𑁨𑁧. 𑀫𑀳𑀸𑀦𑀺𑀧𑀸𑀢𑁄

𑁧. 𑀯𑀗𑁆𑀕𑀻𑀲𑀢𑁆𑀣𑁂𑀭𑀕𑀸𑀣𑀸

𑁧𑁨𑁧𑁮. ‘‘𑀦𑀺𑀓𑁆𑀔𑀦𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀯𑀺𑀢𑀓𑁆𑀓𑀸 𑀉𑀧𑀥𑀸𑀯𑀦𑁆𑀢𑀺, 𑀧𑀕𑀩𑁆𑀪𑀸 𑀓𑀡𑁆𑀳𑀢𑁄 𑀇𑀫𑁂.

𑁧𑁨𑁧𑁯. ‘‘𑀉𑀕𑁆𑀕𑀧𑀼𑀢𑁆𑀢𑀸 𑀫𑀳𑀺𑀲𑁆𑀲𑀸𑀲𑀸, 𑀲𑀺𑀓𑁆𑀔𑀺𑀢𑀸 𑀤𑀴𑁆𑀳𑀥𑀫𑁆𑀫𑀺𑀦𑁄 [𑀤𑀴𑁆𑀳𑀥𑀦𑁆𑀯𑀺𑀦𑁄 (𑀲𑀻. 𑀅𑀝𑁆𑀞.)];

𑀲𑀫𑀦𑁆𑀢𑀸 𑀧𑀭𑀺𑀓𑀺𑀭𑁂𑀬𑁆𑀬𑀼𑀁, 𑀲𑀳𑀲𑁆𑀲𑀁 𑀅𑀧𑀮𑀸𑀬𑀺𑀦𑀁.

𑁧𑁨𑁨𑁦. ‘‘𑀲𑀘𑁂𑀧𑀺 𑀏𑀢𑁆𑀢𑀓𑀸 [𑀏𑀢𑀢𑁄 (𑀲𑀁. 𑀦𑀺. 𑁧.𑁨𑁦𑁯)] 𑀪𑀺𑀬𑁆𑀬𑁄, 𑀆𑀕𑀫𑀺𑀲𑁆𑀲𑀦𑁆𑀢𑀺 𑀇𑀢𑁆𑀣𑀺𑀬𑁄;

𑀦𑁂𑀯 𑀫𑀁 𑀩𑁆𑀬𑀸𑀥𑀬𑀺𑀲𑁆𑀲𑀦𑁆𑀢𑀺 [𑀩𑁆𑀬𑀸𑀣𑀬𑀺𑀲𑁆𑀲𑀦𑁆𑀢𑀺 (?)], 𑀥𑀫𑁆𑀫𑁂 𑀲𑀫𑁆𑀳𑀺 [𑀥𑀫𑁆𑀫𑁂𑀲𑁆𑀯𑀫𑁆𑀳𑀺 (𑀲𑁆𑀬𑀸. 𑀓.)] 𑀧𑀢𑀺𑀝𑁆𑀞𑀺𑀢𑁄.

𑁧𑁨𑁨𑁧. ‘‘𑀲𑀓𑁆𑀔𑀻 𑀳𑀺 𑀫𑁂 𑀲𑀼𑀢𑀁 𑀏𑀢𑀁, 𑀩𑀼𑀤𑁆𑀥𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑁄;

𑀦𑀺𑀩𑁆𑀩𑀸𑀦𑀕𑀫𑀦𑀁 𑀫𑀕𑁆𑀕𑀁, 𑀢𑀢𑁆𑀣 𑀫𑁂 𑀦𑀺𑀭𑀢𑁄 𑀫𑀦𑁄.

𑁧𑁨𑁨𑁨. ‘‘𑀏𑀯𑀁 𑀘𑁂 𑀫𑀁 𑀯𑀺𑀳𑀭𑀦𑁆𑀢𑀁, 𑀧𑀸𑀧𑀺𑀫 𑀉𑀧𑀕𑀘𑁆𑀙𑀲𑀺;

𑀢𑀣𑀸 𑀫𑀘𑁆𑀘𑀼 𑀓𑀭𑀺𑀲𑁆𑀲𑀸𑀫𑀺, 𑀦 𑀫𑁂 𑀫𑀕𑁆𑀕𑀫𑁆𑀧𑀺 𑀤𑀓𑁆𑀔𑀲𑀺.

𑁧𑁨𑁨𑁩. ‘‘𑀅𑀭𑀢𑀺𑀜𑁆𑀘 [𑀅𑀭𑀢𑀺𑀁 (𑀩𑀳𑀽𑀲𑀼)] 𑀭𑀢𑀺𑀜𑁆𑀘 𑀧𑀳𑀸𑀬, 𑀲𑀩𑁆𑀩𑀲𑁄 𑀕𑁂𑀳𑀲𑀺𑀢𑀜𑁆𑀘 𑀯𑀺𑀢𑀓𑁆𑀓𑀁;

𑀯𑀦𑀣𑀁 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀺, 𑀦𑀺𑀩𑁆𑀩𑀦𑀣𑁄 𑀅𑀯𑀦𑀣𑁄 𑀲 [𑀦𑀺𑀩𑁆𑀩𑀦𑀣𑁄 𑀅𑀭𑀢𑁄 𑀲 𑀳𑀺 (𑀲𑀁. 𑀦𑀺. 𑁧.𑁨𑁧𑁦)] 𑀪𑀺𑀓𑁆𑀔𑀼.

𑁧𑁨𑁨𑁪. ‘‘𑀬𑀫𑀺𑀥 𑀧𑀣𑀯𑀺𑀜𑁆𑀘 𑀯𑁂𑀳𑀸𑀲𑀁, 𑀭𑀽𑀧𑀕𑀢𑀁 𑀚𑀕𑀢𑁄𑀕𑀥𑀁 𑀓𑀺𑀜𑁆𑀘𑀺;

𑀧𑀭𑀺𑀚𑀻𑀬𑀢𑀺 𑀲𑀩𑁆𑀩𑀫𑀦𑀺𑀘𑁆𑀘𑀁, 𑀏𑀯𑀁 𑀲𑀫𑁂𑀘𑁆𑀘 𑀘𑀭𑀦𑁆𑀢𑀺 𑀫𑀼𑀢𑀢𑁆𑀢𑀸.

𑁧𑁨𑁨𑁫. ‘‘𑀉𑀧𑀥𑀻𑀲𑀼 𑀚𑀦𑀸 𑀕𑀥𑀺𑀢𑀸𑀲𑁂, 𑀤𑀺𑀝𑁆𑀞𑀲𑀼𑀢𑁂 [𑀤𑀺𑀝𑁆𑀞𑁂 𑀲𑀼𑀢𑁂 (𑀲𑀻.)] 𑀧𑀝𑀺𑀖𑁂 𑀘 𑀫𑀼𑀢𑁂 𑀘;

𑀏𑀢𑁆𑀣 𑀯𑀺𑀦𑁄𑀤𑀬 𑀙𑀦𑁆𑀤𑀫𑀦𑁂𑀚𑁄, 𑀬𑁄 𑀳𑁂𑀢𑁆𑀣 𑀦 𑀮𑀺𑀫𑁆𑀧𑀢𑀺 𑀫𑀼𑀦𑀺 𑀢𑀫𑀸𑀳𑀼 [𑀢𑀁 𑀫𑀼𑀦𑀺𑀫𑀸𑀳𑀼 (𑀲𑀁. 𑀦𑀺. 𑁧.𑁨𑁧𑁦)].

