𑁧. 𑀧𑀞𑀫𑀯𑀕𑁆𑀕𑁄

𑁧. 𑀉𑀢𑁆𑀢𑀭𑀢𑁆𑀣𑁂𑀭𑀕𑀸𑀣𑀸

𑁧𑁨𑁧. ‘‘𑀦𑀢𑁆𑀣𑀺 𑀓𑁄𑀘𑀺 𑀪𑀯𑁄 𑀦𑀺𑀘𑁆𑀘𑁄, 𑀲𑀗𑁆𑀔𑀸𑀭𑀸 𑀯𑀸𑀧𑀺 𑀲𑀲𑁆𑀲𑀢𑀸;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀢𑁂 𑀔𑀦𑁆𑀥𑀸, 𑀘𑀯𑀦𑁆𑀢𑀺 𑀅𑀧𑀭𑀸𑀧𑀭𑀁.

𑁧𑁨𑁨. ‘‘𑀏𑀢𑀫𑀸𑀤𑀻𑀦𑀁 𑀜𑀢𑁆𑀯𑀸, 𑀪𑀯𑁂𑀦𑀫𑁆𑀳𑀺 𑀅𑀦𑀢𑁆𑀣𑀺𑀓𑁄;

𑀦𑀺𑀲𑁆𑀲𑀝𑁄 𑀲𑀩𑁆𑀩𑀓𑀸𑀫𑁂𑀳𑀺, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀢𑁆𑀢𑀭𑁄 𑀣𑁂𑀭𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁨. 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀢𑁆𑀣𑁂𑀭𑀕𑀸𑀣𑀸

𑁧𑁨𑁩. ‘‘𑀦𑀬𑀺𑀤𑀁 𑀅𑀦𑀬𑁂𑀦 𑀚𑀻𑀯𑀺𑀢𑀁, 𑀦𑀸𑀳𑀸𑀭𑁄 𑀳𑀤𑀬𑀲𑁆𑀲 𑀲𑀦𑁆𑀢𑀺𑀓𑁄;

𑀆𑀳𑀸𑀭𑀝𑁆𑀞𑀺𑀢𑀺𑀓𑁄 𑀲𑀫𑀼𑀲𑁆𑀲𑀬𑁄, 𑀇𑀢𑀺 𑀤𑀺𑀲𑁆𑀯𑀸𑀦 𑀘𑀭𑀸𑀫𑀺 𑀏𑀲𑀦𑀁.

𑁧𑁨𑁪. ‘‘𑀧𑀗𑁆𑀓𑁄𑀢𑀺 𑀳𑀺 𑀦𑀁 𑀧𑀯𑁂𑀤𑀬𑀼𑀁, 𑀬𑀸𑀬𑀁 𑀯𑀦𑁆𑀤𑀦𑀧𑀽𑀚𑀦𑀸 𑀓𑀼𑀮𑁂𑀲𑀼;

𑀲𑀼𑀔𑀼𑀫𑀁 𑀲𑀮𑁆𑀮𑀁 𑀤𑀼𑀭𑀼𑀩𑁆𑀩𑀳𑀁, 𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑁂𑀦 𑀤𑀼𑀚𑁆𑀚𑀳𑁄’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄 𑀣𑁂𑀭𑁄 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁩. 𑀯𑀮𑁆𑀮𑀺𑀬𑀢𑁆𑀣𑁂𑀭𑀕𑀸𑀣𑀸

𑁧𑁨𑁫. ‘‘𑀫𑀓𑁆𑀓𑀝𑁄 𑀧𑀜𑁆𑀘𑀤𑁆𑀯𑀸𑀭𑀸𑀬𑀁, 𑀓𑀼𑀝𑀺𑀓𑀸𑀬𑀁 𑀧𑀲𑀓𑁆𑀓𑀺𑀬;

𑀤𑁆𑀯𑀸𑀭𑁂𑀦 𑀅𑀦𑀼𑀧𑀭𑀺𑀬𑁂𑀢𑀺, 𑀖𑀝𑁆𑀝𑀬𑀦𑁆𑀢𑁄 𑀫𑀼𑀳𑀼𑀁 𑀫𑀼𑀳𑀼𑀁.

