𑁪. 𑀏𑀓𑀸𑀲𑀦𑀤𑀸𑀬𑀺𑀓𑀸𑀣𑁂𑀭𑀻𑀅𑀧𑀤𑀸𑀦𑀁

𑁩𑁭. ‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀅𑀳𑁄𑀲𑀺𑀁 𑀩𑀸𑀮𑀺𑀓𑀸 [𑀫𑀸𑀮𑀺𑀓𑀸 (𑀲𑁆𑀬𑀸. 𑀧𑀻.)] 𑀢𑀤𑀸;

𑀫𑀸𑀢𑀸 𑀘 𑀫𑁂 𑀧𑀺𑀢𑀸 𑀘𑁂𑀯, 𑀓𑀫𑁆𑀫𑀦𑁆𑀢𑀁 𑀅𑀕𑀫𑀁𑀲𑀼 𑀢𑁂.

𑁩𑁮. ‘‘𑀫𑀚𑁆𑀛𑀦𑁆𑀳𑀺𑀓𑀫𑁆𑀳𑀺 𑀲𑀽𑀭𑀺𑀬𑁂, 𑀅𑀤𑁆𑀤𑀲𑀁 𑀲𑀫𑀡𑀁 𑀅𑀳𑀁;

𑀯𑀻𑀣𑀺𑀬𑀸 𑀅𑀦𑀼𑀕𑀘𑁆𑀙𑀦𑁆𑀢𑀁, 𑀆𑀲𑀦𑀁 𑀧𑀜𑁆𑀜𑀧𑁂𑀲𑀳𑀁.

𑁩𑁯. ‘‘𑀕𑁄𑀦𑀓𑀸𑀯𑀺𑀓𑀢𑀺𑀓𑀸𑀳𑀺 [𑀕𑁄𑀦𑀓𑀘𑀺𑀢𑁆𑀢𑀓𑀸𑀤𑀻𑀳𑀺 (𑀲𑀻.)], 𑀧𑀜𑁆𑀜𑀧𑁂𑀢𑁆𑀯𑀸 𑀫𑀫𑀸𑀲𑀦𑀁;

𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀫𑀦𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁪𑁦. ‘‘‘𑀲𑀦𑁆𑀢𑀢𑁆𑀢𑀸 𑀓𑀼𑀣𑀺𑀢𑀸 𑀪𑀽𑀫𑀺, 𑀲𑀽𑀭𑁄 𑀫𑀚𑁆𑀛𑀦𑁆𑀳𑀺𑀓𑁂 𑀞𑀺𑀢𑁄;

𑀫𑀸𑀮𑀼𑀢𑀸 𑀘 𑀦 𑀯𑀸𑀬𑀦𑁆𑀢𑀺, 𑀓𑀸𑀮𑁄 𑀘𑁂𑀯𑁂𑀢𑁆𑀣 𑀫𑁂𑀳𑀺𑀢𑀺 [𑀘𑁂𑀢𑁆𑀣 𑀉𑀧𑀝𑁆𑀞𑀺𑀢𑁄 (𑀲𑀻.), 𑀘𑁂𑀯𑀢𑁆𑀣𑀁 𑀏𑀢𑀺 𑀢𑀁 (𑀧𑀻.)].

𑁪𑁧. ‘‘‘𑀧𑀜𑁆𑀜𑀢𑁆𑀢𑀫𑀸𑀲𑀦𑀫𑀺𑀤𑀁, 𑀢𑀯𑀢𑁆𑀣𑀸𑀬 𑀫𑀳𑀸𑀫𑀼𑀦𑀺;

𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀦𑀺𑀲𑀻𑀤 𑀫𑀫 𑀆𑀲𑀦𑁂’.

𑁪𑁨. ‘‘𑀦𑀺𑀲𑀻𑀤𑀺 𑀢𑀢𑁆𑀣 𑀲𑀫𑀡𑁄, 𑀲𑀼𑀤𑀦𑁆𑀢𑁄 𑀲𑀼𑀤𑁆𑀥𑀫𑀸𑀦𑀲𑁄;

𑀢𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀬𑀣𑀸𑀭𑀦𑁆𑀥𑀁 𑀅𑀤𑀸𑀲𑀳𑀁.

