𑁭. 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀣𑁂𑀭𑀻𑀅𑀧𑀤𑀸𑀦𑀁

𑁯𑁭. ‘‘𑀏𑀓𑀤𑀸 𑀮𑁄𑀓𑀧𑀚𑁆𑀚𑁄𑀢𑁄, 𑀯𑁂𑀲𑀸𑀮𑀺𑀬𑀁 𑀫𑀳𑀸𑀯𑀦𑁂;

𑀓𑀽𑀝𑀸𑀕𑀸𑀭𑁂 𑀲𑀼𑀲𑀸𑀮𑀸𑀬𑀁, 𑀯𑀲𑀢𑁂 𑀦𑀭𑀲𑀸𑀭𑀣𑀺.

𑁯𑁮. ‘‘𑀢𑀤𑀸 𑀚𑀺𑀦𑀲𑁆𑀲 𑀫𑀸𑀢𑀼𑀘𑁆𑀙𑀸, 𑀫𑀳𑀸𑀕𑁄𑀢𑀫𑀺 𑀪𑀺𑀓𑁆𑀔𑀼𑀦𑀻;

𑀢𑀳𑀺𑀁 𑀓𑀢𑁂 [𑀢𑀳𑀺𑀁𑀬𑁂𑀯 (𑀲𑁆𑀬𑀸.)] 𑀧𑀼𑀭𑁂 𑀭𑀫𑁆𑀫𑁂, 𑀯𑀲𑀻 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂.

𑁯𑁯. ‘‘𑀪𑀺𑀓𑁆𑀔𑀼𑀦𑀻𑀳𑀺 𑀯𑀺𑀫𑀼𑀢𑁆𑀢𑀸𑀳𑀺, 𑀲𑀢𑁂𑀳𑀺 𑀲𑀳 𑀧𑀜𑁆𑀘𑀳𑀺;

𑀭𑀳𑁄𑀕𑀢𑀸𑀬 𑀢𑀲𑁆𑀲𑁂𑀯𑀁, 𑀘𑀺𑀢𑀲𑁆𑀲𑀸𑀲𑀺 [𑀘𑀺𑀢𑁆𑀢𑀲𑁆𑀲𑀸𑀧𑀺 (𑀲𑁆𑀬𑀸.)] 𑀯𑀺𑀢𑀓𑁆𑀓𑀺𑀢𑀁.

𑁧𑁦𑁦. ‘‘𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁, 𑀲𑀸𑀯𑀓𑀕𑁆𑀕𑀬𑀼𑀕𑀲𑁆𑀲 𑀯𑀸;

𑀭𑀸𑀳𑀼𑀮𑀸𑀦𑀦𑁆𑀤𑀦𑀦𑁆𑀤𑀸𑀦𑀁, 𑀦𑀸𑀳𑀁 𑀮𑀘𑁆𑀙𑀸𑀫𑀺 𑀧𑀲𑁆𑀲𑀺𑀢𑀼𑀁.

𑁧𑁦𑁧. ‘‘𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀸, 𑀲𑀸𑀯𑀓𑀕𑁆𑀕𑀬𑀼𑀕𑀲𑁆𑀲 𑀯𑀸;

𑀫𑀳𑀸𑀓𑀲𑁆𑀲𑀧𑀦𑀦𑁆𑀤𑀸𑀦𑀁, 𑀆𑀦𑀦𑁆𑀤𑀭𑀸𑀳𑀼𑀮𑀸𑀦 𑀘.

𑁧𑁦𑁨. ‘‘𑀧𑀝𑀺𑀓𑀘𑁆𑀘𑀸𑀬𑀼𑀲𑀗𑁆𑀔𑀸𑀭𑀁 [𑀧𑀝𑀺𑀕𑀘𑁆𑀘𑀸𑀬𑀼𑀲𑀗𑁆𑀔𑀸𑀭𑁂 (𑀲𑀻.)], 𑀑𑀲𑀚𑁆𑀚𑀺𑀢𑁆𑀯𑀸𑀦 𑀦𑀺𑀩𑁆𑀩𑀼𑀢𑀺𑀁;

𑀕𑀘𑁆𑀙𑁂𑀬𑁆𑀬𑀁 𑀮𑁄𑀓𑀦𑀸𑀣𑁂𑀦, 𑀅𑀦𑀼𑀜𑁆𑀜𑀸𑀢𑀸 𑀫𑀳𑁂𑀲𑀺𑀦𑀸.

𑁧𑁦𑁩. ‘‘𑀢𑀣𑀸 𑀧𑀜𑁆𑀘𑀲𑀢𑀸𑀦𑀫𑁆𑀧𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀢𑀓𑁆𑀓𑀺𑀢𑀁;

𑀆𑀲𑀺 𑀔𑁂𑀫𑀸𑀤𑀺𑀓𑀸𑀦𑀫𑁆𑀧𑀺, 𑀏𑀢𑀤𑁂𑀯 𑀯𑀺𑀢𑀓𑁆𑀓𑀺𑀢𑀁.

𑁧𑁦𑁪. ‘‘𑀪𑀽𑀫𑀺𑀘𑀸𑀮𑁄 𑀢𑀤𑀸 𑀆𑀲𑀺, 𑀦𑀸𑀤𑀺𑀢𑀸 𑀤𑁂𑀯𑀤𑀼𑀦𑁆𑀤𑀼𑀪𑀻;

𑀉𑀧𑀲𑁆𑀲𑀬𑀸𑀥𑀺𑀯𑀢𑁆𑀣𑀸𑀬𑁄, 𑀤𑁂𑀯𑀢𑀸 𑀲𑁄𑀓𑀧𑀻𑀴𑀺𑀢𑀸.

𑁧𑁦𑁫. ‘‘𑀯𑀺𑀮𑀧𑀦𑁆𑀢𑀸 𑀲𑀼𑀓𑀭𑀼𑀡𑀁 [𑀲𑀓𑀭𑀼𑀡𑀁 (𑀲𑀻. 𑀲𑁆𑀬𑀸. 𑀧𑀻.)], 𑀢𑀢𑁆𑀣𑀲𑁆𑀲𑀽𑀦𑀺 𑀧𑀯𑀢𑁆𑀢𑀬𑀼𑀁;

𑀫𑀺𑀢𑁆𑀢𑀸 [𑀲𑀩𑁆𑀩𑀸 (𑀲𑁆𑀬𑀸. 𑀧𑀻.)] 𑀪𑀺𑀓𑁆𑀔𑀼𑀦𑀺𑀬𑁄 𑀢𑀸𑀳𑀺, 𑀉𑀧𑀕𑀦𑁆𑀢𑁆𑀯𑀸𑀦 𑀕𑁄𑀢𑀫𑀺𑀁.

