𑁨𑁦. 𑀲𑀝𑁆𑀞𑀺𑀦𑀺𑀧𑀸𑀢𑁄

𑁧. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀕𑀸𑀣𑀸

𑁧𑁧𑁪𑁯. ‘‘𑀆𑀭𑀜𑁆𑀜𑀺𑀓𑀸 𑀧𑀺𑀡𑁆𑀟𑀧𑀸𑀢𑀺𑀓𑀸, 𑀉𑀜𑁆𑀙𑀸𑀧𑀢𑁆𑀢𑀸𑀕𑀢𑁂 𑀭𑀢𑀸;

𑀤𑀸𑀮𑁂𑀫𑀼 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀸.

𑁧𑁧𑁫𑁦. ‘‘𑀆𑀭𑀜𑁆𑀜𑀺𑀓𑀸 𑀧𑀺𑀡𑁆𑀟𑀧𑀸𑀢𑀺𑀓𑀸, 𑀉𑀜𑁆𑀙𑀸𑀧𑀢𑁆𑀢𑀸𑀕𑀢𑁂 𑀭𑀢𑀸;

𑀥𑀼𑀦𑀸𑀫 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄.

𑁧𑁧𑁫𑁧. ‘‘𑀭𑀼𑀓𑁆𑀔𑀫𑀽𑀮𑀺𑀓𑀸 𑀲𑀸𑀢𑀢𑀺𑀓𑀸, 𑀉𑀜𑁆𑀙𑀸𑀧𑀢𑁆𑀢𑀸𑀕𑀢𑁂 𑀭𑀢𑀸;

𑀤𑀸𑀮𑁂𑀫𑀼 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀸.

𑁧𑁧𑁫𑁨. ‘‘𑀭𑀼𑀓𑁆𑀔𑀫𑀽𑀮𑀺𑀓𑀸 𑀲𑀸𑀢𑀢𑀺𑀓𑀸, 𑀉𑀜𑁆𑀙𑀸𑀧𑀢𑁆𑀢𑀸𑀕𑀢𑁂 𑀭𑀢𑀸;

𑀥𑀼𑀦𑀸𑀫 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄.

𑁧𑁧𑁫𑁩. ‘‘𑀅𑀝𑁆𑀞𑀺𑀓𑀗𑁆𑀓𑀮𑀓𑀼𑀝𑀺𑀓𑁂, 𑀫𑀁𑀲𑀦𑁆𑀳𑀸𑀭𑀼𑀧𑀲𑀺𑀩𑁆𑀩𑀺𑀢𑁂;

𑀥𑀺𑀭𑀢𑁆𑀣𑀼 𑀧𑀼𑀭𑁂 𑀤𑀼𑀕𑁆𑀕𑀦𑁆𑀥𑁂, 𑀧𑀭𑀕𑀢𑁆𑀢𑁂 𑀫𑀫𑀸𑀬𑀲𑁂.

𑁧𑁧𑁫𑁪. ‘‘𑀕𑀽𑀣𑀪𑀲𑁆𑀢𑁂 𑀢𑀘𑁄𑀦𑀤𑁆𑀥𑁂, 𑀉𑀭𑀕𑀡𑁆𑀟𑀺𑀧𑀺𑀲𑀸𑀘𑀺𑀦𑀺;

𑀦𑀯 𑀲𑁄𑀢𑀸𑀦𑀺 𑀢𑁂 𑀓𑀸𑀬𑁂, 𑀬𑀸𑀦𑀺 𑀲𑀦𑁆𑀤𑀦𑁆𑀢𑀺 𑀲𑀩𑁆𑀩𑀤𑀸.

𑁧𑁧𑁫𑁫. ‘‘𑀢𑀯 𑀲𑀭𑀻𑀭𑀁 𑀦𑀯𑀲𑁄𑀢𑀁, 𑀤𑀼𑀕𑁆𑀕𑀦𑁆𑀥𑀓𑀭𑀁 𑀧𑀭𑀺𑀩𑀦𑁆𑀥𑀁;

𑀪𑀺𑀓𑁆𑀔𑀼 𑀧𑀭𑀺𑀯𑀚𑁆𑀚𑀬𑀢𑁂 𑀢𑀁, 𑀫𑀻𑀴𑁆𑀳𑀁 𑀘 𑀬𑀣𑀸 𑀲𑀼𑀘𑀺𑀓𑀸𑀫𑁄.

𑁧𑁧𑁫𑁬. ‘‘𑀏𑀯𑀜𑁆𑀘𑁂 𑀢𑀁 𑀚𑀦𑁄 𑀚𑀜𑁆𑀜𑀸, 𑀬𑀣𑀸 𑀚𑀸𑀦𑀸𑀫𑀺 𑀢𑀁 𑀅𑀳𑀁;

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀕𑀽𑀣𑀝𑁆𑀞𑀸𑀦𑀁𑀯 𑀧𑀸𑀯𑀼𑀲𑁂’’.

