𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀫𑀳𑀸𑀘𑀼𑀦𑁆𑀤𑀢𑁆𑀣𑁂𑀭𑀕𑀸𑀣𑀸

𑁧𑁪𑁧. ‘‘𑀲𑀼𑀲𑁆𑀲𑀽𑀲𑀸 𑀲𑀼𑀢𑀯𑀤𑁆𑀥𑀦𑀻, 𑀲𑀼𑀢𑀁 𑀧𑀜𑁆𑀜𑀸𑀬 𑀯𑀤𑁆𑀥𑀦𑀁;

𑀧𑀜𑁆𑀜𑀸𑀬 𑀅𑀢𑁆𑀣𑀁 𑀚𑀸𑀦𑀸𑀢𑀺, 𑀜𑀸𑀢𑁄 𑀅𑀢𑁆𑀣𑁄 𑀲𑀼𑀔𑀸𑀯𑀳𑁄.

𑁧𑁪𑁨. ‘‘𑀲𑁂𑀯𑁂𑀣 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀘𑀭𑁂𑀬𑁆𑀬 𑀲𑀁𑀬𑁄𑀚𑀦𑀯𑀺𑀧𑁆𑀧𑀫𑁄𑀓𑁆𑀔𑀁;

𑀲𑀘𑁂 𑀭𑀢𑀺𑀁 𑀦𑀸𑀥𑀺𑀕𑀘𑁆𑀙𑁂𑀬𑁆𑀬 𑀢𑀢𑁆𑀣, 𑀲𑀗𑁆𑀖𑁂 𑀯𑀲𑁂 𑀭𑀓𑁆𑀔𑀺𑀢𑀢𑁆𑀢𑁄 𑀲𑀢𑀺𑀫𑀸’’𑀢𑀺.

… 𑀫𑀳𑀸𑀘𑀼𑀦𑁆𑀤𑁄 𑀣𑁂𑀭𑁄….

𑁨. 𑀚𑁄𑀢𑀺𑀤𑀸𑀲𑀢𑁆𑀣𑁂𑀭𑀕𑀸𑀣𑀸

𑁧𑁪𑁩. ‘‘𑀬𑁂 𑀔𑁄 𑀢𑁂 𑀯𑁂𑀞𑀫𑀺𑀲𑁆𑀲𑁂𑀦 [𑀯𑁂𑀖𑀫𑀺𑀲𑁆𑀲𑁂𑀦 (𑀲𑀻. 𑀲𑁆𑀬𑀸.), 𑀯𑁂 𑀕𑀫𑀺𑀲𑁆𑀲𑁂𑀦, 𑀯𑁂𑀔𑀫𑀺𑀲𑁆𑀲𑁂𑀦 (𑀓.)], 𑀦𑀸𑀦𑀢𑁆𑀢𑁂𑀦 𑀘 𑀓𑀫𑁆𑀫𑀼𑀦𑀸;

𑀫𑀦𑀼𑀲𑁆𑀲𑁂 𑀉𑀧𑀭𑀼𑀦𑁆𑀥𑀦𑁆𑀢𑀺, 𑀨𑀭𑀼𑀲𑀽𑀧𑀓𑁆𑀓𑀫𑀸 𑀚𑀦𑀸;

𑀢𑁂𑀧𑀺 𑀢𑀢𑁆𑀣𑁂𑀯 𑀓𑀻𑀭𑀦𑁆𑀢𑀺, 𑀦 𑀳𑀺 𑀓𑀫𑁆𑀫𑀁 𑀧𑀦𑀲𑁆𑀲𑀢𑀺.

𑁧𑁪𑁪. ‘‘𑀬𑀁 𑀓𑀭𑁄𑀢𑀺 𑀦𑀭𑁄 𑀓𑀫𑁆𑀫𑀁, 𑀓𑀮𑁆𑀬𑀸𑀡𑀁 𑀬𑀤𑀺 𑀧𑀸𑀧𑀓𑀁;

𑀢𑀲𑁆𑀲 𑀢𑀲𑁆𑀲𑁂𑀯 𑀤𑀸𑀬𑀸𑀤𑁄, 𑀬𑀁 𑀬𑀁 𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑀻’’𑀢𑀺.

