

𑁨𑁯𑁨. ‘‘𑀢𑀲𑁆𑀲𑀸𑀧𑀺 𑀪𑀸𑀕𑀺𑀦𑀻 𑀆𑀲𑀺𑀁, 𑀫𑁄𑀤𑀺𑀢𑁆𑀯𑀸 𑀤𑀸𑀦𑀫𑀼𑀢𑁆𑀢𑀫𑀁;

𑀧𑀼𑀦𑀸𑀧𑀺 𑀓𑀸𑀲𑀺𑀭𑀝𑁆𑀞𑀫𑁆𑀳𑀺, 𑀚𑀸𑀢𑁄 𑀓𑁄𑀮𑀺𑀬𑀚𑀸𑀢𑀺𑀬𑀸.

𑁨𑁯𑁩. ‘‘𑀢𑀤𑀸 𑀓𑁄𑀮𑀺𑀬𑀧𑀼𑀢𑁆𑀢𑀸𑀦𑀁, 𑀲𑀢𑁂𑀳𑀺 𑀲𑀳 𑀧𑀜𑁆𑀘𑀳𑀺;

𑀧𑀜𑁆𑀘𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀲𑀢𑀸𑀦𑀺 𑀲𑀫𑀼𑀧𑀝𑁆𑀞𑀳𑀺.

𑁨𑁯𑁪. ‘‘𑀢𑁂𑀫𑀸𑀲𑀁 𑀢𑀧𑁆𑀧𑀬𑀺𑀢𑁆𑀯𑀸𑀦 [𑀯𑀸𑀲𑀬𑀺𑀢𑁆𑀯𑀸𑀦 (𑀲𑁆𑀬𑀸. 𑀧𑀻.)], 𑀅𑀤𑀸𑀲𑀺 𑀘 𑀢𑀺𑀘𑀻𑀯𑀭𑁂 [𑀢𑀺𑀘𑀻𑀯𑀭𑀁 (𑀲𑁆𑀬𑀸.)];

𑀚𑀸𑀬𑀸 𑀢𑀲𑁆𑀲 𑀢𑀤𑀸 𑀆𑀲𑀺𑀁, 𑀧𑀼𑀜𑁆𑀜𑀓𑀫𑁆𑀫𑀧𑀣𑀸𑀦𑀼𑀕𑀸.

𑁨𑁯𑁫. ‘‘𑀢𑀢𑁄 𑀘𑀼𑀢𑁄 𑀅𑀳𑀼 𑀭𑀸𑀚𑀸, 𑀦𑀦𑁆𑀤𑁄 𑀦𑀸𑀫 𑀫𑀳𑀸𑀬𑀲𑁄;

𑀢𑀲𑁆𑀲𑀸𑀧𑀺 𑀫𑀳𑁂𑀲𑀻 𑀆𑀲𑀺𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻.

𑁨𑁯𑁬. ‘‘𑀢𑀤𑀸 𑀭𑀸𑀚𑀸 𑀪𑀯𑀺𑀢𑁆𑀯𑀸𑀦, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀫𑀳𑀻𑀧𑀢𑀺;

𑀧𑀤𑀼𑀫𑀯𑀢𑀻𑀧𑀼𑀢𑁆𑀢𑀸𑀦𑀁, 𑀧𑀘𑁆𑀘𑁂𑀓𑀫𑀼𑀦𑀺𑀦𑀁 𑀢𑀤𑀸.

𑁨𑁯𑁭. ‘‘𑀲𑀢𑀸𑀦𑀺 𑀧𑀜𑁆𑀘𑀦𑀽𑀦𑀸𑀦𑀺, 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀳𑀺𑀁;

𑀭𑀸𑀚𑀼𑀬𑁆𑀬𑀸𑀦𑁂 𑀦𑀺𑀯𑀸𑀲𑁂𑀢𑁆𑀯𑀸, 𑀦𑀺𑀩𑁆𑀩𑀼𑀢𑀸𑀦𑀺 𑀘 𑀧𑀽𑀚𑀬𑀺𑀁.

