𑁩. 𑀪𑀤𑁆𑀤𑀢𑁆𑀣𑁂𑀭𑀕𑀸𑀣𑀸

𑁪𑁭𑁩. ‘‘𑀏𑀓𑀧𑀼𑀢𑁆𑀢𑁄 𑀅𑀳𑀁 𑀆𑀲𑀺𑀁, 𑀧𑀺𑀬𑁄 𑀫𑀸𑀢𑀼 𑀧𑀺𑀬𑁄 𑀧𑀺𑀢𑀼;

𑀩𑀳𑀽𑀳𑀺 𑀯𑀢𑀘𑀭𑀺𑀬𑀸𑀳𑀺, 𑀮𑀤𑁆𑀥𑁄 𑀆𑀬𑀸𑀘𑀦𑀸𑀳𑀺 𑀘.

𑁪𑁭𑁪. ‘‘𑀢𑁂 𑀘 𑀫𑀁 𑀅𑀦𑀼𑀓𑀫𑁆𑀧𑀸𑀬, 𑀅𑀢𑁆𑀣𑀓𑀸𑀫𑀸 𑀳𑀺𑀢𑁂𑀲𑀺𑀦𑁄;

𑀉𑀪𑁄 𑀧𑀺𑀢𑀸 𑀘 𑀫𑀸𑀢𑀸 𑀘, 𑀩𑀼𑀤𑁆𑀥𑀲𑁆𑀲 𑀉𑀧𑀦𑀸𑀫𑀬𑀼𑀁’’.

𑁪𑁭𑁫. ‘‘𑀓𑀺𑀘𑁆𑀙𑀸 𑀮𑀤𑁆𑀥𑁄 𑀅𑀬𑀁 𑀧𑀼𑀢𑁆𑀢𑁄, 𑀲𑀼𑀔𑀼𑀫𑀸𑀮𑁄 𑀲𑀼𑀔𑁂𑀥𑀺𑀢𑁄;

𑀇𑀫𑀁 𑀤𑀤𑀸𑀫 𑀢𑁂 𑀦𑀸𑀣, 𑀚𑀺𑀦𑀲𑁆𑀲 𑀧𑀭𑀺𑀘𑀸𑀭𑀓𑀁’’.

𑁪𑁭𑁬. ‘‘𑀲𑀢𑁆𑀣𑀸 𑀘 𑀫𑀁 𑀧𑀝𑀺𑀕𑁆𑀕𑀬𑁆𑀳, 𑀆𑀦𑀦𑁆𑀤𑀁 𑀏𑀢𑀤𑀩𑁆𑀭𑀯𑀺;

‘𑀧𑀩𑁆𑀩𑀸𑀚𑁂𑀳𑀺 𑀇𑀫𑀁 𑀔𑀺𑀧𑁆𑀧𑀁, 𑀳𑁂𑀲𑁆𑀲𑀢𑁆𑀬𑀸𑀚𑀸𑀦𑀺𑀬𑁄 𑀅𑀬𑀁.

𑁪𑁭𑁭. ‘‘𑀧𑀩𑁆𑀩𑀸𑀚𑁂𑀢𑁆𑀯𑀸𑀦 𑀫𑀁 𑀲𑀢𑁆𑀣𑀸, 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻 𑀚𑀺𑀦𑁄;

𑀅𑀦𑁄𑀕𑁆𑀕𑀢𑀲𑁆𑀫𑀺𑀁 𑀲𑀽𑀭𑀺𑀬𑀲𑁆𑀫𑀺𑀁, 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂.

𑁪𑁭𑁮. ‘‘𑀢𑀢𑁄 𑀲𑀢𑁆𑀣𑀸 𑀦𑀺𑀭𑀸𑀓𑀢𑁆𑀯𑀸, 𑀧𑀝𑀺𑀲𑀮𑁆𑀮𑀸𑀦𑀯𑀼𑀝𑁆𑀞𑀺𑀢𑁄;

‘𑀏𑀳𑀺 𑀪𑀤𑁆𑀤𑀸’𑀢𑀺 𑀫𑀁 𑀆𑀳, 𑀲𑀸 𑀫𑁂 𑀆𑀲𑀽𑀧𑀲𑀫𑁆𑀧𑀤𑀸.

𑁪𑁭𑁯. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦, 𑀮𑀤𑁆𑀥𑀸 𑀫𑁂 𑀉𑀧𑀲𑀫𑁆𑀧𑀤𑀸;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀅𑀳𑁄 𑀥𑀫𑁆𑀫𑀲𑀼𑀥𑀫𑁆𑀫𑀢𑀸’’𑀢𑀺.

… 𑀪𑀤𑁆𑀤𑁄 𑀣𑁂𑀭𑁄….