𑁩. 𑀢𑀺𑀓𑀦𑀺𑀧𑀸𑀢𑁄

𑁧. 𑀅𑀗𑁆𑀕𑀡𑀺𑀓𑀪𑀸𑀭𑀤𑁆𑀯𑀸𑀚𑀢𑁆𑀣𑁂𑀭𑀕𑀸𑀣𑀸

𑁨𑁧𑁯. ‘‘𑀅𑀬𑁄𑀦𑀺 𑀲𑀼𑀤𑁆𑀥𑀺𑀫𑀦𑁆𑀯𑁂𑀲𑀁, 𑀅𑀕𑁆𑀕𑀺𑀁 𑀧𑀭𑀺𑀘𑀭𑀺𑀁 𑀯𑀦𑁂;

𑀲𑀼𑀤𑁆𑀥𑀺𑀫𑀕𑁆𑀕𑀁 𑀅𑀚𑀸𑀦𑀦𑁆𑀢𑁄, 𑀅𑀓𑀸𑀲𑀺𑀁 𑀅𑀫𑀭𑀁 𑀢𑀧𑀁 [𑀅𑀓𑀸𑀲𑀺𑀁 𑀅𑀧𑀭𑀁 𑀢𑀧𑀁 (𑀲𑁆𑀬𑀸.), 𑀅𑀓𑀸𑀲𑀺𑀁 𑀅𑀫𑀢𑀁 𑀢𑀧𑀁 (𑀓.)].

𑁨𑁨𑁦. ‘‘𑀢𑀁 𑀲𑀼𑀔𑁂𑀦 𑀲𑀼𑀔𑀁 𑀮𑀤𑁆𑀥𑀁, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁨𑁧. ‘‘𑀩𑁆𑀭𑀳𑁆𑀫𑀩𑀦𑁆𑀥𑀼 𑀧𑀼𑀭𑁂 𑀆𑀲𑀺𑀁, 𑀇𑀤𑀸𑀦𑀺 𑀔𑁄𑀫𑁆𑀳𑀺 𑀩𑁆𑀭𑀸𑀳𑁆𑀫𑀡𑁄;

𑀢𑁂𑀯𑀺𑀚𑁆𑀚𑁄 𑀦𑁆𑀳𑀸𑀢𑀓𑁄 [𑀦𑀳𑀸𑀢𑀓𑁄 (𑀲𑀻. 𑀅𑀝𑁆𑀞.)] 𑀘𑀫𑁆𑀳𑀺, 𑀲𑁄𑀢𑁆𑀢𑀺𑀬𑁄 𑀘𑀫𑁆𑀳𑀺 𑀯𑁂𑀤𑀕𑀽’’𑀢𑀺.

… 𑀅𑀗𑁆𑀕𑀡𑀺𑀓𑀪𑀸𑀭𑀤𑁆𑀯𑀸𑀚𑁄 𑀣𑁂𑀭𑁄….

𑁨. 𑀧𑀘𑁆𑀘𑀬𑀢𑁆𑀣𑁂𑀭𑀕𑀸𑀣𑀸

𑁨𑁨𑁨. ‘‘𑀧𑀜𑁆𑀘𑀸𑀳𑀸𑀳𑀁 𑀧𑀩𑁆𑀩𑀚𑀺𑀢𑁄, 𑀲𑁂𑀔𑁄 𑀅𑀧𑁆𑀧𑀢𑁆𑀢𑀫𑀸𑀦𑀲𑁄,

𑀯𑀺𑀳𑀸𑀭𑀁 𑀫𑁂 𑀧𑀯𑀺𑀝𑁆𑀞𑀲𑁆𑀲, 𑀘𑁂𑀢𑀲𑁄 𑀧𑀡𑀺𑀥𑀻 𑀅𑀳𑀼.

𑁨𑁨𑁩. ‘‘𑀦𑀸𑀲𑀺𑀲𑁆𑀲𑀁 𑀦 𑀧𑀺𑀯𑀺𑀲𑁆𑀲𑀸𑀫𑀺, 𑀯𑀺𑀳𑀸𑀭𑀢𑁄 𑀦 𑀦𑀺𑀓𑁆𑀔𑀫𑁂;

𑀦𑀧𑀺 𑀧𑀲𑁆𑀲𑀁 𑀦𑀺𑀧𑀸𑀢𑁂𑀲𑁆𑀲𑀁, 𑀢𑀡𑁆𑀳𑀸𑀲𑀮𑁆𑀮𑁂 𑀅𑀦𑀽𑀳𑀢𑁂.

