𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀉𑀢𑁆𑀢𑀭𑀢𑁆𑀣𑁂𑀭𑀕𑀸𑀣𑀸

𑁧𑁬𑁧. ‘‘𑀔𑀦𑁆𑀥𑀸 𑀫𑀬𑀸 𑀧𑀭𑀺𑀜𑁆𑀜𑀸𑀢𑀸, 𑀢𑀡𑁆𑀳𑀸 𑀫𑁂 𑀲𑀼𑀲𑀫𑀽𑀳𑀢𑀸;

𑀪𑀸𑀯𑀺𑀢𑀸 𑀫𑀫 𑀩𑁄𑀚𑁆𑀛𑀗𑁆𑀕𑀸, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄.

𑁧𑁬𑁨. ‘‘𑀲𑁄𑀳𑀁 𑀔𑀦𑁆𑀥𑁂 𑀧𑀭𑀺𑀜𑁆𑀜𑀸𑀬, 𑀅𑀩𑁆𑀩𑀳𑀺𑀢𑁆𑀯𑀸𑀦 [𑀅𑀩𑁆𑀩𑀼𑀳𑀺𑀢𑁆𑀯𑀸𑀦 (𑀓.)] 𑀚𑀸𑀮𑀺𑀦𑀺𑀁;

𑀪𑀸𑀯𑀬𑀺𑀢𑁆𑀯𑀸𑀦 𑀩𑁄𑀚𑁆𑀛𑀗𑁆𑀕𑁂, 𑀦𑀺𑀩𑁆𑀩𑀸𑀬𑀺𑀲𑁆𑀲𑀁 𑀅𑀦𑀸𑀲𑀯𑁄’’𑀢𑀺.

… 𑀉𑀢𑁆𑀢𑀭𑁄 𑀣𑁂𑀭𑁄….

𑁨. 𑀪𑀤𑁆𑀤𑀚𑀺𑀢𑁆𑀣𑁂𑀭𑀕𑀸𑀣𑀸

𑁧𑁬𑁩. ‘‘𑀧𑀦𑀸𑀤𑁄 𑀦𑀸𑀫 𑀲𑁄 𑀭𑀸𑀚𑀸, 𑀬𑀲𑁆𑀲 𑀬𑀽𑀧𑁄 𑀲𑀼𑀯𑀡𑁆𑀡𑀬𑁄;

𑀢𑀺𑀭𑀺𑀬𑀁 𑀲𑁄𑀴𑀲𑀼𑀩𑁆𑀩𑁂𑀥𑁄 [𑀲𑁄𑀴𑀲𑀧𑀩𑁆𑀩𑁂𑀥𑁄 (𑀲𑀻. 𑀅𑀝𑁆𑀞.), 𑀲𑁄𑀴𑀲𑀩𑁆𑀩𑀸𑀡𑁄 (?)], 𑀉𑀩𑁆𑀪𑀫𑀸𑀳𑀼 [𑀉𑀤𑁆𑀥𑀫𑀸𑀳𑀼 (𑀲𑀻.), 𑀉𑀘𑁆𑀘𑀫𑀸𑀳𑀼 (𑀲𑁆𑀬𑀸.)] 𑀲𑀳𑀲𑁆𑀲𑀥𑀸.

𑁧𑁬𑁪. ‘‘𑀲𑀳𑀲𑁆𑀲𑀓𑀡𑁆𑀟𑁄 𑀲𑀢𑀕𑁂𑀡𑁆𑀟𑀼, 𑀥𑀚𑀸𑀮𑀼 𑀳𑀭𑀺𑀢𑀸𑀫𑀬𑁄;

𑀅𑀦𑀘𑁆𑀘𑀼𑀁 𑀢𑀢𑁆𑀣 𑀕𑀦𑁆𑀥𑀩𑁆𑀩𑀸, 𑀙𑀲𑀳𑀲𑁆𑀲𑀸𑀦𑀺 𑀲𑀢𑁆𑀢𑀥𑀸’’𑀢𑀺.

… 𑀪𑀤𑁆𑀤𑀚𑀺𑀢𑁆𑀣𑁂𑀭𑁄….

