𑁫. 𑀧𑀜𑁆𑀘𑀫𑀯𑀕𑁆𑀕𑁄

𑁧. 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀕𑀸𑀣𑀸

𑁨𑁦𑁧. ‘‘𑀅𑀳𑁄 𑀩𑀼𑀤𑁆𑀥𑀸 𑀅𑀳𑁄 𑀥𑀫𑁆𑀫𑀸, 𑀅𑀳𑁄 𑀦𑁄 𑀲𑀢𑁆𑀣𑀼 𑀲𑀫𑁆𑀧𑀤𑀸;

𑀬𑀢𑁆𑀣 𑀏𑀢𑀸𑀤𑀺𑀲𑀁 𑀥𑀫𑁆𑀫𑀁, 𑀲𑀸𑀯𑀓𑁄 𑀲𑀘𑁆𑀙𑀺𑀓𑀸𑀳𑀺’’𑀢𑀺.

𑁨𑁦𑁨. ‘‘𑀅𑀲𑀗𑁆𑀔𑁂𑀬𑁆𑀬𑁂𑀲𑀼 𑀓𑀧𑁆𑀧𑁂𑀲𑀼, 𑀲𑀓𑁆𑀓𑀸𑀬𑀸𑀥𑀺𑀕𑀢𑀸 𑀅𑀳𑀽;

𑀢𑁂𑀲𑀫𑀬𑀁 𑀧𑀘𑁆𑀙𑀺𑀫𑀓𑁄, 𑀘𑀭𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀓𑀼𑀫𑀸𑀭𑀓𑀲𑁆𑀲𑀧𑁄 𑀣𑁂𑀭𑁄….

𑁨. 𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑀕𑀸𑀣𑀸

𑁨𑁦𑁩. ‘‘𑀬𑁄 𑀳𑀯𑁂 𑀤𑀳𑀭𑁄 𑀪𑀺𑀓𑁆𑀔𑀼, 𑀬𑀼𑀜𑁆𑀚𑀢𑀺 𑀩𑀼𑀤𑁆𑀥𑀲𑀸𑀲𑀦𑁂;

𑀚𑀸𑀕𑀭𑁄 𑀲 𑀳𑀺 𑀲𑀼𑀢𑁆𑀢𑁂𑀲𑀼 [𑀧𑀢𑀺𑀲𑀼𑀢𑁆𑀢𑁂𑀲𑀼 (𑀲𑀻. 𑀓.)], 𑀅𑀫𑁄𑀖𑀁 𑀢𑀲𑁆𑀲 𑀚𑀻𑀯𑀺𑀢𑀁.

𑁨𑁦𑁪. ‘‘𑀢𑀲𑁆𑀫𑀸 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀧𑀲𑀸𑀤𑀁 𑀥𑀫𑁆𑀫𑀤𑀲𑁆𑀲𑀦𑀁;

𑀅𑀦𑀼𑀬𑀼𑀜𑁆𑀚𑁂𑀣 𑀫𑁂𑀥𑀸𑀯𑀻, 𑀲𑀭𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺.

… 𑀥𑀫𑁆𑀫𑀧𑀸𑀮𑁄 𑀣𑁂𑀭𑁄….

𑁩. 𑀩𑁆𑀭𑀳𑁆𑀫𑀸𑀮𑀺𑀢𑁆𑀣𑁂𑀭𑀕𑀸𑀣𑀸

𑁨𑁦𑁫. ‘‘𑀓𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀣𑀗𑁆𑀕𑀢𑀸𑀦𑀺, 𑀅𑀲𑁆𑀲𑀸 𑀬𑀣𑀸 𑀲𑀸𑀭𑀣𑀺𑀦𑀸 𑀲𑀼𑀤𑀦𑁆𑀢𑀸;

𑀧𑀳𑀻𑀦𑀫𑀸𑀦𑀲𑁆𑀲 𑀅𑀦𑀸𑀲𑀯𑀲𑁆𑀲, 𑀤𑁂𑀯𑀸𑀧𑀺 𑀓𑀲𑁆𑀲 [𑀢𑀲𑁆𑀲 (𑀩𑀳𑀽𑀲𑀼)] 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄’’𑀢𑀺.