𑁧𑁧𑁫𑁭. ‘‘𑀏𑀯𑀫𑁂𑀢𑀁 𑀫𑀳𑀸𑀯𑀻𑀭, 𑀬𑀣𑀸 𑀲𑀫𑀡 𑀪𑀸𑀲𑀲𑀺;

𑀏𑀢𑁆𑀣 𑀘𑁂𑀓𑁂 𑀯𑀺𑀲𑀻𑀤𑀦𑁆𑀢𑀺, 𑀧𑀗𑁆𑀓𑀫𑁆𑀳𑀺𑀯 𑀚𑀭𑀕𑁆𑀕𑀯𑁄.

𑁧𑁧𑁫𑁮. ‘‘𑀆𑀓𑀸𑀲𑀫𑁆𑀳𑀺 𑀳𑀮𑀺𑀤𑁆𑀤𑀺𑀬𑀸, 𑀬𑁄 𑀫𑀜𑁆𑀜𑁂𑀣 𑀭𑀚𑁂𑀢𑀯𑁂;

𑀅𑀜𑁆𑀜𑁂𑀦 𑀯𑀸𑀧𑀺 𑀭𑀗𑁆𑀕𑁂𑀦, 𑀯𑀺𑀖𑀸𑀢𑀼𑀤𑀬𑀫𑁂𑀯 𑀢𑀁.

𑁧𑁧𑁫𑁯. ‘‘𑀢𑀤𑀸𑀓𑀸𑀲𑀲𑀫𑀁 𑀘𑀺𑀢𑁆𑀢𑀁, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀁;

𑀫𑀸 𑀧𑀸𑀧𑀘𑀺𑀢𑁆𑀢𑁂 𑀆𑀲𑀸𑀤𑀺, 𑀅𑀕𑁆𑀕𑀺𑀔𑀦𑁆𑀥𑀁𑀯 𑀧𑀓𑁆𑀔𑀺𑀫𑀸.

𑁧𑁧𑁬𑁦. ‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀩𑀺𑀫𑁆𑀩𑀁, 𑀅𑀭𑀼𑀓𑀸𑀬𑀁 𑀲𑀫𑀼𑀲𑁆𑀲𑀺𑀢𑀁;

𑀆𑀢𑀼𑀭𑀁 𑀩𑀳𑀼𑀲𑀗𑁆𑀓𑀧𑁆𑀧𑀁, 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀺.

𑁧𑁧𑁬𑁧. ‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀭𑀽𑀧𑀁, 𑀫𑀡𑀺𑀦𑀸 𑀓𑀼𑀡𑁆𑀟𑀮𑁂𑀦 𑀘;

𑀅𑀝𑁆𑀞𑀺𑀁 𑀢𑀘𑁂𑀦 𑀑𑀦𑀤𑁆𑀥𑀁, 𑀲𑀳 𑀯𑀢𑁆𑀣𑁂𑀳𑀺 𑀲𑁄𑀪𑀢𑀺.

𑁧𑁧𑁬𑁨. ‘‘𑀅𑀮𑀢𑁆𑀢𑀓𑀓𑀢𑀸 𑀧𑀸𑀤𑀸, 𑀫𑀼𑀔𑀁 𑀘𑀼𑀡𑁆𑀡𑀓𑀫𑀓𑁆𑀔𑀺𑀢𑀁;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

𑁧𑁧𑁬𑁩. ‘‘𑀅𑀝𑁆𑀞𑀧𑀤𑀓𑀢𑀸 𑀓𑁂𑀲𑀸, 𑀦𑁂𑀢𑁆𑀢𑀸 𑀅𑀜𑁆𑀚𑀦𑀫𑀓𑁆𑀔𑀺𑀢𑀸;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

𑁧𑁧𑁬𑁪. ‘‘𑀅𑀜𑁆𑀚𑀦𑀻𑀯 𑀦𑀯𑀸 𑀘𑀺𑀢𑁆𑀢𑀸, 𑀧𑀽𑀢𑀺𑀓𑀸𑀬𑁄 𑀅𑀮𑀗𑁆𑀓𑀢𑁄;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

𑁧𑁧𑁬𑁫. ‘‘𑀑𑀤𑀳𑀺 𑀫𑀺𑀕𑀯𑁄 𑀧𑀸𑀲𑀁, 𑀦𑀸𑀲𑀤𑀸 𑀯𑀸𑀕𑀼𑀭𑀁 𑀫𑀺𑀕𑁄;

𑀪𑀼𑀢𑁆𑀯𑀸 𑀦𑀺𑀯𑀸𑀧𑀁 𑀕𑀘𑁆𑀙𑀸𑀫, 𑀓𑀤𑁆𑀤𑀦𑁆𑀢𑁂 𑀫𑀺𑀕𑀩𑀦𑁆𑀥𑀓𑁂.

𑁧𑁧𑁬𑁬. ‘‘𑀙𑀺𑀦𑁆𑀦𑁄 𑀧𑀸𑀲𑁄 𑀫𑀺𑀕𑀯𑀲𑁆𑀲, 𑀦𑀸𑀲𑀤𑀸 𑀯𑀸𑀕𑀼𑀭𑀁 𑀫𑀺𑀕𑁄;

𑀪𑀼𑀢𑁆𑀯𑀸 𑀦𑀺𑀯𑀸𑀧𑀁 𑀕𑀘𑁆𑀙𑀸𑀫, 𑀲𑁄𑀘𑀦𑁆𑀢𑁂 𑀫𑀺𑀕𑀮𑀼𑀤𑁆𑀤𑀓𑁂.