𑁪𑁩. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁪𑁪. ‘‘𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀆𑀲𑀦𑁂𑀦 𑀲𑀼𑀦𑀺𑀫𑁆𑀫𑀺𑀢𑀁;

𑀲𑀝𑁆𑀞𑀺𑀬𑁄𑀚𑀦𑀫𑀼𑀩𑁆𑀩𑁂𑀥𑀁, 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁.

𑁪𑁫. ‘‘𑀲𑁄𑀡𑁆𑀡𑀫𑀬𑀸 𑀫𑀡𑀺𑀫𑀬𑀸, 𑀅𑀣𑁄𑀧𑀺 𑀨𑀮𑀺𑀓𑀸𑀫𑀬𑀸;

𑀮𑁄𑀳𑀺𑀢𑀗𑁆𑀕𑀫𑀬𑀸 𑀘𑁂𑀯, 𑀧𑀮𑁆𑀮𑀗𑁆𑀓𑀸 𑀯𑀺𑀯𑀺𑀥𑀸 𑀫𑀫.

𑁪𑁬. ‘‘𑀢𑀽𑀮𑀺𑀓𑀸 𑀯𑀺𑀓𑀢𑀺𑀓𑀸𑀳𑀺, 𑀓𑀝𑁆𑀝𑀺𑀲𑁆𑀲𑀘𑀺𑀢𑁆𑀢𑀓𑀸𑀳𑀺 𑀘;

𑀉𑀤𑁆𑀤𑀏𑀓𑀦𑁆𑀢𑀮𑁄𑀫𑀻 𑀘, 𑀧𑀮𑁆𑀮𑀗𑁆𑀓𑀸 𑀫𑁂 𑀲𑀼𑀲𑀡𑁆𑀞𑀺𑀢𑀸 [𑀲𑀼𑀲𑀦𑁆𑀣𑀢𑀸 (𑀲𑀻.)].

𑁪𑁭. ‘‘𑀬𑀤𑀸 𑀇𑀘𑁆𑀙𑀸𑀫𑀺 𑀕𑀫𑀦𑀁, 𑀳𑀸𑀲𑀔𑀺𑀟𑁆𑀟𑀲𑀫𑀧𑁆𑀧𑀺𑀢𑀸;

𑀲𑀳 𑀧𑀮𑁆𑀮𑀗𑁆𑀓𑀲𑁂𑀝𑁆𑀞𑁂𑀦, 𑀕𑀘𑁆𑀙𑀸𑀫𑀺 𑀫𑀫 𑀧𑀢𑁆𑀣𑀺𑀢𑀁.

𑁪𑁮. ‘‘𑀅𑀲𑀻𑀢𑀺 𑀤𑁂𑀯𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁;

𑀲𑀢𑁆𑀢𑀢𑀺 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

𑁪𑁯. ‘‘𑀪𑀯𑀸𑀪𑀯𑁂 𑀲𑀁𑀲𑀭𑀦𑁆𑀢𑀻, 𑀫𑀳𑀸𑀪𑁄𑀕𑀁 𑀮𑀪𑀸𑀫𑀳𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁 [𑀏𑀓𑀸𑀲𑀦𑀨𑀮𑀁 𑀇𑀤𑀁 (𑀲𑀩𑁆𑀩𑀢𑁆𑀣) 𑀏𑀯𑀫𑀼𑀧𑀭𑀺𑀧𑀺].

𑁫𑁦. ‘‘𑀤𑀼𑀯𑁂 𑀪𑀯𑁂 𑀲𑀁𑀲𑀭𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀅𑀜𑁆𑀜𑁂 𑀪𑀯𑁂 𑀦 𑀚𑀸𑀦𑀸𑀫𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁧. ‘‘𑀤𑀼𑀯𑁂 𑀓𑀼𑀮𑁂 𑀧𑀚𑀸𑀬𑀸𑀫𑀺, 𑀔𑀢𑁆𑀢𑀺𑀬𑁂 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑁂;

