𑁪. 𑀘𑀢𑀼𑀢𑁆𑀣𑀯𑀕𑁆𑀕𑁄

𑁧. 𑀫𑀺𑀕𑀲𑀺𑀭𑀢𑁆𑀣𑁂𑀭𑀕𑀸𑀣𑀸

𑁧𑁮𑁧. ‘‘𑀬𑀢𑁄 𑀅𑀳𑀁 𑀧𑀩𑁆𑀩𑀚𑀺𑀢𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂;

𑀯𑀺𑀫𑀼𑀘𑁆𑀘𑀫𑀸𑀦𑁄 𑀉𑀕𑁆𑀕𑀘𑁆𑀙𑀺𑀁, 𑀓𑀸𑀫𑀥𑀸𑀢𑀼𑀁 𑀉𑀧𑀘𑁆𑀘𑀕𑀁.

𑁧𑁮𑁨. ‘‘𑀩𑁆𑀭𑀳𑁆𑀫𑀼𑀦𑁄 𑀧𑁂𑀓𑁆𑀔𑀫𑀸𑀦𑀲𑁆𑀲, 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂;

𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀻𑀢𑀺, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀸’’𑀢𑀺.

… 𑀫𑀺𑀕𑀲𑀺𑀭𑁄 𑀣𑁂𑀭𑁄….

𑁨. 𑀲𑀺𑀯𑀓𑀢𑁆𑀣𑁂𑀭𑀕𑀸𑀣𑀸

𑁧𑁮𑁩. ‘‘𑀅𑀦𑀺𑀘𑁆𑀘𑀸𑀦𑀺 𑀕𑀳𑀓𑀸𑀦𑀺, 𑀢𑀢𑁆𑀣 𑀢𑀢𑁆𑀣 𑀧𑀼𑀦𑀧𑁆𑀧𑀼𑀦𑀁;

𑀕𑀳𑀓𑀸𑀭𑀁 [𑀕𑀳𑀓𑀸𑀭𑀓𑀁 (𑀲𑀻. 𑀧𑀻.)] 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

𑁧𑁮𑁪. ‘‘𑀕𑀳𑀓𑀸𑀭𑀓 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀣𑀽𑀡𑀺𑀓𑀸 [𑀣𑀽𑀡𑀺𑀭𑀸 (𑀧𑀻. 𑀓.), 𑀥𑀼𑀡𑀺𑀭𑀸 (𑀲𑁆𑀬𑀸.)] 𑀘 𑀯𑀺𑀤𑀸𑀮𑀺𑀢𑀸 [𑀧𑀤𑀸𑀮𑀺𑀢𑀸 (𑀲𑀻. 𑀲𑁆𑀬𑀸.)];

𑀯𑀺𑀫𑀭𑀺𑀬𑀸𑀤𑀺𑀓𑀢𑀁 𑀘𑀺𑀢𑁆𑀢𑀁, 𑀇𑀥𑁂𑀯 𑀯𑀺𑀥𑀫𑀺𑀲𑁆𑀲𑀢𑀻’’𑀢𑀺.

… 𑀲𑀺𑀯𑀓𑁄 [𑀲𑀻𑀯𑀓𑁄 (𑀲𑀻.)] 𑀣𑁂𑀭𑁄….

𑁩. 𑀉𑀧𑀯𑀸𑀡𑀢𑁆𑀣𑁂𑀭𑀕𑀸𑀣𑀸

𑁧𑁮𑁫. ‘‘𑀅𑀭𑀳𑀁 𑀲𑀼𑀕𑀢𑁄 𑀮𑁄𑀓𑁂, 𑀯𑀸𑀢𑁂𑀳𑀸𑀩𑀸𑀥𑀺𑀢𑁄 [… 𑀩𑀸𑀥𑀺𑀢𑁄 (𑀓.)] 𑀫𑀼𑀦𑀺;

𑀲𑀘𑁂 𑀉𑀡𑁆𑀳𑁄𑀤𑀓𑀁 𑀅𑀢𑁆𑀣𑀺, 𑀫𑀼𑀦𑀺𑀦𑁄 𑀤𑁂𑀳𑀺 𑀩𑁆𑀭𑀸𑀳𑁆𑀫𑀡.

