𑁯. 𑀦𑀯𑀫𑀯𑀕𑁆𑀕𑁄

𑁮𑁧. ‘‘𑀬𑀁 𑀫𑀬𑀸 𑀧𑀓𑀢𑀁 𑀧𑀸𑀧𑀁, 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀺𑀲𑀼;

𑀇𑀥𑁂𑀯 𑀢𑀁 𑀯𑁂𑀤𑀦𑀻𑀬𑀁, 𑀯𑀢𑁆𑀣𑀼 𑀅𑀜𑁆𑀜𑀁 𑀦 𑀯𑀺𑀚𑁆𑀚𑀢𑀻’’𑀢𑀺.

… 𑀲𑀫𑀺𑀢𑀺𑀕𑀼𑀢𑁆𑀢𑁄 𑀣𑁂𑀭𑁄….

𑁮𑁨. ‘‘𑀬𑁂𑀦 𑀬𑁂𑀦 𑀲𑀼𑀪𑀺𑀓𑁆𑀔𑀸𑀦𑀺, 𑀲𑀺𑀯𑀸𑀦𑀺 𑀅𑀪𑀬𑀸𑀦𑀺 𑀘;

𑀢𑁂𑀦 𑀧𑀼𑀢𑁆𑀢𑀓 𑀕𑀘𑁆𑀙𑀲𑁆𑀲𑀼, 𑀫𑀸 𑀲𑁄𑀓𑀸𑀧𑀳𑀢𑁄 𑀪𑀯𑀸’’𑀢𑀺.

… 𑀓𑀲𑁆𑀲𑀧𑁄 𑀣𑁂𑀭𑁄….

𑁮𑁩. ‘‘𑀲𑀻𑀳𑀧𑁆𑀧𑀫𑀢𑁆𑀢𑁄 𑀯𑀺𑀳𑀭, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄;

𑀪𑀸𑀯𑁂𑀳𑀺 𑀓𑀼𑀲𑀮𑀁 𑀥𑀫𑁆𑀫𑀁, 𑀚𑀳 𑀲𑀻𑀖𑀁 𑀲𑀫𑀼𑀲𑁆𑀲𑀬’’𑀦𑁆𑀢𑀺.

… 𑀲𑀻𑀳𑁄 𑀣𑁂𑀭𑁄….

𑁮𑁪. ‘‘𑀲𑀩𑁆𑀩𑀭𑀢𑁆𑀢𑀺𑀁 𑀲𑀼𑀧𑀺𑀢𑁆𑀯𑀸𑀦, 𑀤𑀺𑀯𑀸 𑀲𑀗𑁆𑀕𑀡𑀺𑀓𑁂 𑀭𑀢𑁄;

𑀓𑀼𑀤𑀸𑀲𑁆𑀲𑀼 𑀦𑀸𑀫 𑀤𑀼𑀫𑁆𑀫𑁂𑀥𑁄, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻’’𑀢𑀺.

… 𑀦𑀻𑀢𑁄 𑀣𑁂𑀭𑁄….

𑁮𑁫. ‘‘𑀘𑀺𑀢𑁆𑀢𑀦𑀺𑀫𑀺𑀢𑁆𑀢𑀲𑁆𑀲 𑀓𑁄𑀯𑀺𑀤𑁄, 𑀧𑀯𑀺𑀯𑁂𑀓𑀭𑀲𑀁 𑀯𑀺𑀚𑀸𑀦𑀺𑀬;

𑀛𑀸𑀬𑀁 𑀦𑀺𑀧𑀓𑁄 𑀧𑀢𑀺𑀲𑁆𑀲𑀢𑁄, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑀼𑀔𑀁 𑀦𑀺𑀭𑀸𑀫𑀺𑀲’’𑀦𑁆𑀢𑀺.

… 𑀲𑀼𑀦𑀸𑀕𑁄 𑀣𑁂𑀭𑁄….