𑁧𑁦𑁬. ‘‘𑀦𑀺𑀧𑀘𑁆𑀘 𑀲𑀺𑀭𑀲𑀸 𑀧𑀸𑀤𑁂, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀼𑀁;

‘𑀢𑀢𑁆𑀣 𑀢𑁄𑀬𑀮𑀯𑀸𑀲𑀺𑀢𑁆𑀢𑀸, 𑀫𑀬𑀫𑀬𑁆𑀬𑁂 𑀭𑀳𑁄𑀕𑀢𑀸.

𑁧𑁦𑁭. ‘‘‘𑀲𑀸 𑀘𑀮𑀸 𑀘𑀮𑀺𑀢𑀸 𑀪𑀽𑀫𑀺, 𑀦𑀸𑀤𑀺𑀢𑀸 𑀤𑁂𑀯𑀤𑀼𑀦𑁆𑀤𑀼𑀪𑀻;

𑀧𑀭𑀺𑀤𑁂𑀯𑀸 𑀘 𑀲𑀼𑀬𑁆𑀬𑀦𑁆𑀢𑁂, 𑀓𑀺𑀫𑀢𑁆𑀣𑀁 𑀦𑀽𑀦 𑀕𑁄𑀢𑀫𑀻’.

𑁧𑁦𑁮. ‘‘𑀢𑀤𑀸 𑀅𑀯𑁄𑀘 𑀲𑀸 𑀲𑀩𑁆𑀩𑀁, 𑀬𑀣𑀸𑀧𑀭𑀺𑀯𑀺𑀢𑀓𑁆𑀓𑀺𑀢𑀁;

𑀢𑀸𑀬𑁄𑀧𑀺 𑀲𑀩𑁆𑀩𑀸 𑀆𑀳𑀁𑀲𑀼, 𑀬𑀣𑀸𑀧𑀭𑀺𑀯𑀺𑀢𑀓𑁆𑀓𑀺𑀢𑀁.

𑁧𑁦𑁯. ‘‘‘𑀬𑀤𑀺 𑀢𑁂 𑀭𑀼𑀘𑀺𑀢𑀁 𑀅𑀬𑁆𑀬𑁂, 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀺𑀯𑀁;

𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫 𑀲𑀩𑁆𑀩𑀸𑀧𑀺, 𑀩𑀼𑀤𑁆𑀥𑀸𑀦𑀼𑀜𑁆𑀜𑀸𑀬 𑀲𑀼𑀩𑁆𑀩𑀢𑁂.

𑁧𑁧𑁦. ‘‘‘𑀫𑀬𑀁 𑀲𑀳𑀸𑀯 𑀦𑀺𑀓𑁆𑀔𑀦𑁆𑀢𑀸, 𑀖𑀭𑀸𑀧𑀺 𑀘 𑀪𑀯𑀸𑀧𑀺 𑀘;

𑀲𑀳𑀸𑀬𑁂𑀯 𑀕𑀫𑀺𑀲𑁆𑀲𑀸𑀫, 𑀦𑀺𑀩𑁆𑀩𑀸𑀦𑀁 𑀧𑀤𑀫𑀼𑀢𑁆𑀢𑀫𑀁’.

𑁧𑁧𑁧. ‘‘‘𑀦𑀺𑀩𑁆𑀩𑀸𑀦𑀸𑀬 𑀯𑀚𑀦𑁆𑀢𑀻𑀦𑀁, 𑀓𑀺𑀁 𑀯𑀓𑁆𑀔𑀸𑀫𑀻’𑀢𑀺 𑀲𑀸 𑀯𑀤𑀁;

𑀲𑀳 𑀲𑀩𑁆𑀩𑀸𑀳𑀺 𑀦𑀺𑀕𑁆𑀕𑀜𑁆𑀙𑀺, 𑀪𑀺𑀓𑁆𑀔𑀼𑀦𑀻𑀦𑀺𑀮𑀬𑀸 𑀢𑀤𑀸.

𑁧𑁧𑁨. ‘‘𑀉𑀧𑀲𑁆𑀲𑀬𑁂 𑀬𑀸𑀥𑀺𑀯𑀢𑁆𑀣𑀸, 𑀤𑁂𑀯𑀢𑀸 𑀢𑀸 𑀔𑀫𑀦𑁆𑀢𑀼 𑀫𑁂;

𑀪𑀺𑀓𑁆𑀔𑀼𑀦𑀻𑀦𑀺𑀮𑀬𑀲𑁆𑀲𑁂𑀤𑀁, 𑀧𑀘𑁆𑀙𑀺𑀫𑀁 𑀤𑀲𑁆𑀲𑀦𑀁 𑀫𑀫.

𑁧𑁧𑁩. ‘‘𑀦 𑀚𑀭𑀸 𑀫𑀘𑁆𑀘𑀼 𑀯𑀸 𑀬𑀢𑁆𑀣, 𑀅𑀧𑁆𑀧𑀺𑀬𑁂𑀳𑀺 𑀲𑀫𑀸𑀕𑀫𑁄;

𑀧𑀺𑀬𑁂𑀳𑀺 𑀦 𑀯𑀺𑀬𑁄𑀕𑁄𑀢𑁆𑀣𑀺, 𑀢𑀁 𑀯𑀚𑀺𑀲𑁆𑀲𑀁 [𑀢𑀁 𑀯𑀚𑁆𑀚𑀺𑀬𑀁 (𑀲𑁆𑀬𑀸.)] 𑀅𑀲𑀗𑁆𑀔𑀢𑀁.

𑁧𑁧𑁪. ‘‘𑀅𑀯𑀻𑀢𑀭𑀸𑀕𑀸 𑀢𑀁 𑀲𑀼𑀢𑁆𑀯𑀸, 𑀯𑀘𑀦𑀁 𑀲𑀼𑀕𑀢𑁄𑀭𑀲𑀸;

𑀲𑁄𑀓𑀝𑁆𑀝𑀸 𑀧𑀭𑀺𑀤𑁂𑀯𑀺𑀁𑀲𑀼, 𑀅𑀳𑁄 𑀦𑁄 𑀅𑀧𑁆𑀧𑀧𑀼𑀜𑁆𑀜𑀢𑀸.

𑁧𑁧𑁫. ‘‘𑀪𑀺𑀓𑁆𑀔𑀼𑀦𑀻𑀦𑀺𑀮𑀬𑁄 𑀲𑀼𑀜𑁆𑀜𑁄, 𑀪𑀽𑀢𑁄 𑀢𑀸𑀳𑀺 𑀯𑀺𑀦𑀸 𑀅𑀬𑀁;

𑀧𑀪𑀸𑀢𑁂 𑀯𑀺𑀬 𑀢𑀸𑀭𑀸𑀬𑁄, 𑀦 𑀤𑀺𑀲𑁆𑀲𑀦𑁆𑀢𑀺 𑀚𑀺𑀦𑁄𑀭𑀲𑀸.

