𑁯. 𑀯𑀺𑀚𑀺𑀢𑀲𑁂𑀦𑀢𑁆𑀣𑁂𑀭𑀕𑀸𑀣𑀸

𑁩𑁫𑁫. ‘‘𑀑𑀮𑀕𑁆𑀕𑁂𑀲𑁆𑀲𑀸𑀫𑀺 𑀢𑁂 𑀘𑀺𑀢𑁆𑀢, 𑀆𑀡𑀺𑀤𑁆𑀯𑀸𑀭𑁂𑀯 𑀳𑀢𑁆𑀣𑀺𑀦𑀁;

𑀦 𑀢𑀁 𑀧𑀸𑀧𑁂 𑀦𑀺𑀬𑁄𑀚𑁂𑀲𑁆𑀲𑀁, 𑀓𑀸𑀫𑀚𑀸𑀮 [𑀓𑀸𑀫𑀚𑀸𑀮𑀁 (𑀲𑁆𑀬𑀸.)] 𑀲𑀭𑀻𑀭𑀚 [𑀲𑀭𑀻𑀭𑀚𑀁 (𑀲𑁆𑀬𑀸. 𑀓.)].

𑁩𑁫𑁬. ‘‘𑀢𑁆𑀯𑀁 𑀑𑀮𑀕𑁆𑀕𑁄 𑀦 𑀕𑀘𑁆𑀙𑀲𑀺 [𑀦 𑀕𑀜𑁆𑀙𑀺𑀲𑀺 (𑀧𑀻)], 𑀤𑁆𑀯𑀸𑀭𑀯𑀺𑀯𑀭𑀁 𑀕𑀚𑁄𑀯 𑀅𑀮𑀪𑀦𑁆𑀢𑁄;

𑀦 𑀘 𑀘𑀺𑀢𑁆𑀢𑀓𑀮𑀺 𑀧𑀼𑀦𑀧𑁆𑀧𑀼𑀦𑀁, 𑀧𑀲𑀓𑁆𑀓 [𑀧𑀲𑀳𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀸𑀧𑀭𑀢𑁄 𑀘𑀭𑀺𑀲𑁆𑀲𑀲𑀺.

𑁩𑁫𑁭. ‘‘𑀬𑀣𑀸 𑀓𑀼𑀜𑁆𑀚𑀭𑀁 𑀅𑀤𑀦𑁆𑀢𑀁, 𑀦𑀯𑀕𑁆𑀕𑀳𑀫𑀗𑁆𑀓𑀼𑀲𑀕𑁆𑀕𑀳𑁄;

𑀩𑀮𑀯𑀸 𑀆𑀯𑀢𑁆𑀢𑁂𑀢𑀺 𑀅𑀓𑀸𑀫𑀁, 𑀏𑀯𑀁 𑀆𑀯𑀢𑁆𑀢𑀬𑀺𑀲𑁆𑀲𑀁 𑀢𑀁.

𑁩𑁫𑁮. ‘‘𑀬𑀣𑀸 𑀯𑀭𑀳𑀬𑀤𑀫𑀓𑀼𑀲𑀮𑁄, 𑀲𑀸𑀭𑀣𑀺 𑀧𑀯𑀭𑁄 𑀤𑀫𑁂𑀢𑀺 𑀆𑀚𑀜𑁆𑀜𑀁;

𑀏𑀯𑀁 𑀤𑀫𑀬𑀺𑀲𑁆𑀲𑀁 𑀢𑀁, 𑀧𑀢𑀺𑀝𑁆𑀞𑀺𑀢𑁄 𑀧𑀜𑁆𑀘𑀲𑀼 𑀩𑀮𑁂𑀲𑀼.

𑁩𑁫𑁯. ‘‘𑀲𑀢𑀺𑀬𑀸 𑀢𑀁 𑀦𑀺𑀩𑀦𑁆𑀥𑀺𑀲𑁆𑀲𑀁, 𑀧𑀬𑀼𑀢𑁆𑀢𑁄 𑀢𑁂 𑀤𑀫𑁂𑀲𑁆𑀲𑀸𑀫𑀺 [𑀧𑀬𑀢𑀢𑁆𑀢𑁄 𑀯𑁄𑀤𑀧𑁂𑀲𑁆𑀲𑀸𑀫𑀺 (𑀲𑀻.)];

𑀯𑀻𑀭𑀺𑀬𑀥𑀼𑀭𑀦𑀺𑀕𑁆𑀕𑀳𑀺𑀢𑁄, 𑀦 𑀬𑀺𑀢𑁄 𑀤𑀽𑀭𑀁 𑀕𑀫𑀺𑀲𑁆𑀲𑀲𑁂 𑀘𑀺𑀢𑁆𑀢𑀸’’𑀢𑀺.

… 𑀯𑀺𑀚𑀺𑀢𑀲𑁂𑀦𑁄 𑀣𑁂𑀭𑁄….