𑁧𑁨𑁨𑁬. ‘‘𑀅𑀣 𑀲𑀝𑁆𑀞𑀺𑀲𑀺𑀢𑀸 𑀲𑀯𑀺𑀢𑀓𑁆𑀓𑀸, 𑀧𑀼𑀣𑀼𑀚𑁆𑀚𑀦𑀢𑀸𑀬 [𑀧𑀼𑀣𑀽 𑀚𑀦𑀢𑀸𑀬 (𑀲𑀁. 𑀦𑀺. 𑁧.𑁨𑁧𑁦)] 𑀅𑀥𑀫𑁆𑀫𑀸 𑀦𑀺𑀯𑀺𑀝𑁆𑀞𑀸;

𑀦 𑀘 𑀯𑀕𑁆𑀕𑀕𑀢𑀲𑁆𑀲 𑀓𑀼𑀳𑀺𑀜𑁆𑀘𑀺, 𑀦𑁄 𑀧𑀦 𑀤𑀼𑀝𑁆𑀞𑀼𑀮𑁆𑀮𑀕𑀸𑀳𑀻 [𑀤𑀼𑀝𑁆𑀞𑀼𑀮𑁆𑀮𑀪𑀸𑀡𑀻 (𑀲𑀁. 𑀦𑀺. 𑁧.𑁨𑁧𑁦)] 𑀲 𑀪𑀺𑀓𑁆𑀔𑀼.

𑁧𑁨𑁨𑁭. ‘‘𑀤𑀩𑁆𑀩𑁄 𑀘𑀺𑀭𑀭𑀢𑁆𑀢𑀲𑀫𑀸𑀳𑀺𑀢𑁄, 𑀅𑀓𑀼𑀳𑀓𑁄 𑀦𑀺𑀧𑀓𑁄 𑀅𑀧𑀺𑀳𑀸𑀮𑀼;

𑀲𑀦𑁆𑀢𑀁 𑀧𑀤𑀁 𑀅𑀚𑁆𑀛𑀕𑀫𑀸 𑀫𑀼𑀦𑀺, 𑀧𑀝𑀺𑀘𑁆𑀘 𑀧𑀭𑀺𑀦𑀺𑀩𑁆𑀩𑀼𑀢𑁄 𑀓𑀗𑁆𑀔𑀢𑀺 𑀓𑀸𑀮𑀁.

𑁧𑁨𑁨𑁮. ‘‘𑀫𑀸𑀦𑀁 𑀧𑀚𑀳𑀲𑁆𑀲𑀼 𑀕𑁄𑀢𑀫, 𑀫𑀸𑀦𑀧𑀣𑀜𑁆𑀘 𑀚𑀳𑀲𑁆𑀲𑀼 𑀅𑀲𑁂𑀲𑀁;

𑀫𑀸𑀦𑀧𑀣𑀫𑁆𑀳𑀺 𑀲 𑀫𑀼𑀘𑁆𑀙𑀺𑀢𑁄, 𑀯𑀺𑀧𑁆𑀧𑀝𑀺𑀲𑀸𑀭𑀻𑀳𑀼𑀯𑀸 𑀘𑀺𑀭𑀭𑀢𑁆𑀢𑀁.

𑁧𑁨𑁨𑁯. ‘‘𑀫𑀓𑁆𑀔𑁂𑀦 𑀫𑀓𑁆𑀔𑀺𑀢𑀸 𑀧𑀚𑀸, 𑀫𑀸𑀦𑀳𑀢𑀸 𑀦𑀺𑀭𑀬𑀁 𑀧𑀧𑀢𑀦𑁆𑀢𑀺;

𑀲𑁄𑀘𑀦𑁆𑀢𑀺 𑀚𑀦𑀸 𑀘𑀺𑀭𑀭𑀢𑁆𑀢𑀁, 𑀫𑀸𑀦𑀳𑀢𑀸 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸.

𑁧𑁨𑁩𑁦. ‘‘𑀦 𑀳𑀺 𑀲𑁄𑀘𑀢𑀺 𑀪𑀺𑀓𑁆𑀔𑀼 𑀓𑀤𑀸𑀘𑀺, 𑀫𑀕𑁆𑀕𑀚𑀺𑀦𑁄 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄;

𑀓𑀺𑀢𑁆𑀢𑀺𑀜𑁆𑀘 𑀲𑀼𑀔𑀜𑁆𑀘𑀸𑀦𑀼𑀪𑁄𑀢𑀺, 𑀥𑀫𑁆𑀫𑀤𑀲𑁄𑀢𑀺 𑀢𑀫𑀸𑀳𑀼 𑀢𑀣𑀢𑁆𑀢𑀁.

𑁧𑁨𑁩𑁧. ‘‘𑀢𑀲𑁆𑀫𑀸 𑀅𑀔𑀺𑀮𑁄 𑀇𑀥 [𑀅𑀔𑀺𑀮𑁄 (𑀲𑀻.), 𑀅𑀔𑀺𑀮𑁄𑀥 (𑀲𑀁. 𑀦𑀺. 𑁧.𑁨𑁧𑁧)] 𑀧𑀥𑀸𑀦𑀯𑀸, 𑀦𑀻𑀯𑀭𑀡𑀸𑀦𑀺 𑀧𑀳𑀸𑀬 𑀯𑀺𑀲𑀼𑀤𑁆𑀥𑁄;

𑀫𑀸𑀦𑀜𑁆𑀘 𑀧𑀳𑀸𑀬 𑀅𑀲𑁂𑀲𑀁, 𑀯𑀺𑀚𑁆𑀚𑀸𑀬𑀦𑁆𑀢𑀓𑀭𑁄 𑀲𑀫𑀺𑀢𑀸𑀯𑀻.

𑁧𑁨𑁩𑁨. ‘‘𑀓𑀸𑀫𑀭𑀸𑀕𑁂𑀦 𑀟𑀬𑁆𑀳𑀸𑀫𑀺, 𑀘𑀺𑀢𑁆𑀢𑀁 𑀫𑁂 𑀧𑀭𑀺𑀟𑀬𑁆𑀳𑀢𑀺;

𑀲𑀸𑀥𑀼 𑀦𑀺𑀩𑁆𑀩𑀸𑀧𑀦𑀁 𑀩𑁆𑀭𑀽𑀳𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫.