𑁧𑁧𑁬. ‘‘𑀦𑀺𑀩𑁆𑀩𑀸𑀦𑀁 𑀕𑁄𑀢𑀫𑀻 𑀬𑀸𑀢𑀺, 𑀲𑀢𑁂𑀳𑀺 𑀲𑀳 𑀧𑀜𑁆𑀘𑀳𑀺;

𑀦𑀤𑀻𑀲𑀢𑁂𑀳𑀺𑀯 𑀲𑀳, 𑀕𑀗𑁆𑀕𑀸 𑀧𑀜𑁆𑀘𑀳𑀺 𑀲𑀸𑀕𑀭𑀁.

𑁧𑁧𑁭. ‘‘𑀭𑀣𑀺𑀬𑀸𑀬 𑀯𑀚𑀦𑁆𑀢𑀺𑀬𑁄 [𑀯𑀚𑀦𑁆𑀢𑀺𑀁 𑀢𑀁 (𑀲𑀻.), 𑀯𑀚𑀦𑁆𑀢𑀺 𑀢𑀁 (𑀲𑁆𑀬𑀸.), 𑀯𑀚𑀦𑁆𑀢𑀸𑀦𑀁 (𑀧𑀻.)], 𑀤𑀺𑀲𑁆𑀯𑀸 𑀲𑀤𑁆𑀥𑀸 𑀉𑀧𑀸𑀲𑀺𑀓𑀸;

𑀖𑀭𑀸 𑀦𑀺𑀓𑁆𑀔𑀫𑁆𑀫 𑀧𑀸𑀤𑁂𑀲𑀼, 𑀦𑀺𑀧𑀘𑁆𑀘 𑀇𑀤𑀫𑀩𑁆𑀭𑀯𑀼𑀁.

𑁧𑁧𑁮. ‘‘‘𑀧𑀲𑀻𑀤𑀲𑁆𑀲𑀼 𑀫𑀳𑀸𑀪𑁄𑀕𑁂, 𑀅𑀦𑀸𑀣𑀸𑀬𑁄 𑀯𑀺𑀳𑀸𑀬 𑀦𑁄;

𑀢𑀬𑀸 𑀦 𑀬𑀼𑀢𑁆𑀢𑀸 [𑀬𑀼𑀢𑁆𑀢𑀁 (𑀲𑀻. 𑀲𑁆𑀬𑀸. 𑀧𑀻.)] 𑀦𑀺𑀩𑁆𑀩𑀸𑀢𑀼𑀁, 𑀇𑀘𑁆𑀙𑀝𑁆𑀝𑀸 𑀯𑀺𑀮𑀧𑀺𑀁𑀲𑀼 𑀢𑀸’.

𑁧𑁧𑁯. ‘‘𑀢𑀸𑀲𑀁 𑀲𑁄𑀓𑀧𑀳𑀸𑀦𑀢𑁆𑀣𑀁, 𑀅𑀯𑁄𑀘 𑀫𑀥𑀼𑀭𑀁 𑀕𑀺𑀭𑀁;

‘𑀭𑀼𑀤𑀺𑀢𑁂𑀦 𑀅𑀮𑀁 𑀧𑀼𑀢𑁆𑀢𑀸, 𑀳𑀸𑀲𑀓𑀸𑀮𑁄𑀬𑀫𑀚𑁆𑀚 𑀯𑁄.

𑁧𑁨𑁦. ‘‘‘𑀧𑀭𑀺𑀜𑁆𑀜𑀸𑀢𑀁 𑀫𑀬𑀸 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀳𑁂𑀢𑀼 𑀯𑀺𑀯𑀚𑁆𑀚𑀺𑀢𑁄;

𑀦𑀺𑀭𑁄𑀥𑁄 𑀫𑁂 𑀲𑀘𑁆𑀙𑀺𑀓𑀢𑁄, 𑀫𑀕𑁆𑀕𑁄 𑀘𑀸𑀧𑀺 𑀲𑀼𑀪𑀸𑀯𑀺𑀢𑁄.

𑀧𑀞𑀫𑀁 𑀪𑀸𑀡𑀯𑀸𑀭𑀁.

𑁧𑁨𑁧. ‘‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

𑁧𑁨𑁨. ‘‘‘𑀬𑀲𑁆𑀲𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀸, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄.

𑁧𑁨𑁩. ‘‘‘𑀩𑀼𑀤𑁆𑀥𑁄 𑀢𑀲𑁆𑀲 𑀘 𑀲𑀤𑁆𑀥𑀫𑁆𑀫𑁄, 𑀅𑀦𑀽𑀦𑁄 𑀬𑀸𑀯 𑀢𑀺𑀝𑁆𑀞𑀢𑀺;

𑀦𑀺𑀩𑁆𑀩𑀸𑀢𑀼𑀁 𑀢𑀸𑀯 𑀓𑀸𑀮𑁄 𑀫𑁂, 𑀫𑀸 𑀫𑀁 𑀲𑁄𑀘𑀣 𑀧𑀼𑀢𑁆𑀢𑀺𑀓𑀸.

𑁧𑁨𑁪. ‘‘‘𑀓𑁄𑀡𑁆𑀟𑀜𑁆𑀜𑀸𑀦𑀦𑁆𑀤𑀦𑀦𑁆𑀤𑀸𑀤𑀻, 𑀢𑀺𑀝𑁆𑀞𑀦𑁆𑀢𑀺 𑀭𑀸𑀳𑀼𑀮𑁄 𑀚𑀺𑀦𑁄;

𑀲𑀼𑀔𑀺𑀢𑁄 𑀲𑀳𑀺𑀢𑁄 𑀲𑀗𑁆𑀖𑁄, 𑀳𑀢𑀤𑀩𑁆𑀩𑀸 𑀘 𑀢𑀺𑀢𑁆𑀣𑀺𑀬𑀸.

𑁧𑁨𑁫. ‘‘‘𑀑𑀓𑁆𑀓𑀸𑀓𑀯𑀁𑀲𑀲𑁆𑀲 𑀬𑀲𑁄, 𑀉𑀲𑁆𑀲𑀺𑀢𑁄 𑀫𑀸𑀭𑀫𑀤𑁆𑀤𑀦𑁄;

𑀦𑀦𑀼 𑀲𑀫𑁆𑀧𑀢𑀺 𑀓𑀸𑀮𑁄 𑀫𑁂, 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀧𑀼𑀢𑁆𑀢𑀺𑀓𑀸.

𑁧𑁨𑁬. ‘‘‘𑀘𑀺𑀭𑀧𑁆𑀧𑀪𑀼𑀢𑀺 𑀬𑀁 𑀫𑀬𑁆𑀳𑀁, 𑀧𑀢𑁆𑀣𑀺𑀢𑀁 𑀅𑀚𑁆𑀚 𑀲𑀺𑀚𑁆𑀛𑀢𑁂;

𑀆𑀦𑀦𑁆𑀤𑀪𑁂𑀭𑀺𑀓𑀸𑀮𑁄𑀬𑀁, 𑀓𑀺𑀁 𑀯𑁄 𑀅𑀲𑁆𑀲𑀽𑀳𑀺 𑀧𑀼𑀢𑁆𑀢𑀺𑀓𑀸.

