𑁯. 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀚𑁂𑀦𑁆𑀢𑀢𑁆𑀣𑁂𑀭𑀕𑀸𑀣𑀸

𑁪𑁨𑁩. ‘‘𑀚𑀸𑀢𑀺𑀫𑀤𑁂𑀦 𑀫𑀢𑁆𑀢𑁄𑀳𑀁, 𑀪𑁄𑀕𑀇𑀲𑁆𑀲𑀭𑀺𑀬𑁂𑀦 𑀘;

𑀲𑀡𑁆𑀞𑀸𑀦𑀯𑀡𑁆𑀡𑀭𑀽𑀧𑁂𑀦, 𑀫𑀤𑀫𑀢𑁆𑀢𑁄 𑀅𑀘𑀸𑀭𑀺𑀳𑀁.

𑁪𑁨𑁪. ‘‘𑀦𑀸𑀢𑁆𑀢𑀦𑁄 𑀲𑀫𑀓𑀁 𑀓𑀜𑁆𑀘𑀺, 𑀅𑀢𑀺𑀭𑁂𑀓𑀁 𑀘 𑀫𑀜𑁆𑀜𑀺𑀲𑀁;

𑀅𑀢𑀺𑀫𑀸𑀦𑀳𑀢𑁄 𑀩𑀸𑀮𑁄, 𑀧𑀢𑁆𑀣𑀤𑁆𑀥𑁄 𑀉𑀲𑁆𑀲𑀺𑀢𑀤𑁆𑀥𑀚𑁄.

𑁪𑁨𑁫. ‘‘𑀫𑀸𑀢𑀭𑀁 𑀧𑀺𑀢𑀭𑀜𑁆𑀘𑀸𑀧𑀺, 𑀅𑀜𑁆𑀜𑁂𑀧𑀺 𑀕𑀭𑀼𑀲𑀫𑁆𑀫𑀢𑁂;

𑀦 𑀓𑀜𑁆𑀘𑀺 𑀅𑀪𑀺𑀯𑀸𑀤𑁂𑀲𑀺𑀁, 𑀫𑀸𑀦𑀢𑁆𑀣𑀤𑁆𑀥𑁄 𑀅𑀦𑀸𑀤𑀭𑁄.

𑁪𑁨𑁬. ‘‘𑀤𑀺𑀲𑁆𑀯𑀸 𑀯𑀺𑀦𑀸𑀬𑀓𑀁 𑀅𑀕𑁆𑀕𑀁, 𑀲𑀸𑀭𑀣𑀻𑀦𑀁 𑀯𑀭𑀼𑀢𑁆𑀢𑀫𑀁;

𑀢𑀧𑀦𑁆𑀢𑀫𑀺𑀯 𑀆𑀤𑀺𑀘𑁆𑀘𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

𑁪𑁨𑁭. ‘‘𑀫𑀸𑀦𑀁 𑀫𑀤𑀜𑁆𑀘 𑀙𑀟𑁆𑀟𑁂𑀢𑁆𑀯𑀸, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀲𑀺𑀭𑀲𑀸 𑀅𑀪𑀺𑀯𑀸𑀤𑁂𑀲𑀺𑀁, 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫𑀁.

𑁪𑁨𑁮. ‘‘𑀅𑀢𑀺𑀫𑀸𑀦𑁄 𑀘 𑀑𑀫𑀸𑀦𑁄, 𑀧𑀳𑀻𑀦𑀸 𑀲𑀼𑀲𑀫𑀽𑀳𑀢𑀸;

𑀅𑀲𑁆𑀫𑀺𑀫𑀸𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀲𑀩𑁆𑀩𑁂 𑀫𑀸𑀦𑀯𑀺𑀥𑀸 𑀳𑀢𑀸’’𑀢𑀺.

… 𑀚𑁂𑀦𑁆𑀢𑁄 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀣𑁂𑀭𑁄….