𑁫. 𑀧𑀜𑁆𑀘𑀤𑀻𑀧𑀤𑀸𑀬𑀺𑀓𑀸𑀣𑁂𑀭𑀻𑀅𑀧𑀤𑀸𑀦𑀁

𑁬𑁧. ‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀘𑀸𑀭𑀺𑀓𑀻 [𑀘𑀸𑀭𑀺𑀓𑀸 (𑀲𑀻. 𑀲𑁆𑀬𑀸.)] 𑀆𑀲𑀳𑀁 𑀢𑀤𑀸;

𑀆𑀭𑀸𑀫𑁂𑀦 𑀘 𑀆𑀭𑀸𑀫𑀁 [𑀆𑀭𑀸𑀫𑁂𑀦 𑀯𑀺𑀳𑀸𑀭𑁂𑀦 (𑀲𑁆𑀬𑀸. 𑀧𑀻.)], 𑀘𑀭𑀸𑀫𑀺 𑀓𑀼𑀲𑀮𑀢𑁆𑀣𑀺𑀓𑀸.

𑁬𑁨. ‘‘𑀓𑀸𑀴𑀧𑀓𑁆𑀔𑀫𑁆𑀳𑀺 𑀤𑀺𑀯𑀲𑁂, 𑀅𑀤𑁆𑀤𑀲𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀩𑁄𑀥𑀺𑀫𑀽𑀮𑁂 𑀦𑀺𑀲𑀻𑀤𑀳𑀁.

𑁬𑁩. ‘‘𑀕𑀭𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑁂𑀢𑁆𑀯𑀸, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑁂𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀺 𑀢𑀸𑀯𑀤𑁂.

𑁬𑁪. ‘‘‘𑀬𑀤𑀺 𑀩𑀼𑀤𑁆𑀥𑁄 𑀅𑀫𑀺𑀢𑀕𑀼𑀡𑁄, 𑀅𑀲𑀫𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀻𑀭𑀁 𑀫𑁂, 𑀩𑁄𑀥𑀺 𑀑𑀪𑀸𑀲𑀢𑀼 𑀅𑀬𑀁’.

𑁬𑁫. ‘‘𑀲𑀳 𑀆𑀯𑀚𑁆𑀚𑀺𑀢𑁂 𑀫𑀬𑁆𑀳𑀁, 𑀩𑁄𑀥𑀺 𑀧𑀚𑁆𑀚𑀮𑀺 𑀢𑀸𑀯𑀤𑁂;

𑀲𑀩𑁆𑀩𑀲𑁄𑀡𑁆𑀡𑀫𑀬𑀸 𑀆𑀲𑀺, 𑀤𑀺𑀲𑀸 𑀲𑀩𑁆𑀩𑀸 𑀯𑀺𑀭𑁄𑀘𑀢𑀺.

𑁬𑁬. ‘‘𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀢𑀢𑁆𑀣, 𑀩𑁄𑀥𑀺𑀫𑀽𑀮𑁂 𑀦𑀺𑀲𑀻𑀤𑀳𑀁;

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀢𑁆𑀢𑁂, 𑀤𑀻𑀧𑀧𑀽𑀚𑀁 𑀅𑀓𑀸𑀲𑀳𑀁.

𑁬𑁭. ‘‘𑀆𑀲𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀧𑀜𑁆𑀘 𑀤𑀻𑀧𑀸𑀦𑀺 𑀧𑀚𑁆𑀚𑀮𑀼𑀁;

𑀬𑀸𑀯 𑀉𑀤𑁂𑀢𑀺 𑀲𑀽𑀭𑀺𑀬𑁄, 𑀤𑀻𑀧𑀸 𑀫𑁂 𑀧𑀚𑁆𑀚𑀮𑀼𑀁 𑀢𑀤𑀸.

𑁬𑁮. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁬𑁯. ‘‘𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀧𑀜𑁆𑀘𑀤𑀻𑀧𑀸𑀢𑀺 𑀯𑀼𑀘𑁆𑀘𑀢𑀺;

𑀲𑀝𑁆𑀞𑀺𑀬𑁄𑀚𑀦𑀫𑀼𑀩𑁆𑀩𑁂𑀥𑀁, 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁.

𑁭𑁦. ‘‘𑀅𑀲𑀗𑁆𑀔𑀺𑀬𑀸𑀦𑀺 𑀤𑀻𑀧𑀸𑀦𑀺, 𑀧𑀭𑀺𑀯𑀸𑀭𑁂 𑀚𑀮𑀺𑀁𑀲𑀼 𑀫𑁂;

𑀬𑀸𑀯𑀢𑀸 𑀤𑁂𑀯𑀪𑀯𑀦𑀁, 𑀤𑀻𑀧𑀸𑀮𑁄𑀓𑁂𑀦 𑀚𑁄𑀢𑀢𑀺.

𑁭𑁧. ‘‘𑀧𑀭𑀫𑁆𑀫𑀼𑀔𑀸 [𑀧𑀼𑀩𑁆𑀩𑀫𑀼𑀔𑀸 (𑀲𑁆𑀬𑀸.)] 𑀦𑀺𑀲𑀻𑀤𑀺𑀢𑁆𑀯𑀸, 𑀬𑀤𑀺 𑀇𑀘𑁆𑀙𑀸𑀫𑀺 𑀧𑀲𑁆𑀲𑀺𑀢𑀼𑀁;

𑀉𑀤𑁆𑀥𑀁 𑀅𑀥𑁄 𑀘 𑀢𑀺𑀭𑀺𑀬𑀁, 𑀲𑀩𑁆𑀩𑀁 𑀧𑀲𑁆𑀲𑀸𑀫𑀺 𑀘𑀓𑁆𑀔𑀼𑀦𑀸.