𑁩. 𑀲𑁄𑀪𑀺𑀢𑀢𑁆𑀣𑁂𑀭𑀕𑀸𑀣𑀸

𑁧𑁬𑁫. ‘‘𑀲𑀢𑀺𑀫𑀸 𑀧𑀜𑁆𑀜𑀯𑀸 𑀪𑀺𑀓𑁆𑀔𑀼, 𑀆𑀭𑀤𑁆𑀥𑀩𑀮𑀯𑀻𑀭𑀺𑀬𑁄;

𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀸𑀳𑀁, 𑀏𑀓𑀭𑀢𑁆𑀢𑀺𑀁 𑀅𑀦𑀼𑀲𑁆𑀲𑀭𑀺𑀁.

𑁧𑁬𑁬. ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂, 𑀲𑀢𑁆𑀢 𑀅𑀝𑁆𑀞 𑀘 𑀪𑀸𑀯𑀬𑀁;

𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀸𑀳𑀁, 𑀏𑀓𑀭𑀢𑁆𑀢𑀺𑀁 𑀅𑀦𑀼𑀲𑁆𑀲𑀭𑀺’’𑀦𑁆𑀢𑀺.

… 𑀲𑁄𑀪𑀺𑀢𑁄 𑀣𑁂𑀭𑁄….

𑁪. 𑀯𑀮𑁆𑀮𑀺𑀬𑀢𑁆𑀣𑁂𑀭𑀕𑀸𑀣𑀸

𑁧𑁬𑁭. ‘‘𑀬𑀁 𑀓𑀺𑀘𑁆𑀘𑀁 𑀤𑀴𑁆𑀳𑀯𑀻𑀭𑀺𑀬𑁂𑀦, 𑀬𑀁 𑀓𑀺𑀘𑁆𑀘𑀁 𑀩𑁄𑀤𑁆𑀥𑀼𑀫𑀺𑀘𑁆𑀙𑀢𑀸;

𑀓𑀭𑀺𑀲𑁆𑀲𑀁 𑀦𑀸𑀯𑀭𑀚𑁆𑀛𑀺𑀲𑁆𑀲𑀁 [𑀦𑀸𑀯𑀭𑀼𑀚𑁆𑀛𑀺𑀲𑁆𑀲𑀁 (𑀓. 𑀲𑀻. 𑀓.)], 𑀧𑀲𑁆𑀲 𑀯𑀻𑀭𑀺𑀬𑀁 𑀧𑀭𑀓𑁆𑀓𑀫.

𑁧𑁬𑁮. ‘‘𑀢𑁆𑀯𑀜𑁆𑀘 𑀫𑁂 𑀫𑀕𑁆𑀕𑀫𑀓𑁆𑀔𑀸𑀳𑀺, 𑀅𑀜𑁆𑀚𑀲𑀁 𑀅𑀫𑀢𑁄𑀕𑀥𑀁;

𑀅𑀳𑀁 𑀫𑁄𑀦𑁂𑀦 𑀫𑁄𑀦𑀺𑀲𑁆𑀲𑀁, 𑀕𑀗𑁆𑀕𑀸𑀲𑁄𑀢𑁄𑀯 𑀲𑀸𑀕𑀭’’𑀦𑁆𑀢𑀺.

… 𑀯𑀮𑁆𑀮𑀺𑀬𑁄 𑀣𑁂𑀭𑁄….

𑁫. 𑀯𑀻𑀢𑀲𑁄𑀓𑀢𑁆𑀣𑁂𑀭𑀕𑀸𑀣𑀸

𑁧𑁬𑁯. ‘‘𑀓𑁂𑀲𑁂 𑀫𑁂 𑀑𑀮𑀺𑀔𑀺𑀲𑁆𑀲𑀦𑁆𑀢𑀺, 𑀓𑀧𑁆𑀧𑀓𑁄 𑀉𑀧𑀲𑀗𑁆𑀓𑀫𑀺;

𑀢𑀢𑁄 𑀆𑀤𑀸𑀲𑀫𑀸𑀤𑀸𑀬, 𑀲𑀭𑀻𑀭𑀁 𑀧𑀘𑁆𑀘𑀯𑁂𑀓𑁆𑀔𑀺𑀲𑀁.

𑁧𑁭𑁦. ‘‘𑀢𑀼𑀘𑁆𑀙𑁄 𑀓𑀸𑀬𑁄 𑀅𑀤𑀺𑀲𑁆𑀲𑀺𑀢𑁆𑀣, 𑀅𑀦𑁆𑀥𑀓𑀸𑀭𑁄 𑀢𑀫𑁄 𑀩𑁆𑀬𑀕𑀸;

𑀲𑀩𑁆𑀩𑁂 𑀘𑁄𑀴𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀯𑀻𑀢𑀲𑁄𑀓𑁄 𑀣𑁂𑀭𑁄….