𑁧𑁧𑁬𑁭. ‘‘𑀢𑀤𑀸𑀲𑀺 𑀬𑀁 𑀪𑀺𑀁𑀲𑀦𑀓𑀁, 𑀢𑀤𑀸𑀲𑀺 𑀮𑁄𑀫𑀳𑀁𑀲𑀦𑀁;

𑀅𑀦𑁂𑀓𑀸𑀓𑀸𑀭𑀲𑀫𑁆𑀧𑀦𑁆𑀦𑁂, 𑀲𑀸𑀭𑀺𑀧𑀼𑀢𑁆𑀢𑀫𑁆𑀳𑀺 𑀦𑀺𑀩𑁆𑀩𑀼𑀢𑁂.

𑁧𑁧𑁬𑁮. [𑀤𑀻. 𑀦𑀺. 𑁨.𑁨𑁨𑁧, 𑁨𑁭𑁨; 𑀲𑀁. 𑀦𑀺. 𑁧.𑁧𑁮𑁬; 𑁨.𑁧𑁪𑁩; 𑀅𑀧. 𑀣𑁂𑀭 𑁧.𑁨.𑁧𑁧𑁫; 𑀚𑀸. 𑁧.𑁧.𑁯𑁫] ‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸 𑀉𑀧𑁆𑀧𑀸𑀤𑀯𑀬 𑀥𑀫𑁆𑀫𑀺𑀦𑁄.

𑀉𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄.

𑁧𑁧𑁬𑁯. ‘‘𑀲𑀼𑀔𑀼𑀫𑀁 𑀢𑁂 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀯𑀸𑀮𑀕𑁆𑀕𑀁 𑀉𑀲𑀼𑀦𑀸 𑀬𑀣𑀸;

𑀬𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀲𑁆𑀲𑀦𑁆𑀢𑀺, 𑀧𑀭𑀢𑁄 𑀦𑁄 𑀘 𑀅𑀢𑁆𑀢𑀢𑁄.

𑁧𑁧𑁭𑁦. ‘‘𑀬𑁂 𑀘 𑀧𑀲𑁆𑀲𑀦𑁆𑀢𑀺 𑀲𑀗𑁆𑀔𑀸𑀭𑁂, 𑀧𑀭𑀢𑁄 𑀦𑁄 𑀘 𑀅𑀢𑁆𑀢𑀢𑁄;

𑀧𑀘𑁆𑀘𑀩𑁆𑀬𑀸𑀥𑀺𑀁𑀲𑀼 𑀦𑀺𑀧𑀼𑀡𑀁, 𑀯𑀸𑀮𑀕𑁆𑀕𑀁 𑀉𑀲𑀼𑀦𑀸 𑀬𑀣𑀸.

𑁧𑁧𑁭𑁧. [𑀲𑀁. 𑀦𑀺. 𑁧.𑁨𑁧, 𑁯𑁭] ‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀟𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂;

𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂.

𑁧𑁧𑁭𑁨. [𑀲𑀁. 𑀦𑀺. 𑁧.𑁨𑁧, 𑁯𑁭]‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀟𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂;

𑀪𑀯𑀭𑀸𑀕𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’.

𑁧𑁧𑁭𑁩. ‘‘𑀘𑁄𑀤𑀺𑀢𑁄 𑀪𑀸𑀯𑀺𑀢𑀢𑁆𑀢𑁂𑀦, 𑀲𑀭𑀻𑀭𑀦𑁆𑀢𑀺𑀫𑀥𑀸𑀭𑀺𑀦𑀸;

𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑀁, 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀧𑀬𑀺𑀁.

𑁧𑁧𑁭𑁪. ‘‘𑀦𑀬𑀺𑀤𑀁 𑀲𑀺𑀣𑀺𑀮𑀫𑀸𑀭𑀩𑁆𑀪, 𑀦𑀬𑀺𑀤𑀁 𑀅𑀧𑁆𑀧𑁂𑀦 𑀣𑀸𑀫𑀲𑀸;

𑀦𑀺𑀩𑁆𑀩𑀸𑀦𑀫𑀥𑀺𑀕𑀦𑁆𑀢𑀩𑁆𑀩𑀁, 𑀲𑀩𑁆𑀩𑀕𑀦𑁆𑀣-𑀧𑀫𑁄𑀘𑀦𑀁.

𑁧𑁧𑁭𑁫. ‘‘𑀅𑀬𑀜𑁆𑀘 𑀤𑀳𑀭𑁄 𑀪𑀺𑀓𑁆𑀔𑀼, 𑀅𑀬𑀫𑀼𑀢𑁆𑀢𑀫𑀧𑁄𑀭𑀺𑀲𑁄;

𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀺𑀦𑀺𑀁 [𑀲𑀯𑀸𑀳𑀦𑀁 (𑀓.)].