𑁧𑁨𑁩𑁩. ‘‘𑀲𑀜𑁆𑀜𑀸𑀬 𑀯𑀺𑀧𑀭𑀺𑀬𑁂𑀲𑀸, 𑀘𑀺𑀢𑁆𑀢𑀁 𑀢𑁂 𑀧𑀭𑀺𑀟𑀬𑁆𑀳𑀢𑀺;

𑀦𑀺𑀫𑀺𑀢𑁆𑀢𑀁 𑀧𑀭𑀺𑀯𑀚𑁆𑀚𑁂𑀳𑀺, 𑀲𑀼𑀪𑀁 𑀭𑀸𑀕𑀽𑀧𑀲𑀁𑀳𑀺𑀢𑀁 ( ) [(𑀲𑀗𑁆𑀔𑀸𑀭𑁂 𑀧𑀭𑀢𑁄 𑀧𑀲𑁆𑀲, 𑀤𑀼𑀓𑁆𑀔𑀢𑁄 𑀫𑀸 𑀘 𑀅𑀢𑁆𑀢𑀢𑁄; 𑀦𑀺𑀩𑁆𑀩𑀸𑀧𑁂𑀳𑀺 𑀫𑀳𑀸𑀭𑀸𑀕𑀁, 𑀫𑀸 𑀤𑀬𑁆𑀳𑀺𑀢𑁆𑀣𑁄 𑀧𑀼𑀦𑀧𑁆𑀧𑀼𑀦𑀁;) (𑀲𑀻. 𑀲𑀁. 𑀦𑀺. 𑁧.𑁨𑁧𑁨) 𑀉𑀤𑁆𑀤𑀸𑀦𑀕𑀸𑀣𑀸𑀬𑀁 𑀏𑀓𑀲𑀢𑁆𑀢𑀢𑀻𑀢𑀺𑀲𑀗𑁆𑀔𑁆𑀬𑀸 𑀘, 𑀣𑁂𑀭𑀕𑀸𑀣𑀸𑀝𑁆𑀞𑀓𑀣𑀸 𑀘 𑀧𑀲𑁆𑀲𑀺𑀢𑀩𑁆𑀩𑀸].

𑁧𑁨𑁩𑁪. ‘‘𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁;

𑀲𑀢𑀺 𑀓𑀸𑀬𑀕𑀢𑀸 𑀢𑁆𑀬𑀢𑁆𑀣𑀼, 𑀦𑀺𑀩𑁆𑀩𑀺𑀤𑀸𑀩𑀳𑀼𑀮𑁄 𑀪𑀯.

𑁧𑁨𑁩𑁫. ‘‘𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀳𑀺, 𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳;

𑀢𑀢𑁄 𑀫𑀸𑀦𑀸𑀪𑀺𑀲𑀫𑀬𑀸, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺.

𑁧𑁨𑁩𑁬. ‘‘𑀢𑀫𑁂𑀯 𑀯𑀸𑀘𑀁 𑀪𑀸𑀲𑁂𑀬𑁆𑀬, 𑀬𑀸𑀬𑀢𑁆𑀢𑀸𑀦𑀁 𑀦 𑀢𑀸𑀧𑀬𑁂;

𑀧𑀭𑁂 𑀘 𑀦 𑀯𑀺𑀳𑀺𑀁𑀲𑁂𑀬𑁆𑀬, 𑀲𑀸 𑀯𑁂 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸.

𑁧𑁨𑁩𑁭. ‘‘𑀧𑀺𑀬𑀯𑀸𑀘𑀫𑁂𑀯 𑀪𑀸𑀲𑁂𑀬𑁆𑀬, 𑀬𑀸 𑀯𑀸𑀘𑀸 𑀧𑀝𑀺𑀦𑀦𑁆𑀤𑀺𑀢𑀸;

𑀬𑀁 𑀅𑀦𑀸𑀤𑀸𑀬 𑀧𑀸𑀧𑀸𑀦𑀺, 𑀧𑀭𑁂𑀲𑀁 𑀪𑀸𑀲𑀢𑁂 𑀧𑀺𑀬𑀁.

𑁧𑁨𑁩𑁮. ‘‘𑀲𑀘𑁆𑀘𑀁 𑀯𑁂 𑀅𑀫𑀢𑀸 𑀯𑀸𑀘𑀸, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄;

𑀲𑀘𑁆𑀘𑁂 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘, 𑀆𑀳𑀼 𑀲𑀦𑁆𑀢𑁄 𑀧𑀢𑀺𑀝𑁆𑀞𑀺𑀢𑀸.

𑁧𑁨𑁩𑁯. ‘‘𑀬𑀁 𑀩𑀼𑀤𑁆𑀥𑁄 𑀪𑀸𑀲𑀢𑀺 𑀯𑀸𑀘𑀁, 𑀔𑁂𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬, 𑀲𑀸 𑀯𑁂 𑀯𑀸𑀘𑀸𑀦𑀫𑀼𑀢𑁆𑀢𑀫𑀸.

𑁧𑁨𑁪𑁦. ‘‘𑀕𑀫𑁆𑀪𑀻𑀭𑀧𑀜𑁆𑀜𑁄 𑀫𑁂𑀥𑀸𑀯𑀻, 𑀫𑀕𑁆𑀕𑀸𑀫𑀕𑁆𑀕𑀲𑁆𑀲 𑀓𑁄𑀯𑀺𑀤𑁄;

𑀲𑀸𑀭𑀺𑀧𑀼𑀢𑁆𑀢𑁄 𑀫𑀳𑀸𑀧𑀜𑁆𑀜𑁄, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀪𑀺𑀓𑁆𑀔𑀼𑀦𑀁.

𑁧𑁨𑁪𑁧. ‘‘𑀲𑀗𑁆𑀔𑀺𑀢𑁆𑀢𑁂𑀦𑀧𑀺 𑀤𑁂𑀲𑁂𑀢𑀺, 𑀯𑀺𑀢𑁆𑀣𑀸𑀭𑁂𑀦𑀧𑀺 𑀪𑀸𑀲𑀢𑀺;

𑀲𑀸𑀮𑀺𑀓𑀸𑀬𑀺𑀯 𑀦𑀺𑀕𑁆𑀖𑁄𑀲𑁄, 𑀧𑀝𑀺𑀪𑀸𑀦𑀁 𑀉𑀤𑀺𑀬𑁆𑀬𑀢𑀺 [𑀉𑀤𑀻𑀭𑀬𑀺 (𑀲𑀻.), 𑀉𑀤𑀻𑀬𑁆𑀬𑀢𑀺 (𑀲𑁆𑀬𑀸.), 𑀉𑀤𑀬𑁆𑀬𑀢𑀺 (?) 𑀉𑀝𑁆𑀞𑀳𑀢𑀻𑀢𑀺 𑀢𑀁𑀲𑀁𑀯𑀡𑁆𑀡𑀦𑀸].