𑁨𑁨𑁪. ‘‘𑀢𑀲𑁆𑀲 𑀫𑁂𑀯𑀁 𑀯𑀺𑀳𑀭𑀢𑁄, 𑀧𑀲𑁆𑀲 𑀯𑀻𑀭𑀺𑀬𑀧𑀭𑀓𑁆𑀓𑀫𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀧𑀘𑁆𑀘𑀬𑁄 𑀣𑁂𑀭𑁄….

𑁩. 𑀩𑀸𑀓𑀼𑀮𑀢𑁆𑀣𑁂𑀭𑀕𑀸𑀣𑀸

𑁨𑁨𑁫. ‘‘𑀬𑁄 𑀧𑀼𑀩𑁆𑀩𑁂 𑀓𑀭𑀡𑀻𑀬𑀸𑀦𑀺, 𑀧𑀘𑁆𑀙𑀸 𑀲𑁄 𑀓𑀸𑀢𑀼𑀫𑀺𑀘𑁆𑀙𑀢𑀺;

𑀲𑀼𑀔𑀸 𑀲𑁄 𑀥𑀁𑀲𑀢𑁂 𑀞𑀸𑀦𑀸, 𑀧𑀘𑁆𑀙𑀸 𑀘 𑀫𑀦𑀼𑀢𑀧𑁆𑀧𑀢𑀺.

𑁨𑁨𑁬. ‘‘𑀬𑀜𑁆𑀳𑀺 𑀓𑀬𑀺𑀭𑀸 𑀢𑀜𑁆𑀳𑀺 𑀯𑀤𑁂, 𑀬𑀁 𑀦 𑀓𑀬𑀺𑀭𑀸 𑀦 𑀢𑀁 𑀯𑀤𑁂;

𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁨𑁨𑁭. ‘‘𑀲𑀼𑀲𑀼𑀔𑀁 𑀯𑀢 𑀦𑀺𑀩𑁆𑀩𑀸𑀦𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁;

𑀅𑀲𑁄𑀓𑀁 𑀯𑀺𑀭𑀚𑀁 𑀔𑁂𑀫𑀁, 𑀬𑀢𑁆𑀣 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺.

… 𑀩𑀸𑀓𑀼𑀮𑁄 [𑀩𑀸𑀓𑁆𑀓𑀼𑀮𑁄 (𑀲𑀻.)] 𑀣𑁂𑀭𑁄….

𑁪. 𑀥𑀦𑀺𑀬𑀢𑁆𑀣𑁂𑀭𑀕𑀸𑀣𑀸

𑁨𑁨𑁮. ‘‘𑀲𑀼𑀔𑀁 𑀘𑁂 𑀚𑀻𑀯𑀺𑀢𑀼𑀁 𑀇𑀘𑁆𑀙𑁂, 𑀲𑀸𑀫𑀜𑁆𑀜𑀲𑁆𑀫𑀺𑀁 𑀅𑀧𑁂𑀓𑁆𑀔𑀯𑀸;

𑀲𑀗𑁆𑀖𑀺𑀓𑀁 𑀦𑀸𑀢𑀺𑀫𑀜𑁆𑀜𑁂𑀬𑁆𑀬, 𑀘𑀻𑀯𑀭𑀁 𑀧𑀸𑀦𑀪𑁄𑀚𑀦𑀁.

𑁨𑁨𑁯. ‘‘𑀲𑀼𑀔𑀁 𑀘𑁂 𑀚𑀻𑀯𑀺𑀢𑀼𑀁 𑀇𑀘𑁆𑀙𑁂, 𑀲𑀸𑀫𑀜𑁆𑀜𑀲𑁆𑀫𑀺𑀁 𑀅𑀧𑁂𑀓𑁆𑀔𑀯𑀸;

𑀅𑀳𑀺 𑀫𑀽𑀲𑀺𑀓𑀲𑁄𑀩𑁆𑀪𑀁𑀯, 𑀲𑁂𑀯𑁂𑀣 𑀲𑀬𑀦𑀸𑀲𑀦𑀁.

𑁨𑁩𑁦. ‘‘𑀲𑀼𑀔𑀁 𑀘𑁂 𑀚𑀻𑀯𑀺𑀢𑀼𑀁 𑀇𑀘𑁆𑀙𑁂, 𑀲𑀸𑀫𑀜𑁆𑀜𑀲𑁆𑀫𑀺𑀁 𑀅𑀧𑁂𑀓𑁆𑀔𑀯𑀸;

𑀇𑀢𑀭𑀻𑀢𑀭𑁂𑀦 𑀢𑀼𑀲𑁆𑀲𑁂𑀬𑁆𑀬, 𑀏𑀓𑀥𑀫𑁆𑀫𑀜𑁆𑀘 𑀪𑀸𑀯𑀬𑁂’’𑀢𑀺.