𑁧𑁨𑁭. ‘‘‘𑀲𑀘𑁂 𑀫𑀬𑀺 𑀤𑀬𑀸 𑀅𑀢𑁆𑀣𑀺, 𑀬𑀤𑀺 𑀘𑀢𑁆𑀣𑀺 𑀓𑀢𑀜𑁆𑀜𑀼𑀢𑀸;

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀲𑀩𑁆𑀩𑀸, 𑀓𑀭𑁄𑀣 𑀯𑀻𑀭𑀺𑀬𑀁 𑀤𑀴𑁆𑀳𑀁.

𑁧𑁨𑁮. ‘‘‘𑀣𑀻𑀦𑀁 𑀅𑀤𑀸𑀲𑀺 𑀧𑀩𑁆𑀩𑀚𑁆𑀚𑀁, 𑀲𑀫𑁆𑀩𑀼𑀤𑁆𑀥𑁄 𑀬𑀸𑀘𑀺𑀢𑁄 𑀫𑀬𑀸;

𑀢𑀲𑁆𑀫𑀸 𑀬𑀣𑀸𑀳𑀁 𑀦𑀦𑁆𑀤𑀺𑀲𑁆𑀲𑀁, 𑀢𑀣𑀸 𑀢𑀫𑀦𑀼𑀢𑀺𑀝𑁆𑀞𑀣’.

𑁧𑁨𑁯. ‘‘𑀢𑀸 𑀏𑀯𑀫𑀦𑀼𑀲𑀸𑀲𑀺𑀢𑁆𑀯𑀸, 𑀪𑀺𑀓𑁆𑀔𑀼𑀦𑀻𑀳𑀺 𑀧𑀼𑀭𑀓𑁆𑀔𑀢𑀸;

𑀉𑀧𑁂𑀘𑁆𑀘 𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁩𑁦. ‘‘‘𑀅𑀳𑀁 𑀲𑀼𑀕𑀢 𑀢𑁂 𑀫𑀸𑀢𑀸, 𑀢𑁆𑀯𑀜𑁆𑀘 𑀯𑀻𑀭 𑀧𑀺𑀢𑀸 𑀫𑀫;

𑀲𑀤𑁆𑀥𑀫𑁆𑀫𑀲𑀼𑀔𑀤 [𑀲𑀤𑁆𑀥𑀫𑁆𑀫𑀲𑀼𑀔𑀤𑁄 (𑀲𑀻. 𑀲𑁆𑀬𑀸. 𑀧𑀻.)] 𑀦𑀸𑀣, 𑀢𑀬𑀸 𑀚𑀸𑀢𑀸𑀫𑁆𑀳𑀺 𑀕𑁄𑀢𑀫.

𑁧𑁩𑁧. ‘‘‘𑀲𑀁𑀯𑀤𑁆𑀥𑀺𑀢𑁄𑀬𑀁 𑀲𑀼𑀕𑀢, 𑀭𑀽𑀧𑀓𑀸𑀬𑁄 𑀫𑀬𑀸 𑀢𑀯;

𑀅𑀦𑀺𑀦𑁆𑀤𑀺𑀢𑁄 [𑀆𑀦𑀦𑁆𑀤𑀺𑀬𑁄 (𑀲𑁆𑀬𑀸.), 𑀅𑀦𑀺𑀦𑁆𑀤𑀺𑀬𑁄 (𑀧𑀻.)] 𑀥𑀫𑁆𑀫𑀓𑀸𑀬𑁄 [𑀥𑀫𑁆𑀫𑀢𑀦𑀼 (𑀲𑀻. 𑀧𑀻. 𑀓.)], 𑀫𑀫 𑀲𑀁𑀯𑀤𑁆𑀥𑀺𑀢𑁄 𑀢𑀬𑀸.

𑁧𑁩𑁨. ‘‘‘𑀫𑀼𑀳𑀼𑀢𑁆𑀢𑀁 𑀢𑀡𑁆𑀳𑀸𑀲𑀫𑀡𑀁, 𑀔𑀻𑀭𑀁 𑀢𑁆𑀯𑀁 𑀧𑀸𑀬𑀺𑀢𑁄 𑀫𑀬𑀸;

𑀢𑀬𑀸𑀳𑀁 𑀲𑀦𑁆𑀢𑀫𑀘𑁆𑀘𑀦𑁆𑀢𑀁, 𑀥𑀫𑁆𑀫𑀔𑀻𑀭𑀜𑁆𑀳𑀺 [𑀥𑀫𑁆𑀫𑀔𑀻𑀭𑀫𑁆𑀧𑀺 (𑀲𑁆𑀬𑀸., 𑀓.)] 𑀧𑀸𑀬𑀺𑀢𑀸.

𑁧𑁩𑁩. ‘‘‘𑀩𑀦𑁆𑀥𑀦𑀸𑀭𑀓𑁆𑀔𑀦𑁂 𑀫𑀬𑁆𑀳𑀁, 𑀅𑀡𑀡𑁄 [𑀅𑀦𑀡𑁄 (𑀲𑀻. 𑀲𑁆𑀬𑀸. 𑀧𑀻.)] 𑀢𑁆𑀯𑀁 𑀫𑀳𑀸𑀫𑀼𑀦𑁂;

𑀧𑀼𑀢𑁆𑀢𑀓𑀸𑀫𑀸 𑀣𑀺𑀬𑁄 𑀬𑀸𑀘𑀁, 𑀮𑀪𑀦𑁆𑀢𑀺 𑀢𑀸𑀤𑀺𑀲𑀁 𑀲𑀼𑀢𑀁.

𑁧𑁩𑁪. ‘‘‘𑀫𑀦𑁆𑀥𑀸𑀢𑀸𑀤𑀺𑀦𑀭𑀺𑀦𑁆𑀤𑀸𑀦𑀁, 𑀬𑀸 𑀫𑀸𑀢𑀸 𑀲𑀸 𑀪𑀯𑀡𑁆𑀡𑀯𑁂;

𑀦𑀺𑀫𑀼𑀕𑁆𑀕𑀸𑀳𑀁 𑀢𑀬𑀸 𑀧𑀼𑀢𑁆𑀢, 𑀢𑀸𑀭𑀺𑀢𑀸 𑀪𑀯𑀲𑀸𑀕𑀭𑀸.