𑁧𑁧𑁭𑁬. ‘‘𑀯𑀺𑀯𑀭𑀫𑀦𑀼𑀧𑀪𑀦𑁆𑀢𑀺 𑀯𑀺𑀚𑁆𑀚𑀼𑀢𑀸, 𑀯𑁂𑀪𑀸𑀭𑀲𑁆𑀲 𑀘 𑀧𑀡𑁆𑀟𑀯𑀲𑁆𑀲 𑀘;

𑀦𑀕𑀯𑀺𑀯𑀭𑀕𑀢𑁄 𑀛𑀸𑀬𑀢𑀺, 𑀧𑀼𑀢𑁆𑀢𑁄 𑀅𑀧𑁆𑀧𑀝𑀺𑀫𑀲𑁆𑀲 𑀢𑀸𑀤𑀺𑀦𑁄.

𑁧𑁧𑁭𑁭. ‘‘𑀉𑀧𑀲𑀦𑁆𑀢𑁄 𑀉𑀧𑀭𑀢𑁄, 𑀧𑀦𑁆𑀢𑀲𑁂𑀦𑀸𑀲𑀦𑁄 𑀫𑀼𑀦𑀺;

𑀤𑀸𑀬𑀸𑀤𑁄 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀩𑁆𑀭𑀳𑁆𑀫𑀼𑀦𑀸 𑀅𑀪𑀺𑀯𑀦𑁆𑀤𑀺𑀢𑁄.

𑁧𑁧𑁭𑁮. ‘‘𑀉𑀧𑀲𑀦𑁆𑀢𑀁 𑀉𑀧𑀭𑀢𑀁, 𑀧𑀦𑁆𑀢𑀲𑁂𑀦𑀸𑀲𑀦𑀁 𑀫𑀼𑀦𑀺𑀁;

𑀤𑀸𑀬𑀸𑀤𑀁 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀯𑀦𑁆𑀤 𑀩𑁆𑀭𑀸𑀳𑁆𑀫𑀡 𑀓𑀲𑁆𑀲𑀧𑀁.

𑁧𑁧𑁭𑁯. ‘‘𑀬𑁄 𑀘 𑀚𑀸𑀢𑀺𑀲𑀢𑀁 𑀕𑀘𑁆𑀙𑁂, 𑀲𑀩𑁆𑀩𑀸 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀬𑁄;

𑀲𑁄𑀢𑁆𑀢𑀺𑀬𑁄 𑀯𑁂𑀤𑀲𑀫𑁆𑀧𑀦𑁆𑀦𑁄, 𑀫𑀦𑀼𑀲𑁆𑀲𑁂𑀲𑀼 𑀧𑀼𑀦𑀧𑁆𑀧𑀼𑀦𑀁.

𑁧𑁧𑁮𑁦. ‘‘𑀅𑀚𑁆𑀛𑀸𑀬𑀓𑁄𑀧𑀺 𑀘𑁂 𑀅𑀲𑁆𑀲, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽;

𑀏𑀢𑀲𑁆𑀲 𑀯𑀦𑁆𑀤𑀦𑀸𑀬𑁂𑀢𑀁, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺𑀁.

𑁧𑁧𑁮𑁧. ‘‘𑀬𑁄 𑀲𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸𑀦𑀺, 𑀧𑀼𑀭𑁂𑀪𑀢𑁆𑀢𑀁 𑀅𑀨𑀲𑁆𑀲𑀬𑀺 [𑀅𑀧𑀲𑁆𑀲𑀬𑀺 (𑀲𑀻. 𑀓.), 𑀅𑀨𑀼𑀲𑁆𑀲𑀬𑀺 (𑀲𑁆𑀬𑀸.)];

𑀅𑀦𑀼𑀮𑁄𑀫𑀁 𑀧𑀝𑀺𑀮𑁄𑀫𑀁, 𑀢𑀢𑁄 𑀧𑀺𑀡𑁆𑀟𑀸𑀬 𑀕𑀘𑁆𑀙𑀢𑀺.

𑁧𑁧𑁮𑁨. ‘‘𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀁 𑀫𑀸𑀲𑀸𑀤𑀺 [𑀫𑀸 𑀳𑀦𑀺 (𑀲𑀻.)], 𑀫𑀸𑀢𑁆𑀢𑀸𑀦𑀁 𑀔𑀡𑀺 𑀩𑁆𑀭𑀸𑀳𑁆𑀫𑀡;

𑀅𑀪𑀺𑀧𑁆𑀧𑀲𑀸𑀤𑁂𑀳𑀺 𑀫𑀦𑀁, 𑀅𑀭𑀳𑀦𑁆𑀢𑀫𑁆𑀳𑀺 𑀢𑀸𑀤𑀺𑀦𑁂;

𑀔𑀺𑀧𑁆𑀧𑀁 𑀧𑀜𑁆𑀚𑀮𑀺𑀓𑁄 𑀯𑀦𑁆𑀤, 𑀫𑀸 𑀢𑁂 𑀯𑀺𑀚𑀝𑀺 𑀫𑀢𑁆𑀣𑀓𑀁.