… 𑀥𑀦𑀺𑀬𑁄 𑀣𑁂𑀭𑁄….

𑁫. 𑀫𑀸𑀢𑀗𑁆𑀕𑀧𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁨𑁩𑁧. ‘‘𑀅𑀢𑀺𑀲𑀻𑀢𑀁 𑀅𑀢𑀺𑀉𑀡𑁆𑀳𑀁, 𑀅𑀢𑀺𑀲𑀸𑀬𑀫𑀺𑀤𑀁 𑀅𑀳𑀼;

𑀇𑀢𑀺 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀦𑁆𑀢𑁂, 𑀔𑀡𑀸 𑀅𑀘𑁆𑀘𑁂𑀦𑁆𑀢𑀺 𑀫𑀸𑀡𑀯𑁂.

𑁨𑁩𑁨. ‘‘𑀬𑁄 𑀘 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘, 𑀢𑀺𑀡𑀸 𑀪𑀺𑀬𑁆𑀬𑁄 𑀦 𑀫𑀜𑁆𑀜𑀢𑀺;

𑀓𑀭𑀁 𑀧𑀼𑀭𑀺𑀲𑀓𑀺𑀘𑁆𑀘𑀸𑀦𑀺, 𑀲𑁄 𑀲𑀼𑀔𑀸 𑀦 𑀯𑀺𑀳𑀸𑀬𑀢𑀺.

𑁨𑁩𑁩. ‘‘𑀤𑀩𑁆𑀩𑀁 𑀓𑀼𑀲𑀁 𑀧𑁄𑀝𑀓𑀺𑀮𑀁, 𑀉𑀲𑀻𑀭𑀁 𑀫𑀼𑀜𑁆𑀚𑀧𑀩𑁆𑀩𑀚𑀁;

𑀉𑀭𑀲𑀸 𑀧𑀦𑀼𑀤𑀺𑀲𑁆𑀲𑀸𑀫𑀺, 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀬’’𑀦𑁆𑀢𑀺.

… 𑀫𑀸𑀢𑀗𑁆𑀕𑀧𑀼𑀢𑁆𑀢𑁄 𑀣𑁂𑀭𑁄….

𑁬. 𑀔𑀼𑀚𑁆𑀚𑀲𑁄𑀪𑀺𑀢𑀢𑁆𑀣𑁂𑀭𑀕𑀸𑀣𑀸

𑁨𑁩𑁪. ‘‘𑀬𑁂 𑀘𑀺𑀢𑁆𑀢𑀓𑀣𑀻 𑀩𑀳𑀼𑀲𑁆𑀲𑀼𑀢𑀸, 𑀲𑀫𑀡𑀸 𑀧𑀸𑀝𑀮𑀺𑀧𑀼𑀢𑁆𑀢𑀯𑀸𑀲𑀺𑀦𑁄;

𑀢𑁂𑀲𑀜𑁆𑀜𑀢𑀭𑁄𑀬𑀫𑀸𑀬𑀼𑀯𑀸, 𑀤𑁆𑀯𑀸𑀭𑁂 𑀢𑀺𑀝𑁆𑀞𑀢𑀺 𑀔𑀼𑀚𑁆𑀚𑀲𑁄𑀪𑀺𑀢𑁄.

𑁨𑁩𑁫. ‘‘𑀬𑁂 𑀘𑀺𑀢𑁆𑀢𑀓𑀣𑀻 𑀩𑀳𑀼𑀲𑁆𑀲𑀼𑀢𑀸, 𑀲𑀫𑀡𑀸 𑀧𑀸𑀝𑀮𑀺𑀧𑀼𑀢𑁆𑀢𑀯𑀸𑀲𑀺𑀦𑁄;

𑀢𑁂𑀲𑀜𑁆𑀜𑀢𑀭𑁄𑀬𑀫𑀸𑀬𑀼𑀯𑀸, 𑀤𑁆𑀯𑀸𑀭𑁂 𑀢𑀺𑀝𑁆𑀞𑀢𑀺 𑀫𑀸𑀮𑀼𑀢𑁂𑀭𑀺𑀢𑁄.

𑁨𑁩𑁬. ‘‘𑀲𑀼𑀬𑀼𑀤𑁆𑀥𑁂𑀦 𑀲𑀼𑀬𑀺𑀝𑁆𑀞𑁂𑀦, 𑀲𑀗𑁆𑀕𑀸𑀫𑀯𑀺𑀚𑀬𑁂𑀦 𑀘;

𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀘𑀺𑀡𑁆𑀡𑁂𑀦, 𑀏𑀯𑀸𑀬𑀁 𑀲𑀼𑀔𑀫𑁂𑀥𑀢𑀻’’𑀢𑀺.