𑁧𑁮𑁬. ‘‘𑀧𑀽𑀚𑀺𑀢𑁄 𑀧𑀽𑀚𑀦𑁂𑀬𑁆𑀬𑀸𑀦𑀁 [𑀧𑀽𑀚𑀦𑀻𑀬𑀸𑀦𑀁 (𑀲𑀻.)], 𑀲𑀓𑁆𑀓𑀭𑁂𑀬𑁆𑀬𑀸𑀦 𑀲𑀓𑁆𑀓𑀢𑁄;

𑀅𑀧𑀘𑀺𑀢𑁄𑀧𑀘𑁂𑀬𑁆𑀬𑀸𑀦𑀁 [𑀅𑀧𑀘𑀦𑀻𑀬𑀸𑀦𑀁 (𑀲𑀻.), 𑀅𑀧𑀘𑀺𑀦𑁂𑀬𑁆𑀬𑀸𑀦𑀁 (𑀲𑁆𑀬𑀸.)], 𑀢𑀲𑁆𑀲 𑀇𑀘𑁆𑀙𑀸𑀫𑀺 𑀳𑀸𑀢𑀯𑁂’’𑀢𑀺.

… 𑀉𑀧𑀯𑀸𑀡𑁄 𑀣𑁂𑀭𑁄….

𑁪. 𑀇𑀲𑀺𑀤𑀺𑀦𑁆𑀦𑀢𑁆𑀣𑁂𑀭𑀕𑀸𑀣𑀸

𑁧𑁮𑁭. ‘‘𑀤𑀺𑀝𑁆𑀞𑀸 𑀫𑀬𑀸 𑀥𑀫𑁆𑀫𑀥𑀭𑀸 𑀉𑀧𑀸𑀲𑀓𑀸, 𑀓𑀸𑀫𑀸 𑀅𑀦𑀺𑀘𑁆𑀘𑀸 𑀇𑀢𑀺 𑀪𑀸𑀲𑀫𑀸𑀦𑀸;

𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀢𑁂 𑀅𑀧𑁂𑀓𑁆𑀔𑀸.

𑁧𑁮𑁮. ‘‘𑀅𑀤𑁆𑀥𑀸 𑀦 𑀚𑀸𑀦𑀦𑁆𑀢𑀺 𑀬𑀢𑁄𑀥 𑀥𑀫𑁆𑀫𑀁, 𑀓𑀸𑀫𑀸 𑀅𑀦𑀺𑀘𑁆𑀘𑀸 𑀇𑀢𑀺 𑀘𑀸𑀧𑀺 𑀆𑀳𑀼;

𑀭𑀸𑀕𑀜𑁆𑀘 𑀢𑁂𑀲𑀁 𑀦 𑀩𑀮𑀢𑁆𑀣𑀺 𑀙𑁂𑀢𑁆𑀢𑀼𑀁, 𑀢𑀲𑁆𑀫𑀸 𑀲𑀺𑀢𑀸 𑀧𑀼𑀢𑁆𑀢𑀤𑀸𑀭𑀁 𑀥𑀦𑀜𑁆𑀘𑀸’’𑀢𑀺.

… 𑀇𑀲𑀺𑀤𑀺𑀦𑁆𑀦𑁄 𑀣𑁂𑀭𑁄….

𑁫. 𑀲𑀫𑁆𑀩𑀼𑀮𑀓𑀘𑁆𑀘𑀸𑀦𑀢𑁆𑀣𑁂𑀭𑀕𑀸𑀣𑀸

𑁧𑁮𑁯. ‘‘𑀤𑁂𑀯𑁄 𑀘 𑀯𑀲𑁆𑀲𑀢𑀺 𑀤𑁂𑀯𑁄 𑀘 𑀕𑀴𑀕𑀴𑀸𑀬𑀢𑀺,

𑀏𑀓𑀓𑁄 𑀘𑀸𑀳𑀁 𑀪𑁂𑀭𑀯𑁂 𑀩𑀺𑀮𑁂 𑀯𑀺𑀳𑀭𑀸𑀫𑀺;

𑀢𑀲𑁆𑀲 𑀫𑀬𑁆𑀳𑀁 𑀏𑀓𑀓𑀲𑁆𑀲 𑀪𑁂𑀭𑀯𑁂 𑀩𑀺𑀮𑁂 𑀯𑀺𑀳𑀭𑀢𑁄,

𑀦𑀢𑁆𑀣𑀺 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸.