𑁧𑁨𑁪𑁨. ‘‘𑀢𑀲𑁆𑀲 𑀢𑀁 𑀤𑁂𑀲𑀬𑀦𑁆𑀢𑀲𑁆𑀲, 𑀲𑀼𑀡𑀦𑁆𑀢𑀺 𑀫𑀥𑀼𑀭𑀁 𑀕𑀺𑀭𑀁;

𑀲𑀭𑁂𑀦 𑀭𑀚𑀦𑀻𑀬𑁂𑀦, 𑀲𑀯𑀦𑀻𑀬𑁂𑀦 𑀯𑀕𑁆𑀕𑀼𑀦𑀸;

𑀉𑀤𑀕𑁆𑀕𑀘𑀺𑀢𑁆𑀢𑀸 𑀫𑀼𑀤𑀺𑀢𑀸, 𑀲𑁄𑀢𑀁 𑀑𑀥𑁂𑀦𑁆𑀢𑀺 𑀪𑀺𑀓𑁆𑀔𑀯𑁄.

𑁧𑁨𑁪𑁩. ‘‘𑀅𑀚𑁆𑀚 𑀧𑀦𑁆𑀦𑀭𑀲𑁂 𑀯𑀺𑀲𑀼𑀤𑁆𑀥𑀺𑀬𑀸, 𑀪𑀺𑀓𑁆𑀔𑀽 𑀧𑀜𑁆𑀘𑀲𑀢𑀸 𑀲𑀫𑀸𑀕𑀢𑀸;

𑀲𑀁𑀬𑁄𑀚𑀦𑀩𑀦𑁆𑀥𑀦𑀘𑁆𑀙𑀺𑀤𑀸, 𑀅𑀦𑀻𑀖𑀸 𑀔𑀻𑀡𑀧𑀼𑀦𑀩𑁆𑀪𑀯𑀸 𑀇𑀲𑀻.

𑁧𑁨𑁪𑁪. ‘‘𑀘𑀓𑁆𑀓𑀯𑀢𑁆𑀢𑀻 𑀬𑀣𑀸 𑀭𑀸𑀚𑀸, 𑀅𑀫𑀘𑁆𑀘𑀧𑀭𑀺𑀯𑀸𑀭𑀺𑀢𑁄;

𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑁂𑀢𑀺, 𑀲𑀸𑀕𑀭𑀦𑁆𑀢𑀁 𑀫𑀳𑀺𑀁 𑀇𑀫𑀁.

𑁧𑁨𑁪𑁫. ‘‘𑀏𑀯𑀁 𑀯𑀺𑀚𑀺𑀢𑀲𑀗𑁆𑀕𑀸𑀫𑀁, 𑀲𑀢𑁆𑀣𑀯𑀸𑀳𑀁 𑀅𑀦𑀼𑀢𑁆𑀢𑀭𑀁;

𑀲𑀸𑀯𑀓𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑁄.

𑁧𑁨𑁪𑁬. ‘‘𑀲𑀩𑁆𑀩𑁂 𑀪𑀕𑀯𑀢𑁄 𑀧𑀼𑀢𑁆𑀢𑀸, 𑀧𑀮𑀸𑀧𑁂𑀢𑁆𑀣 𑀦 𑀯𑀺𑀚𑁆𑀚𑀢𑀺;

𑀢𑀡𑁆𑀳𑀸𑀲𑀮𑁆𑀮𑀲𑁆𑀲 𑀳𑀦𑁆𑀢𑀸𑀭𑀁, 𑀯𑀦𑁆𑀤𑁂 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀁.

𑁧𑁨𑁪𑁭. ‘‘𑀧𑀭𑁄𑀲𑀳𑀲𑁆𑀲𑀁 𑀪𑀺𑀓𑁆𑀔𑀽𑀦𑀁, 𑀲𑀼𑀕𑀢𑀁 𑀧𑀬𑀺𑀭𑀼𑀧𑀸𑀲𑀢𑀺;

𑀤𑁂𑀲𑁂𑀦𑁆𑀢𑀁 𑀯𑀺𑀭𑀚𑀁 𑀥𑀫𑁆𑀫𑀁, 𑀦𑀺𑀩𑁆𑀩𑀸𑀦𑀁 𑀅𑀓𑀼𑀢𑁄𑀪𑀬𑀁.

𑁧𑁨𑁪𑁮. ‘‘𑀲𑀼𑀡𑀦𑁆𑀢𑀺 𑀥𑀫𑁆𑀫𑀁 𑀯𑀺𑀫𑀮𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁;

𑀲𑁄𑀪𑀢𑀺 𑀯𑀢 𑀲𑀫𑁆𑀩𑀼𑀤𑁆𑀥𑁄, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑁄.

𑁧𑁨𑁪𑁯. ‘‘‘𑀦𑀸𑀕𑀦𑀸𑀫𑁄’𑀲𑀺 𑀪𑀕𑀯𑀸, 𑀇𑀲𑀻𑀦𑀁 𑀇𑀲𑀺𑀲𑀢𑁆𑀢𑀫𑁄;

𑀫𑀳𑀸𑀫𑁂𑀖𑁄𑀯 𑀳𑀼𑀢𑁆𑀯𑀸𑀦, 𑀲𑀸𑀯𑀓𑁂 𑀅𑀪𑀺𑀯𑀲𑁆𑀲𑀲𑀺.

𑁧𑁨𑁫𑁦. ‘‘𑀤𑀺𑀯𑀸 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀲𑀢𑁆𑀣𑀼𑀤𑀲𑁆𑀲𑀦𑀓𑀫𑁆𑀬𑀢𑀸;

𑀲𑀸𑀯𑀓𑁄 𑀢𑁂 𑀫𑀳𑀸𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀢𑀺 𑀯𑀗𑁆𑀕𑀺𑀲𑁄.

𑁧𑁨𑁫𑁧. ‘‘𑀉𑀫𑁆𑀫𑀕𑁆𑀕𑀧𑀣𑀁 𑀫𑀸𑀭𑀲𑁆𑀲, 𑀅𑀪𑀺𑀪𑀼𑀬𑁆𑀬 𑀘𑀭𑀢𑀺 𑀧𑀪𑀺𑀚𑁆𑀚 𑀔𑀻𑀮𑀸𑀦𑀺;

𑀢𑀁 𑀧𑀲𑁆𑀲𑀣 𑀩𑀦𑁆𑀥𑀧𑀫𑀼𑀜𑁆𑀘𑀓𑀭𑀁, 𑀅𑀲𑀺𑀢𑀁𑀯 𑀪𑀸𑀕𑀲𑁄 𑀧𑀯𑀺𑀪𑀚𑁆𑀚.

𑁧𑁨𑁫𑁨. ‘‘𑀑𑀖𑀲𑁆𑀲 𑀳𑀺 𑀦𑀺𑀢𑀭𑀡𑀢𑁆𑀣𑀁, 𑀅𑀦𑁂𑀓𑀯𑀺𑀳𑀺𑀢𑀁 𑀫𑀕𑁆𑀕𑀁 𑀅𑀓𑁆𑀔𑀸𑀲𑀺;

𑀢𑀲𑁆𑀫𑀺𑀜𑁆𑀘 𑀅𑀫𑀢𑁂 𑀅𑀓𑁆𑀔𑀸𑀢𑁂, 𑀥𑀫𑁆𑀫𑀤𑀲𑀸 𑀞𑀺𑀢𑀸 𑀅𑀲𑀁𑀳𑀻𑀭𑀸.

