𑁬. 𑀦𑀴𑀫𑀸𑀮𑀺𑀓𑀸𑀣𑁂𑀭𑀻𑀅𑀧𑀤𑀸𑀦𑀁

𑁮𑁬. ‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀅𑀳𑁄𑀲𑀺𑀁 𑀓𑀺𑀦𑁆𑀦𑀭𑀻 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁.

𑁮𑁭. ‘‘𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀯𑁂𑀤𑀚𑀸𑀢𑀸 𑀓𑀢𑀜𑁆𑀚𑀮𑀻;

𑀦𑀴𑀫𑀸𑀮𑀁 𑀕𑀳𑁂𑀢𑁆𑀯𑀸𑀦, 𑀲𑀬𑀫𑁆𑀪𑀼𑀁 𑀅𑀪𑀺𑀧𑀽𑀚𑀬𑀺𑀁.

𑁮𑁮. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀓𑀺𑀦𑁆𑀦𑀭𑀻𑀤𑁂𑀳𑀁 [𑀫𑀸𑀦𑀲𑀁 𑀤𑁂𑀳𑀁 (𑀲𑀻. 𑀧𑀻. 𑀓.) 𑀲𑀼𑀫𑁂𑀥𑀸𑀯𑀕𑁆𑀕𑁂𑀧𑀺], 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁮𑁯. ‘‘𑀙𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀫𑀦𑀲𑀸 𑀧𑀢𑁆𑀣𑀺𑀢𑀁 𑀫𑀬𑁆𑀳𑀁, 𑀦𑀺𑀩𑁆𑀩𑀢𑁆𑀢𑀢𑀺 𑀬𑀣𑀺𑀘𑁆𑀙𑀺𑀢𑀁.

𑁯𑁦. ‘‘𑀤𑀲𑀦𑁆𑀦𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀑𑀘𑀺𑀢𑀢𑁆𑀢𑀸𑀯 [𑀲𑀼𑀘𑀺𑀢𑀢𑁆𑀢𑀸𑀯 (𑀧𑀻.)] 𑀳𑀼𑀢𑁆𑀯𑀸𑀦, 𑀲𑀁𑀲𑀭𑀸𑀫𑀺 𑀪𑀯𑁂𑀲𑁆𑀯𑀳𑀁.

𑁯𑁧. ‘‘𑀓𑀼𑀲𑀮𑀁 𑀯𑀺𑀚𑁆𑀚𑀢𑁂 𑀫𑀬𑁆𑀳𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀧𑀽𑀚𑀸𑀭𑀳𑀸 𑀅𑀳𑀁 𑀅𑀚𑁆𑀚, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

𑁯𑁨. ‘‘𑀯𑀺𑀲𑀼𑀤𑁆𑀥𑀫𑀦𑀲𑀸 𑀅𑀚𑁆𑀚, 𑀅𑀧𑁂𑀢𑀫𑀦𑀧𑀸𑀧𑀺𑀓𑀸;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁯𑁩. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀦𑀴𑀫𑀸𑀮𑀸𑀬𑀺𑀤𑀁 𑀨𑀮𑀁.

𑁯𑁪. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁯𑁫. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁯𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀦𑀴𑀫𑀸𑀮𑀺𑀓𑀸 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀴𑀫𑀸𑀮𑀺𑀓𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀙𑀝𑁆𑀞𑀁.