𑁪. 𑀘𑀢𑀼𑀢𑁆𑀣𑀯𑀕𑁆𑀕𑁄

𑁩𑁧. ‘‘𑀨𑀼𑀝𑁆𑀞𑁄 𑀟𑀁𑀲𑁂𑀳𑀺 𑀫𑀓𑀲𑁂𑀳𑀺, 𑀅𑀭𑀜𑁆𑀜𑀲𑁆𑀫𑀺𑀁 𑀩𑁆𑀭𑀳𑀸𑀯𑀦𑁂;

𑀦𑀸𑀕𑁄 𑀲𑀁𑀕𑀸𑀫𑀲𑀻𑀲𑁂𑀯, 𑀲𑀢𑁄 𑀢𑀢𑁆𑀭𑀸𑀥𑀺𑀯𑀸𑀲𑀬𑁂’’𑀢𑀺.

… 𑀕𑀳𑁆𑀯𑀭𑀢𑀻𑀭𑀺𑀬𑁄 𑀣𑁂𑀭𑁄….

𑁩𑁨. ‘‘𑀅𑀚𑀭𑀁 𑀚𑀻𑀭𑀫𑀸𑀦𑁂𑀦, 𑀢𑀧𑁆𑀧𑀫𑀸𑀦𑁂𑀦 𑀦𑀺𑀩𑁆𑀩𑀼𑀢𑀺𑀁;

𑀦𑀺𑀫𑀺𑀬𑀁 [𑀦𑀺𑀫𑁆𑀫𑀺𑀲𑁆𑀲𑀁 (𑀲𑀻.), 𑀦𑀺𑀭𑀸𑀫𑀺𑀲𑀁 (𑀲𑁆𑀬𑀸.), 𑀦𑀺𑀫𑀺𑀦𑁂𑀬𑁆𑀬𑀁 (?)] 𑀧𑀭𑀫𑀁 𑀲𑀦𑁆𑀢𑀺𑀁, 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭’’𑀦𑁆𑀢𑀺.

… 𑀲𑀼𑀧𑁆𑀧𑀺𑀬𑁄 𑀣𑁂𑀭𑁄….

𑁩𑁩. ‘‘𑀬𑀣𑀸𑀧𑀺 𑀏𑀓𑀧𑀼𑀢𑁆𑀢𑀲𑁆𑀫𑀺𑀁, 𑀧𑀺𑀬𑀲𑁆𑀫𑀺𑀁 𑀓𑀼𑀲𑀮𑀻 𑀲𑀺𑀬𑀸;

𑀏𑀯𑀁 𑀲𑀩𑁆𑀩𑁂𑀲𑀼 𑀧𑀸𑀡𑁂𑀲𑀼, 𑀲𑀩𑁆𑀩𑀢𑁆𑀣 𑀓𑀼𑀲𑀮𑁄 𑀲𑀺𑀬𑀸’’𑀢𑀺.

… 𑀲𑁄𑀧𑀸𑀓𑁄 𑀣𑁂𑀭𑁄….

𑁩𑁪. ‘‘𑀅𑀦𑀸𑀲𑀦𑁆𑀦𑀯𑀭𑀸 𑀏𑀢𑀸, 𑀦𑀺𑀘𑁆𑀘𑀫𑁂𑀯 𑀯𑀺𑀚𑀸𑀦𑀢𑀸;

𑀕𑀸𑀫𑀸 𑀅𑀭𑀜𑁆𑀜𑀫𑀸𑀕𑀫𑁆𑀫, 𑀢𑀢𑁄 𑀕𑁂𑀳𑀁 𑀉𑀧𑀸𑀯𑀺𑀲𑀺 [𑀉𑀧𑀸𑀯𑀺𑀲𑀺𑀁 (𑀲𑀻.)];

𑀢𑀢𑁄 𑀉𑀝𑁆𑀞𑀸𑀬 𑀧𑀓𑁆𑀓𑀸𑀫𑀺, 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 [𑀅𑀦𑀸𑀫𑀦𑁆𑀢𑀺𑀬 (𑀲𑀻.)] 𑀧𑁄𑀲𑀺𑀬𑁄’’𑀢𑀺.

… 𑀧𑁄𑀲𑀺𑀬𑁄 𑀣𑁂𑀭𑁄….

𑁩𑁫. ‘‘𑀲𑀼𑀔𑀁 𑀲𑀼𑀔𑀢𑁆𑀣𑁄 𑀮𑀪𑀢𑁂 𑀢𑀤𑀸𑀘𑀭𑀁, 𑀓𑀺𑀢𑁆𑀢𑀺𑀜𑁆𑀘 𑀧𑀧𑁆𑀧𑁄𑀢𑀺 𑀬𑀲𑀲𑁆𑀲 𑀯𑀟𑁆𑀠𑀢𑀺;

𑀬𑁄 𑀅𑀭𑀺𑀬𑀫𑀝𑁆𑀞𑀗𑁆𑀕𑀺𑀓𑀫𑀜𑁆𑀚𑀲𑀁 𑀉𑀚𑀼𑀁, 𑀪𑀸𑀯𑁂𑀢𑀺 𑀫𑀕𑁆𑀕𑀁 𑀅𑀫𑀢𑀲𑁆𑀲 𑀧𑀢𑁆𑀢𑀺𑀬𑀸’’𑀢𑀺.

… 𑀲𑀸𑀫𑀜𑁆𑀜𑀓𑀸𑀦𑀺𑀢𑁆𑀣𑁂𑀭𑁄….