𑁮𑁬. ‘‘𑀇𑀢𑁄 𑀩𑀳𑀺𑀤𑁆𑀥𑀸 𑀧𑀼𑀣𑀼 𑀅𑀜𑁆𑀜𑀯𑀸𑀤𑀺𑀦𑀁, 𑀫𑀕𑁆𑀕𑁄 𑀦 𑀦𑀺𑀩𑁆𑀩𑀸𑀦𑀕𑀫𑁄 𑀬𑀣𑀸 𑀅𑀬𑀁;

𑀇𑀢𑀺𑀲𑁆𑀲𑀼 𑀲𑀗𑁆𑀖𑀁 𑀪𑀕𑀯𑀸𑀦𑀼𑀲𑀸𑀲𑀢𑀺, 𑀲𑀢𑁆𑀣𑀸 𑀲𑀬𑀁 𑀧𑀸𑀡𑀺𑀢𑀮𑁂𑀯 𑀤𑀲𑁆𑀲𑀬’’𑀦𑁆𑀢𑀺.

… 𑀦𑀸𑀕𑀺𑀢𑁄 𑀣𑁂𑀭𑁄….

𑁮𑁭. ‘‘𑀔𑀦𑁆𑀥𑀸 𑀤𑀺𑀝𑁆𑀞𑀸 𑀬𑀣𑀸𑀪𑀽𑀢𑀁, 𑀪𑀯𑀸 𑀲𑀩𑁆𑀩𑁂 𑀧𑀤𑀸𑀮𑀺𑀢𑀸;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀧𑀯𑀺𑀝𑁆𑀞𑁄 𑀣𑁂𑀭𑁄….

𑁮𑁮. ‘‘𑀅𑀲𑀓𑁆𑀔𑀺𑀁 𑀯𑀢 𑀅𑀢𑁆𑀢𑀸𑀦𑀁, 𑀉𑀤𑁆𑀥𑀸𑀢𑀼𑀁 𑀉𑀤𑀓𑀸 𑀣𑀮𑀁;

𑀯𑀼𑀬𑁆𑀳𑀫𑀸𑀦𑁄 𑀫𑀳𑁄𑀖𑁂𑀯, 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀳’’𑀦𑁆𑀢𑀺.

… 𑀅𑀚𑁆𑀚𑀼𑀦𑁄 𑀣𑁂𑀭𑁄….

𑁮𑁯. ‘‘𑀉𑀢𑁆𑀢𑀺𑀡𑁆𑀡𑀸 𑀧𑀗𑁆𑀓𑀧𑀮𑀺𑀧𑀸, 𑀧𑀸𑀢𑀸𑀮𑀸 𑀧𑀭𑀺𑀯𑀚𑁆𑀚𑀺𑀢𑀸;

𑀫𑀼𑀢𑁆𑀢𑁄 𑀑𑀖𑀸 𑀘 𑀕𑀦𑁆𑀣𑀸 𑀘, 𑀲𑀩𑁆𑀩𑁂 𑀫𑀸𑀦𑀸 𑀯𑀺𑀲𑀁𑀳𑀢𑀸’’𑀢𑀺.

… 𑀤𑁂𑀯𑀲𑀪𑁄 𑀣𑁂𑀭𑁄….

𑁯𑁦. ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸, 𑀢𑀺𑀝𑁆𑀞𑀦𑁆𑀢𑀺 𑀙𑀺𑀦𑁆𑀦𑀫𑀽𑀮𑀓𑀸;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀲𑀸𑀫𑀺𑀤𑀢𑁆𑀢𑁄 𑀣𑁂𑀭𑁄….

𑀯𑀕𑁆𑀕𑁄 𑀦𑀯𑀫𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀣𑁂𑀭𑁄 𑀲𑀫𑀺𑀢𑀺𑀕𑀼𑀢𑁆𑀢𑁄 𑀘, 𑀓𑀲𑁆𑀲𑀧𑁄 𑀲𑀻𑀳𑀲𑀯𑁆𑀳𑀬𑁄;

𑀦𑀻𑀢𑁄 𑀲𑀼𑀦𑀸𑀕𑁄 𑀦𑀸𑀕𑀺𑀢𑁄, 𑀧𑀯𑀺𑀝𑁆𑀞𑁄 𑀅𑀚𑁆𑀚𑀼𑀦𑁄 𑀇𑀲𑀺;

𑀤𑁂𑀯𑀲𑀪𑁄 𑀘 𑀬𑁄 𑀣𑁂𑀭𑁄, 𑀲𑀸𑀫𑀺𑀤𑀢𑁆𑀢𑁄 𑀫𑀳𑀩𑁆𑀩𑀮𑁄𑀢𑀺.