𑁧𑁨𑁬. ‘‘𑀢𑀺𑀝𑁆𑀞 𑀫𑀓𑁆𑀓𑀝 𑀫𑀸 𑀥𑀸𑀯𑀺, 𑀦 𑀳𑀺 𑀢𑁂 𑀢𑀁 𑀬𑀣𑀸 𑀧𑀼𑀭𑁂;

𑀦𑀺𑀕𑁆𑀕𑀳𑀻𑀢𑁄𑀲𑀺 𑀧𑀜𑁆𑀜𑀸𑀬, 𑀦𑁂𑀯 𑀤𑀽𑀭𑀁 𑀕𑀫𑀺𑀲𑁆𑀲𑀢𑀻’’𑀢𑀺.

… 𑀯𑀮𑁆𑀮𑀺𑀬𑁄 𑀣𑁂𑀭𑁄….

𑁪. 𑀕𑀗𑁆𑀕𑀸𑀢𑀻𑀭𑀺𑀬𑀢𑁆𑀣𑁂𑀭𑀕𑀸𑀣𑀸

𑁧𑁨𑁭. ‘‘𑀢𑀺𑀡𑁆𑀡𑀁 𑀫𑁂 𑀢𑀸𑀮𑀧𑀢𑁆𑀢𑀸𑀦𑀁, 𑀕𑀗𑁆𑀕𑀸𑀢𑀻𑀭𑁂 𑀓𑀼𑀝𑀻 𑀓𑀢𑀸;

𑀙𑀯𑀲𑀺𑀢𑁆𑀢𑁄𑀯 𑀫𑁂 𑀧𑀢𑁆𑀢𑁄, 𑀧𑀁𑀲𑀼𑀓𑀽𑀮𑀜𑁆𑀘 𑀘𑀻𑀯𑀭𑀁.

𑁧𑁨𑁮. ‘‘𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑀯𑀲𑁆𑀲𑀸𑀦𑀁, 𑀏𑀓𑀸 𑀯𑀸𑀘𑀸 𑀫𑁂 𑀪𑀸𑀲𑀺𑀢𑀸;

𑀢𑀢𑀺𑀬𑁂 𑀅𑀦𑁆𑀢𑀭𑀯𑀲𑁆𑀲𑀫𑁆𑀳𑀺, 𑀢𑀫𑁄𑀔𑀦𑁆𑀥𑁄 [𑀢𑀫𑁄𑀓𑁆𑀔𑀦𑁆𑀥𑁄 (𑀲𑀻. 𑀲𑁆𑀬𑀸.)] 𑀧𑀤𑀸𑀮𑀺𑀢𑁄’’𑀢𑀺.

… 𑀕𑀗𑁆𑀕𑀸𑀢𑀻𑀭𑀺𑀬𑁄 𑀣𑁂𑀭𑁄….

𑁫. 𑀅𑀚𑀺𑀦𑀢𑁆𑀣𑁂𑀭𑀕𑀸𑀣𑀸

𑁧𑁨𑁯. ‘‘𑀅𑀧𑀺 𑀘𑁂 𑀳𑁄𑀢𑀺 𑀢𑁂𑀯𑀺𑀚𑁆𑀚𑁄, 𑀫𑀘𑁆𑀘𑀼𑀳𑀸𑀬𑀻 𑀅𑀦𑀸𑀲𑀯𑁄;

𑀅𑀧𑁆𑀧𑀜𑁆𑀜𑀸𑀢𑁄𑀢𑀺 𑀦𑀁 𑀩𑀸𑀮𑀸, 𑀅𑀯𑀚𑀸𑀦𑀦𑁆𑀢𑀺 𑀅𑀚𑀸𑀦𑀢𑀸.

𑁧𑁩𑁦. ‘‘𑀬𑁄 𑀘 𑀔𑁄 𑀅𑀦𑁆𑀦𑀧𑀸𑀦𑀲𑁆𑀲, 𑀮𑀸𑀪𑀻 𑀳𑁄𑀢𑀻𑀥 𑀧𑀼𑀕𑁆𑀕𑀮𑁄;

𑀧𑀸𑀧𑀥𑀫𑁆𑀫𑁄𑀧𑀺 𑀘𑁂 𑀳𑁄𑀢𑀺, 𑀲𑁄 𑀦𑁂𑀲𑀁 𑀳𑁄𑀢𑀺 𑀲𑀓𑁆𑀓𑀢𑁄’’𑀢𑀺.

… 𑀅𑀚𑀺𑀦𑁄 𑀣𑁂𑀭𑁄….