𑁧𑁨𑁫𑁩. ‘‘𑀧𑀚𑁆𑀚𑁄𑀢𑀓𑀭𑁄 𑀅𑀢𑀺𑀯𑀺𑀚𑁆𑀛 [𑀅𑀢𑀺𑀯𑀺𑀚𑁆𑀛 𑀥𑀫𑁆𑀫𑀁 (𑀲𑀻.)], 𑀲𑀩𑁆𑀩𑀞𑀺𑀢𑀻𑀦𑀁 𑀅𑀢𑀺𑀓𑁆𑀓𑀫𑀫𑀤𑁆𑀤𑀲 [𑀅𑀢𑀺𑀓𑁆𑀓𑀫𑀫𑀤𑁆𑀤 (𑀲𑀻. 𑀓.)];

𑀜𑀢𑁆𑀯𑀸 𑀘 𑀲𑀘𑁆𑀙𑀺𑀓𑀢𑁆𑀯𑀸 𑀘, 𑀅𑀕𑁆𑀕𑀁 𑀲𑁄 𑀤𑁂𑀲𑀬𑀺 𑀤𑀲𑀤𑁆𑀥𑀸𑀦𑀁.

𑁧𑁨𑁫𑁪. ‘‘𑀏𑀯𑀁 𑀲𑀼𑀤𑁂𑀲𑀺𑀢𑁂 𑀥𑀫𑁆𑀫𑁂, 𑀓𑁄 𑀧𑀫𑀸𑀤𑁄 𑀯𑀺𑀚𑀸𑀦𑀢𑀁 𑀥𑀫𑁆𑀫𑀁;

𑀢𑀲𑁆𑀫𑀸 𑀳𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂, 𑀅𑀧𑁆𑀧𑀫𑀢𑁆𑀢𑁄 𑀲𑀤𑀸 𑀦𑀫𑀲𑁆𑀲𑀫𑀦𑀼𑀲𑀺𑀓𑁆𑀔𑁂.

𑁧𑁨𑁫𑁫. ‘‘𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁄 𑀬𑁄 𑀣𑁂𑀭𑁄, 𑀓𑁄𑀡𑁆𑀟𑀜𑁆𑀜𑁄 𑀢𑀺𑀩𑁆𑀩𑀦𑀺𑀓𑁆𑀓𑀫𑁄;

𑀮𑀸𑀪𑀻 𑀲𑀼𑀔𑀯𑀺𑀳𑀸𑀭𑀸𑀦𑀁, 𑀯𑀺𑀯𑁂𑀓𑀸𑀦𑀁 𑀅𑀪𑀺𑀡𑁆𑀳𑀲𑁄.

𑁧𑁨𑁫𑁬. ‘‘𑀬𑀁 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀁, 𑀲𑀢𑁆𑀣𑀼 𑀲𑀸𑀲𑀦𑀓𑀸𑀭𑀺𑀦𑀸;

𑀲𑀩𑁆𑀩𑀲𑁆𑀲 𑀢𑀁 𑀅𑀦𑀼𑀧𑁆𑀧𑀢𑁆𑀢𑀁, 𑀅𑀧𑁆𑀧𑀫𑀢𑁆𑀢𑀲𑁆𑀲 𑀲𑀺𑀓𑁆𑀔𑀢𑁄.

𑁧𑁨𑁫𑁭. ‘‘𑀫𑀳𑀸𑀦𑀼𑀪𑀸𑀯𑁄 𑀢𑁂𑀯𑀺𑀚𑁆𑀚𑁄, 𑀘𑁂𑀢𑁄𑀧𑀭𑀺𑀬𑀓𑁄𑀯𑀺𑀤𑁄;

𑀓𑁄𑀡𑁆𑀟𑀜𑁆𑀜𑁄 𑀩𑀼𑀤𑁆𑀥𑀤𑀸𑀬𑀸𑀤𑁄, 𑀧𑀸𑀤𑁂 𑀯𑀦𑁆𑀤𑀢𑀺 𑀲𑀢𑁆𑀣𑀼𑀦𑁄.

𑁧𑁨𑁫𑁮. ‘‘𑀦𑀕𑀲𑁆𑀲 𑀧𑀲𑁆𑀲𑁂 𑀆𑀲𑀻𑀦𑀁, 𑀫𑀼𑀦𑀺𑀁 𑀤𑀼𑀓𑁆𑀔𑀲𑁆𑀲 𑀧𑀸𑀭𑀕𑀼𑀁;

𑀲𑀸𑀯𑀓𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀢𑁂𑀯𑀺𑀚𑁆𑀚𑀸 𑀫𑀘𑁆𑀘𑀼𑀳𑀸𑀬𑀺𑀦𑁄.

𑁧𑁨𑁫𑁯. ‘‘𑀘𑁂𑀢𑀲𑀸 [𑀢𑁂 𑀘𑁂𑀢𑀲𑀸 (𑀲𑀁. 𑀦𑀺. 𑁧.𑁨𑁧𑁮)] 𑀅𑀦𑀼𑀧𑀭𑀺𑀬𑁂𑀢𑀺, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀳𑀺𑀤𑁆𑀥𑀺𑀓𑁄;

𑀘𑀺𑀢𑁆𑀢𑀁 𑀦𑁂𑀲𑀁 𑀲𑀫𑀦𑁆𑀯𑁂𑀲𑀁 [𑀲𑀫𑀦𑁆𑀦𑁂𑀲𑀁 (𑀲𑀁. 𑀦𑀺. 𑁧.𑁨𑁧𑁮)], 𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀭𑀽𑀧𑀥𑀺𑀁.

𑁧𑁨𑁬𑁦. ‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀁, 𑀫𑀼𑀦𑀺𑀁 𑀤𑀼𑀓𑁆𑀔𑀲𑁆𑀲 𑀧𑀸𑀭𑀕𑀼𑀁;

𑀅𑀦𑁂𑀓𑀸𑀓𑀸𑀭𑀲𑀫𑁆𑀧𑀦𑁆𑀦𑀁, 𑀧𑀬𑀺𑀭𑀼𑀧𑀸𑀲𑀦𑁆𑀢𑀺 𑀕𑁄𑀢𑀫𑀁.

𑁧𑁨𑁬𑁧. ‘‘𑀘𑀦𑁆𑀤𑁄 𑀬𑀣𑀸 𑀯𑀺𑀕𑀢𑀯𑀮𑀸𑀳𑀓𑁂 𑀦𑀪𑁂, 𑀯𑀺𑀭𑁄𑀘𑀢𑀺 𑀯𑀻𑀢𑀫𑀮𑁄𑀯 𑀪𑀸𑀡𑀼𑀫𑀸;

𑀏𑀯𑀫𑁆𑀧𑀺 𑀅𑀗𑁆𑀕𑀻𑀭𑀲 𑀢𑁆𑀯𑀁 𑀫𑀳𑀸𑀫𑀼𑀦𑀺, 𑀅𑀢𑀺𑀭𑁄𑀘𑀲𑀺 𑀬𑀲𑀲𑀸 𑀲𑀩𑁆𑀩𑀮𑁄𑀓𑀁.