… 𑀚𑁄𑀢𑀺𑀤𑀸𑀲𑁄 𑀣𑁂𑀭𑁄….

𑁩. 𑀳𑁂𑀭𑀜𑁆𑀜𑀓𑀸𑀦𑀺𑀢𑁆𑀣𑁂𑀭𑀕𑀸𑀣𑀸

𑁧𑁪𑁫. ‘‘𑀅𑀘𑁆𑀘𑀬𑀦𑁆𑀢𑀺 𑀅𑀳𑁄𑀭𑀢𑁆𑀢𑀸, 𑀚𑀻𑀯𑀺𑀢𑀁 𑀉𑀧𑀭𑀼𑀚𑁆𑀛𑀢𑀺;

𑀆𑀬𑀼 𑀔𑀻𑀬𑀢𑀺 𑀫𑀘𑁆𑀘𑀸𑀦𑀁, 𑀓𑀼𑀦𑁆𑀦𑀤𑀻𑀦𑀁𑀯 𑀑𑀤𑀓𑀁.

𑁧𑁪𑁬. ‘‘𑀅𑀣 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺, 𑀓𑀭𑀁 𑀩𑀸𑀮𑁄 𑀦 𑀩𑀼𑀚𑁆𑀛𑀢𑀺;

𑀧𑀘𑁆𑀙𑀸𑀲𑁆𑀲 𑀓𑀝𑀼𑀓𑀁 𑀳𑁄𑀢𑀺, 𑀯𑀺𑀧𑀸𑀓𑁄 𑀳𑀺𑀲𑁆𑀲 𑀧𑀸𑀧𑀓𑁄’’𑀢𑀺.

… 𑀳𑁂𑀭𑀜𑁆𑀜𑀓𑀸𑀦𑀺𑀢𑁆𑀣𑁂𑀭𑁄….

𑁪. 𑀲𑁄𑀫𑀫𑀺𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁧𑁪𑁭. ‘‘𑀧𑀭𑀺𑀢𑁆𑀢𑀁 𑀤𑀸𑀭𑀼𑀫𑀸𑀭𑀼𑀬𑁆𑀳, 𑀬𑀣𑀸 𑀲𑀻𑀤𑁂 𑀫𑀳𑀡𑁆𑀡𑀯𑁂;

𑀏𑀯𑀁 𑀓𑀼𑀲𑀻𑀢𑀫𑀸𑀕𑀫𑁆𑀫, 𑀲𑀸𑀥𑀼𑀚𑀻𑀯𑀻𑀧𑀺 𑀲𑀻𑀤𑀢𑀺;

𑀢𑀲𑁆𑀫𑀸 𑀢𑀁 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀓𑀼𑀲𑀻𑀢𑀁 𑀳𑀻𑀦𑀯𑀻𑀭𑀺𑀬𑀁.

𑁧𑁪𑁮. ‘‘𑀧𑀯𑀺𑀯𑀺𑀢𑁆𑀢𑁂𑀳𑀺 𑀅𑀭𑀺𑀬𑁂𑀳𑀺, 𑀧𑀳𑀺𑀢𑀢𑁆𑀢𑁂𑀳𑀺 𑀛𑀸𑀬𑀺𑀪𑀺;

𑀦𑀺𑀘𑁆𑀘𑀁 𑀆𑀭𑀤𑁆𑀥𑀯𑀻𑀭𑀺𑀬𑁂𑀳𑀺, 𑀧𑀡𑁆𑀟𑀺𑀢𑁂𑀳𑀺 𑀲𑀳𑀸𑀯𑀲𑁂’’𑀢𑀺.

… 𑀲𑁄𑀫𑀫𑀺𑀢𑁆𑀢𑁄 𑀣𑁂𑀭𑁄….