𑀉𑀘𑁆𑀘𑀸𑀓𑀼𑀮𑀻𑀦𑀸 [𑀉𑀘𑁆𑀘𑀸𑀓𑀼𑀮𑀺𑀓𑀸 (𑀲𑁆𑀬𑀸. 𑀧𑀻. 𑀓.)] 𑀲𑀩𑁆𑀩𑀢𑁆𑀣, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁨. ‘‘𑀤𑁄𑀫𑀦𑀲𑁆𑀲𑀁 𑀦 𑀚𑀸𑀦𑀸𑀫𑀺, 𑀘𑀺𑀢𑁆𑀢𑀲𑀦𑁆𑀢𑀸𑀧𑀦𑀁 𑀫𑀫;

𑀯𑁂𑀯𑀡𑁆𑀡𑀺𑀬𑀁 𑀦 𑀚𑀸𑀦𑀸𑀫𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁩. ‘‘𑀥𑀸𑀢𑀺𑀬𑁄 𑀫𑀁 𑀉𑀧𑀝𑁆𑀞𑀦𑁆𑀢𑀺, 𑀔𑀼𑀚𑁆𑀚𑀸 𑀘𑁂𑀮𑀸𑀧𑀺𑀓𑀸 [𑀔𑁂𑀮𑀸𑀧𑀺𑀓𑀸 (𑀲𑀻.), 𑀘𑁂𑀮𑀸𑀯𑀺𑀓𑀸 (𑀧𑀻.)] 𑀩𑀳𑀽;

𑀅𑀗𑁆𑀓𑁂𑀦 𑀅𑀗𑁆𑀓𑀁 𑀕𑀘𑁆𑀙𑀸𑀫𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁪. ‘‘𑀅𑀜𑁆𑀜𑀸 𑀦𑁆𑀳𑀸𑀧𑁂𑀦𑁆𑀢𑀺 𑀪𑁄𑀚𑁂𑀦𑁆𑀢𑀺, 𑀅𑀜𑁆𑀜𑀸 𑀭𑀫𑁂𑀦𑁆𑀢𑀺 𑀫𑀁 𑀲𑀤𑀸;

𑀅𑀜𑁆𑀜𑀸 𑀕𑀦𑁆𑀥𑀁 𑀯𑀺𑀮𑀺𑀫𑁆𑀧𑀦𑁆𑀢𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁 [𑀅𑀜𑁆𑀜𑀸 𑀫𑀫𑁂𑀯 𑀦𑁆𑀳𑀸𑀧𑁂𑀦𑁆𑀢𑀺, 𑀅𑀜𑁆𑀜𑀸 𑀪𑁄𑀚𑁂𑀦𑁆𑀢𑀺 𑀪𑁄𑀚𑀦𑀁; 𑀅𑀜𑁆𑀜𑀸 𑀫𑀁 𑀅𑀮𑀗𑁆𑀓𑀭𑁄𑀦𑁆𑀢𑀺, 𑀅𑀜𑁆𑀜𑀸 𑀭𑀫𑁂𑀦𑁆𑀢𑀺 𑀫𑀁 𑀲𑀤𑁆𑀥𑀸; (𑀲𑁆𑀬𑀸.)].

𑁫𑁫. ‘‘𑀫𑀡𑁆𑀟𑀧𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀲𑀼𑀜𑁆𑀜𑀸𑀕𑀸𑀭𑁂 𑀯𑀲𑀦𑁆𑀢𑀺𑀬𑀸;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀮𑁆𑀮𑀗𑁆𑀓𑁄 𑀉𑀧𑀢𑀺𑀝𑁆𑀞𑀢𑀺.

𑁫𑁬. ‘‘𑀅𑀬𑀁 𑀧𑀘𑁆𑀙𑀺𑀫𑀓𑁄 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀅𑀚𑁆𑀚𑀸𑀧𑀺 𑀭𑀚𑁆𑀚𑀁 𑀙𑀟𑁆𑀟𑁂𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁫𑁭. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀏𑀓𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁮. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁫𑁯. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀏𑀓𑀸𑀲𑀦𑀤𑀸𑀬𑀺𑀓𑀸 𑀪𑀺𑀓𑁆𑀔𑀼𑀦𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀸𑀲𑀦𑀤𑀸𑀬𑀺𑀓𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.