𑁧𑁦. 𑀤𑀲𑀫𑀯𑀕𑁆𑀕𑁄

𑁧. 𑀧𑀭𑀺𑀧𑀼𑀡𑁆𑀡𑀓𑀢𑁆𑀣𑁂𑀭𑀕𑀸𑀣𑀸

𑁯𑁧. ‘‘𑀦 𑀢𑀣𑀸 𑀫𑀢𑀁 𑀲𑀢𑀭𑀲𑀁, 𑀲𑀼𑀥𑀦𑁆𑀦𑀁 𑀬𑀁 𑀫𑀬𑀚𑁆𑀚 𑀧𑀭𑀺𑀪𑀼𑀢𑁆𑀢𑀁;

𑀅𑀧𑀭𑀺𑀫𑀺𑀢𑀤𑀲𑁆𑀲𑀺𑀦𑀸 𑀕𑁄𑀢𑀫𑁂𑀦, 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑁄 𑀥𑀫𑁆𑀫𑁄’’𑀢𑀺.

… 𑀧𑀭𑀺𑀧𑀼𑀡𑁆𑀡𑀓𑁄 𑀣𑁂𑀭𑁄….

𑁨. 𑀯𑀺𑀚𑀬𑀢𑁆𑀣𑁂𑀭𑀕𑀸𑀣𑀸

𑁯𑁨. ‘‘𑀬𑀲𑁆𑀲𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀆𑀳𑀸𑀭𑁂 𑀘 𑀅𑀦𑀺𑀲𑁆𑀲𑀺𑀢𑁄;

𑀲𑀼𑀜𑁆𑀜𑀢𑀸 𑀅𑀦𑀺𑀫𑀺𑀢𑁆𑀢𑁄 𑀘, 𑀯𑀺𑀫𑁄𑀓𑁆𑀔𑁄 𑀬𑀲𑁆𑀲 𑀕𑁄𑀘𑀭𑁄;

𑀆𑀓𑀸𑀲𑁂𑀯 𑀲𑀓𑀼𑀦𑁆𑀢𑀸𑀦𑀁, 𑀧𑀤𑀁 𑀢𑀲𑁆𑀲 𑀤𑀼𑀭𑀦𑁆𑀦𑀬’’𑀦𑁆𑀢𑀺.

… 𑀯𑀺𑀚𑀬𑁄 𑀣𑁂𑀭𑁄….

𑁩. 𑀏𑀭𑀓𑀢𑁆𑀣𑁂𑀭𑀕𑀸𑀣𑀸

𑁯𑁩. ‘‘𑀤𑀼𑀓𑁆𑀔𑀸 𑀓𑀸𑀫𑀸 𑀏𑀭𑀓, 𑀦 𑀲𑀼𑀔𑀸 𑀓𑀸𑀫𑀸 𑀏𑀭𑀓;

𑀬𑁄 𑀓𑀸𑀫𑁂 𑀓𑀸𑀫𑀬𑀢𑀺, 𑀤𑀼𑀓𑁆𑀔𑀁 𑀲𑁄 𑀓𑀸𑀫𑀬𑀢𑀺 𑀏𑀭𑀓;

𑀬𑁄 𑀓𑀸𑀫𑁂 𑀦 𑀓𑀸𑀫𑀬𑀢𑀺, 𑀤𑀼𑀓𑁆𑀔𑀁 𑀲𑁄 𑀦 𑀓𑀸𑀫𑀬𑀢𑀺 𑀏𑀭𑀓𑀸’’𑀢𑀺.

… 𑀏𑀭𑀓𑁄 𑀣𑁂𑀭𑁄….

