𑁧𑁪. 𑀲𑀩𑁆𑀩𑀓𑀸𑀫𑀺𑀢𑁆𑀣𑁂𑀭𑀕𑀸𑀣𑀸

𑁪𑁫𑁩. ‘‘𑀤𑁆𑀯𑀺𑀧𑀸𑀤𑀓𑁄𑀬𑀁 𑀅𑀲𑀼𑀘𑀺, 𑀤𑀼𑀕𑁆𑀕𑀦𑁆𑀥𑁄 𑀧𑀭𑀺𑀳𑀻𑀭𑀢𑀺 [𑀧𑀭𑀺𑀳𑀭𑀢𑀺 (𑀓.)];

𑀦𑀸𑀦𑀸𑀓𑀼𑀡𑀧𑀧𑀭𑀺𑀧𑀽𑀭𑁄, 𑀯𑀺𑀲𑁆𑀲𑀯𑀦𑁆𑀢𑁄 𑀢𑀢𑁄 𑀢𑀢𑁄.

𑁪𑁫𑁪. ‘‘𑀫𑀺𑀕𑀁 𑀦𑀺𑀮𑀻𑀦𑀁 𑀓𑀽𑀝𑁂𑀦, 𑀩𑀴𑀺𑀲𑁂𑀦𑁂𑀯 𑀅𑀫𑁆𑀩𑀼𑀚𑀁;

𑀯𑀸𑀦𑀭𑀁 𑀯𑀺𑀬 𑀮𑁂𑀧𑁂𑀦, 𑀩𑀸𑀥𑀬𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀁.

𑁪𑁫𑁫. ‘‘𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸, 𑀨𑁄𑀝𑁆𑀞𑀩𑁆𑀩𑀸 𑀘 𑀫𑀦𑁄𑀭𑀫𑀸;

𑀧𑀜𑁆𑀘 𑀓𑀸𑀫𑀕𑀼𑀡𑀸 𑀏𑀢𑁂, 𑀇𑀢𑁆𑀣𑀺𑀭𑀽𑀧𑀲𑁆𑀫𑀺 𑀤𑀺𑀲𑁆𑀲𑀭𑁂.

𑁪𑁫𑁬. ‘‘𑀬𑁂 𑀏𑀢𑀸 𑀉𑀧𑀲𑁂𑀯𑀦𑁆𑀢𑀺, 𑀭𑀢𑁆𑀢𑀘𑀺𑀢𑁆𑀢𑀸 𑀧𑀼𑀣𑀼𑀚𑁆𑀚𑀦𑀸;

𑀯𑀟𑁆𑀠𑁂𑀦𑁆𑀢𑀺 𑀓𑀝𑀲𑀺𑀁 𑀖𑁄𑀭𑀁, 𑀆𑀘𑀺𑀦𑀦𑁆𑀢𑀺 𑀧𑀼𑀦𑀩𑁆𑀪𑀯𑀁.

𑁪𑁫𑁭. ‘‘𑀬𑁄 𑀘𑁂𑀢𑀸 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀺.

𑁪𑁫𑁮. ‘‘𑀓𑀸𑀫𑁂𑀲𑁆𑀯𑀸𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄;

𑀦𑀺𑀲𑁆𑀲𑀝𑁄 𑀲𑀩𑁆𑀩𑀓𑀸𑀫𑁂𑀳𑀺, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄’’𑀢𑀺.

… 𑀲𑀩𑁆𑀩𑀓𑀸𑀫𑀺𑀢𑁆𑀣𑁂𑀭𑁄….

𑀙𑀓𑁆𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.