𑁨𑁦𑁬. [𑀥. 𑀧. 𑁯𑁪 𑀥𑀫𑁆𑀫𑀧𑀤𑁂𑀧𑀺] ‘‘𑀫𑀬𑁆𑀳𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀣𑀗𑁆𑀕𑀢𑀸𑀦𑀺, 𑀅𑀲𑁆𑀲𑀸 𑀬𑀣𑀸 𑀲𑀸𑀭𑀣𑀺𑀦𑀸 𑀲𑀼𑀤𑀦𑁆𑀢𑀸;

𑀧𑀳𑀻𑀦𑀫𑀸𑀦𑀲𑁆𑀲 𑀅𑀦𑀸𑀲𑀯𑀲𑁆𑀲, 𑀤𑁂𑀯𑀸𑀧𑀺 𑀫𑀬𑁆𑀳𑀁 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄’’𑀢𑀺.

… 𑀩𑁆𑀭𑀳𑁆𑀫𑀸𑀮𑀺 𑀣𑁂𑀭𑁄….

𑁪. 𑀫𑁄𑀖𑀭𑀸𑀚𑀢𑁆𑀣𑁂𑀭𑀕𑀸𑀣𑀸

𑁨𑁦𑁭. ‘‘𑀙𑀯𑀺𑀧𑀸𑀧𑀓 𑀘𑀺𑀢𑁆𑀢𑀪𑀤𑁆𑀤𑀓, 𑀫𑁄𑀖𑀭𑀸𑀚 𑀲𑀢𑀢𑀁 𑀲𑀫𑀸𑀳𑀺𑀢𑁄;

𑀳𑁂𑀫𑀦𑁆𑀢𑀺𑀓𑀲𑀻𑀢𑀓𑀸𑀮𑀭𑀢𑁆𑀢𑀺𑀬𑁄 [𑀳𑁂𑀫𑀦𑁆𑀢𑀺𑀓𑀓𑀸𑀮𑀭𑀢𑁆𑀢𑀺𑀬𑁄 (𑀓.)], 𑀪𑀺𑀓𑁆𑀔𑀼 𑀢𑁆𑀯𑀁𑀲𑀺 𑀓𑀣𑀁 𑀓𑀭𑀺𑀲𑁆𑀲𑀲𑀺’’.

𑁨𑁦𑁮. ‘‘𑀲𑀫𑁆𑀧𑀦𑁆𑀦𑀲𑀲𑁆𑀲𑀸 𑀫𑀕𑀥𑀸, 𑀓𑁂𑀯𑀮𑀸 𑀇𑀢𑀺 𑀫𑁂 𑀲𑀼𑀢𑀁;

𑀧𑀮𑀸𑀮𑀘𑁆𑀙𑀦𑁆𑀦𑀓𑁄 𑀲𑁂𑀬𑁆𑀬𑀁, 𑀬𑀣𑀜𑁆𑀜𑁂 𑀲𑀼𑀔𑀚𑀻𑀯𑀺𑀦𑁄’’𑀢𑀺.

… 𑀫𑁄𑀖𑀭𑀸𑀚𑀸 𑀣𑁂𑀭𑁄….

𑁫. 𑀯𑀺𑀲𑀸𑀔𑀧𑀜𑁆𑀘𑀸𑀮𑀧𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁨𑁦𑁯. ‘‘𑀦 𑀉𑀓𑁆𑀔𑀺𑀧𑁂 𑀦𑁄 𑀘 𑀧𑀭𑀺𑀓𑁆𑀔𑀺𑀧𑁂 𑀧𑀭𑁂, 𑀑𑀓𑁆𑀔𑀺𑀧𑁂 𑀧𑀸𑀭𑀕𑀢𑀁 𑀦 𑀏𑀭𑀬𑁂;

𑀦 𑀘𑀢𑁆𑀢𑀯𑀡𑁆𑀡𑀁 𑀧𑀭𑀺𑀲𑀸𑀲𑀼 𑀩𑁆𑀬𑀸𑀳𑀭𑁂, 𑀅𑀦𑀼𑀤𑁆𑀥𑀢𑁄 𑀲𑀫𑁆𑀫𑀺𑀢𑀪𑀸𑀡𑀺 𑀲𑀼𑀩𑁆𑀩𑀢𑁄.

𑁨𑁧𑁦. ‘‘𑀲𑀼𑀲𑀼𑀔𑀼𑀫𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀺𑀦𑀸, 𑀫𑀢𑀺𑀓𑀼𑀲𑀮𑁂𑀦 𑀦𑀺𑀯𑀸𑀢𑀯𑀼𑀢𑁆𑀢𑀺𑀦𑀸;

𑀲𑀁𑀲𑁂𑀯𑀺𑀢𑀯𑀼𑀤𑁆𑀥𑀲𑀻𑀮𑀺𑀦𑀸, 𑀦𑀺𑀩𑁆𑀩𑀸𑀦𑀁 𑀦 𑀳𑀺 𑀢𑁂𑀦 𑀤𑀼𑀮𑁆𑀮𑀪’’𑀦𑁆𑀢𑀺.