𑁨𑁯𑁮. ‘‘𑀘𑁂𑀢𑀺𑀬𑀸𑀦𑀺 𑀘 𑀓𑀸𑀭𑁂𑀢𑁆𑀯𑀸, 𑀧𑀩𑁆𑀩𑀚𑀺𑀢𑁆𑀯𑀸 𑀉𑀪𑁄 𑀫𑀬𑀁;

𑀪𑀸𑀯𑁂𑀢𑁆𑀯𑀸 𑀅𑀧𑁆𑀧𑀫𑀜𑁆𑀜𑀸𑀬𑁄, 𑀩𑁆𑀭𑀳𑁆𑀫𑀮𑁄𑀓𑀁 𑀅𑀕𑀫𑁆𑀳𑀲𑁂.

𑁨𑁯𑁯. ‘‘𑀢𑀢𑁄 𑀘𑀼𑀢𑁄 𑀫𑀳𑀸𑀢𑀺𑀢𑁆𑀣𑁂, 𑀲𑀼𑀚𑀸𑀢𑁄 𑀧𑀺𑀧𑁆𑀨𑀮𑀸𑀬𑀦𑁄;

𑀫𑀸𑀢𑀸 𑀲𑀼𑀫𑀦𑀤𑁂𑀯𑀻𑀢𑀺, 𑀓𑁄𑀲𑀺𑀕𑁄𑀢𑁆𑀢𑁄 𑀤𑀺𑀚𑁄 𑀧𑀺𑀢𑀸.

𑁩𑁦𑁦. ‘‘𑀅𑀳𑀁 𑀫𑀤𑁆𑀤𑁂 𑀚𑀦𑀧𑀤𑁂, 𑀲𑀸𑀓𑀮𑀸𑀬 𑀧𑀼𑀭𑀼𑀢𑁆𑀢𑀫𑁂;

𑀓𑀧𑁆𑀧𑀺𑀮𑀲𑁆𑀲 𑀤𑀺𑀚𑀲𑁆𑀲𑀸𑀲𑀺𑀁, 𑀥𑀻𑀢𑀸 𑀫𑀸𑀢𑀸 𑀲𑀼𑀘𑀻𑀫𑀢𑀺.

𑁩𑁦𑁧. ‘‘𑀖𑀦𑀓𑀜𑁆𑀘𑀦𑀩𑀺𑀫𑁆𑀩𑁂𑀦, 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀦 𑀫𑀁 𑀧𑀺𑀢𑀸;

𑀅𑀤𑀸 𑀓𑀲𑁆𑀲𑀧𑀥𑀻𑀭𑀲𑁆𑀲, 𑀓𑀸𑀫𑁂𑀳𑀺 𑀯𑀚𑁆𑀚𑀺𑀢𑀲𑁆𑀲𑀫𑀁.

𑁩𑁦𑁨. ‘‘𑀓𑀤𑀸𑀘𑀺 𑀲𑁄 𑀓𑀸𑀭𑀼𑀡𑀺𑀓𑁄, 𑀕𑀦𑁆𑀢𑁆𑀯𑀸 𑀓𑀫𑁆𑀫𑀦𑁆𑀢𑀧𑁂𑀓𑁆𑀔𑀓𑁄;

𑀓𑀸𑀓𑀸𑀤𑀺𑀓𑁂𑀳𑀺 𑀔𑀚𑁆𑀚𑀦𑁆𑀢𑁂, 𑀧𑀸𑀡𑁂 𑀤𑀺𑀲𑁆𑀯𑀸𑀦 𑀲𑀁𑀯𑀺𑀚𑀺.

𑁩𑁦𑁩. ‘‘𑀖𑀭𑁂𑀯𑀸𑀳𑀁 𑀢𑀺𑀮𑁂 𑀚𑀸𑀢𑁂, 𑀤𑀺𑀲𑁆𑀯𑀸𑀦𑀸𑀢𑀧𑀢𑀸𑀧𑀦𑁂;

𑀓𑀺𑀫𑀺 𑀓𑀸𑀓𑁂𑀳𑀺 𑀔𑀚𑁆𑀚𑀦𑁆𑀢𑁂, 𑀲𑀁𑀯𑁂𑀕𑀫𑀮𑀪𑀺𑀁 𑀢𑀤𑀸.