𑁪. 𑀫𑁂𑀢𑁆𑀢𑀚𑀺𑀢𑁆𑀣𑁂𑀭𑀕𑀸𑀣𑀸

𑁯𑁪. ‘‘𑀦𑀫𑁄 𑀳𑀺 𑀢𑀲𑁆𑀲 𑀪𑀕𑀯𑀢𑁄, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀺𑀭𑀻𑀫𑀢𑁄;

𑀢𑁂𑀦𑀸𑀬𑀁 𑀅𑀕𑁆𑀕𑀧𑁆𑀧𑀢𑁆𑀢𑁂𑀦, 𑀅𑀕𑁆𑀕𑀥𑀫𑁆𑀫𑁄 [𑀅𑀕𑁆𑀕𑁄 𑀥𑀫𑁆𑀫𑁄 (𑀲𑀻.)] 𑀲𑀼𑀤𑁂𑀲𑀺𑀢𑁄’’𑀢𑀺.

… 𑀫𑁂𑀢𑁆𑀢𑀚𑀺 𑀣𑁂𑀭𑁄….

𑁫. 𑀘𑀓𑁆𑀔𑀼𑀧𑀸𑀮𑀢𑁆𑀣𑁂𑀭𑀕𑀸𑀣𑀸

𑁯𑁫. ‘‘𑀅𑀦𑁆𑀥𑁄𑀳𑀁 𑀳𑀢𑀦𑁂𑀢𑁆𑀢𑁄𑀲𑁆𑀫𑀺, 𑀓𑀦𑁆𑀢𑀸𑀭𑀤𑁆𑀥𑀸𑀦𑀧𑀓𑁆𑀔𑀦𑁆𑀤𑁄 [𑀧𑀓𑁆𑀔𑀦𑁆𑀦𑁄 (𑀲𑀻.), 𑀧𑀓𑁆𑀓𑀦𑁆𑀢𑁄 (𑀲𑁆𑀬𑀸. 𑀲𑀻. 𑀅𑀝𑁆𑀞.)];

𑀲𑀬𑀫𑀸𑀦𑁄𑀧𑀺 𑀕𑀘𑁆𑀙𑀺𑀲𑁆𑀲𑀁, 𑀦 𑀲𑀳𑀸𑀬𑁂𑀦 𑀧𑀸𑀧𑁂𑀦𑀸’’𑀢𑀺.

… 𑀘𑀓𑁆𑀔𑀼𑀧𑀸𑀮𑁄 𑀣𑁂𑀭𑁄….

𑁬. 𑀔𑀡𑁆𑀟𑀲𑀼𑀫𑀦𑀢𑁆𑀣𑁂𑀭𑀕𑀸𑀣𑀸

𑁯𑁬. ‘‘𑀏𑀓𑀧𑀼𑀧𑁆𑀨𑀁 𑀘𑀚𑀺𑀢𑁆𑀯𑀸𑀦, 𑀅𑀲𑀻𑀢𑀺 [𑀅𑀲𑀻𑀢𑀺𑀁 (𑀲𑀻.)] 𑀯𑀲𑁆𑀲𑀓𑁄𑀝𑀺𑀬𑁄;

𑀲𑀕𑁆𑀕𑁂𑀲𑀼 𑀧𑀭𑀺𑀘𑀸𑀭𑁂𑀢𑁆𑀯𑀸, 𑀲𑁂𑀲𑀓𑁂𑀦𑀫𑁆𑀳𑀺 𑀦𑀺𑀩𑁆𑀩𑀼𑀢𑁄’’𑀢𑀺.

… 𑀔𑀡𑁆𑀟𑀲𑀼𑀫𑀦𑁄 𑀣𑁂𑀭𑁄….

𑁭. 𑀢𑀺𑀲𑁆𑀲𑀢𑁆𑀣𑁂𑀭𑀕𑀸𑀣𑀸

𑁯𑁭. ‘‘𑀳𑀺𑀢𑁆𑀯𑀸 𑀲𑀢𑀧𑀮𑀁 𑀓𑀁𑀲𑀁, 𑀲𑁄𑀯𑀡𑁆𑀡𑀁 𑀲𑀢𑀭𑀸𑀚𑀺𑀓𑀁;

𑀅𑀕𑁆𑀕𑀳𑀺𑀁 𑀫𑀢𑁆𑀢𑀺𑀓𑀸𑀧𑀢𑁆𑀢𑀁, 𑀇𑀤𑀁 𑀤𑀼𑀢𑀺𑀬𑀸𑀪𑀺𑀲𑁂𑀘𑀦’’𑀦𑁆𑀢𑀺.