𑁬. 𑀫𑁂𑀴𑀚𑀺𑀦𑀢𑁆𑀣𑁂𑀭𑀕𑀸𑀣𑀸

𑁧𑁩𑁧. ‘‘𑀬𑀤𑀸𑀳𑀁 𑀥𑀫𑁆𑀫𑀫𑀲𑁆𑀲𑁄𑀲𑀺𑀁, 𑀪𑀸𑀲𑀫𑀸𑀦𑀲𑁆𑀲 𑀲𑀢𑁆𑀣𑀼𑀦𑁄;

𑀦 𑀓𑀗𑁆𑀔𑀫𑀪𑀺𑀚𑀸𑀦𑀸𑀫𑀺, 𑀲𑀩𑁆𑀩𑀜𑁆𑀜𑀽𑀅𑀧𑀭𑀸𑀚𑀺𑀢𑁂.

𑁧𑁩𑁨. ‘‘𑀲𑀢𑁆𑀣𑀯𑀸𑀳𑁂 𑀫𑀳𑀸𑀯𑀻𑀭𑁂, 𑀲𑀸𑀭𑀣𑀻𑀦𑀁 𑀯𑀭𑀼𑀢𑁆𑀢𑀫𑁂;

𑀫𑀕𑁆𑀕𑁂 𑀧𑀝𑀺𑀧𑀤𑀸𑀬𑀁 𑀯𑀸, 𑀓𑀗𑁆𑀔𑀸 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀻’’𑀢𑀺.

… 𑀫𑁂𑀴𑀚𑀺𑀦𑁄 𑀣𑁂𑀭𑁄….

𑁭. 𑀭𑀸𑀥𑀢𑁆𑀣𑁂𑀭𑀕𑀸𑀣𑀸

𑁧𑁩𑁩. [𑀥. 𑀧. 𑁧𑁩 𑀥𑀫𑁆𑀫𑀧𑀤𑁂] ‘‘𑀬𑀣𑀸 𑀅𑀕𑀸𑀭𑀁 𑀤𑀼𑀘𑁆𑀙𑀦𑁆𑀦𑀁, 𑀯𑀼𑀝𑁆𑀞𑀻 𑀲𑀫𑀢𑀺𑀯𑀺𑀚𑁆𑀛𑀢𑀺;

𑀏𑀯𑀁 𑀅𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀭𑀸𑀕𑁄 𑀲𑀫𑀢𑀺𑀯𑀺𑀚𑁆𑀛𑀢𑀺.

𑁧𑁩𑁪. [𑀥. 𑀧. 𑁧𑁪 𑀥𑀫𑁆𑀫𑀧𑀤𑁂] ‘‘𑀬𑀣𑀸 𑀅𑀕𑀸𑀭𑀁 𑀲𑀼𑀘𑁆𑀙𑀦𑁆𑀦𑀁, 𑀯𑀼𑀟𑁆𑀠𑀻 𑀦 𑀲𑀫𑀢𑀺𑀯𑀺𑀚𑁆𑀛𑀢𑀺;

𑀏𑀯𑀁 𑀲𑀼𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀭𑀸𑀕𑁄 𑀦 𑀲𑀫𑀢𑀺𑀯𑀺𑀚𑁆𑀛𑀢𑀻’’𑀢𑀺.

… 𑀭𑀸𑀥𑁄 𑀣𑁂𑀭𑁄….

𑁮. 𑀲𑀼𑀭𑀸𑀥𑀢𑁆𑀣𑁂𑀭𑀕𑀸𑀣𑀸

𑁧𑁩𑁫. ‘‘𑀔𑀻𑀡𑀸 𑀳𑀺 𑀫𑀬𑁆𑀳𑀁 𑀚𑀸𑀢𑀺, 𑀯𑀼𑀲𑀺𑀢𑀁 𑀚𑀺𑀦𑀲𑀸𑀲𑀦𑀁;

𑀧𑀳𑀻𑀦𑁄 𑀚𑀸𑀮𑀲𑀗𑁆𑀔𑀸𑀢𑁄, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

𑁧𑁩𑁬. ‘‘𑀬𑀲𑁆𑀲𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑁄 𑀫𑁂 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑁄’’𑀢𑀺.

… 𑀲𑀼𑀭𑀸𑀥𑁄 𑀣𑁂𑀭𑁄….