… 𑀔𑀼𑀚𑁆𑀚𑀲𑁄𑀪𑀺𑀢𑁄 𑀣𑁂𑀭𑁄….

𑁭. 𑀯𑀸𑀭𑀡𑀢𑁆𑀣𑁂𑀭𑀕𑀸𑀣𑀸

𑁨𑁩𑁭. ‘‘𑀬𑁄𑀥 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀧𑀭𑀧𑀸𑀡𑀸𑀦𑀺 𑀳𑀺𑀁𑀲𑀢𑀺;

𑀅𑀲𑁆𑀫𑀸 𑀮𑁄𑀓𑀸 𑀧𑀭𑀫𑁆𑀳𑀸 𑀘, 𑀉𑀪𑀬𑀸 𑀥𑀁𑀲𑀢𑁂 𑀦𑀭𑁄.

𑁨𑁩𑁮. ‘‘𑀬𑁄 𑀘 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦, 𑀲𑀩𑁆𑀩𑀧𑀸𑀡𑀸𑀦𑀼𑀓𑀫𑁆𑀧𑀢𑀺;

𑀩𑀳𑀼𑀜𑁆𑀳𑀺 𑀲𑁄 𑀧𑀲𑀯𑀢𑀺, 𑀧𑀼𑀜𑁆𑀜𑀁 𑀢𑀸𑀤𑀺𑀲𑀓𑁄 𑀦𑀭𑁄.

𑁨𑁩𑁯. ‘‘𑀲𑀼𑀪𑀸𑀲𑀺𑀢𑀲𑁆𑀲 𑀲𑀺𑀓𑁆𑀔𑁂𑀣, 𑀲𑀫𑀡𑀽𑀧𑀸𑀲𑀦𑀲𑁆𑀲 𑀘;

𑀏𑀓𑀸𑀲𑀦𑀲𑁆𑀲 𑀘 𑀭𑀳𑁄, 𑀘𑀺𑀢𑁆𑀢𑀯𑀽𑀧𑀲𑀫𑀲𑁆𑀲 𑀘𑀸’’𑀢𑀺.

… 𑀯𑀸𑀭𑀡𑁄 𑀣𑁂𑀭𑁄….

𑁮. 𑀯𑀲𑁆𑀲𑀺𑀓𑀢𑁆𑀣𑁂𑀭𑀕𑀸𑀣𑀸

𑁨𑁪𑁦. ‘‘𑀏𑀓𑁄𑀧𑀺 𑀲𑀤𑁆𑀥𑁄 𑀫𑁂𑀥𑀸𑀯𑀻, 𑀅𑀲𑁆𑀲𑀤𑁆𑀥𑀸𑀦𑀻𑀥 𑀜𑀸𑀢𑀺𑀦𑀁;

𑀥𑀫𑁆𑀫𑀝𑁆𑀞𑁄 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀳𑁄𑀢𑀺 𑀅𑀢𑁆𑀣𑀸𑀬 𑀩𑀦𑁆𑀥𑀼𑀦𑀁.

𑁨𑁪𑁧. ‘‘𑀦𑀺𑀕𑁆𑀕𑀬𑁆𑀳 𑀅𑀦𑀼𑀓𑀫𑁆𑀧𑀸𑀬, 𑀘𑁄𑀤𑀺𑀢𑀸 𑀜𑀸𑀢𑀬𑁄 𑀫𑀬𑀸;

𑀜𑀸𑀢𑀺𑀩𑀦𑁆𑀥𑀯𑀧𑁂𑀫𑁂𑀦, 𑀓𑀸𑀭𑀁 𑀓𑀢𑁆𑀯𑀸𑀦 𑀪𑀺𑀓𑁆𑀔𑀼𑀲𑀼.

𑁨𑁪𑁨. ‘‘𑀢𑁂 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸, 𑀧𑀢𑁆𑀢𑀸 𑀢𑁂 𑀢𑀺𑀤𑀺𑀯𑀁 𑀲𑀼𑀔𑀁;

𑀪𑀸𑀢𑀭𑁄 𑀫𑀬𑁆𑀳𑀁 𑀫𑀸𑀢𑀸 𑀘, 𑀫𑁄𑀤𑀦𑁆𑀢𑀺 𑀓𑀸𑀫𑀓𑀸𑀫𑀺𑀦𑁄’’𑀢𑀺.

… 𑀯𑀲𑁆𑀲𑀺𑀓𑁄 [𑀧𑀲𑁆𑀲𑀺𑀓𑁄 (𑀲𑀻. 𑀲𑁆𑀬𑀸. 𑀧𑀻.)] 𑀣𑁂𑀭𑁄….