𑁧𑁧𑁮𑁩. ‘‘𑀦𑁂𑀲𑁄 𑀧𑀲𑁆𑀲𑀢𑀺 𑀲𑀤𑁆𑀥𑀫𑁆𑀫𑀁, 𑀲𑀁𑀲𑀸𑀭𑁂𑀦 𑀧𑀼𑀭𑀓𑁆𑀔𑀢𑁄;

𑀅𑀥𑁄𑀕𑀫𑀁 𑀚𑀺𑀫𑁆𑀳𑀧𑀣𑀁, 𑀓𑀼𑀫𑁆𑀫𑀕𑁆𑀕𑀫𑀦𑀼𑀥𑀸𑀯𑀢𑀺.

𑁧𑁧𑁮𑁪. ‘‘𑀓𑀺𑀫𑀻𑀯 𑀫𑀻𑀴𑁆𑀳𑀲𑀮𑁆𑀮𑀺𑀢𑁆𑀢𑁄, 𑀲𑀗𑁆𑀔𑀸𑀭𑁂 𑀅𑀥𑀺𑀫𑀼𑀘𑁆𑀙𑀺𑀢𑁄;

𑀧𑀕𑀸𑀴𑁆𑀳𑁄 𑀮𑀸𑀪𑀲𑀓𑁆𑀓𑀸𑀭𑁂, 𑀢𑀼𑀘𑁆𑀙𑁄 𑀕𑀘𑁆𑀙𑀢𑀺 𑀧𑁄𑀝𑁆𑀞𑀺𑀮𑁄.

𑁧𑁧𑁮𑁫. ‘‘𑀇𑀫𑀜𑁆𑀘 𑀧𑀲𑁆𑀲 𑀆𑀬𑀦𑁆𑀢𑀁, 𑀲𑀸𑀭𑀺𑀧𑀼𑀢𑁆𑀢𑀁 𑀲𑀼𑀤𑀲𑁆𑀲𑀦𑀁;

𑀯𑀺𑀫𑀼𑀢𑁆𑀢𑀁 𑀉𑀪𑀢𑁄𑀪𑀸𑀕𑁂, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀁.

𑁧𑁧𑁮𑁬. ‘‘𑀯𑀺𑀲𑀮𑁆𑀮𑀁 𑀔𑀻𑀡𑀲𑀁𑀬𑁄𑀕𑀁, 𑀢𑁂𑀯𑀺𑀚𑁆𑀚𑀁 𑀫𑀘𑁆𑀘𑀼𑀳𑀸𑀬𑀺𑀦𑀁;

𑀤𑀓𑁆𑀔𑀺𑀡𑁂𑀬𑁆𑀬𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁.

𑁧𑁧𑁮𑁭. ‘‘𑀏𑀢𑁂 𑀲𑀫𑁆𑀩𑀳𑀼𑀮𑀸 𑀤𑁂𑀯𑀸, 𑀇𑀤𑁆𑀥𑀺𑀫𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀤𑀲 𑀤𑁂𑀯𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑁂 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸;

𑀫𑁄𑀕𑁆𑀕𑀮𑁆𑀮𑀸𑀦𑀁 𑀦𑀫𑀲𑁆𑀲𑀦𑁆𑀢𑀸, 𑀢𑀺𑀝𑁆𑀞𑀦𑁆𑀢𑀺 𑀧𑀜𑁆𑀚𑀮𑀻𑀓𑀢𑀸.

𑁧𑁧𑁮𑁮. ‘‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀆𑀲𑀯𑀸 𑀔𑀻𑀡𑀸, 𑀤𑀓𑁆𑀔𑀺𑀡𑁂𑀬𑁆𑀬𑁄𑀲𑀺 𑀫𑀸𑀭𑀺𑀲’.

𑁧𑁧𑁮𑁯. ‘‘𑀧𑀽𑀚𑀺𑀢𑁄 𑀦𑀭𑀤𑁂𑀯𑁂𑀦, 𑀉𑀧𑁆𑀧𑀦𑁆𑀦𑁄 𑀫𑀭𑀡𑀸𑀪𑀺𑀪𑀽;

𑀧𑀼𑀡𑁆𑀟𑀭𑀻𑀓𑀁𑀯 𑀢𑁄𑀬𑁂𑀦, 𑀲𑀗𑁆𑀔𑀸𑀭𑁂𑀦𑀼𑀧𑀮𑀺𑀧𑁆𑀧𑀢𑀺.

𑁧𑁧𑁯𑁦. ‘‘𑀬𑀲𑁆𑀲 𑀫𑀼𑀳𑀼𑀢𑁆𑀢𑁂𑀦 𑀲𑀳𑀲𑁆𑀲𑀥𑀸 𑀮𑁄𑀓𑁄, 𑀲𑀁𑀯𑀺𑀤𑀺𑀢𑁄 𑀲𑀩𑁆𑀭𑀳𑁆𑀫𑀓𑀧𑁆𑀧𑁄 𑀯𑀲𑀺;

𑀇𑀤𑁆𑀥𑀺𑀕𑀼𑀡𑁂 𑀘𑀼𑀢𑀼𑀧𑀧𑀸𑀢𑁂 𑀓𑀸𑀮𑁂, 𑀧𑀲𑁆𑀲𑀢𑀺 𑀤𑁂𑀯𑀢𑀸 𑀲 𑀪𑀺𑀓𑁆𑀔𑀼.

