𑁧. 𑀭𑀸𑀚𑀤𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁩𑁧𑁫. ‘‘𑀪𑀺𑀓𑁆𑀔𑀼 𑀲𑀺𑀯𑀣𑀺𑀓𑀁 [𑀲𑀻𑀯𑀣𑀺𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀕𑀦𑁆𑀢𑁆𑀯𑀸, 𑀅𑀤𑁆𑀤𑀲 𑀇𑀢𑁆𑀣𑀺𑀫𑀼𑀚𑁆𑀛𑀺𑀢𑀁;

𑀅𑀧𑀯𑀺𑀤𑁆𑀥𑀁 𑀲𑀼𑀲𑀸𑀦𑀲𑁆𑀫𑀺𑀁, 𑀔𑀚𑁆𑀚𑀦𑁆𑀢𑀺𑀁 𑀓𑀺𑀫𑀺𑀳𑀻 𑀨𑀼𑀝𑀁.

𑁩𑁧𑁬. ‘‘𑀬𑀜𑁆𑀳𑀺 𑀏𑀓𑁂 𑀚𑀺𑀕𑀼𑀘𑁆𑀙𑀦𑁆𑀢𑀺, 𑀫𑀢𑀁 𑀤𑀺𑀲𑁆𑀯𑀸𑀦 𑀧𑀸𑀧𑀓𑀁;

𑀓𑀸𑀫𑀭𑀸𑀕𑁄 𑀧𑀸𑀢𑀼𑀭𑀳𑀼, 𑀅𑀦𑁆𑀥𑁄𑀯 𑀲𑀯𑀢𑀻 [𑀯𑀲𑀢𑀻 (𑀲𑀻.)] 𑀅𑀳𑀼𑀁.

𑁩𑁧𑁭. ‘‘𑀑𑀭𑀁 𑀑𑀤𑀦𑀧𑀸𑀓𑀫𑁆𑀳𑀸, 𑀢𑀫𑁆𑀳𑀸 𑀞𑀸𑀦𑀸 𑀅𑀧𑀓𑁆𑀓𑀫𑀺𑀁;

𑀲𑀢𑀺𑀫𑀸 𑀲𑀫𑁆𑀧𑀚𑀸𑀦𑁄𑀳𑀁, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺𑀁.

𑁩𑁧𑁮. ‘‘𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄, 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣;

𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑀼, 𑀦𑀺𑀩𑁆𑀩𑀺𑀤𑀸 𑀲𑀫𑀢𑀺𑀝𑁆𑀞𑀣.

𑁩𑁧𑁯. ‘‘𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀭𑀸𑀚𑀤𑀢𑁆𑀢𑁄 𑀣𑁂𑀭𑁄….