𑁯. 𑀬𑀲𑁄𑀚𑀢𑁆𑀣𑁂𑀭𑀕𑀸𑀣𑀸

𑁨𑁪𑁩. ‘‘𑀓𑀸𑀮𑀧𑀩𑁆𑀩𑀗𑁆𑀕𑀲𑀗𑁆𑀓𑀸𑀲𑁄, 𑀓𑀺𑀲𑁄 𑀥𑀫𑀦𑀺𑀲𑀦𑁆𑀣𑀢𑁄;

𑀫𑀢𑁆𑀢𑀜𑁆𑀜𑀽 𑀅𑀦𑁆𑀦𑀧𑀸𑀦𑀫𑁆𑀳𑀺, 𑀅𑀤𑀻𑀦𑀫𑀦𑀲𑁄 𑀦𑀭𑁄’’.

𑁨𑁪𑁪. ‘‘𑀨𑀼𑀝𑁆𑀞𑁄 𑀟𑀁𑀲𑁂𑀳𑀺 𑀫𑀓𑀲𑁂𑀳𑀺, 𑀅𑀭𑀜𑁆𑀜𑀲𑁆𑀫𑀺𑀁 𑀩𑁆𑀭𑀳𑀸𑀯𑀦𑁂;

𑀦𑀸𑀕𑁄 𑀲𑀗𑁆𑀕𑀸𑀫𑀲𑀻𑀲𑁂𑀯, 𑀲𑀢𑁄 𑀢𑀢𑁆𑀭𑀸𑀥𑀺𑀯𑀸𑀲𑀬𑁂.

𑁨𑁪𑁫. ‘‘𑀬𑀣𑀸 𑀩𑁆𑀭𑀳𑁆𑀫𑀸 𑀢𑀣𑀸 𑀏𑀓𑁄, 𑀬𑀣𑀸 𑀤𑁂𑀯𑁄 𑀢𑀣𑀸 𑀤𑀼𑀯𑁂;

𑀬𑀣𑀸 𑀕𑀸𑀫𑁄 𑀢𑀣𑀸 𑀢𑀬𑁄, 𑀓𑁄𑀮𑀸𑀳𑀮𑀁 𑀢𑀢𑀼𑀢𑁆𑀢𑀭𑀺’’𑀦𑁆𑀢𑀺.

… 𑀬𑀲𑁄𑀚𑁄 𑀣𑁂𑀭𑁄….

𑁧𑁦. 𑀲𑀸𑀝𑀺𑀫𑀢𑁆𑀢𑀺𑀬𑀢𑁆𑀣𑁂𑀭𑀕𑀸𑀣𑀸

𑁨𑁪𑁬. ‘‘𑀅𑀳𑀼 𑀢𑀼𑀬𑁆𑀳𑀁 𑀧𑀼𑀭𑁂 𑀲𑀤𑁆𑀥𑀸, 𑀲𑀸 𑀢𑁂 𑀅𑀚𑁆𑀚 𑀦 𑀯𑀺𑀚𑁆𑀚𑀢𑀺;

𑀬𑀁 𑀢𑀼𑀬𑁆𑀳𑀁 𑀢𑀼𑀬𑁆𑀳𑀫𑁂𑀯𑁂𑀢𑀁, 𑀦𑀢𑁆𑀣𑀺 𑀤𑀼𑀘𑁆𑀘𑀭𑀺𑀢𑀁 𑀫𑀫.

𑁨𑁪𑁭. ‘‘𑀅𑀦𑀺𑀘𑁆𑀘𑀸 𑀳𑀺 𑀘𑀮𑀸 𑀲𑀤𑁆𑀤𑀸, 𑀏𑀯𑀁 𑀤𑀺𑀝𑁆𑀞𑀸 𑀳𑀺 𑀲𑀸 𑀫𑀬𑀸;

𑀭𑀚𑁆𑀚𑀦𑁆𑀢𑀺𑀧𑀺 𑀯𑀺𑀭𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀓𑀺𑀁 𑀚𑀺𑀬𑁆𑀬𑀢𑁂 𑀫𑀼𑀦𑀺.

𑁨𑁪𑁮. ‘‘𑀧𑀘𑁆𑀘𑀢𑀺 𑀫𑀼𑀦𑀺𑀦𑁄 𑀪𑀢𑁆𑀢𑀁, 𑀣𑁄𑀓𑀁 𑀣𑁄𑀓𑀁 𑀓𑀼𑀮𑁂 𑀓𑀼𑀮𑁂;

𑀧𑀺𑀡𑁆𑀟𑀺𑀓𑀸𑀬 𑀘𑀭𑀺𑀲𑁆𑀲𑀸𑀫𑀺, 𑀅𑀢𑁆𑀣𑀺 𑀚𑀗𑁆𑀖𑀩𑀮𑀁 [𑀚𑀗𑁆𑀖𑀸𑀩𑀮𑀁 (𑀲𑀻.)] 𑀫𑀫𑀸’’𑀢𑀺.

