𑁧𑁧. 𑀲𑁄𑀡𑀓𑀼𑀝𑀺𑀓𑀡𑁆𑀡𑀢𑁆𑀣𑁂𑀭𑀕𑀸𑀣𑀸

𑁩𑁬𑁫. ‘‘𑀉𑀧𑀲𑀫𑁆𑀧𑀤𑀸 𑀘 𑀫𑁂 𑀮𑀤𑁆𑀥𑀸, 𑀯𑀺𑀫𑀼𑀢𑁆𑀢𑁄 𑀘𑀫𑁆𑀳𑀺 𑀅𑀦𑀸𑀲𑀯𑁄;

𑀲𑁄 𑀘 𑀫𑁂 𑀪𑀕𑀯𑀸 𑀤𑀺𑀝𑁆𑀞𑁄, 𑀯𑀺𑀳𑀸𑀭𑁂 𑀘 𑀲𑀳𑀸𑀯𑀲𑀺𑀁.

𑁩𑁬𑁬. ‘‘𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀪𑀕𑀯𑀸, 𑀅𑀩𑁆𑀪𑁄𑀓𑀸𑀲𑁂𑀢𑀺𑀦𑀸𑀫𑀬𑀺;

𑀯𑀺𑀳𑀸𑀭𑀓𑀼𑀲𑀮𑁄 𑀲𑀢𑁆𑀣𑀸, 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻 𑀢𑀤𑀸.

𑁩𑁬𑁭. ‘‘𑀲𑀦𑁆𑀣𑀭𑀺𑀢𑁆𑀯𑀸𑀦 𑀲𑀗𑁆𑀖𑀸𑀝𑀺𑀁, 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺 𑀕𑁄𑀢𑀫𑁄;

𑀲𑀻𑀳𑁄 𑀲𑁂𑀮𑀕𑀼𑀳𑀸𑀬𑀁𑀯, 𑀧𑀳𑀻𑀦𑀪𑀬𑀪𑁂𑀭𑀯𑁄.

𑁩𑁬𑁮. ‘‘𑀢𑀢𑁄 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄;

𑀲𑁄𑀡𑁄 𑀅𑀪𑀸𑀲𑀺 𑀲𑀤𑁆𑀥𑀫𑁆𑀫𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀫𑁆𑀫𑀼𑀔𑀸.

𑁩𑁬𑁯. ‘‘𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀜𑁆𑀜𑀸𑀬, 𑀪𑀸𑀯𑀬𑀺𑀢𑁆𑀯𑀸𑀦 𑀅𑀜𑁆𑀚𑀲𑀁;

𑀧𑀧𑁆𑀧𑀼𑀬𑁆𑀬 𑀧𑀭𑀫𑀁 𑀲𑀦𑁆𑀢𑀺𑀁, 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀢𑁆𑀬𑀦𑀸𑀲𑀯𑁄’’𑀢𑀺.

… 𑀲𑁄𑀡𑁄 𑀓𑀼𑀝𑀺𑀓𑀡𑁆𑀡𑀣𑁂𑀭𑁄….