𑁩𑁦𑁪. ‘‘𑀢𑀤𑀸 𑀲𑁄 𑀧𑀩𑁆𑀩𑀚𑀻 𑀥𑀻𑀭𑁄, 𑀅𑀳𑀁 𑀢𑀫𑀦𑀼𑀧𑀩𑁆𑀩𑀚𑀺𑀁;

𑀧𑀜𑁆𑀘𑀯𑀲𑁆𑀲𑀸𑀦𑀺 𑀦𑀺𑀯𑀲𑀺𑀁, 𑀧𑀭𑀺𑀩𑁆𑀩𑀸𑀚𑀯𑀢𑁂 [𑀧𑀭𑀺𑀩𑁆𑀩𑀸𑀚𑀧𑀣𑁂 (𑀲𑁆𑀬𑀸. 𑀧𑀻.)] 𑀅𑀳𑀁.

𑁩𑁦𑁫. ‘‘𑀬𑀤𑀸 𑀧𑀩𑁆𑀩𑀚𑀺𑀢𑀸 𑀆𑀲𑀺, 𑀕𑁄𑀢𑀫𑀻 𑀚𑀺𑀦𑀧𑁄𑀲𑀺𑀓𑀸;

𑀢𑀤𑀸𑀳𑀁 𑀢𑀫𑀼𑀧𑀕𑀦𑁆𑀢𑁆𑀯𑀸, 𑀩𑀼𑀤𑁆𑀥𑁂𑀦 𑀅𑀦𑀼𑀲𑀸𑀲𑀺𑀢𑀸.

𑁩𑁦𑁬. ‘‘𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀅𑀳𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑁆𑀢𑀁, 𑀓𑀲𑁆𑀲𑀧𑀲𑁆𑀲 𑀲𑀺𑀭𑀻𑀫𑀢𑁄.

𑁩𑁦𑁭. ‘‘𑀲𑀼𑀢𑁄 𑀩𑀼𑀤𑁆𑀥𑀲𑁆𑀲 𑀤𑀸𑀬𑀸𑀤𑁄, 𑀓𑀲𑁆𑀲𑀧𑁄 𑀲𑀼𑀲𑀫𑀸𑀳𑀺𑀢𑁄;

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀬𑁄 𑀯𑁂𑀤𑀺, 𑀲𑀕𑁆𑀕𑀸𑀧𑀸𑀬𑀜𑁆𑀘 𑀧𑀲𑁆𑀲𑀢𑀺.

𑁩𑁦𑁮. ‘‘𑀅𑀣𑁄 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄 𑀫𑀼𑀦𑀺;

𑀏𑀢𑀸𑀳𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺, 𑀢𑁂𑀯𑀺𑀚𑁆𑀚𑁄 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄.

𑁩𑁦𑁯. ‘‘𑀢𑀣𑁂𑀯 𑀪𑀤𑁆𑀤𑀓𑀸𑀧𑀺𑀮𑀸𑀦𑀻 [𑀪𑀤𑁆𑀤𑀸𑀓𑀸𑀧𑀺𑀮𑀸𑀦𑀻 (𑀲𑀻. 𑀧𑀻.)], 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑀻;

𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑀺𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀦𑀁.

𑁩𑁧𑁦. ‘‘𑀤𑀺𑀲𑁆𑀯𑀸 𑀆𑀤𑀻𑀦𑀯𑀁 𑀮𑁄𑀓𑁂, 𑀉𑀪𑁄 𑀧𑀩𑁆𑀩𑀚𑀺𑀢𑀸 𑀫𑀬𑀁;

𑀢𑁆𑀬𑀫𑁆𑀳 𑀔𑀻𑀡𑀸𑀲𑀯𑀸 𑀤𑀦𑁆𑀢𑀸, 𑀲𑀻𑀢𑀺𑀪𑀽𑀢𑀸𑀫𑁆𑀳 𑀦𑀺𑀩𑁆𑀩𑀼𑀢𑀸.

𑁩𑁧𑁧. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁩𑁧𑁨. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁧𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀪𑀤𑁆𑀤𑀓𑀸𑀧𑀺𑀮𑀸𑀦𑀻 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀪𑀤𑁆𑀤𑀓𑀸𑀧𑀺𑀮𑀸𑀦𑀻𑀣𑁂𑀭𑀺𑀬𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.