𑁧𑁨𑁬𑁨. ‘‘𑀓𑀸𑀯𑁂𑀬𑁆𑀬𑀫𑀢𑁆𑀢𑀸 𑀯𑀺𑀘𑀭𑀺𑀫𑁆𑀳 𑀧𑀼𑀩𑁆𑀩𑁂, 𑀕𑀸𑀫𑀸 𑀕𑀸𑀫𑀁 𑀧𑀼𑀭𑀸 𑀧𑀼𑀭𑀁;

𑀅𑀣𑀤𑁆𑀤𑀲𑀸𑀫 𑀲𑀫𑁆𑀩𑀼𑀤𑁆𑀥𑀁, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀁.

𑁧𑁨𑁬𑁩. ‘‘𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀫𑀼𑀦𑀺 𑀤𑀼𑀓𑁆𑀔𑀲𑁆𑀲 𑀧𑀸𑀭𑀕𑀽;

𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀻𑀤𑀺𑀫𑁆𑀳, 𑀲𑀤𑁆𑀥𑀸 [𑀅𑀤𑁆𑀥𑀸 (𑀲𑀻. 𑀅𑀝𑁆𑀞.)] 𑀦𑁄 𑀉𑀤𑀧𑀚𑁆𑀚𑀣.

𑁧𑁨𑁬𑁪. ‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀔𑀦𑁆𑀥𑁂 𑀆𑀬𑀢𑀦𑀸𑀦𑀺 𑀘;

𑀥𑀸𑀢𑀼𑀬𑁄 𑀘 𑀯𑀺𑀤𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁧𑁨𑁬𑁫. ‘‘𑀩𑀳𑀽𑀦𑀁 𑀯𑀢 𑀅𑀢𑁆𑀣𑀸𑀬, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀣𑀸𑀕𑀢𑀸;

𑀇𑀢𑁆𑀣𑀻𑀦𑀁 𑀧𑀼𑀭𑀺𑀲𑀸𑀦𑀜𑁆𑀘, 𑀬𑁂 𑀢𑁂 𑀲𑀸𑀲𑀦𑀓𑀸𑀭𑀓𑀸.

𑁧𑁨𑁬𑁬. ‘‘𑀢𑁂𑀲𑀁 𑀔𑁄 𑀯𑀢 𑀅𑀢𑁆𑀣𑀸𑀬, 𑀩𑁄𑀥𑀺𑀫𑀚𑁆𑀛𑀕𑀫𑀸 𑀫𑀼𑀦𑀺;

𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘, 𑀬𑁂 𑀦𑀺𑀭𑀸𑀫𑀕𑀢𑀤𑁆𑀤𑀲𑀸.

𑁧𑁨𑁬𑁭. ‘‘𑀲𑀼𑀤𑁂𑀲𑀺𑀢𑀸 𑀘𑀓𑁆𑀔𑀼𑀫𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀅𑀦𑀼𑀓𑀫𑁆𑀧𑀸𑀬 𑀧𑀸𑀡𑀺𑀦𑀁.

𑁧𑁨𑁬𑁮. ‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀁, 𑀤𑀼𑀓𑁆𑀔𑀲𑁆𑀲 𑀘 𑀅𑀢𑀺𑀓𑁆𑀓𑀫𑀁;

𑀅𑀭𑀺𑀬𑀁 𑀘𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

𑁧𑁨𑁬𑁯. ‘‘𑀏𑀯𑀫𑁂𑀢𑁂 𑀢𑀣𑀸 𑀯𑀼𑀢𑁆𑀢𑀸, 𑀤𑀺𑀝𑁆𑀞𑀸 𑀫𑁂 𑀢𑁂 𑀬𑀣𑀸 𑀢𑀣𑀸;

𑀲𑀤𑀢𑁆𑀣𑁄 𑀫𑁂 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁨𑁭𑁦. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀲𑀼𑀯𑀺𑀪𑀢𑁆𑀢𑁂𑀲𑀼 [𑀲𑀯𑀺𑀪𑀢𑁆𑀢𑁂𑀲𑀼 (𑀲𑀻. 𑀓.)] 𑀥𑀫𑁆𑀫𑁂𑀲𑀼, 𑀬𑀁 𑀲𑁂𑀝𑁆𑀞𑀁 𑀢𑀤𑀼𑀧𑀸𑀕𑀫𑀺𑀁.

𑁧𑁨𑁭𑁧. ‘‘𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀲𑁄𑀢𑀥𑀸𑀢𑀼 𑀯𑀺𑀲𑁄𑀥𑀺𑀢𑀸;

𑀢𑁂𑀯𑀺𑀚𑁆𑀚𑁄 𑀇𑀤𑁆𑀥𑀺𑀧𑀢𑁆𑀢𑁄𑀫𑁆𑀳𑀺, 𑀘𑁂𑀢𑁄𑀧𑀭𑀺𑀬𑀓𑁄𑀯𑀺𑀤𑁄.

𑁧𑁨𑁭𑁨. ‘‘𑀧𑀼𑀘𑁆𑀙𑀸𑀫𑀺 𑀲𑀢𑁆𑀣𑀸𑀭𑀫𑀦𑁄𑀫𑀧𑀜𑁆𑀜𑀁, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀬𑁄 𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀙𑁂𑀢𑁆𑀢𑀸;

𑀅𑀕𑁆𑀕𑀸𑀴𑀯𑁂 𑀓𑀸𑀮𑀫𑀓𑀸𑀲𑀺 𑀪𑀺𑀓𑁆𑀔𑀼, 𑀜𑀸𑀢𑁄 𑀬𑀲𑀲𑁆𑀲𑀻 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄.

𑁧𑁨𑁭𑁩. ‘‘𑀦𑀺𑀕𑁆𑀭𑁄𑀥𑀓𑀧𑁆𑀧𑁄 𑀇𑀢𑀺 𑀢𑀲𑁆𑀲 𑀦𑀸𑀫𑀁, 𑀢𑀬𑀸 𑀓𑀢𑀁 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀲𑁄 𑀢𑀁 𑀦𑀫𑀲𑁆𑀲𑀁 𑀅𑀘𑀭𑀺 𑀫𑀼𑀢𑁆𑀬𑀧𑁂𑀔𑁄, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀤𑀴𑁆𑀳𑀥𑀫𑁆𑀫𑀤𑀲𑁆𑀲𑀻.