𑁯. 𑀕𑁄𑀢𑀫𑀢𑁆𑀣𑁂𑀭𑀕𑀸𑀣𑀸

𑁧𑁩𑁭. ‘‘𑀲𑀼𑀔𑀁 𑀲𑀼𑀧𑀦𑁆𑀢𑀺 𑀫𑀼𑀦𑀬𑁄, 𑀬𑁂 𑀇𑀢𑁆𑀣𑀻𑀲𑀼 𑀦 𑀩𑀚𑁆𑀛𑀭𑁂;

𑀲𑀤𑀸 𑀯𑁂 𑀭𑀓𑁆𑀔𑀺𑀢𑀩𑁆𑀩𑀸𑀲𑀼, 𑀬𑀸𑀲𑀼 𑀲𑀘𑁆𑀘𑀁 𑀲𑀼𑀤𑀼𑀮𑁆𑀮𑀪𑀁.

𑁧𑁩𑁮. ‘‘𑀯𑀥𑀁 𑀘𑀭𑀺𑀫𑁆𑀳 𑀢𑁂 𑀓𑀸𑀫, 𑀅𑀦𑀡𑀸 𑀤𑀸𑀦𑀺 𑀢𑁂 𑀫𑀬𑀁;

𑀕𑀘𑁆𑀙𑀸𑀫 𑀤𑀸𑀦𑀺 𑀦𑀺𑀩𑁆𑀩𑀸𑀦𑀁, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀢𑀻’’𑀢𑀺.

… 𑀕𑁄𑀢𑀫𑁄 𑀣𑁂𑀭𑁄….

𑁧𑁦. 𑀯𑀲𑀪𑀢𑁆𑀣𑁂𑀭𑀕𑀸𑀣𑀸

𑁧𑁩𑁯. ‘‘𑀧𑀼𑀩𑁆𑀩𑁂 𑀳𑀦𑀢𑀺 𑀅𑀢𑁆𑀢𑀸𑀦𑀁, 𑀧𑀘𑁆𑀙𑀸 𑀳𑀦𑀢𑀺 𑀲𑁄 𑀧𑀭𑁂;

𑀲𑀼𑀳𑀢𑀁 𑀳𑀦𑁆𑀢𑀺 𑀅𑀢𑁆𑀢𑀸𑀦𑀁, 𑀯𑀻𑀢𑀁𑀲𑁂𑀦𑁂𑀯 𑀧𑀓𑁆𑀔𑀺𑀫𑀸.

𑁧𑁪𑁦. ‘‘𑀦 𑀩𑁆𑀭𑀸𑀳𑁆𑀫𑀡𑁄 𑀩𑀳𑀺𑀯𑀡𑁆𑀡𑁄, 𑀅𑀦𑁆𑀢𑁄 𑀯𑀡𑁆𑀡𑁄 𑀳𑀺 𑀩𑁆𑀭𑀸𑀳𑁆𑀫𑀡𑁄;

𑀬𑀲𑁆𑀫𑀺𑀁 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺, 𑀲 𑀯𑁂 𑀓𑀡𑁆𑀳𑁄 𑀲𑀼𑀚𑀫𑁆𑀧𑀢𑀻’’𑀢𑀺.

… 𑀯𑀲𑀪𑁄 𑀣𑁂𑀭𑁄….

𑀯𑀕𑁆𑀕𑁄 𑀧𑀞𑀫𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀉𑀢𑁆𑀢𑀭𑁄 𑀘𑁂𑀯 𑀧𑀺𑀡𑁆𑀟𑁄𑀮𑁄, 𑀯𑀮𑁆𑀮𑀺𑀬𑁄 𑀢𑀻𑀭𑀺𑀬𑁄 𑀇𑀲𑀺;

𑀅𑀚𑀺𑀦𑁄 𑀘 𑀫𑁂𑀴𑀚𑀺𑀦𑁄, 𑀭𑀸𑀥𑁄 𑀲𑀼𑀭𑀸𑀥𑁄 𑀕𑁄𑀢𑀫𑁄;

𑀯𑀲𑀪𑁂𑀦 𑀇𑀫𑁂 𑀳𑁄𑀦𑁆𑀢𑀺, 𑀤𑀲 𑀣𑁂𑀭𑀸 𑀫𑀳𑀺𑀤𑁆𑀥𑀺𑀓𑀸𑀢𑀺.