𑁧𑁧𑁯𑁧. ‘‘𑀲𑀸𑀭𑀺𑀧𑀼𑀢𑁆𑀢𑁄𑀯 𑀧𑀜𑁆𑀜𑀸𑀬, 𑀲𑀻𑀮𑁂𑀦 𑀉𑀧𑀲𑀫𑁂𑀦 𑀘;

𑀬𑁄𑀧𑀺 𑀧𑀸𑀭𑀗𑁆𑀕𑀢𑁄 𑀪𑀺𑀓𑁆𑀔𑀼, 𑀏𑀢𑀸𑀯𑀧𑀭𑀫𑁄 𑀲𑀺𑀬𑀸.

𑁧𑁧𑁯𑁨. ‘‘𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑁆𑀲, 𑀅𑀢𑁆𑀢𑀪𑀸𑀯𑀁 𑀔𑀡𑁂𑀦 𑀦𑀺𑀫𑁆𑀫𑀺𑀦𑁂;

𑀅𑀳𑀁 𑀯𑀺𑀓𑀼𑀩𑁆𑀩𑀦𑀸𑀲𑀼 𑀓𑀼𑀲𑀮𑁄, 𑀯𑀲𑀻𑀪𑀽𑀢𑁄𑀫𑁆𑀳𑀺 𑀇𑀤𑁆𑀥𑀺𑀬𑀸.

𑁧𑁧𑁯𑁩. ‘‘𑀲𑀫𑀸𑀥𑀺𑀯𑀺𑀚𑁆𑀚𑀸𑀯𑀲𑀺𑀧𑀸𑀭𑀫𑀻𑀕𑀢𑁄, 𑀫𑁄𑀕𑁆𑀕𑀮𑁆𑀮𑀸𑀦𑀕𑁄𑀢𑁆𑀢𑁄 𑀅𑀲𑀺𑀢𑀲𑁆𑀲 𑀲𑀸𑀲𑀦𑁂;

𑀥𑀻𑀭𑁄 𑀲𑀫𑀼𑀘𑁆𑀙𑀺𑀦𑁆𑀤𑀺 𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑁄, 𑀦𑀸𑀕𑁄 𑀬𑀣𑀸 𑀧𑀽𑀢𑀺𑀮𑀢𑀁𑀯 𑀩𑀦𑁆𑀥𑀦𑀁.

𑁧𑁧𑁯𑁪. ‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀑𑀳𑀺𑀢𑁄 𑀕𑀭𑀼𑀓𑁄 𑀪𑀸𑀭𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

𑁧𑁧𑁯𑁫. ‘‘𑀬𑀲𑁆𑀲 𑀘𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄.

𑁧𑁧𑁯𑁬. [𑀫. 𑀦𑀺. 𑁧.𑁫𑁧𑁩] ‘‘𑀓𑀻𑀤𑀺𑀲𑁄 𑀦𑀺𑀭𑀬𑁄 𑀆𑀲𑀺, 𑀬𑀢𑁆𑀣 𑀤𑀼𑀲𑁆𑀲𑀻 𑀅𑀧𑀘𑁆𑀘𑀣;

𑀯𑀺𑀥𑀼𑀭𑀁 𑀲𑀸𑀯𑀓𑀫𑀸𑀲𑀚𑁆𑀚, 𑀓𑀓𑀼𑀲𑀦𑁆𑀥𑀜𑁆𑀘 𑀩𑁆𑀭𑀸𑀳𑁆𑀫𑀡𑀁.

𑁧𑁧𑁯𑁭. ‘‘𑀲𑀢𑀁 𑀆𑀲𑀺 𑀅𑀬𑁄𑀲𑀗𑁆𑀓𑀽, 𑀲𑀩𑁆𑀩𑁂 𑀧𑀘𑁆𑀘𑀢𑁆𑀢𑀯𑁂𑀤𑀦𑀸;

𑀈𑀤𑀺𑀲𑁄 𑀦𑀺𑀭𑀬𑁄 𑀆𑀲𑀺, 𑀬𑀢𑁆𑀣 𑀤𑀼𑀲𑁆𑀲𑀻 𑀅𑀧𑀘𑁆𑀘𑀣;

𑀯𑀺𑀥𑀼𑀭𑀁 𑀲𑀸𑀯𑀓𑀫𑀸𑀲𑀚𑁆𑀚, 𑀓𑀓𑀼𑀲𑀦𑁆𑀥𑀜𑁆𑀘 𑀩𑁆𑀭𑀸𑀳𑁆𑀫𑀡𑀁.