𑁧𑁨𑁭𑁪. ‘‘𑀢𑀁 𑀲𑀸𑀯𑀓𑀁 𑀲𑀓𑁆𑀓 𑀫𑀬𑀫𑁆𑀧𑀺 𑀲𑀩𑁆𑀩𑁂, 𑀅𑀜𑁆𑀜𑀸𑀢𑀼𑀫𑀺𑀘𑁆𑀙𑀸𑀫 𑀲𑀫𑀦𑁆𑀢𑀘𑀓𑁆𑀔𑀼;

𑀲𑀫𑀯𑀝𑁆𑀞𑀺𑀢𑀸 𑀦𑁄 𑀲𑀯𑀦𑀸𑀬 𑀲𑁄𑀢𑀸 [𑀳𑁂𑀢𑀼𑀁 (𑀲𑀻. 𑀲𑁆𑀬𑀸.) 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸 𑀧𑀲𑁆𑀲𑀺𑀢𑀩𑁆𑀩𑀸], 𑀢𑀼𑀯𑀁 𑀦𑁄 𑀲𑀢𑁆𑀣𑀸 𑀢𑁆𑀯𑀫𑀦𑀼𑀢𑁆𑀢𑀭𑁄𑀲𑀺’’.

𑁧𑁨𑁭𑁫. 𑀙𑀺𑀦𑁆𑀤 𑀦𑁄 𑀯𑀺𑀘𑀺𑀓𑀺𑀘𑁆𑀙𑀁 𑀩𑁆𑀭𑀽𑀳𑀺 𑀫𑁂𑀢𑀁, 𑀧𑀭𑀺𑀦𑀺𑀩𑁆𑀩𑀼𑀢𑀁 𑀯𑁂𑀤𑀬 𑀪𑀽𑀭𑀺𑀧𑀜𑁆𑀜;

𑀫𑀚𑁆𑀛𑁂𑀯 𑀦𑁄 𑀪𑀸𑀲 𑀲𑀫𑀦𑁆𑀢𑀘𑀓𑁆𑀔𑀼, 𑀲𑀓𑁆𑀓𑁄𑀯 𑀤𑁂𑀯𑀸𑀦 𑀲𑀳𑀲𑁆𑀲𑀦𑁂𑀢𑁆𑀢𑁄.

𑁧𑁨𑁭𑁬. ‘‘𑀬𑁂 𑀓𑁂𑀘𑀺 𑀕𑀦𑁆𑀣𑀸 𑀇𑀥 𑀫𑁄𑀳𑀫𑀕𑁆𑀕𑀸, 𑀅𑀜𑁆𑀜𑀸𑀡𑀧𑀓𑁆𑀔𑀸 𑀯𑀺𑀘𑀺𑀓𑀺𑀘𑁆𑀙𑀞𑀸𑀦𑀸;

𑀢𑀣𑀸𑀕𑀢𑀁 𑀧𑀢𑁆𑀯𑀸 𑀦 𑀢𑁂 𑀪𑀯𑀦𑁆𑀢𑀺, 𑀘𑀓𑁆𑀔𑀼𑀜𑁆𑀳𑀺 𑀏𑀢𑀁 𑀧𑀭𑀫𑀁 𑀦𑀭𑀸𑀦𑀁.

𑁧𑁨𑁭𑁭. ‘‘𑀦𑁄 𑀘𑁂 𑀳𑀺 𑀚𑀸𑀢𑀼 𑀧𑀼𑀭𑀺𑀲𑁄 𑀓𑀺𑀮𑁂𑀲𑁂, 𑀯𑀸𑀢𑁄 𑀬𑀣𑀸 𑀅𑀩𑁆𑀪𑀖𑀦𑀁 𑀯𑀺𑀳𑀸𑀦𑁂;

𑀢𑀫𑁄𑀯𑀲𑁆𑀲 𑀦𑀺𑀯𑀼𑀢𑁄 𑀲𑀩𑁆𑀩𑀮𑁄𑀓𑁄, 𑀚𑁄𑀢𑀺𑀫𑀦𑁆𑀢𑁄𑀧𑀺 𑀦 𑀧𑀪𑀸𑀲𑁂𑀬𑁆𑀬𑀼𑀁 [𑀦 𑀚𑁄𑀢𑀺𑀫𑀦𑁆𑀢𑁄𑀧𑀺 𑀦𑀭𑀸 𑀢𑀧𑁂𑀬𑁆𑀬𑀼𑀁 (𑀲𑀼. 𑀦𑀺. 𑁩𑁫𑁦)].

𑁧𑁨𑁭𑁮. ‘‘𑀥𑀻𑀭𑀸 𑀘 𑀧𑀚𑁆𑀚𑁄𑀢𑀓𑀭𑀸 𑀪𑀯𑀦𑁆𑀢𑀺, 𑀢𑀁 𑀢𑀁 𑀅𑀳𑀁 𑀯𑀻𑀭 𑀢𑀣𑁂𑀯 𑀫𑀜𑁆𑀜𑁂;

𑀯𑀺𑀧𑀲𑁆𑀲𑀺𑀦𑀁 𑀚𑀸𑀦𑀫𑀼𑀧𑀸𑀕𑀫𑀺𑀫𑁆𑀳, 𑀧𑀭𑀺𑀲𑀸𑀲𑀼 𑀦𑁄 𑀆𑀯𑀺𑀓𑀭𑁄𑀳𑀺 𑀓𑀧𑁆𑀧𑀁.

𑁧𑁨𑁭𑁯. ‘‘𑀔𑀺𑀧𑁆𑀧𑀁 𑀕𑀺𑀭𑀁 𑀏𑀭𑀬 𑀯𑀕𑁆𑀕𑀼 𑀯𑀕𑁆𑀕𑀼𑀁, 𑀳𑀁𑀲𑁄𑀯 𑀧𑀕𑁆𑀕𑀬𑁆𑀳 𑀲𑀡𑀺𑀓𑀁 𑀦𑀺𑀓𑀽𑀚;

𑀩𑀺𑀦𑁆𑀤𑀼𑀲𑁆𑀲𑀭𑁂𑀦 𑀲𑀼𑀯𑀺𑀓𑀧𑁆𑀧𑀺𑀢𑁂𑀦, 𑀲𑀩𑁆𑀩𑁂𑀯 𑀢𑁂 𑀉𑀚𑁆𑀚𑀼𑀕𑀢𑀸 𑀲𑀼𑀡𑁄𑀫.

𑁧𑁨𑁮𑁦. ‘‘𑀧𑀳𑀻𑀦𑀚𑀸𑀢𑀺𑀫𑀭𑀡𑀁 𑀅𑀲𑁂𑀲𑀁, 𑀦𑀺𑀕𑁆𑀕𑀬𑁆𑀳 𑀥𑁄𑀦𑀁 𑀯𑀤𑁂𑀲𑁆𑀲𑀸𑀫𑀺 [𑀧𑀝𑀺𑀯𑁂𑀤𑀺𑀬𑀸𑀫𑀺 (𑀲𑀻. 𑀓.)] 𑀥𑀫𑁆𑀫𑀁;

𑀦 𑀓𑀸𑀫𑀓𑀸𑀭𑁄 𑀳𑀺 [𑀳𑁄𑀢𑀺 (𑀲𑀻. 𑀓.)] 𑀧𑀼𑀣𑀼𑀚𑁆𑀚𑀦𑀸𑀦𑀁, 𑀲𑀗𑁆𑀔𑁂𑀬𑁆𑀬𑀓𑀸𑀭𑁄 𑀘 [𑀯 (𑀩𑀳𑀽𑀲𑀼)] 𑀢𑀣𑀸𑀕𑀢𑀸𑀦𑀁.