𑁩𑁬. ‘‘𑀲𑀸𑀥𑀼 𑀲𑀼𑀢𑀁 𑀲𑀸𑀥𑀼 𑀘𑀭𑀺𑀢𑀓𑀁, 𑀲𑀸𑀥𑀼 𑀲𑀤𑀸 𑀅𑀦𑀺𑀓𑁂𑀢𑀯𑀺𑀳𑀸𑀭𑁄;

𑀅𑀢𑁆𑀣𑀧𑀼𑀘𑁆𑀙𑀦𑀁 𑀧𑀤𑀓𑁆𑀔𑀺𑀡𑀓𑀫𑁆𑀫𑀁, 𑀏𑀢𑀁 𑀲𑀸𑀫𑀜𑁆𑀜𑀫𑀓𑀺𑀜𑁆𑀘𑀦𑀲𑁆𑀲𑀸’’𑀢𑀺.

… 𑀓𑀼𑀫𑀸𑀧𑀼𑀢𑁆𑀢𑁄 𑀣𑁂𑀭𑁄….

𑁩𑁭. ‘‘𑀦𑀸𑀦𑀸𑀚𑀦𑀧𑀤𑀁 𑀬𑀦𑁆𑀢𑀺, 𑀯𑀺𑀘𑀭𑀦𑁆𑀢𑀸 𑀅𑀲𑀜𑁆𑀜𑀢𑀸;

𑀲𑀫𑀸𑀥𑀺𑀜𑁆𑀘 𑀯𑀺𑀭𑀸𑀥𑁂𑀦𑁆𑀢𑀺, 𑀓𑀺𑀁𑀲𑀼 𑀭𑀝𑁆𑀞𑀘𑀭𑀺𑀬𑀸 𑀓𑀭𑀺𑀲𑁆𑀲𑀢𑀺;

𑀢𑀲𑁆𑀫𑀸 𑀯𑀺𑀦𑁂𑀬𑁆𑀬 𑀲𑀸𑀭𑀫𑁆𑀪𑀁, 𑀛𑀸𑀬𑁂𑀬𑁆𑀬 𑀅𑀧𑀼𑀭𑀓𑁆𑀔𑀢𑁄’’𑀢𑀺.

… 𑀓𑀼𑀫𑀸𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀳𑀸𑀬𑀓𑁄 𑀣𑁂𑀭𑁄….

𑁩𑁮. ‘‘𑀬𑁄 𑀇𑀤𑁆𑀥𑀺𑀬𑀸 𑀲𑀭𑀪𑀼𑀁 𑀅𑀝𑁆𑀞𑀧𑁂𑀲𑀺, 𑀲𑁄 𑀕𑀯𑀫𑁆𑀧𑀢𑀺 𑀅𑀲𑀺𑀢𑁄 𑀅𑀦𑁂𑀚𑁄;

𑀢𑀁 𑀲𑀩𑁆𑀩𑀲𑀗𑁆𑀕𑀸𑀢𑀺𑀕𑀢𑀁 𑀫𑀳𑀸𑀫𑀼𑀦𑀺𑀁, 𑀤𑁂𑀯𑀸 𑀦𑀫𑀲𑁆𑀲𑀦𑁆𑀢𑀺 𑀪𑀯𑀲𑁆𑀲 𑀧𑀸𑀭𑀕𑀼’’𑀦𑁆𑀢𑀺.

… 𑀕𑀯𑀫𑁆𑀧𑀢𑀺𑀢𑁆𑀣𑁂𑀭𑁄….

𑁩𑁯. [𑀲𑀁. 𑀦𑀺. 𑁧.𑁨𑁧, 𑁯𑁭]‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀟𑀬𑁆𑀳𑀫𑀸𑀦𑁄𑀯 [𑀟𑀬𑁆𑀳𑀫𑀸𑀦𑁂𑀯 (𑀲𑀩𑁆𑀩𑀢𑁆𑀣)] 𑀫𑀢𑁆𑀣𑀓𑁂;

𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

… 𑀢𑀺𑀲𑁆𑀲𑁄 𑀣𑁂𑀭𑁄….

𑁪𑁦. ‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀟𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂;

𑀪𑀯𑀭𑀸𑀕𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

… 𑀯𑀟𑁆𑀠𑀫𑀸𑀦𑁄 𑀣𑁂𑀭𑁄….

𑀯𑀕𑁆𑀕𑁄 𑀘𑀢𑀼𑀢𑁆𑀣𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀕𑀳𑁆𑀯𑀭𑀢𑀻𑀭𑀺𑀬𑁄 𑀲𑀼𑀧𑁆𑀧𑀺𑀬𑁄, 𑀲𑁄𑀧𑀸𑀓𑁄 𑀘𑁂𑀯 𑀧𑁄𑀲𑀺𑀬𑁄;

𑀲𑀸𑀫𑀜𑁆𑀜𑀓𑀸𑀦𑀺 𑀓𑀼𑀫𑀸𑀧𑀼𑀢𑁆𑀢𑁄, 𑀓𑀼𑀫𑀸𑀧𑀼𑀢𑁆𑀢𑀲𑀳𑀸𑀬𑀓𑁄;

𑀕𑀯𑀫𑁆𑀧𑀢𑀺 𑀢𑀺𑀲𑁆𑀲𑀢𑁆𑀣𑁂𑀭𑁄, 𑀯𑀟𑁆𑀠𑀫𑀸𑀦𑁄 𑀫𑀳𑀸𑀬𑀲𑁄𑀢𑀺.