𑁭𑁨. ‘‘𑀬𑀸𑀯𑀢𑀸 𑀅𑀪𑀺𑀓𑀗𑁆𑀔𑀸𑀫𑀺, 𑀤𑀝𑁆𑀞𑀼𑀁 𑀲𑀼𑀕𑀢𑀤𑀼𑀕𑁆𑀕𑀢𑁂 [𑀲𑀼𑀓𑀢𑀤𑀼𑀓𑁆𑀓𑀝𑁂 (𑀧𑀻.)];

𑀢𑀢𑁆𑀣 𑀆𑀯𑀭𑀡𑀁 𑀦𑀢𑁆𑀣𑀺, 𑀭𑀼𑀓𑁆𑀔𑁂𑀲𑀼 𑀧𑀩𑁆𑀩𑀢𑁂𑀲𑀼 𑀯𑀸.

𑁭𑁩. ‘‘𑀅𑀲𑀻𑀢𑀺 𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀲𑀢𑀸𑀦𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

𑁭𑁪. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀤𑀻𑀧𑀲𑀢𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂 𑀚𑀮𑀦𑁆𑀢𑀺 𑀫𑁂.

𑁭𑁫. ‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀉𑀧𑁆𑀧𑀚𑁆𑀚𑀺𑀁 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑀸 𑀲𑀦𑁆𑀢𑀻, 𑀅𑀓𑁆𑀔𑀺 𑀫𑁂 𑀦 𑀦𑀺𑀫𑀻𑀮𑀢𑀺.

𑁭𑁬. ‘‘𑀤𑀻𑀧𑀲𑀢𑀲𑀳𑀲𑁆𑀲𑀸𑀦𑀺, 𑀧𑀼𑀜𑁆𑀜𑀓𑀫𑁆𑀫𑀲𑀫𑀗𑁆𑀕𑀺𑀢𑀸;

𑀚𑀮𑀦𑁆𑀢𑀺 𑀲𑀽𑀢𑀺𑀓𑀸𑀕𑁂𑀳𑁂, 𑀧𑀜𑁆𑀘𑀤𑀻𑀧𑀸𑀦𑀺𑀤𑀁 𑀨𑀮𑀁.

𑁭𑁭. ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀫𑀸𑀦𑀲𑀁 𑀯𑀺𑀦𑀺𑀯𑀢𑁆𑀢𑀬𑀺𑀁;

𑀅𑀚𑀭𑀸𑀫𑀢𑀁 𑀲𑀻𑀢𑀺𑀪𑀸𑀯𑀁, 𑀦𑀺𑀩𑁆𑀩𑀸𑀦𑀁 𑀨𑀲𑁆𑀲𑀬𑀺𑀁 𑀅𑀳𑀁.

𑁭𑁮. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀸𑀳𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀉𑀧𑀲𑀫𑁆𑀧𑀸𑀤𑀬𑀻 𑀩𑀼𑀤𑁆𑀥𑁄, 𑀕𑀼𑀡𑀫𑀜𑁆𑀜𑀸𑀬 𑀕𑁄𑀢𑀫𑁄.

𑁭𑁯. ‘‘𑀫𑀡𑁆𑀟𑀧𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀲𑀼𑀜𑁆𑀜𑀸𑀕𑀸𑀭𑁂 𑀯𑀲𑀦𑁆𑀢𑀺𑀬𑀸;

𑀲𑀤𑀸 𑀧𑀚𑁆𑀚𑀮𑀢𑁂 𑀤𑀻𑀧𑀁, 𑀧𑀜𑁆𑀘𑀤𑀻𑀧𑀸𑀦𑀺𑀤𑀁 𑀨𑀮𑀁.

𑁮𑁦. ‘‘𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑀼𑀤𑁆𑀥𑀁 𑀫𑁂, 𑀲𑀫𑀸𑀥𑀺𑀓𑀼𑀲𑀮𑀸 𑀅𑀳𑀁;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑀸, 𑀧𑀜𑁆𑀘𑀤𑀻𑀧𑀸𑀦𑀺𑀤𑀁 𑀨𑀮𑀁.

𑁮𑁧. ‘‘𑀲𑀩𑁆𑀩𑀯𑁄𑀲𑀺𑀢𑀯𑁄𑀲𑀸𑀦𑀸, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸;

𑀧𑀜𑁆𑀘𑀤𑀻𑀧𑀸 𑀫𑀳𑀸𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀘𑀓𑁆𑀔𑀼𑀫.

𑁮𑁨. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀻𑀧𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀜𑁆𑀘𑀤𑀻𑀧𑀸𑀦𑀺𑀤𑀁 𑀨𑀮𑀁.

𑁮𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁮𑁪. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁮𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀧𑀜𑁆𑀘𑀤𑀻𑀧𑀤𑀸𑀬𑀺𑀓𑀸 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀜𑁆𑀘𑀤𑀻𑀧𑀤𑀸𑀬𑀺𑀓𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.