𑁧𑁨𑁮𑁧. ‘‘𑀲𑀫𑁆𑀧𑀦𑁆𑀦𑀯𑁂𑀬𑁆𑀬𑀸𑀓𑀭𑀡𑀁 𑀢𑀯𑁂𑀤𑀁, 𑀲𑀫𑀼𑀚𑁆𑀚𑀼𑀧𑀜𑁆𑀜𑀲𑁆𑀲 𑀲𑀫𑀼𑀕𑁆𑀕𑀳𑀻𑀢𑀁;

𑀅𑀬𑀫𑀜𑁆𑀚𑀮𑀺 𑀧𑀘𑁆𑀙𑀺𑀫𑁄 𑀲𑀼𑀧𑁆𑀧𑀡𑀸𑀫𑀺𑀢𑁄, 𑀫𑀸 𑀫𑁄𑀳𑀬𑀻 𑀚𑀸𑀦𑀫𑀦𑁄𑀫𑀧𑀜𑁆𑀜.

𑁧𑁨𑁮𑁨. ‘‘𑀧𑀭𑁄𑀧𑀭𑀁 𑀅𑀭𑀺𑀬𑀥𑀫𑁆𑀫𑀁 𑀯𑀺𑀤𑀺𑀢𑁆𑀯𑀸, 𑀫𑀸 𑀫𑁄𑀳𑀬𑀻 𑀚𑀸𑀦𑀫𑀦𑁄𑀫𑀯𑀻𑀭𑀺𑀬;

𑀯𑀸𑀭𑀺𑀁 𑀬𑀣𑀸 𑀖𑀫𑁆𑀫𑀦𑀺 𑀖𑀫𑁆𑀫𑀢𑀢𑁆𑀢𑁄, 𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀺 𑀲𑀼𑀢𑀁 𑀧𑀯𑀲𑁆𑀲.

𑁧𑁨𑁮𑁩. ‘‘𑀬𑀤𑀢𑁆𑀣𑀺𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀻, 𑀓𑀧𑁆𑀧𑀸𑀬𑀦𑁄 𑀓𑀘𑁆𑀘𑀺𑀲𑁆𑀲𑀢𑀁 𑀅𑀫𑁄𑀖𑀁;

𑀦𑀺𑀩𑁆𑀩𑀸𑀬𑀺 𑀲𑁄 𑀆𑀤𑀼 𑀲𑀉𑀧𑀸𑀤𑀺𑀲𑁂𑀲𑁄 [𑀅𑀦𑀼𑀧𑀸𑀤𑀺𑀲𑁂𑀲𑀸 (𑀲𑀻.), 𑀅𑀦𑀼𑀧𑀸𑀤𑀺𑀲𑁂𑀲𑁄 (𑀓.)], 𑀬𑀣𑀸 𑀯𑀺𑀫𑀼𑀢𑁆𑀢𑁄 𑀅𑀳𑀼 𑀢𑀁 𑀲𑀼𑀡𑁄𑀫.

𑁧𑁨𑁮𑁪. ‘‘‘𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀁 𑀇𑀥 𑀦𑀸𑀫𑀭𑀽𑀧𑁂,

(𑀇𑀢𑀺 𑀪𑀕𑀯𑀸) 𑀓𑀡𑁆𑀳𑀲𑁆𑀲 𑀲𑁄𑀢𑀁 𑀤𑀻𑀖𑀭𑀢𑁆𑀢𑀸𑀦𑀼𑀲𑀬𑀺𑀢𑀁;

𑀅𑀢𑀸𑀭𑀺 𑀚𑀸𑀢𑀺𑀁 𑀫𑀭𑀡𑀁 𑀅𑀲𑁂𑀲𑀁’, 𑀇𑀘𑁆𑀘𑀩𑁆𑀭𑀯𑀺 𑀪𑀕𑀯𑀸 𑀧𑀜𑁆𑀘𑀲𑁂𑀝𑁆𑀞𑁄.

𑁧𑁨𑁮𑁫. ‘‘𑀏𑀲 𑀲𑀼𑀢𑁆𑀯𑀸 𑀧𑀲𑀻𑀤𑀸𑀫𑀺, 𑀯𑀘𑁄 𑀢𑁂 𑀇𑀲𑀺𑀲𑀢𑁆𑀢𑀫;

𑀅𑀫𑁄𑀖𑀁 𑀓𑀺𑀭 𑀫𑁂 𑀧𑀼𑀝𑁆𑀞𑀁, 𑀦 𑀫𑀁 𑀯𑀜𑁆𑀘𑁂𑀲𑀺 𑀩𑁆𑀭𑀸𑀳𑁆𑀫𑀡𑁄.

𑁧𑁨𑁮𑁬. ‘‘𑀬𑀣𑀸 𑀯𑀸𑀤𑀻 𑀢𑀣𑀸 𑀓𑀸𑀭𑀻, 𑀅𑀳𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀅𑀘𑁆𑀙𑁂𑀘𑁆𑀙𑀺 𑀫𑀘𑁆𑀘𑀼𑀦𑁄 𑀚𑀸𑀮𑀁, 𑀢𑀢𑀁 𑀫𑀸𑀬𑀸𑀯𑀺𑀦𑁄 𑀤𑀴𑁆𑀳𑀁.

𑁧𑁨𑁮𑁭. ‘‘𑀅𑀤𑁆𑀤𑀲 𑀪𑀕𑀯𑀸 𑀆𑀤𑀺𑀁, 𑀉𑀧𑀸𑀤𑀸𑀦𑀲𑁆𑀲 𑀓𑀧𑁆𑀧𑀺𑀬𑁄;

𑀅𑀘𑁆𑀘𑀕𑀸 𑀯𑀢 𑀓𑀧𑁆𑀧𑀸𑀦𑁄, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭𑀁.

𑁧𑁨𑁮𑁮. ‘‘𑀢𑀁 𑀤𑁂𑀯𑀤𑁂𑀯𑀁 𑀯𑀦𑁆𑀤𑀸𑀫𑀺, 𑀧𑀼𑀢𑁆𑀢𑀁 𑀢𑁂 𑀤𑁆𑀯𑀺𑀧𑀤𑀼𑀢𑁆𑀢𑀫;

𑀅𑀦𑀼𑀚𑀸𑀢𑀁 𑀫𑀳𑀸𑀯𑀻𑀭𑀁, 𑀦𑀸𑀕𑀁 𑀦𑀸𑀕𑀲𑁆𑀲 𑀑𑀭𑀲’’𑀦𑁆𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀣𑁂𑀭𑁄 𑀕𑀸𑀣𑀸𑀬𑁄

𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀳𑀸𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.