𑁧𑁩𑁫. ‘‘‘𑀭𑀜𑁆𑀜𑁄 𑀫𑀸𑀢𑀸 𑀫𑀳𑁂𑀲𑀻𑀢𑀺, 𑀲𑀼𑀮𑀪𑀁 𑀦𑀸𑀫𑀫𑀺𑀢𑁆𑀣𑀺𑀦𑀁;

𑀩𑀼𑀤𑁆𑀥𑀫𑀸𑀢𑀸𑀢𑀺 𑀬𑀁 𑀦𑀸𑀫𑀁, 𑀏𑀢𑀁 𑀧𑀭𑀫𑀤𑀼𑀮𑁆𑀮𑀪𑀁.

𑁧𑁩𑁬. ‘‘‘𑀢𑀜𑁆𑀘 𑀮𑀤𑁆𑀥𑀁 𑀫𑀳𑀸𑀯𑀻𑀭, 𑀧𑀡𑀺𑀥𑀸𑀦𑀁 𑀫𑀫𑀁 𑀢𑀬𑀸;

𑀅𑀡𑀼𑀓𑀁 𑀯𑀸 𑀫𑀳𑀦𑁆𑀢𑀁 𑀯𑀸, 𑀢𑀁 𑀲𑀩𑁆𑀩𑀁 𑀧𑀽𑀭𑀺𑀢𑀁 𑀫𑀬𑀸.

𑁧𑁩𑁭. ‘‘‘𑀧𑀭𑀺𑀦𑀺𑀩𑁆𑀩𑀸𑀢𑀼𑀫𑀺𑀘𑁆𑀙𑀸𑀫𑀺, 𑀯𑀺𑀳𑀸𑀬𑁂𑀫𑀁 𑀓𑀴𑁂𑀯𑀭𑀁;

𑀅𑀦𑀼𑀚𑀸𑀦𑀸𑀳𑀺 𑀫𑁂 𑀯𑀻𑀭, 𑀤𑀼𑀓𑁆𑀔𑀦𑁆𑀢𑀓𑀭 𑀦𑀸𑀬𑀓.

𑁧𑁩𑁮. ‘‘‘𑀘𑀓𑁆𑀓𑀗𑁆𑀓𑀼𑀲𑀥𑀚𑀸𑀓𑀺𑀡𑁆𑀡𑁂, 𑀧𑀸𑀤𑁂 𑀓𑀫𑀮𑀓𑁄𑀫𑀮𑁂;

𑀧𑀲𑀸𑀭𑁂𑀳𑀺 𑀧𑀡𑀸𑀫𑀁 𑀢𑁂, 𑀓𑀭𑀺𑀲𑁆𑀲𑀁 𑀧𑀼𑀢𑁆𑀢𑀉𑀢𑁆𑀢𑀫𑁂 [𑀧𑀼𑀢𑁆𑀢𑀧𑁂𑀫𑀲𑀸 (𑀲𑀻. 𑀧𑀻.), 𑀧𑀼𑀢𑁆𑀢𑀧𑁂𑀫𑀳𑀁 (𑀲𑁆𑀬𑀸.)].

𑁧𑁩𑁯. ‘‘‘𑀲𑀼𑀯𑀡𑁆𑀡𑀭𑀸𑀲𑀺𑀲𑀗𑁆𑀓𑀸𑀲𑀁, 𑀲𑀭𑀻𑀭𑀁 𑀓𑀼𑀭𑀼 𑀧𑀸𑀓𑀝𑀁;

𑀓𑀢𑁆𑀯𑀸 𑀤𑁂𑀳𑀁 𑀲𑀼𑀤𑀺𑀝𑁆𑀞𑀁 𑀢𑁂, 𑀲𑀦𑁆𑀢𑀺𑀁 𑀕𑀘𑁆𑀙𑀸𑀫𑀺 𑀦𑀸𑀬𑀓’.

𑁧𑁪𑁦. ‘‘𑀤𑁆𑀯𑀢𑁆𑀢𑀺𑀁𑀲𑀮𑀓𑁆𑀔𑀡𑀽𑀧𑁂𑀢𑀁, 𑀲𑀼𑀧𑁆𑀧𑀪𑀸𑀮𑀗𑁆𑀓𑀢𑀁 𑀢𑀦𑀼𑀁;

𑀲𑀜𑁆𑀛𑀸𑀖𑀦𑀸𑀯 𑀩𑀸𑀮𑀓𑁆𑀓𑀁, 𑀫𑀸𑀢𑀼𑀘𑁆𑀙𑀁 𑀤𑀲𑁆𑀲𑀬𑀻 𑀚𑀺𑀦𑁄.

𑁧𑁪𑁧. ‘‘𑀨𑀼𑀮𑁆𑀮𑀸𑀭𑀯𑀺𑀦𑁆𑀤𑀲𑀁𑀓𑀸𑀲𑁂, 𑀢𑀭𑀼𑀡𑀸𑀤𑀺𑀘𑁆𑀘𑀲𑀧𑁆𑀧𑀪𑁂;

𑀘𑀓𑁆𑀓𑀗𑁆𑀓𑀺𑀢𑁂 𑀧𑀸𑀤𑀢𑀮𑁂, 𑀢𑀢𑁄 𑀲𑀸 𑀲𑀺𑀭𑀲𑀸 𑀧𑀢𑀺.

𑁧𑁪𑁨. ‘‘‘𑀧𑀡𑀫𑀸𑀫𑀺 𑀦𑀭𑀸𑀤𑀺𑀘𑁆𑀘, 𑀆𑀤𑀺𑀘𑁆𑀘𑀓𑀼𑀮𑀓𑁂𑀢𑀼𑀓𑀁;

𑀧𑀘𑁆𑀙𑀺𑀫𑁂 𑀫𑀭𑀡𑁂 𑀫𑀬𑁆𑀳𑀁 [𑀲𑀭𑀡𑀁 𑀫𑀬𑁆𑀳𑀁 (𑀲𑁆𑀬𑀸.)], 𑀦 𑀢𑀁 𑀇𑀓𑁆𑀔𑀸𑀫𑀳𑀁 𑀧𑀼𑀦𑁄.

𑁧𑁪𑁩. ‘‘‘𑀇𑀢𑁆𑀣𑀺𑀬𑁄 𑀦𑀸𑀫 𑀮𑁄𑀓𑀕𑁆𑀕, 𑀲𑀩𑁆𑀩𑀤𑁄𑀲𑀸𑀓𑀭𑀸 𑀫𑀢𑀸;

𑀬𑀤𑀺 𑀓𑁄 𑀘𑀢𑁆𑀣𑀺 𑀤𑁄𑀲𑁄 𑀫𑁂, 𑀔𑀫𑀲𑁆𑀲𑀼 𑀓𑀭𑀼𑀡𑀸𑀓𑀭.