𑁧𑁧𑁯𑁮. ‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀫𑀸𑀲𑀚𑁆𑀚, 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

𑁧𑁧𑁯𑁯. ‘‘𑀫𑀚𑁆𑀛𑁂𑀲𑀭𑀲𑁆𑀫𑀺𑀁 [𑀲𑀭𑀲𑁆𑀲 (𑀲𑀻.), 𑀲𑀸𑀕𑀭𑀲𑁆𑀫𑀺𑀁 (𑀓.)] 𑀢𑀺𑀝𑁆𑀞𑀦𑁆𑀢𑀺, 𑀯𑀺𑀫𑀸𑀦𑀸 𑀓𑀧𑁆𑀧𑀞𑀸𑀬𑀺𑀦𑁄;

𑀯𑁂𑀴𑀼𑀭𑀺𑀬𑀯𑀡𑁆𑀡𑀸 𑀭𑀼𑀘𑀺𑀭𑀸, 𑀅𑀘𑁆𑀘𑀺𑀫𑀦𑁆𑀢𑁄 𑀧𑀪𑀲𑁆𑀲𑀭𑀸;

𑀅𑀘𑁆𑀙𑀭𑀸 𑀢𑀢𑁆𑀣 𑀦𑀘𑁆𑀘𑀦𑁆𑀢𑀺, 𑀧𑀼𑀣𑀼 𑀦𑀸𑀦𑀢𑁆𑀢𑀯𑀡𑁆𑀡𑀺𑀬𑁄.

𑁧𑁨𑁦𑁦. ‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺…𑀧𑁂… 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

𑁧𑁨𑁦𑁧. ‘‘𑀬𑁄 𑀯𑁂 𑀩𑀼𑀤𑁆𑀥𑁂𑀦 𑀘𑁄𑀤𑀺𑀢𑁄, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑁂𑀓𑁆𑀔𑀢𑁄;

𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑀁, 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀧𑀬𑀺.

𑁧𑁨𑁦𑁨. ‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺…𑀧𑁂… 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

𑁧𑁨𑁦𑁩. ‘‘𑀬𑁄 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑀁, 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀧𑀬𑀺;

𑀇𑀤𑁆𑀥𑀺𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑁄, 𑀲𑀁𑀯𑁂𑀚𑁂𑀲𑀺 𑀘 𑀤𑁂𑀯𑀢𑀸.

𑁧𑁨𑁦𑁪. ‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺…𑀧𑁂… 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

𑁧𑁨𑁦𑁪. ‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺…𑀧𑁂… 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

𑁧𑁨𑁦𑁫. ‘‘𑀬𑁄 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑁂, 𑀲𑀓𑁆𑀓𑀁 𑀲𑁄 𑀧𑀭𑀺𑀧𑀼𑀘𑁆𑀙𑀢𑀺;

𑀅𑀧𑀺 𑀆𑀯𑀼𑀲𑁄 𑀚𑀸𑀦𑀸𑀲𑀺, 𑀢𑀡𑁆𑀳𑀓𑁆𑀔𑀬𑀯𑀺𑀫𑀼𑀢𑁆𑀢𑀺𑀬𑁄;

𑀢𑀲𑁆𑀲 𑀲𑀓𑁆𑀓𑁄 𑀯𑀺𑀬𑀸𑀓𑀸𑀲𑀺, 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀬𑀣𑀸𑀢𑀣𑀁.

𑁧𑁨𑁦𑁬. ‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺…𑀧𑁂… 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

𑁧𑁨𑁦𑁭. ‘‘𑀬𑁄 𑀩𑁆𑀭𑀳𑁆𑀫𑀸𑀦𑀁 𑀧𑀭𑀺𑀧𑀼𑀘𑁆𑀙𑀢𑀺, 𑀲𑀼𑀥𑀫𑁆𑀫𑀸𑀬𑀁 𑀞𑀺𑀢𑁄 [𑀲𑀼𑀥𑀫𑁆𑀫𑀸𑀬𑀸’𑀪𑀺𑀢𑁄 (𑀲𑁆𑀬𑀸.)] 𑀲𑀪𑀁;

𑀅𑀚𑁆𑀚𑀸𑀧𑀺 𑀢𑁆𑀬𑀸𑀯𑀼𑀲𑁄 𑀲𑀸 𑀤𑀺𑀝𑁆𑀞𑀺, 𑀬𑀸 𑀢𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼;

𑀧𑀲𑁆𑀲𑀲𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀁, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀁.

𑁧𑁨𑁦𑁮. ‘‘𑀢𑀲𑁆𑀲 𑀩𑁆𑀭𑀳𑁆𑀫𑀸 𑀯𑀺𑀬𑀸𑀓𑀸𑀲𑀺, 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀬𑀣𑀸𑀢𑀣𑀁;

𑀦 𑀫𑁂 𑀫𑀸𑀭𑀺𑀲 𑀲𑀸 𑀤𑀺𑀝𑁆𑀞𑀺, 𑀬𑀸 𑀫𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼.

𑁧𑁨𑁦𑁯. ‘‘𑀧𑀲𑁆𑀲𑀸𑀫𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀁, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀁;

𑀲𑁄𑀳𑀁 𑀅𑀚𑁆𑀚 𑀓𑀣𑀁 𑀯𑀚𑁆𑀚𑀁, 𑀅𑀳𑀁 𑀦𑀺𑀘𑁆𑀘𑁄𑀫𑁆𑀳𑀺 𑀲𑀲𑁆𑀲𑀢𑁄.