… 𑀯𑀺𑀲𑀸𑀔𑁄 𑀧𑀜𑁆𑀘𑀸𑀮𑀧𑀼𑀢𑁆𑀢𑁄 𑀣𑁂𑀭𑁄 ….

𑁬. 𑀘𑀽𑀴𑀓𑀢𑁆𑀣𑁂𑀭𑀕𑀸𑀣𑀸

𑁨𑁧𑁧. ‘‘𑀦𑀤𑀦𑁆𑀢𑀺 𑀫𑁄𑀭𑀸 𑀲𑀼𑀲𑀺𑀔𑀸 𑀲𑀼𑀧𑁂𑀔𑀼𑀡𑀸, 𑀲𑀼𑀦𑀻𑀮𑀕𑀻𑀯𑀸 𑀲𑀼𑀫𑀼𑀔𑀸 𑀲𑀼𑀕𑀚𑁆𑀚𑀺𑀦𑁄;

𑀲𑀼𑀲𑀤𑁆𑀤𑀮𑀸 𑀘𑀸𑀧𑀺 𑀫𑀳𑀸𑀫𑀳𑀻 𑀅𑀬𑀁, 𑀲𑀼𑀩𑁆𑀬𑀸𑀧𑀺𑀢𑀫𑁆𑀩𑀼 𑀲𑀼𑀯𑀮𑀸𑀳𑀓𑀁 𑀦𑀪𑀁.

𑁨𑁧𑁨. ‘‘𑀲𑀼𑀓𑀮𑁆𑀮𑀭𑀽𑀧𑁄 𑀲𑀼𑀫𑀦𑀲𑁆𑀲 𑀛𑀸𑀬𑀢𑀁 [𑀛𑀸𑀬𑀺𑀢𑀁 (𑀲𑁆𑀬𑀸. 𑀓.)], 𑀲𑀼𑀦𑀺𑀓𑁆𑀓𑀫𑁄 𑀲𑀸𑀥𑀼 𑀲𑀼𑀩𑀼𑀤𑁆𑀥𑀲𑀸𑀲𑀦𑁂;

𑀲𑀼𑀲𑀼𑀓𑁆𑀓𑀲𑀼𑀓𑁆𑀓𑀁 𑀦𑀺𑀧𑀼𑀡𑀁 𑀲𑀼𑀤𑀼𑀤𑁆𑀤𑀲𑀁, 𑀨𑀼𑀲𑀸𑀳𑀺 𑀢𑀁 𑀉𑀢𑁆𑀢𑀫𑀫𑀘𑁆𑀘𑀼𑀢𑀁 𑀧𑀤’’𑀦𑁆𑀢𑀺.

… 𑀘𑀽𑀴𑀓𑁄 [𑀘𑀽𑀮𑀓𑁄 (𑀲𑀻. 𑀅𑀝𑁆𑀞.)] 𑀣𑁂𑀭𑁄….

𑁭. 𑀅𑀦𑀽𑀧𑀫𑀢𑁆𑀣𑁂𑀭𑀕𑀸𑀣𑀸

𑁨𑁧𑁩. ‘‘𑀦𑀦𑁆𑀤𑀫𑀸𑀦𑀸𑀕𑀢𑀁 𑀘𑀺𑀢𑁆𑀢𑀁, 𑀲𑀽𑀮𑀫𑀸𑀭𑁄𑀧𑀫𑀸𑀦𑀓𑀁;

𑀢𑁂𑀦 𑀢𑁂𑀦𑁂𑀯 𑀯𑀚𑀲𑀺, 𑀬𑁂𑀦 𑀲𑀽𑀮𑀁 𑀓𑀮𑀺𑀗𑁆𑀕𑀭𑀁.