𑁧𑁯𑁦. ‘‘𑀥𑀫𑁆𑀫𑀢𑀸 𑀫𑀫𑀲𑀸 𑀬𑀲𑁆𑀲 𑀫𑁂, 𑀏𑀓𑀓𑀲𑁆𑀲 𑀪𑁂𑀭𑀯𑁂 𑀩𑀺𑀮𑁂;

𑀯𑀺𑀳𑀭𑀢𑁄 𑀦𑀢𑁆𑀣𑀺 𑀪𑀬𑀁 𑀯𑀸, 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸’’𑀢𑀺.

… 𑀲𑀫𑁆𑀩𑀼𑀮𑀓𑀘𑁆𑀘𑀸𑀦𑁄 [𑀲𑀫𑁆𑀩𑀳𑀼𑀮𑀓𑀘𑁆𑀘𑀸𑀦𑁄 (𑀓.)] 𑀣𑁂𑀭𑁄….

𑁬. 𑀦𑀺𑀢𑀓𑀢𑁆𑀣𑁂𑀭𑀕𑀸𑀣𑀸

𑁧𑁯𑁧. [𑀉𑀤𑀸. 𑁩𑁪 𑀉𑀤𑀸𑀦𑁂𑀧𑀺] ‘‘𑀓𑀲𑁆𑀲 𑀲𑁂𑀮𑀽𑀧𑀫𑀁 𑀘𑀺𑀢𑁆𑀢𑀁, 𑀞𑀺𑀢𑀁 𑀦𑀸𑀦𑀼𑀧𑀓𑀫𑁆𑀧𑀢𑀺;

𑀯𑀺𑀭𑀢𑁆𑀢𑀁 𑀭𑀚𑀦𑀻𑀬𑁂𑀲𑀼, 𑀓𑀼𑀧𑁆𑀧𑀦𑀻𑀬𑁂 𑀦 𑀓𑀼𑀧𑁆𑀧𑀢𑀺;

𑀬𑀲𑁆𑀲𑁂𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀓𑀼𑀢𑁄 𑀢𑀁 𑀤𑀼𑀓𑁆𑀔𑀫𑁂𑀲𑁆𑀲𑀢𑀺.

𑁧𑁯𑁨. ‘‘𑀫𑀫 𑀲𑁂𑀮𑀽𑀧𑀫𑀁 𑀘𑀺𑀢𑁆𑀢𑀁, 𑀞𑀺𑀢𑀁 𑀦𑀸𑀦𑀼𑀧𑀓𑀫𑁆𑀧𑀢𑀺;

𑀯𑀺𑀭𑀢𑁆𑀢𑀁 𑀭𑀚𑀦𑀻𑀬𑁂𑀲𑀼, 𑀓𑀼𑀧𑁆𑀧𑀦𑀻𑀬𑁂 𑀦 𑀓𑀼𑀧𑁆𑀧𑀢𑀺;

𑀫𑀫𑁂𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀓𑀼𑀢𑁄 𑀫𑀁 𑀤𑀼𑀓𑁆𑀔𑀫𑁂𑀲𑁆𑀲𑀢𑀻’’𑀢𑀺.

… 𑀦𑀺𑀢𑀓𑁄 [𑀔𑀺𑀢𑀓𑁄 (𑀲𑀻. 𑀲𑁆𑀬𑀸.)] 𑀣𑁂𑀭𑁄….