… 𑀲𑀸𑀝𑀺𑀫𑀢𑁆𑀢𑀺𑀬𑁄 𑀣𑁂𑀭𑁄….

𑁧𑁧. 𑀉𑀧𑀸𑀮𑀺𑀢𑁆𑀣𑁂𑀭𑀕𑀸𑀣𑀸

𑁨𑁪𑁯. ‘‘𑀲𑀤𑁆𑀥𑀸𑀬 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀦𑀯𑀧𑀩𑁆𑀩𑀚𑀺𑀢𑁄 𑀦𑀯𑁄;

𑀫𑀺𑀢𑁆𑀢𑁂 𑀪𑀚𑁂𑀬𑁆𑀬 𑀓𑀮𑁆𑀬𑀸𑀡𑁂, 𑀲𑀼𑀤𑁆𑀥𑀸𑀚𑀻𑀯𑁂 𑀅𑀢𑀦𑁆𑀤𑀺𑀢𑁂.

𑁨𑁫𑁦. ‘‘𑀲𑀤𑁆𑀥𑀸𑀬 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀦𑀯𑀧𑀩𑁆𑀩𑀚𑀺𑀢𑁄 𑀦𑀯𑁄;

𑀲𑀗𑁆𑀖𑀲𑁆𑀫𑀺𑀁 𑀯𑀺𑀳𑀭𑀁 𑀪𑀺𑀓𑁆𑀔𑀼, 𑀲𑀺𑀓𑁆𑀔𑁂𑀣 𑀯𑀺𑀦𑀬𑀁 𑀩𑀼𑀥𑁄.

𑁨𑁫𑁧. ‘‘𑀲𑀤𑁆𑀥𑀸𑀬 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀦𑀯𑀧𑀩𑁆𑀩𑀚𑀺𑀢𑁄 𑀦𑀯𑁄;

𑀓𑀧𑁆𑀧𑀸𑀓𑀧𑁆𑀧𑁂𑀲𑀼 𑀓𑀼𑀲𑀮𑁄, 𑀘𑀭𑁂𑀬𑁆𑀬 𑀅𑀧𑀼𑀭𑀓𑁆𑀔𑀢𑁄’’𑀢𑀺.

… 𑀉𑀧𑀸𑀮𑀺𑀢𑁆𑀣𑁂𑀭𑁄….

𑁧𑁨. 𑀉𑀢𑁆𑀢𑀭𑀧𑀸𑀮𑀢𑁆𑀣𑁂𑀭𑀕𑀸𑀣𑀸

𑁨𑁫𑁨. ‘‘𑀧𑀡𑁆𑀟𑀺𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀅𑀮𑀫𑀢𑁆𑀣𑀯𑀺𑀘𑀺𑀦𑁆𑀢𑀓𑀁;

𑀧𑀜𑁆𑀘 𑀓𑀸𑀫𑀕𑀼𑀡𑀸 𑀮𑁄𑀓𑁂, 𑀲𑀫𑁆𑀫𑁄𑀳𑀸 𑀧𑀸𑀢𑀬𑀺𑀁𑀲𑀼 𑀫𑀁.

𑁨𑁫𑁩. ‘‘𑀧𑀓𑁆𑀔𑀦𑁆𑀤𑁄 𑀫𑀸𑀭𑀯𑀺𑀲𑀬𑁂, 𑀤𑀴𑁆𑀳𑀲𑀮𑁆𑀮𑀲𑀫𑀧𑁆𑀧𑀺𑀢𑁄;

𑀅𑀲𑀓𑁆𑀔𑀺𑀁 𑀫𑀘𑁆𑀘𑀼𑀭𑀸𑀚𑀲𑁆𑀲, 𑀅𑀳𑀁 𑀧𑀸𑀲𑀸 𑀧𑀫𑀼𑀘𑁆𑀘𑀺𑀢𑀼𑀁.

𑁨𑁫𑁪. ‘‘𑀲𑀩𑁆𑀩𑁂 𑀓𑀸𑀫𑀸 𑀧𑀳𑀻𑀦𑀸 𑀫𑁂, 𑀪𑀯𑀸 𑀲𑀩𑁆𑀩𑁂 𑀧𑀤𑀸𑀮𑀺𑀢𑀸 [𑀯𑀺𑀤𑀸𑀮𑀺𑀢𑀸 (𑀲𑀻. 𑀧𑀻. 𑀅𑀝𑁆𑀞.)];

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀉𑀢𑁆𑀢𑀭𑀧𑀸𑀮𑁄 𑀣𑁂𑀭𑁄….

