𑁧𑁦. 𑀲𑀼𑀫𑀦𑀢𑁆𑀣𑁂𑀭𑀕𑀸𑀣𑀸

𑁪𑁨𑁯. ‘‘𑀬𑀤𑀸 𑀦𑀯𑁄 𑀧𑀩𑁆𑀩𑀚𑀺𑀢𑁄, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄;

𑀇𑀤𑁆𑀥𑀺𑀬𑀸 𑀅𑀪𑀺𑀪𑁄𑀢𑁆𑀯𑀸𑀦, 𑀧𑀦𑁆𑀦𑀕𑀺𑀦𑁆𑀤𑀁 𑀫𑀳𑀺𑀤𑁆𑀥𑀺𑀓𑀁.

𑁪𑁩𑁦. ‘‘𑀉𑀧𑀚𑁆𑀛𑀸𑀬𑀲𑁆𑀲 𑀉𑀤𑀓𑀁, 𑀅𑀦𑁄𑀢𑀢𑁆𑀢𑀸 𑀫𑀳𑀸𑀲𑀭𑀸;

𑀆𑀳𑀭𑀸𑀫𑀺 𑀢𑀢𑁄 𑀤𑀺𑀲𑁆𑀯𑀸, 𑀫𑀁 𑀲𑀢𑁆𑀣𑀸 𑀏𑀢𑀤𑀩𑁆𑀭𑀯𑀺’’.

𑁪𑁩𑁧. ‘‘𑀲𑀸𑀭𑀺𑀧𑀼𑀢𑁆𑀢 𑀇𑀫𑀁 𑀧𑀲𑁆𑀲, 𑀆𑀕𑀘𑁆𑀙𑀦𑁆𑀢𑀁 𑀓𑀼𑀫𑀸𑀭𑀓𑀁;

𑀉𑀤𑀓𑀓𑀼𑀫𑁆𑀪𑀫𑀸𑀤𑀸𑀬, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀁.

𑁪𑁩𑁨. ‘‘𑀧𑀸𑀲𑀸𑀤𑀺𑀓𑁂𑀦 𑀯𑀢𑁆𑀢𑁂𑀦, 𑀓𑀮𑁆𑀬𑀸𑀡𑀇𑀭𑀺𑀬𑀸𑀧𑀣𑁄;

𑀲𑀸𑀫𑀡𑁂𑀭𑁄𑀦𑀼𑀭𑀼𑀤𑁆𑀥𑀲𑁆𑀲, 𑀇𑀤𑁆𑀥𑀺𑀬𑀸 𑀘 𑀯𑀺𑀲𑀸𑀭𑀤𑁄.

𑁪𑁩𑁩. ‘‘𑀆𑀚𑀸𑀦𑀻𑀬𑁂𑀦 𑀆𑀚𑀜𑁆𑀜𑁄, 𑀲𑀸𑀥𑀼𑀦𑀸 𑀲𑀸𑀥𑀼𑀓𑀸𑀭𑀺𑀢𑁄;

𑀯𑀺𑀦𑀻𑀢𑁄 𑀅𑀦𑀼𑀭𑀼𑀤𑁆𑀥𑁂𑀦, 𑀓𑀢𑀓𑀺𑀘𑁆𑀘𑁂𑀦 𑀲𑀺𑀓𑁆𑀔𑀺𑀢𑁄.

𑁪𑁩𑁪. ‘‘𑀲𑁄 𑀧𑀢𑁆𑀯𑀸 𑀧𑀭𑀫𑀁 𑀲𑀦𑁆𑀢𑀺𑀁, 𑀲𑀘𑁆𑀙𑀺𑀓𑀢𑁆𑀯𑀸 𑀅𑀓𑀼𑀧𑁆𑀧𑀢𑀁;

𑀲𑀸𑀫𑀡𑁂𑀭𑁄 𑀲 𑀲𑀼𑀫𑀦𑁄, 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀇𑀘𑁆𑀙𑀢𑀻’’𑀢𑀺.

… 𑀲𑀼𑀫𑀦𑁄 𑀣𑁂𑀭𑁄….