… 𑀢𑀺𑀲𑁆𑀲𑁄 𑀣𑁂𑀭𑁄….

𑁮. 𑀅𑀪𑀬𑀢𑁆𑀣𑁂𑀭𑀕𑀸𑀣𑀸

𑁯𑁮. ‘‘𑀭𑀽𑀧𑀁 𑀤𑀺𑀲𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺;

𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀆𑀲𑀯𑀸, 𑀪𑀯𑀫𑀽𑀮𑁄𑀧𑀕𑀸𑀫𑀺𑀦𑁄’’𑀢𑀺 [𑀪𑀯𑀫𑀽𑀮𑀸 𑀪𑀯𑀕𑀸𑀫𑀺𑀦𑁄𑀢𑀺 (𑀲𑀻. 𑀓.)].

… 𑀅𑀪𑀬𑁄 𑀣𑁂𑀭𑁄….

𑁯. 𑀉𑀢𑁆𑀢𑀺𑀬𑀢𑁆𑀣𑁂𑀭𑀕𑀸𑀣𑀸

𑁯𑁯. ‘‘𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺;

𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀆𑀲𑀯𑀸, 𑀲𑀁𑀲𑀸𑀭𑀁 𑀉𑀧𑀕𑀸𑀫𑀺𑀦𑁄’’𑀢𑀺.

… 𑀉𑀢𑁆𑀢𑀺𑀬𑁄 𑀣𑁂𑀭𑁄….

𑁧𑁦. (𑀤𑀼𑀢𑀺𑀬)-𑀤𑁂𑀯𑀲𑀪𑀢𑁆𑀣𑁂𑀭𑀕𑀸𑀣𑀸

𑁧𑁦𑁦. ‘‘𑀲𑀫𑁆𑀫𑀧𑁆𑀧𑀥𑀸𑀦𑀲𑀫𑁆𑀧𑀦𑁆𑀦𑁄, 𑀲𑀢𑀺𑀧𑀝𑁆𑀞𑀸𑀦𑀕𑁄𑀘𑀭𑁄;

𑀯𑀺𑀫𑀼𑀢𑁆𑀢𑀺𑀓𑀼𑀲𑀼𑀫𑀲𑀜𑁆𑀙𑀦𑁆𑀦𑁄, 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀢𑁆𑀬𑀦𑀸𑀲𑀯𑁄’’𑀢𑀺.

… 𑀤𑁂𑀯𑀲𑀪𑁄 𑀣𑁂𑀭𑁄….

𑀯𑀕𑁆𑀕𑁄 𑀤𑀲𑀫𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀭𑀺𑀧𑀼𑀡𑁆𑀡𑀓𑁄 𑀘 𑀯𑀺𑀚𑀬𑁄, 𑀏𑀭𑀓𑁄 𑀫𑁂𑀢𑁆𑀢𑀚𑀻 𑀫𑀼𑀦𑀺;

𑀘𑀓𑁆𑀔𑀼𑀧𑀸𑀮𑁄 𑀔𑀡𑁆𑀟𑀲𑀼𑀫𑀦𑁄, 𑀢𑀺𑀲𑁆𑀲𑁄 𑀘 𑀅𑀪𑀬𑁄 𑀢𑀣𑀸;

𑀉𑀢𑁆𑀢𑀺𑀬𑁄 𑀘 𑀫𑀳𑀸𑀧𑀜𑁆𑀜𑁄, 𑀣𑁂𑀭𑁄 𑀤𑁂𑀯𑀲𑀪𑁄𑀧𑀺 𑀘𑀸𑀢𑀺.