𑁧𑁩. 𑀅𑀪𑀺𑀪𑀽𑀢𑀢𑁆𑀣𑁂𑀭𑀕𑀸𑀣𑀸

𑁨𑁫𑁫. ‘‘𑀲𑀼𑀡𑀸𑀣 𑀜𑀸𑀢𑀬𑁄 𑀲𑀩𑁆𑀩𑁂, 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀥𑀫𑁆𑀫𑀁 𑀯𑁄 𑀤𑁂𑀲𑀬𑀺𑀲𑁆𑀲𑀸𑀫𑀺, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

𑁨𑁫𑁬. [𑀲𑀁. 𑀦𑀺. 𑁧.𑁧𑁮𑁫] ‘‘𑀆𑀭𑀫𑁆𑀪𑀣 [𑀆𑀭𑀪𑀣 (𑀲𑀻. 𑀲𑁆𑀬𑀸.), 𑀆𑀭𑀩𑁆𑀪𑀣 (𑀓.)] 𑀦𑀺𑀓𑁆𑀓𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂;

𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄.

𑁨𑁫𑁭. ‘‘𑀬𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀲𑁆𑀲𑀢𑀺 [𑀯𑀺𑀳𑁂𑀲𑁆𑀲𑀢𑀺 (𑀲𑁆𑀬𑀸. 𑀧𑀻.)];

𑀧𑀳𑀸𑀬 𑀚𑀸𑀢𑀺𑀲𑀁𑀲𑀸𑀭𑀁, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻’’𑀢𑀺.

… 𑀅𑀪𑀺𑀪𑀽𑀢𑁄 𑀣𑁂𑀭𑁄….

𑁧𑁪. 𑀕𑁄𑀢𑀫𑀢𑁆𑀣𑁂𑀭𑀕𑀸𑀣𑀸

𑁨𑁫𑁮. ‘‘𑀲𑀁𑀲𑀭𑀁 𑀳𑀺 𑀦𑀺𑀭𑀬𑀁 𑀅𑀕𑀘𑁆𑀙𑀺𑀲𑁆𑀲𑀁, 𑀧𑁂𑀢𑀮𑁄𑀓𑀫𑀕𑀫𑀁 𑀧𑀼𑀦𑀧𑁆𑀧𑀼𑀦𑀁;

𑀤𑀼𑀓𑁆𑀔𑀫𑀫𑁆𑀳𑀺𑀧𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀦𑁂𑀓𑀥𑀸 𑀳𑀺 𑀯𑀼𑀲𑀺𑀢𑀁 𑀘𑀺𑀭𑀁 𑀫𑀬𑀸.

𑁨𑁫𑁯. ‘‘𑀫𑀸𑀦𑀼𑀲𑁄𑀧𑀺 𑀘 𑀪𑀯𑁄𑀪𑀺𑀭𑀸𑀥𑀺𑀢𑁄, 𑀲𑀕𑁆𑀕𑀓𑀸𑀬𑀫𑀕𑀫𑀁 𑀲𑀓𑀺𑀁 𑀲𑀓𑀺𑀁;

𑀭𑀽𑀧𑀥𑀸𑀢𑀼𑀲𑀼 𑀅𑀭𑀽𑀧𑀥𑀸𑀢𑀼𑀲𑀼, 𑀦𑁂𑀯𑀲𑀜𑁆𑀜𑀺𑀲𑀼 𑀅𑀲𑀜𑁆𑀜𑀺𑀲𑀼𑀝𑁆𑀞𑀺𑀢𑀁.

𑁨𑁬𑁦. ‘‘𑀲𑀫𑁆𑀪𑀯𑀸 𑀲𑀼𑀯𑀺𑀤𑀺𑀢𑀸 𑀅𑀲𑀸𑀭𑀓𑀸, 𑀲𑀗𑁆𑀔𑀢𑀸 𑀧𑀘𑀮𑀺𑀢𑀸 𑀲𑀤𑁂𑀭𑀺𑀢𑀸;

𑀢𑀁 𑀯𑀺𑀤𑀺𑀢𑁆𑀯𑀸 𑀫𑀳𑀫𑀢𑁆𑀢𑀲𑀫𑁆𑀪𑀯𑀁, 𑀲𑀦𑁆𑀢𑀺𑀫𑁂𑀯 𑀲𑀢𑀺𑀫𑀸 𑀲𑀫𑀚𑁆𑀛𑀕’’𑀦𑁆𑀢𑀺.