𑁫. 𑀲𑀩𑁆𑀩𑀫𑀺𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁧𑁪𑁯. ‘‘𑀚𑀦𑁄 𑀚𑀦𑀫𑁆𑀳𑀺 𑀲𑀫𑁆𑀩𑀤𑁆𑀥𑁄 [𑀲𑀫𑁆𑀩𑀤𑁆𑀥𑁄 (𑀲𑁆𑀬𑀸. 𑀓.)], 𑀚𑀦𑀫𑁂𑀯𑀲𑁆𑀲𑀺𑀢𑁄 𑀚𑀦𑁄;

𑀚𑀦𑁄 𑀚𑀦𑁂𑀦 𑀳𑁂𑀞𑀻𑀬𑀢𑀺, 𑀳𑁂𑀞𑁂𑀢𑀺 𑀘 [𑀩𑁄𑀥𑀺𑀬𑀢𑀺, 𑀩𑀸𑀥𑁂𑀢𑀺 𑀘 (𑀓.)] 𑀚𑀦𑁄 𑀚𑀦𑀁.

𑁧𑁫𑁦. ‘‘𑀓𑁄 𑀳𑀺 𑀢𑀲𑁆𑀲 𑀚𑀦𑁂𑀦𑀢𑁆𑀣𑁄, 𑀚𑀦𑁂𑀦 𑀚𑀦𑀺𑀢𑁂𑀦 𑀯𑀸;

𑀚𑀦𑀁 𑀑𑀳𑀸𑀬 𑀕𑀘𑁆𑀙𑀁 𑀢𑀁, 𑀳𑁂𑀞𑀬𑀺𑀢𑁆𑀯𑀸 [𑀩𑀸𑀥𑀬𑀺𑀢𑁆𑀯𑀸 (𑀓.)] 𑀩𑀳𑀼𑀁 𑀚𑀦’’𑀦𑁆𑀢𑀺.

… 𑀲𑀩𑁆𑀩𑀫𑀺𑀢𑁆𑀢𑁄 𑀣𑁂𑀭𑁄….

𑁬. 𑀫𑀳𑀸𑀓𑀸𑀴𑀢𑁆𑀣𑁂𑀭𑀕𑀸𑀣𑀸

𑁧𑁫𑁧. ‘‘𑀓𑀸𑀴𑀻 𑀇𑀢𑁆𑀣𑀻 𑀩𑁆𑀭𑀳𑀢𑀻 𑀥𑀗𑁆𑀓𑀭𑀽𑀧𑀸, 𑀲𑀢𑁆𑀣𑀺𑀜𑁆𑀘 𑀪𑁂𑀢𑁆𑀯𑀸 𑀅𑀧𑀭𑀜𑁆𑀘 𑀲𑀢𑁆𑀣𑀺𑀁;

𑀩𑀸𑀳𑀜𑁆𑀘 𑀪𑁂𑀢𑁆𑀯𑀸 𑀅𑀧𑀭𑀜𑁆𑀘 𑀩𑀸𑀳𑀁, 𑀲𑀻𑀲𑀜𑁆𑀘 𑀪𑁂𑀢𑁆𑀯𑀸 𑀤𑀥𑀺𑀣𑀸𑀮𑀓𑀁𑀯;

𑀏𑀲𑀸 𑀦𑀺𑀲𑀺𑀦𑁆𑀦𑀸 𑀅𑀪𑀺𑀲𑀦𑁆𑀤𑀳𑀺𑀢𑁆𑀯𑀸.

𑁧𑁫𑁨. ‘‘𑀬𑁄 𑀯𑁂 𑀅𑀯𑀺𑀤𑁆𑀯𑀸 𑀉𑀧𑀥𑀺𑀁 𑀓𑀭𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀤𑀼𑀓𑁆𑀔𑀫𑀼𑀧𑁂𑀢𑀺 𑀫𑀦𑁆𑀤𑁄;

𑀢𑀲𑁆𑀫𑀸 𑀧𑀚𑀸𑀦𑀁 𑀉𑀧𑀥𑀺𑀁 𑀦 𑀓𑀬𑀺𑀭𑀸, 𑀫𑀸𑀳𑀁 𑀧𑀼𑀦 𑀪𑀺𑀦𑁆𑀦𑀲𑀺𑀭𑁄 𑀲𑀬𑀺𑀲𑁆𑀲’’𑀦𑁆𑀢𑀺 [𑀧𑀲𑁆𑀲𑀺𑀲𑁆𑀲𑀦𑁆𑀢𑀺 (𑀓.)].