𑁬. 𑀧𑀼𑀡𑁆𑀡𑀫𑀸𑀲𑀢𑁆𑀣𑁂𑀭𑀕𑀸𑀣𑀸

𑁧𑁭𑁧. ‘‘𑀧𑀜𑁆𑀘 𑀦𑀻𑀯𑀭𑀡𑁂 𑀳𑀺𑀢𑁆𑀯𑀸, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸;

𑀥𑀫𑁆𑀫𑀸𑀤𑀸𑀲𑀁 𑀕𑀳𑁂𑀢𑁆𑀯𑀸𑀦, 𑀜𑀸𑀡𑀤𑀲𑁆𑀲𑀦𑀫𑀢𑁆𑀢𑀦𑁄.

𑁧𑁭𑁨. ‘‘𑀧𑀘𑁆𑀘𑀯𑁂𑀓𑁆𑀔𑀺𑀁 𑀇𑀫𑀁 𑀓𑀸𑀬𑀁, 𑀲𑀩𑁆𑀩𑀁 𑀲𑀦𑁆𑀢𑀭𑀩𑀸𑀳𑀺𑀭𑀁;

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀢𑀼𑀘𑁆𑀙𑁄 𑀓𑀸𑀬𑁄 𑀅𑀤𑀺𑀲𑁆𑀲𑀣𑀸’’𑀢𑀺.

… 𑀧𑀼𑀡𑁆𑀡𑀫𑀸𑀲𑁄 𑀣𑁂𑀭𑁄….

𑁭. 𑀦𑀦𑁆𑀤𑀓𑀢𑁆𑀣𑁂𑀭𑀕𑀸𑀣𑀸

𑁧𑁭𑁩. ‘‘𑀬𑀣𑀸𑀧𑀺 𑀪𑀤𑁆𑀤𑁄 𑀆𑀚𑀜𑁆𑀜𑁄, 𑀔𑀮𑀺𑀢𑁆𑀯𑀸 𑀧𑀢𑀺𑀢𑀺𑀝𑁆𑀞𑀢𑀺;

𑀪𑀺𑀬𑁆𑀬𑁄 𑀮𑀤𑁆𑀤𑀸𑀦 𑀲𑀁𑀯𑁂𑀕𑀁, 𑀅𑀤𑀻𑀦𑁄 𑀯𑀳𑀢𑁂 𑀥𑀼𑀭𑀁.

𑁧𑁭𑁪. ‘‘𑀏𑀯𑀁 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑀁;

𑀆𑀚𑀸𑀦𑀻𑀬𑀁 𑀫𑀁 𑀥𑀸𑀭𑁂𑀣, 𑀧𑀼𑀢𑁆𑀢𑀁 𑀩𑀼𑀤𑁆𑀥𑀲𑁆𑀲 𑀑𑀭𑀲’’𑀦𑁆𑀢𑀺.

… 𑀦𑀦𑁆𑀤𑀓𑁄 𑀣𑁂𑀭𑁄….

𑁮. 𑀪𑀭𑀢𑀢𑁆𑀣𑁂𑀭𑀕𑀸𑀣𑀸

𑁧𑁭𑁫. ‘‘𑀏𑀳𑀺 𑀦𑀦𑁆𑀤𑀓 𑀕𑀘𑁆𑀙𑀸𑀫, 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀺𑀓𑀁;

𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀸𑀫, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀫𑁆𑀫𑀼𑀔𑀸.

𑁧𑁭𑁬. ‘‘𑀬𑀸𑀬 𑀦𑁄 𑀅𑀦𑀼𑀓𑀫𑁆𑀧𑀸𑀬, 𑀅𑀫𑁆𑀳𑁂 𑀧𑀩𑁆𑀩𑀸𑀚𑀬𑀻 𑀫𑀼𑀦𑀺;

𑀲𑁄 𑀦𑁄 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄’’𑀢𑀺.

… 𑀪𑀭𑀢𑁄 𑀣𑁂𑀭𑁄….