𑁭. 𑀲𑁄𑀡𑀧𑁄𑀝𑀺𑀭𑀺𑀬𑀢𑁆𑀣𑁂𑀭𑀕𑀸𑀣𑀸

𑁧𑁯𑁩. ‘‘𑀦 𑀢𑀸𑀯 𑀲𑀼𑀧𑀺𑀢𑀼𑀁 𑀳𑁄𑀢𑀺, 𑀭𑀢𑁆𑀢𑀺 𑀦𑀓𑁆𑀔𑀢𑁆𑀢𑀫𑀸𑀮𑀺𑀦𑀻;

𑀧𑀝𑀺𑀚𑀕𑁆𑀕𑀺𑀢𑀼𑀫𑁂𑀯𑁂𑀲𑀸, 𑀭𑀢𑁆𑀢𑀺 𑀳𑁄𑀢𑀺 𑀯𑀺𑀚𑀸𑀦𑀢𑀸.

𑁧𑁯𑁪. ‘‘𑀳𑀢𑁆𑀣𑀺𑀓𑁆𑀔𑀦𑁆𑀥𑀸𑀯𑀧𑀢𑀺𑀢𑀁, 𑀓𑀼𑀜𑁆𑀚𑀭𑁄 𑀘𑁂 𑀅𑀦𑀼𑀓𑁆𑀓𑀫𑁂;

𑀲𑀗𑁆𑀕𑀸𑀫𑁂 𑀫𑁂 𑀫𑀢𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀚𑀻𑀯𑁂 𑀧𑀭𑀸𑀚𑀺𑀢𑁄’’𑀢𑀺.

… 𑀲𑁄𑀡𑁄 𑀧𑁄𑀝𑀺𑀭𑀺𑀬𑁄 [𑀲𑁂𑀮𑀺𑀲𑁆𑀲𑀭𑀺𑀬𑁄 (𑀲𑀻.), 𑀧𑁄𑀝𑁆𑀝𑀺𑀭𑀺𑀬𑀧𑀼𑀢𑁆𑀢𑁄 (𑀲𑁆𑀬𑀸.)] 𑀣𑁂𑀭𑁄 ….

𑁮. 𑀦𑀺𑀲𑀪𑀢𑁆𑀣𑁂𑀭𑀕𑀸𑀣𑀸

𑁧𑁯𑁫. ‘‘𑀧𑀜𑁆𑀘 𑀓𑀸𑀫𑀕𑀼𑀡𑁂 𑀳𑀺𑀢𑁆𑀯𑀸, 𑀧𑀺𑀬𑀭𑀽𑀧𑁂 𑀫𑀦𑁄𑀭𑀫𑁂;

𑀲𑀤𑁆𑀥𑀸𑀬 𑀖𑀭𑀸 𑀦𑀺𑀓𑁆𑀔𑀫𑁆𑀫, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀪𑀯𑁂.

𑁧𑁯𑁬. ‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄’’𑀢𑀺.

… 𑀦𑀺𑀲𑀪𑁄 𑀣𑁂𑀭𑁄….

𑁯. 𑀉𑀲𑀪𑀢𑁆𑀣𑁂𑀭𑀕𑀸𑀣𑀸

𑁧𑁯𑁭. ‘‘𑀅𑀫𑁆𑀩𑀧𑀮𑁆𑀮𑀯𑀲𑀗𑁆𑀓𑀸𑀲𑀁, 𑀅𑀁𑀲𑁂 𑀓𑀢𑁆𑀯𑀸𑀦 𑀘𑀻𑀯𑀭𑀁;

𑀦𑀺𑀲𑀺𑀦𑁆𑀦𑁄 𑀳𑀢𑁆𑀣𑀺𑀕𑀻𑀯𑀸𑀬𑀁, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁.

𑁧𑁯𑁮. ‘‘𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀑𑀭𑀼𑀬𑁆𑀳, 𑀲𑀁𑀯𑁂𑀕𑀁 𑀅𑀮𑀪𑀺𑀁 𑀢𑀤𑀸;

𑀲𑁄𑀳𑀁 𑀤𑀺𑀢𑁆𑀢𑁄 𑀢𑀤𑀸 𑀲𑀦𑁆𑀢𑁄, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄’’𑀢𑀺.