… 𑀕𑁄𑀢𑀫𑁄 𑀣𑁂𑀭𑁄….

𑁧𑁫. 𑀳𑀸𑀭𑀺𑀢𑀢𑁆𑀣𑁂𑀭𑀕𑀸𑀣𑀸

𑁨𑁬𑁧. ‘‘𑀬𑁄 𑀧𑀼𑀩𑁆𑀩𑁂 𑀓𑀭𑀡𑀻𑀬𑀸𑀦𑀺, 𑀧𑀘𑁆𑀙𑀸 𑀲𑁄 𑀓𑀸𑀢𑀼𑀫𑀺𑀘𑁆𑀙𑀢𑀺;

𑀲𑀼𑀔𑀸 𑀲𑁄 𑀥𑀁𑀲𑀢𑁂 𑀞𑀸𑀦𑀸, 𑀧𑀘𑁆𑀙𑀸 𑀘 𑀫𑀦𑀼𑀢𑀧𑁆𑀧𑀢𑀺.

𑁨𑁬𑁨. ‘‘𑀬𑀜𑁆𑀳𑀺 𑀓𑀬𑀺𑀭𑀸 𑀢𑀜𑁆𑀳𑀺 𑀯𑀤𑁂, 𑀬𑀁 𑀦 𑀓𑀬𑀺𑀭𑀸 𑀦 𑀢𑀁 𑀯𑀤𑁂;

𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁨𑁬𑁩. ‘‘𑀲𑀼𑀲𑀼𑀔𑀁 𑀯𑀢 𑀦𑀺𑀩𑁆𑀩𑀸𑀦𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁;

𑀅𑀲𑁄𑀓𑀁 𑀯𑀺𑀭𑀚𑀁 𑀔𑁂𑀫𑀁, 𑀬𑀢𑁆𑀣 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺.

… 𑀳𑀸𑀭𑀺𑀢𑁄 𑀣𑁂𑀭𑁄….

𑁧𑁬. 𑀯𑀺𑀫𑀮𑀢𑁆𑀣𑁂𑀭𑀕𑀸𑀣𑀸

𑁨𑁬𑁪. ‘‘𑀧𑀸𑀧𑀫𑀺𑀢𑁆𑀢𑁂 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀪𑀚𑁂𑀬𑁆𑀬𑀼𑀢𑁆𑀢𑀫𑀧𑀼𑀕𑁆𑀕𑀮𑀁;

𑀑𑀯𑀸𑀤𑁂 𑀘𑀲𑁆𑀲 𑀢𑀺𑀝𑁆𑀞𑁂𑀬𑁆𑀬, 𑀧𑀢𑁆𑀣𑁂𑀦𑁆𑀢𑁄 𑀅𑀘𑀮𑀁 𑀲𑀼𑀔𑀁.

𑁨𑁬𑁫. ‘‘𑀧𑀭𑀺𑀢𑁆𑀢𑀁 𑀤𑀸𑀭𑀼𑀫𑀸𑀭𑀼𑀬𑁆𑀳, 𑀬𑀣𑀸 𑀲𑀻𑀤𑁂 𑀫𑀳𑀡𑁆𑀡𑀯𑁂;

𑀏𑀯𑀁 𑀓𑀼𑀲𑀻𑀢𑀫𑀸𑀕𑀫𑁆𑀫, 𑀲𑀸𑀥𑀼𑀚𑀻𑀯𑀻𑀧𑀺 𑀲𑀻𑀤𑀢𑀺;

𑀢𑀲𑁆𑀫𑀸 𑀢𑀁 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀓𑀼𑀲𑀻𑀢𑀁 𑀳𑀻𑀦𑀯𑀻𑀭𑀺𑀬𑀁.

𑁨𑁬𑁬. ‘‘𑀧𑀯𑀺𑀯𑀺𑀢𑁆𑀢𑁂𑀳𑀺 𑀅𑀭𑀺𑀬𑁂𑀳𑀺, 𑀧𑀳𑀺𑀢𑀢𑁆𑀢𑁂𑀳𑀺 𑀛𑀸𑀬𑀺𑀪𑀺;

𑀦𑀺𑀘𑁆𑀘𑀁 𑀆𑀭𑀤𑁆𑀥𑀯𑀻𑀭𑀺𑀬𑁂𑀳𑀺, 𑀧𑀡𑁆𑀟𑀺𑀢𑁂𑀳𑀺 𑀲𑀳𑀸𑀯𑀲𑁂’’𑀢𑀺.

… 𑀯𑀺𑀫𑀮𑁄 𑀣𑁂𑀭𑁄….

𑀢𑀺𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.