𑁧𑁪𑁪. ‘‘‘𑀇𑀢𑁆𑀣𑀺𑀓𑀸𑀦𑀜𑁆𑀘 𑀧𑀩𑁆𑀩𑀚𑁆𑀚𑀁, 𑀳𑀁 𑀢𑀁 𑀬𑀸𑀘𑀺𑀁 𑀧𑀼𑀦𑀧𑁆𑀧𑀼𑀦𑀁;

𑀢𑀢𑁆𑀣 𑀘𑁂 𑀅𑀢𑁆𑀣𑀺 𑀤𑁄𑀲𑁄 𑀫𑁂, 𑀢𑀁 𑀔𑀫𑀲𑁆𑀲𑀼 𑀦𑀭𑀸𑀲𑀪.

𑁧𑁪𑁫. ‘‘‘𑀫𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀻𑀭, 𑀢𑀯𑀸𑀦𑀼𑀜𑁆𑀜𑀸𑀬 𑀲𑀸𑀲𑀺𑀢𑀸;

𑀢𑀢𑁆𑀭 𑀘𑁂 𑀅𑀢𑁆𑀣𑀺 𑀤𑀼𑀦𑁆𑀦𑀻𑀢𑀁, 𑀢𑀁 𑀔𑀫𑀲𑁆𑀲𑀼 𑀔𑀫𑀸𑀥𑀺𑀧 [𑀔𑀫𑀸𑀥𑀺𑀢𑀺 (𑀲𑁆𑀬𑀸.), 𑀔𑀫𑀸𑀧𑀺𑀢𑁄 (𑀓.)].

𑁧𑁪𑁬. ‘‘‘𑀅𑀓𑁆𑀔𑀦𑁆𑀢𑁂 𑀦𑀸𑀫 𑀔𑀦𑁆𑀢𑀩𑁆𑀩𑀁, 𑀓𑀺𑀁 𑀪𑀯𑁂 𑀕𑀼𑀡𑀪𑀽𑀲𑀦𑁂;

𑀓𑀺𑀫𑀼𑀢𑁆𑀢𑀭𑀁 𑀢𑁂 𑀯𑀓𑁆𑀔𑀸𑀫𑀺, 𑀦𑀺𑀩𑁆𑀩𑀸𑀦𑀸𑀬 𑀯𑀚𑀦𑁆𑀢𑀺𑀬𑀸.

𑁧𑁪𑁭. ‘‘‘𑀲𑀼𑀤𑁆𑀥𑁂 𑀅𑀦𑀽𑀦𑁂 𑀫𑀫 𑀪𑀺𑀓𑁆𑀔𑀼𑀲𑀗𑁆𑀖𑁂, 𑀮𑁄𑀓𑀸 𑀇𑀢𑁄 𑀦𑀺𑀲𑁆𑀲𑀭𑀺𑀢𑀼𑀁 𑀔𑀫𑀦𑁆𑀢𑁂;

𑀧𑀪𑀸𑀢𑀓𑀸𑀮𑁂 𑀩𑁆𑀬𑀲𑀦𑀗𑁆𑀕𑀢𑀸𑀦𑀁, 𑀤𑀺𑀲𑁆𑀯𑀸𑀦 𑀦𑀺𑀬𑁆𑀬𑀸𑀢𑀺𑀯 𑀘𑀦𑁆𑀤𑀮𑁂𑀔𑀸’.

𑁧𑁪𑁮. ‘‘‘𑀢𑀤𑁂𑀢𑀭𑀸 𑀪𑀺𑀓𑁆𑀔𑀼𑀦𑀺𑀬𑁄 𑀚𑀺𑀦𑀕𑁆𑀕𑀁, 𑀢𑀸𑀭𑀸𑀯 𑀘𑀦𑁆𑀤𑀸𑀦𑀼𑀕𑀢𑀸 𑀲𑀼𑀫𑁂𑀭𑀼𑀁;

𑀧𑀤𑀓𑁆𑀔𑀺𑀡𑀁 𑀓𑀘𑁆𑀘 𑀦𑀺𑀧𑀘𑁆𑀘 𑀧𑀸𑀤𑁂, 𑀞𑀺𑀢𑀸 𑀫𑀼𑀔𑀦𑁆𑀢𑀁 𑀲𑀫𑀼𑀤𑀺𑀓𑁆𑀔𑀫𑀸𑀦𑀸.

𑁧𑁪𑁯. ‘‘‘𑀦 𑀢𑀺𑀢𑁆𑀢𑀺𑀧𑀼𑀩𑁆𑀩𑀁 𑀢𑀯 𑀤𑀲𑁆𑀲𑀦𑁂𑀦, 𑀘𑀓𑁆𑀔𑀼𑀁 𑀦 𑀲𑁄𑀢𑀁 𑀢𑀯 𑀪𑀸𑀲𑀺𑀢𑁂𑀦;

𑀘𑀺𑀢𑁆𑀢𑀁 𑀫𑀫𑀁 𑀓𑁂𑀯𑀮𑀫𑁂𑀓𑀫𑁂𑀯, 𑀧𑀧𑁆𑀧𑀼𑀬𑁆𑀬 𑀢𑀁 𑀥𑀫𑁆𑀫𑀭𑀲𑁂𑀦 𑀢𑀺𑀢𑁆𑀢𑀺.

𑁧𑁫𑁦. ‘‘‘𑀦𑀤𑀢𑁄 𑀧𑀭𑀺𑀲𑀸𑀬𑀁 𑀢𑁂, 𑀯𑀸𑀤𑀺𑀢𑀩𑁆𑀩𑀧𑀳𑀸𑀭𑀺𑀦𑁄;

𑀬𑁂 𑀢𑁂 𑀤𑀓𑁆𑀔𑀦𑁆𑀢𑀺 𑀯𑀤𑀦𑀁, 𑀥𑀜𑁆𑀜𑀸 𑀢𑁂 𑀦𑀭𑀧𑀼𑀗𑁆𑀕𑀯.

𑁧𑁫𑁧. ‘‘‘𑀤𑀻𑀖𑀗𑁆𑀕𑀼𑀮𑀻 𑀢𑀫𑁆𑀩𑀦𑀔𑁂, 𑀲𑀼𑀪𑁂 𑀆𑀬𑀢𑀧𑀡𑁆𑀳𑀺𑀓𑁂;

𑀬𑁂 𑀧𑀸𑀤𑁂 𑀧𑀡𑀫𑀺𑀲𑁆𑀲𑀦𑁆𑀢𑀺 [𑀧𑀡𑀫𑀸𑀬𑀦𑁆𑀢𑀺 (𑀲𑁆𑀬𑀸.)], 𑀢𑁂𑀧𑀺 𑀥𑀜𑁆𑀜𑀸 𑀕𑀼𑀡𑀦𑁆𑀥𑀭.