𑁯. 𑀪𑀸𑀭𑀤𑁆𑀯𑀸𑀚𑀢𑁆𑀣𑁂𑀭𑀕𑀸𑀣𑀸

𑁧𑁭𑁭. ‘‘𑀦𑀤𑀦𑁆𑀢𑀺 𑀏𑀯𑀁 𑀲𑀧𑁆𑀧𑀜𑁆𑀜𑀸, 𑀲𑀻𑀳𑀸𑀯 𑀕𑀺𑀭𑀺𑀕𑀩𑁆𑀪𑀭𑁂;

𑀯𑀻𑀭𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑀸, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀦𑀺𑀁 [𑀲𑀯𑀸𑀳𑀦𑀁 (𑀩𑀳𑀽𑀲𑀼)].

𑁧𑁭𑁮. ‘‘𑀲𑀢𑁆𑀣𑀸 𑀘 𑀧𑀭𑀺𑀘𑀺𑀡𑁆𑀡𑁄 𑀫𑁂, 𑀥𑀫𑁆𑀫𑁄 𑀲𑀗𑁆𑀖𑁄 𑀘 𑀧𑀽𑀚𑀺𑀢𑁄;

𑀅𑀳𑀜𑁆𑀘 𑀯𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑀅𑀦𑀸𑀲𑀯’’𑀦𑁆𑀢𑀺.

… 𑀪𑀸𑀭𑀤𑁆𑀯𑀸𑀚𑁄 𑀣𑁂𑀭𑁄….

𑁧𑁦. 𑀓𑀡𑁆𑀳𑀤𑀺𑀦𑁆𑀦𑀢𑁆𑀣𑁂𑀭𑀕𑀸𑀣𑀸

𑁧𑁭𑁯. ‘‘𑀉𑀧𑀸𑀲𑀺𑀢𑀸 𑀲𑀧𑁆𑀧𑀼𑀭𑀺𑀲𑀸, 𑀲𑀼𑀢𑀸 𑀥𑀫𑁆𑀫𑀸 𑀅𑀪𑀺𑀡𑁆𑀳𑀲𑁄;

𑀲𑀼𑀢𑁆𑀯𑀸𑀦 𑀧𑀝𑀺𑀧𑀚𑁆𑀚𑀺𑀲𑁆𑀲𑀁, 𑀅𑀜𑁆𑀚𑀲𑀁 𑀅𑀫𑀢𑁄𑀕𑀥𑀁.

𑁧𑁮𑁦. ‘‘𑀪𑀯𑀭𑀸𑀕𑀳𑀢𑀲𑁆𑀲 𑀫𑁂 𑀲𑀢𑁄, 𑀪𑀯𑀭𑀸𑀕𑁄 𑀧𑀼𑀦 𑀫𑁂 𑀦 𑀯𑀺𑀚𑁆𑀚𑀢𑀺;

𑀦 𑀘𑀸𑀳𑀼 𑀦 𑀘 𑀫𑁂 𑀪𑀯𑀺𑀲𑁆𑀲𑀢𑀺, 𑀦 𑀘 𑀫𑁂 𑀏𑀢𑀭𑀳𑀺 𑀯𑀺𑀚𑁆𑀚𑀢𑀻’’𑀢𑀺.

… 𑀓𑀡𑁆𑀳𑀤𑀺𑀦𑁆𑀦𑁄 𑀣𑁂𑀭𑁄….

𑀯𑀕𑁆𑀕𑁄 𑀢𑀢𑀺𑀬𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀉𑀢𑁆𑀢𑀭𑁄 𑀪𑀤𑁆𑀤𑀚𑀺𑀢𑁆𑀣𑁂𑀭𑁄, 𑀲𑁄𑀪𑀺𑀢𑁄 𑀯𑀮𑁆𑀮𑀺𑀬𑁄 𑀇𑀲𑀺;

𑀯𑀻𑀢𑀲𑁄𑀓𑁄 𑀘 𑀬𑁄 𑀣𑁂𑀭𑁄, 𑀧𑀼𑀡𑁆𑀡𑀫𑀸𑀲𑁄 𑀘 𑀦𑀦𑁆𑀤𑀓𑁄;

𑀪𑀭𑀢𑁄 𑀪𑀸𑀭𑀤𑁆𑀯𑀸𑀚𑁄 𑀘, 𑀓𑀡𑁆𑀳𑀤𑀺𑀦𑁆𑀦𑁄 𑀫𑀳𑀸𑀫𑀼𑀦𑀻𑀢𑀺.