𑁨𑁧𑁪. ‘‘𑀢𑀸𑀳𑀁 𑀘𑀺𑀢𑁆𑀢𑀓𑀮𑀺𑀁 𑀩𑁆𑀭𑀽𑀫𑀺, 𑀢𑀁 𑀩𑁆𑀭𑀽𑀫𑀺 𑀘𑀺𑀢𑁆𑀢𑀤𑀼𑀩𑁆𑀪𑀓𑀁;

𑀲𑀢𑁆𑀣𑀸 𑀢𑁂 𑀤𑀼𑀮𑁆𑀮𑀪𑁄 𑀮𑀤𑁆𑀥𑁄, 𑀫𑀸𑀦𑀢𑁆𑀣𑁂 𑀫𑀁 𑀦𑀺𑀬𑁄𑀚𑀬𑀻’’𑀢𑀺.

… 𑀅𑀦𑀽𑀧𑀫𑁄 𑀣𑁂𑀭𑁄….

𑁮. 𑀯𑀚𑁆𑀚𑀺𑀢𑀢𑁆𑀣𑁂𑀭𑀕𑀸𑀣𑀸

𑁨𑁧𑁫. ‘‘𑀲𑀁𑀲𑀭𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀕𑀢𑀻𑀲𑀼 𑀧𑀭𑀺𑀯𑀢𑁆𑀢𑀺𑀲𑀁;

𑀅𑀧𑀲𑁆𑀲𑀁 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀅𑀦𑁆𑀥𑀪𑀽𑀢𑁄 [𑀅𑀦𑁆𑀥𑀻𑀪𑀽𑀢𑁄 (𑀓.)] 𑀧𑀼𑀣𑀼𑀚𑁆𑀚𑀦𑁄.

𑁨𑁧𑁬. ‘‘𑀢𑀲𑁆𑀲 𑀫𑁂 𑀅𑀧𑁆𑀧𑀫𑀢𑁆𑀢𑀲𑁆𑀲, 𑀲𑀁𑀲𑀸𑀭𑀸 𑀯𑀺𑀦𑀴𑀻𑀓𑀢𑀸;

𑀲𑀩𑁆𑀩𑀸 𑀕𑀢𑀻 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀯𑀚𑁆𑀚𑀺𑀢𑁄 𑀣𑁂𑀭𑁄….

𑁯. 𑀲𑀦𑁆𑀥𑀺𑀢𑀢𑁆𑀣𑁂𑀭𑀕𑀸𑀣𑀸

𑁨𑁧𑁭. ‘‘𑀅𑀲𑁆𑀲𑀢𑁆𑀣𑁂 𑀳𑀭𑀺𑀢𑁄𑀪𑀸𑀲𑁂, 𑀲𑀁𑀯𑀺𑀭𑀽𑀴𑁆𑀳𑀫𑁆𑀳𑀺 𑀧𑀸𑀤𑀧𑁂;

𑀏𑀓𑀁 𑀩𑀼𑀤𑁆𑀥𑀕𑀢𑀁 𑀲𑀜𑁆𑀜𑀁, 𑀅𑀮𑀪𑀺𑀢𑁆𑀣𑀁 [𑀅𑀮𑀪𑀺𑀁 𑀳𑀁 (𑀓.)] 𑀧𑀢𑀺𑀲𑁆𑀲𑀢𑁄.

𑁨𑁧𑁮. ‘‘𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀢𑀲𑁆𑀲𑀸 𑀲𑀜𑁆𑀜𑀸𑀬 𑀯𑀸𑀳𑀲𑀸, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄’’𑀢𑀺.

… 𑀲𑀦𑁆𑀥𑀺𑀢𑁄 𑀣𑁂𑀭𑁄….

𑀯𑀕𑁆𑀕𑁄 𑀧𑀜𑁆𑀘𑀫𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀼𑀫𑀸𑀭𑀓𑀲𑁆𑀲𑀧𑁄 𑀣𑁂𑀭𑁄, 𑀥𑀫𑁆𑀫𑀧𑀸𑀮𑁄 𑀘 𑀩𑁆𑀭𑀳𑁆𑀫𑀸𑀮𑀺;

𑀫𑁄𑀖𑀭𑀸𑀚𑀸 𑀯𑀺𑀲𑀸𑀔𑁄 𑀘, 𑀘𑀽𑀴𑀓𑁄 𑀘 𑀅𑀦𑀽𑀧𑀫𑁄;

𑀯𑀚𑁆𑀚𑀺𑀢𑁄 𑀲𑀦𑁆𑀥𑀺𑀢𑁄 𑀣𑁂𑀭𑁄, 𑀓𑀺𑀮𑁂𑀲𑀭𑀚𑀯𑀸𑀳𑀦𑁄𑀢𑀺.

𑀤𑀼𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.