𑁧𑁫𑁨. ‘‘‘𑀫𑀥𑀼𑀭𑀸𑀦𑀺 𑀧𑀳𑀝𑁆𑀞𑀸𑀦𑀺, 𑀤𑁄𑀲𑀕𑁆𑀖𑀸𑀦𑀺 𑀳𑀺𑀢𑀸𑀦𑀺 𑀘;

𑀬𑁂 𑀢𑁂 𑀯𑀸𑀓𑁆𑀬𑀸𑀦𑀺 𑀲𑀼𑀬𑁆𑀬𑀦𑁆𑀢𑀺, 𑀢𑁂𑀧𑀺 𑀥𑀜𑁆𑀜𑀸 𑀦𑀭𑀼𑀢𑁆𑀢𑀫.

𑁧𑁫𑁩. ‘‘‘𑀥𑀜𑁆𑀜𑀸𑀳𑀁 𑀢𑁂 𑀫𑀳𑀸𑀯𑀻𑀭, 𑀧𑀸𑀤𑀧𑀽𑀚𑀦𑀢𑀧𑁆𑀧𑀭𑀸 [𑀫𑀸𑀦𑀧𑀽𑀚𑀦𑀢𑀧𑁆𑀧𑀭𑀸 (𑀓.)];

𑀢𑀺𑀡𑁆𑀡𑀲𑀁𑀲𑀸𑀭𑀓𑀦𑁆𑀢𑀸𑀭𑀸, 𑀲𑀼𑀯𑀸𑀓𑁆𑀬𑁂𑀦 𑀲𑀺𑀭𑀻𑀫𑀢𑁄’.

𑁧𑁫𑁪. ‘‘𑀢𑀢𑁄 𑀲𑀸 𑀅𑀦𑀼𑀲𑀸𑀯𑁂𑀢𑁆𑀯𑀸 [𑀅𑀦𑀼𑀫𑀸𑀦𑁂 𑀢𑁆𑀯𑀸 (𑀓.)], 𑀪𑀺𑀓𑁆𑀔𑀼𑀲𑀗𑁆𑀖𑀫𑁆𑀧𑀺 𑀲𑀼𑀩𑁆𑀩𑀢𑀸;

𑀭𑀸𑀳𑀼𑀮𑀸𑀦𑀦𑁆𑀤𑀦𑀦𑁆𑀤𑁂 𑀘, 𑀯𑀦𑁆𑀤𑀺𑀢𑁆𑀯𑀸 𑀇𑀤𑀫𑀩𑁆𑀭𑀯𑀺.

𑁧𑁫𑁫. ‘‘‘𑀆𑀲𑀻𑀯𑀺𑀲𑀸𑀮𑀬𑀲𑀫𑁂, 𑀭𑁄𑀕𑀸𑀯𑀸𑀲𑁂 𑀓𑀴𑁂𑀯𑀭𑁂;

𑀦𑀺𑀩𑁆𑀩𑀺𑀦𑁆𑀤𑀸 𑀤𑀼𑀓𑁆𑀔𑀲𑀗𑁆𑀖𑀸𑀝𑁂, 𑀚𑀭𑀸𑀫𑀭𑀡𑀕𑁄𑀘𑀭𑁂.

𑁧𑁫𑁬. ‘‘‘𑀦𑀸𑀦𑀸𑀓𑀮𑀺𑀫𑀮𑀸𑀓𑀺𑀡𑁆𑀡𑁂 [𑀦𑀸𑀦𑀸𑀓𑀼𑀡𑀧𑀫𑀮𑀸𑀓𑀺𑀡𑁆𑀡𑁂 (𑀲𑁆𑀬𑀸.), 𑀦𑀸𑀦𑀸𑀓𑀸𑀴𑀫𑀮𑀸𑀓𑀺𑀡𑁆𑀡𑁂 (𑀓.)], 𑀧𑀭𑀸𑀬𑀢𑁆𑀢𑁂 𑀦𑀺𑀭𑀻𑀳𑀓𑁂;

𑀢𑁂𑀦 𑀦𑀺𑀩𑁆𑀩𑀸𑀢𑀼𑀫𑀺𑀘𑁆𑀙𑀸𑀫𑀺, 𑀅𑀦𑀼𑀫𑀜𑁆𑀜𑀣 𑀧𑀼𑀢𑁆𑀢𑀓𑀸’.

𑁧𑁫𑁭. ‘‘𑀦𑀦𑁆𑀤𑁄 𑀭𑀸𑀳𑀼𑀮𑀪𑀤𑁆𑀤𑁄 𑀘, 𑀯𑀻𑀢𑀲𑁄𑀓𑀸 𑀦𑀺𑀭𑀸𑀲𑀯𑀸;

𑀞𑀺𑀢𑀸𑀘𑀮𑀝𑁆𑀞𑀺𑀢𑀺 𑀣𑀺𑀭𑀸, 𑀥𑀫𑁆𑀫𑀢𑀫𑀦𑀼𑀘𑀺𑀦𑁆𑀢𑀬𑀼𑀁.

𑁧𑁫𑁮. ‘‘‘𑀥𑀺𑀭𑀢𑁆𑀣𑀼 𑀲𑀗𑁆𑀔𑀢𑀁 𑀮𑁄𑀮𑀁, 𑀅𑀲𑀸𑀭𑀁 𑀓𑀤𑀮𑀽𑀧𑀫𑀁;

𑀫𑀸𑀬𑀸𑀫𑀭𑀻𑀘𑀺𑀲𑀤𑀺𑀲𑀁, 𑀇𑀢𑀭𑀁 𑀅𑀦𑀯𑀝𑁆𑀞𑀺𑀢𑀁.

𑁧𑁫𑁯. ‘‘‘𑀬𑀢𑁆𑀣 𑀦𑀸𑀫 𑀚𑀺𑀦𑀲𑁆𑀲𑀸𑀬𑀁, 𑀫𑀸𑀢𑀼𑀘𑁆𑀙𑀸 𑀩𑀼𑀤𑁆𑀥𑀧𑁄𑀲𑀺𑀓𑀸;

𑀕𑁄𑀢𑀫𑀻 𑀦𑀺𑀥𑀦𑀁 𑀬𑀸𑀢𑀺, 𑀅𑀦𑀺𑀘𑁆𑀘𑀁 𑀲𑀩𑁆𑀩𑀲𑀗𑁆𑀔𑀢𑀁’.

𑁧𑁬𑁦. ‘‘𑀆𑀦𑀦𑁆𑀤𑁄 𑀘 𑀢𑀤𑀸 𑀲𑁂𑀔𑁄, 𑀲𑁄𑀓𑀝𑁆𑀝𑁄 [𑀓𑀦𑀺𑀝𑁆𑀞𑁄 (𑀲𑁆𑀬𑀸.)] 𑀚𑀺𑀦𑀯𑀘𑁆𑀙𑀮𑁄;

𑀢𑀢𑁆𑀣𑀲𑁆𑀲𑀽𑀦𑀺 𑀓𑀭𑁄𑀦𑁆𑀢𑁄 𑀲𑁄, 𑀓𑀭𑀼𑀡𑀁 𑀧𑀭𑀺𑀤𑁂𑀯𑀢𑀺.