𑁧𑁨𑁧𑁦. ‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺…𑀧𑁂… 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

𑁧𑁨𑁧𑁧. ‘‘𑀬𑁄 𑀫𑀳𑀸𑀦𑁂𑀭𑀼𑀦𑁄 𑀓𑀽𑀝𑀁, 𑀯𑀺𑀫𑁄𑀓𑁆𑀔𑁂𑀦 𑀅𑀨𑀲𑁆𑀲𑀬𑀺 [𑀅𑀧𑀲𑁆𑀲𑀬𑀺 (𑀲𑀻. 𑀓.)];

𑀯𑀦𑀁 𑀧𑀼𑀩𑁆𑀩𑀯𑀺𑀤𑁂𑀳𑀸𑀦𑀁, 𑀬𑁂 𑀘 𑀪𑀽𑀫𑀺𑀲𑀬𑀸 𑀦𑀭𑀸.

𑁧𑁨𑁧𑁨. ‘‘𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀺, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀫𑀸𑀲𑀚𑁆𑀚, 𑀓𑀡𑁆𑀳 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺.

𑁧𑁨𑁧𑁩. ‘‘𑀦 𑀯𑁂 𑀅𑀕𑁆𑀕𑀺 𑀘𑁂𑀢𑀬𑀢𑀺, 𑀅𑀳𑀁 𑀩𑀸𑀮𑀁 𑀟𑀳𑀸𑀫𑀻𑀢𑀺;

𑀩𑀸𑀮𑁄𑀯 𑀚𑀮𑀺𑀢𑀁 𑀅𑀕𑁆𑀕𑀺𑀁, 𑀆𑀲𑀚𑁆𑀚 𑀦𑀁 𑀧𑀟𑀬𑁆𑀳𑀢𑀺.

𑁧𑁨𑁧𑁪. ‘‘𑀏𑀯𑀫𑁂𑀯 𑀢𑀼𑀯𑀁 𑀫𑀸𑀭, 𑀆𑀲𑀚𑁆𑀚 𑀦𑀁 𑀢𑀣𑀸𑀕𑀢𑀁;

𑀲𑀬𑀁 𑀟𑀳𑀺𑀲𑁆𑀲𑀲𑀺 𑀅𑀢𑁆𑀢𑀸𑀦𑀁, 𑀩𑀸𑀮𑁄 𑀅𑀕𑁆𑀕𑀺𑀁𑀯 𑀲𑀫𑁆𑀨𑀼𑀲𑀁.

𑁧𑁨𑁧𑁫. ‘‘𑀅𑀧𑀼𑀜𑁆𑀜𑀁 𑀧𑀲𑀯𑀻 𑀫𑀸𑀭𑁄, 𑀆𑀲𑀚𑁆𑀚 𑀦𑀁 𑀢𑀣𑀸𑀕𑀢𑀁;

𑀓𑀺𑀁 𑀦𑀼 𑀫𑀜𑁆𑀜𑀲𑀺 𑀧𑀸𑀧𑀺𑀫, 𑀦 𑀫𑁂 𑀧𑀸𑀧𑀁 𑀯𑀺𑀧𑀘𑁆𑀘𑀢𑀺.

𑁧𑁨𑁧𑁬. ‘‘𑀓𑀭𑀢𑁄 𑀢𑁂 𑀘𑀻𑀬𑀢𑁂 [𑀫𑀺𑀬𑁆𑀬𑀢𑁂 (𑀲𑀩𑁆𑀩𑀢𑁆𑀣) 𑀫. 𑀦𑀺. 𑁧.𑁫𑁧𑁩 𑀧𑀲𑁆𑀲𑀺𑀢𑀩𑁆𑀩𑀁] 𑀧𑀸𑀧𑀁, 𑀘𑀺𑀭𑀭𑀢𑁆𑀢𑀸𑀬 𑀅𑀦𑁆𑀢𑀓;

𑀫𑀸𑀭 𑀦𑀺𑀩𑁆𑀩𑀺𑀦𑁆𑀤 𑀩𑀼𑀤𑁆𑀥𑀫𑁆𑀳𑀸, 𑀆𑀲𑀁 𑀫𑀸𑀓𑀸𑀲𑀺 𑀪𑀺𑀓𑁆𑀔𑀼𑀲𑀼.

𑁧𑁨𑁧𑁭. ‘‘𑀇𑀢𑀺 𑀫𑀸𑀭𑀁 𑀅𑀢𑀚𑁆𑀚𑁂𑀲𑀺, 𑀪𑀺𑀓𑁆𑀔𑀼 𑀪𑁂𑀲𑀓𑀴𑀸𑀯𑀦𑁂;

𑀢𑀢𑁄 𑀲𑁄 𑀤𑀼𑀫𑁆𑀫𑀦𑁄 𑀬𑀓𑁆𑀔𑁄, 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀣𑀸’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 [𑀫𑀳𑀸𑀫𑁄𑀕𑁆𑀕𑀮𑀸𑀦𑁄 (𑀓.)] 𑀣𑁂𑀭𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀝𑁆𑀞𑀺𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.