… 𑀫𑀳𑀸𑀓𑀸𑀴𑁄 𑀣𑁂𑀭𑁄….

𑁭. 𑀢𑀺𑀲𑁆𑀲𑀢𑁆𑀣𑁂𑀭𑀕𑀸𑀣𑀸

𑁧𑁫𑁩. ‘‘𑀩𑀳𑀽 𑀲𑀧𑀢𑁆𑀢𑁂 𑀮𑀪𑀢𑀺, 𑀫𑀼𑀡𑁆𑀟𑁄 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑁄;

𑀮𑀸𑀪𑀻 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲, 𑀯𑀢𑁆𑀣𑀲𑁆𑀲 𑀲𑀬𑀦𑀲𑁆𑀲 𑀘.

𑁧𑁫𑁪. ‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀲𑀓𑁆𑀓𑀸𑀭𑁂𑀲𑀼 𑀫𑀳𑀩𑁆𑀪𑀬𑀁;

𑀅𑀧𑁆𑀧𑀮𑀸𑀪𑁄 𑀅𑀦𑀯𑀲𑁆𑀲𑀼𑀢𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

… 𑀢𑀺𑀲𑁆𑀲𑁄 𑀣𑁂𑀭𑁄….

𑁮. 𑀓𑀺𑀫𑀺𑀮𑀢𑁆𑀣𑁂𑀭𑀕𑀸𑀣𑀸

𑁧𑁫𑁫. ‘‘𑀧𑀸𑀘𑀻𑀦𑀯𑀁𑀲𑀤𑀸𑀬𑀫𑁆𑀳𑀺, 𑀲𑀓𑁆𑀬𑀧𑀼𑀢𑁆𑀢𑀸 𑀲𑀳𑀸𑀬𑀓𑀸;

𑀧𑀳𑀸𑀬𑀸𑀦𑀧𑁆𑀧𑀓𑁂 𑀪𑁄𑀕𑁂, 𑀉𑀜𑁆𑀙𑀸𑀧𑀢𑁆𑀢𑀸𑀕𑀢𑁂 𑀭𑀢𑀸.

𑁧𑁫𑁬. ‘‘𑀆𑀭𑀤𑁆𑀥𑀯𑀻𑀭𑀺𑀬𑀸 𑀧𑀳𑀺𑀢𑀢𑁆𑀢𑀸, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑀸;

𑀭𑀫𑀦𑁆𑀢𑀺 𑀥𑀫𑁆𑀫𑀭𑀢𑀺𑀬𑀸, 𑀳𑀺𑀢𑁆𑀯𑀸𑀦 𑀮𑁄𑀓𑀺𑀬𑀁 𑀭𑀢𑀺’’𑀦𑁆𑀢𑀺.

… 𑀓𑀺𑀫𑀺𑀮𑁄 [𑀓𑀺𑀫𑁆𑀩𑀺𑀮𑁄 (𑀲𑀻. 𑀲𑁆𑀬𑀸. 𑀧𑀻.)] 𑀣𑁂𑀭𑁄….

𑁯. 𑀦𑀦𑁆𑀤𑀢𑁆𑀣𑁂𑀭𑀕𑀸𑀣𑀸

𑁧𑁫𑁭. ‘‘𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸, 𑀫𑀡𑁆𑀟𑀦𑀁 𑀅𑀦𑀼𑀬𑀼𑀜𑁆𑀚𑀺𑀲𑀁;

𑀉𑀤𑁆𑀥𑀢𑁄 𑀘𑀧𑀮𑁄 𑀘𑀸𑀲𑀺𑀁, 𑀓𑀸𑀫𑀭𑀸𑀕𑁂𑀦 𑀅𑀝𑁆𑀝𑀺𑀢𑁄.