… 𑀉𑀲𑀪𑁄 𑀣𑁂𑀭𑁄….

𑁧𑁦. 𑀓𑀧𑁆𑀧𑀝𑀓𑀼𑀭𑀢𑁆𑀣𑁂𑀭𑀕𑀸𑀣𑀸

𑁧𑁯𑁯. ‘‘𑀅𑀬𑀫𑀺𑀢𑀺 𑀓𑀧𑁆𑀧𑀝𑁄 𑀓𑀧𑁆𑀧𑀝𑀓𑀼𑀭𑁄, 𑀅𑀘𑁆𑀙𑀸𑀬 𑀅𑀢𑀺𑀪𑀭𑀺𑀢𑀸𑀬 [𑀅𑀢𑀺𑀪𑀭𑀺𑀬𑀸𑀬 (𑀲𑀻. 𑀓.), 𑀅𑀘𑁆𑀘𑀁 𑀪𑀭𑀸𑀬 (𑀲𑁆𑀬𑀸.)];

𑀅𑀫𑀢𑀖𑀝𑀺𑀓𑀸𑀬𑀁 𑀥𑀫𑁆𑀫𑀓𑀝𑀫𑀢𑁆𑀢𑁄 [𑀥𑀫𑁆𑀫𑀓𑀝𑀧𑀢𑁆𑀢𑁄 (𑀲𑁆𑀬𑀸. 𑀓. 𑀅𑀝𑁆𑀞.), 𑀥𑀫𑁆𑀫𑀓𑀝𑀫𑀕𑁆𑀕𑁄 (𑀲𑀻. 𑀅𑀝𑁆𑀞.)], 𑀓𑀢𑀧𑀤𑀁 𑀛𑀸𑀦𑀸𑀦𑀺 𑀑𑀘𑁂𑀢𑀼𑀁.

𑁨𑁦𑁦. ‘‘𑀫𑀸 𑀔𑁄 𑀢𑁆𑀯𑀁 𑀓𑀧𑁆𑀧𑀝 𑀧𑀘𑀸𑀮𑁂𑀲𑀺, 𑀫𑀸 𑀢𑁆𑀯𑀁 𑀉𑀧𑀓𑀡𑁆𑀡𑀫𑁆𑀳𑀺 𑀢𑀸𑀴𑁂𑀲𑁆𑀲𑀁;

𑀦 𑀳𑀺 [𑀦 𑀯𑀸 (𑀓.)] 𑀢𑁆𑀯𑀁 𑀓𑀧𑁆𑀧𑀝 𑀫𑀢𑁆𑀢𑀫𑀜𑁆𑀜𑀸𑀲𑀺, 𑀲𑀗𑁆𑀖𑀫𑀚𑁆𑀛𑀫𑁆𑀳𑀺 𑀧𑀘𑀮𑀸𑀬𑀫𑀸𑀦𑁄𑀢𑀺.

… 𑀓𑀧𑁆𑀧𑀝𑀓𑀼𑀭𑁄 𑀣𑁂𑀭𑁄….

𑀯𑀕𑁆𑀕𑁄 𑀘𑀢𑀼𑀢𑁆𑀣𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀺𑀕𑀲𑀺𑀭𑁄 𑀲𑀺𑀯𑀓𑁄 𑀘, 𑀉𑀧𑀯𑀸𑀦𑁄 𑀘 𑀧𑀡𑁆𑀟𑀺𑀢𑁄;

𑀇𑀲𑀺𑀤𑀺𑀦𑁆𑀦𑁄 𑀘 𑀓𑀘𑁆𑀘𑀸𑀦𑁄, 𑀦𑀺𑀢𑀓𑁄 𑀘 𑀫𑀳𑀸𑀯𑀲𑀻;

𑀧𑁄𑀝𑀺𑀭𑀺𑀬𑀧𑀼𑀢𑁆𑀢𑁄 𑀦𑀺𑀲𑀪𑁄, 𑀉𑀲𑀪𑁄 𑀓𑀧𑁆𑀧𑀝𑀓𑀼𑀭𑁄𑀢𑀺.