𑁧𑁬𑁧. ‘‘𑀳𑀸 𑀲𑀦𑁆𑀢𑀺𑀁 [𑀪𑀸𑀲𑀦𑁆𑀢𑀻 (𑀲𑁆𑀬𑀸.)] 𑀕𑁄𑀢𑀫𑀻 𑀬𑀸𑀢𑀺, 𑀦𑀽𑀦 𑀩𑀼𑀤𑁆𑀥𑁄𑀧𑀺 𑀦𑀺𑀩𑁆𑀩𑀼𑀢𑀺𑀁;

𑀕𑀘𑁆𑀙𑀢𑀺 𑀦 𑀘𑀺𑀭𑁂𑀦𑁂𑀯, 𑀅𑀕𑁆𑀕𑀺𑀭𑀺𑀯 𑀦𑀺𑀭𑀺𑀦𑁆𑀥𑀦𑁄.

𑁧𑁬𑁨. ‘‘𑀏𑀯𑀁 𑀯𑀺𑀮𑀸𑀧𑀫𑀸𑀦𑀁 𑀢𑀁, 𑀆𑀦𑀦𑁆𑀤𑀁 𑀆𑀳 𑀕𑁄𑀢𑀫𑀻;

𑀲𑀼𑀢𑀲𑀸𑀕𑀭𑀕𑀫𑁆𑀪𑀻𑀭, 𑀩𑀼𑀤𑁆𑀥𑁄𑀧𑀝𑁆𑀞𑀸𑀦𑀢𑀧𑁆𑀧𑀭.

𑁧𑁬𑁩. ‘‘‘𑀦 𑀬𑀼𑀢𑁆𑀢𑀁 𑀲𑁄𑀘𑀺𑀢𑀼𑀁 𑀧𑀼𑀢𑁆𑀢, 𑀳𑀸𑀲𑀓𑀸𑀮𑁂 𑀉𑀧𑀝𑁆𑀞𑀺𑀢𑁂;

𑀢𑀬𑀸 𑀫𑁂 𑀲𑀭𑀡𑀁 𑀧𑀼𑀢𑁆𑀢, 𑀦𑀺𑀩𑁆𑀩𑀸𑀦𑀁 𑀢𑀫𑀼𑀧𑀸𑀕𑀢𑀁.

𑁧𑁬𑁪. ‘‘‘𑀢𑀬𑀸 𑀢𑀸𑀢 𑀲𑀫𑀚𑁆𑀛𑀺𑀝𑁆𑀞𑁄, 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀺 𑀦𑁄;

𑀫𑀸 𑀧𑀼𑀢𑁆𑀢 𑀯𑀺𑀫𑀦𑁄 𑀳𑁄𑀳𑀺, 𑀲𑀨𑀮𑁄 𑀢𑁂 𑀧𑀭𑀺𑀲𑁆𑀲𑀫𑁄.

𑁧𑁬𑁫. ‘‘‘𑀬𑀁 𑀦 𑀤𑀺𑀝𑁆𑀞𑀁 𑀧𑀼𑀭𑀸𑀡𑁂𑀳𑀺, 𑀢𑀺𑀢𑁆𑀣𑀺𑀓𑀸𑀘𑀭𑀺𑀬𑁂𑀳𑀺𑀧𑀺;

𑀢𑀁 𑀧𑀤𑀁 𑀲𑀼𑀓𑀼𑀫𑀸𑀭𑀻𑀳𑀺, 𑀲𑀢𑁆𑀢𑀯𑀲𑁆𑀲𑀸𑀳𑀺 𑀯𑁂𑀤𑀺𑀢𑀁.

𑁧𑁬𑁬. ‘‘‘𑀩𑀼𑀤𑁆𑀥𑀲𑀸𑀲𑀦𑀧𑀸𑀮𑁂𑀢, 𑀧𑀘𑁆𑀙𑀺𑀫𑀁 𑀤𑀲𑁆𑀲𑀦𑀁 𑀢𑀯;

𑀢𑀢𑁆𑀣 𑀕𑀘𑁆𑀙𑀸𑀫𑀳𑀁 𑀧𑀼𑀢𑁆𑀢, 𑀕𑀢𑁄 𑀬𑀢𑁆𑀣 𑀦 𑀤𑀺𑀲𑁆𑀲𑀢𑁂.

𑁧𑁬𑁭. ‘‘‘𑀓𑀤𑀸𑀘𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄, 𑀔𑀺𑀧𑀻 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀢𑀤𑀸𑀳𑀁 𑀆𑀲𑀻𑀲𑀯𑀸𑀘𑀁, 𑀅𑀯𑁄𑀘𑀁 𑀅𑀦𑀼𑀓𑀫𑁆𑀧𑀺𑀓𑀸.

𑁧𑁬𑁮. ‘‘‘𑀘𑀺𑀭𑀁 𑀚𑀻𑀯 𑀫𑀳𑀸𑀯𑀻𑀭, 𑀓𑀧𑁆𑀧𑀁 𑀢𑀺𑀝𑁆𑀞 𑀫𑀳𑀸𑀫𑀼𑀦𑁂;

𑀲𑀩𑁆𑀩𑀮𑁄𑀓𑀲𑁆𑀲 𑀅𑀢𑁆𑀣𑀸𑀬, 𑀪𑀯𑀲𑁆𑀲𑀼 𑀅𑀚𑀭𑀸𑀫𑀭𑁄.

𑁧𑁬𑁯. ‘‘‘𑀢𑀁 𑀢𑀣𑀸𑀯𑀸𑀤𑀺𑀦𑀺𑀁 𑀩𑀼𑀤𑁆𑀥𑁄, 𑀫𑀫𑀁 𑀲𑁄 𑀏𑀢𑀤𑀩𑁆𑀭𑀯𑀺;

‘𑀦 𑀳𑁂𑀯𑀁 𑀯𑀦𑁆𑀤𑀺𑀬𑀸 𑀩𑀼𑀤𑁆𑀥𑀸, 𑀬𑀣𑀸 𑀯𑀦𑁆𑀤𑀲𑀺 𑀕𑁄𑀢𑀫𑀻.

𑁧𑁭𑁦. ‘‘‘𑀓𑀣𑀁 𑀘𑀭𑀳𑀺 𑀲𑀩𑁆𑀩𑀜𑁆𑀜𑀽, 𑀯𑀦𑁆𑀤𑀺𑀢𑀩𑁆𑀩𑀸 𑀢𑀣𑀸𑀕𑀢𑀸;

𑀓𑀣𑀁 𑀅𑀯𑀦𑁆𑀤𑀺𑀬𑀸 𑀩𑀼𑀤𑁆𑀥𑀸, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.