𑁧𑁫𑁮. ‘‘𑀉𑀧𑀸𑀬𑀓𑀼𑀲𑀮𑁂𑀦𑀸𑀳𑀁, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀺𑀢𑁆𑀯𑀸, 𑀪𑀯𑁂 𑀘𑀺𑀢𑁆𑀢𑀁 𑀉𑀤𑀩𑁆𑀩𑀳𑀺’’𑀦𑁆𑀢𑀺.

… 𑀦𑀦𑁆𑀤𑁄 𑀣𑁂𑀭𑁄….

𑁧𑁦. 𑀲𑀺𑀭𑀺𑀫𑀢𑁆𑀣𑁂𑀭𑀕𑀸𑀣𑀸

𑁧𑁫𑁯. ‘‘𑀧𑀭𑁂 𑀘 𑀦𑀁 𑀧𑀲𑀁𑀲𑀦𑁆𑀢𑀺, 𑀅𑀢𑁆𑀢𑀸 𑀘𑁂 𑀅𑀲𑀫𑀸𑀳𑀺𑀢𑁄;

𑀫𑁄𑀖𑀁 𑀧𑀭𑁂 𑀧𑀲𑀁𑀲𑀦𑁆𑀢𑀺, 𑀅𑀢𑁆𑀢𑀸 𑀳𑀺 𑀅𑀲𑀫𑀸𑀳𑀺𑀢𑁄.

𑁧𑁬𑁦. ‘‘𑀧𑀭𑁂 𑀘 𑀦𑀁 𑀕𑀭𑀳𑀦𑁆𑀢𑀺, 𑀅𑀢𑁆𑀢𑀸 𑀘𑁂 𑀲𑀼𑀲𑀫𑀸𑀳𑀺𑀢𑁄;

𑀫𑁄𑀖𑀁 𑀧𑀭𑁂 𑀕𑀭𑀳𑀦𑁆𑀢𑀺, 𑀅𑀢𑁆𑀢𑀸 𑀳𑀺 𑀲𑀼𑀲𑀫𑀸𑀳𑀺𑀢𑁄’’𑀢𑀺.

… 𑀲𑀺𑀭𑀺𑀫𑀸 𑀣𑁂𑀭𑁄….

𑀯𑀕𑁆𑀕𑁄 𑀤𑀼𑀢𑀺𑀬𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀘𑀼𑀦𑁆𑀤𑁄 𑀘 𑀚𑁄𑀢𑀺𑀤𑀸𑀲𑁄 𑀘, 𑀣𑁂𑀭𑁄 𑀳𑁂𑀭𑀜𑁆𑀜𑀓𑀸𑀦𑀺 𑀘;

𑀲𑁄𑀫𑀫𑀺𑀢𑁆𑀢𑁄 𑀲𑀩𑁆𑀩𑀫𑀺𑀢𑁆𑀢𑁄, 𑀓𑀸𑀮𑁄 𑀢𑀺𑀲𑁆𑀲𑁄 𑀘 𑀓𑀺𑀫𑀺𑀮𑁄 [𑀓𑀺𑀫𑁆𑀩𑀺𑀮𑁄 (𑀲𑀻. 𑀲𑁆𑀬𑀸. 𑀧𑀻.), 𑀙𑀦𑁆𑀤𑀮𑀓𑁆𑀔𑀡𑀸𑀦𑀼𑀮𑁄𑀫𑀁];

𑀦𑀦𑁆𑀤𑁄 𑀘 𑀲𑀺𑀭𑀺𑀫𑀸 𑀘𑁂𑀯, 𑀤𑀲 𑀣𑁂𑀭𑀸 𑀫𑀳𑀺𑀤𑁆𑀥𑀺𑀓𑀸𑀢𑀺.