𑁫. 𑀧𑀜𑁆𑀘𑀫𑀯𑀕𑁆𑀕𑁄

𑁪𑁧. ‘‘𑀯𑀺𑀯𑀭𑀫𑀦𑀼𑀧𑀢𑀦𑁆𑀢𑀺 𑀯𑀺𑀚𑁆𑀚𑀼𑀢𑀸, 𑀯𑁂𑀪𑀸𑀭𑀲𑁆𑀲 𑀘 𑀧𑀡𑁆𑀟𑀯𑀲𑁆𑀲 𑀘;

𑀦𑀕𑀯𑀺𑀯𑀭𑀕𑀢𑁄 𑀘 𑀛𑀸𑀬𑀢𑀺, 𑀧𑀼𑀢𑁆𑀢𑁄 𑀅𑀧𑁆𑀧𑀝𑀺𑀫𑀲𑁆𑀲 𑀢𑀸𑀤𑀺𑀦𑁄’’𑀢𑀺.

… 𑀲𑀺𑀭𑀺𑀯𑀟𑁆𑀠𑁄 𑀣𑁂𑀭𑁄….

𑁪𑁨. ‘‘𑀘𑀸𑀮𑁂 𑀉𑀧𑀘𑀸𑀮𑁂 𑀲𑀻𑀲𑀽𑀧𑀘𑀸𑀮𑁂 ( ) [(𑀘𑀸𑀮𑀸 𑀉𑀧𑀘𑀸𑀮𑀸, 𑀲𑀻𑀲𑀽𑀧𑀘𑀸𑀮𑀸) (𑀓.)] 𑀧𑀢𑀺𑀲𑁆𑀲𑀢𑀸 [𑀧𑀝𑀺𑀲𑁆𑀲𑀢𑀺𑀓𑀸 (𑀲𑁆𑀬𑀸. 𑀓.)] 𑀦𑀼 𑀔𑁄 𑀯𑀺𑀳𑀭𑀣;

𑀆𑀕𑀢𑁄 𑀯𑁄 𑀯𑀸𑀮𑀁 𑀯𑀺𑀬 𑀯𑁂𑀥𑀻’’𑀢𑀺.

… 𑀔𑀤𑀺𑀭𑀯𑀦𑀺𑀬𑁄 𑀣𑁂𑀭𑁄….

𑁪𑁩. ‘‘𑀲𑀼𑀫𑀼𑀢𑁆𑀢𑀺𑀓𑁄 𑀲𑀼𑀫𑀼𑀢𑁆𑀢𑀺𑀓𑁄 𑀲𑀸𑀳𑀼, 𑀲𑀼𑀫𑀼𑀢𑁆𑀢𑀺𑀓𑁄𑀫𑁆𑀳𑀺 𑀢𑀻𑀳𑀺 𑀔𑀼𑀚𑁆𑀚𑀓𑁂𑀳𑀺;

𑀅𑀲𑀺𑀢𑀸𑀲𑀼 𑀫𑀬𑀸 𑀦𑀗𑁆𑀕𑀮𑀸𑀲𑀼, 𑀫𑀬𑀸 𑀔𑀼𑀤𑁆𑀤𑀓𑀼𑀤𑁆𑀤𑀸𑀮𑀸𑀲𑀼 𑀫𑀬𑀸.

𑀬𑀤𑀺𑀧𑀺 𑀇𑀥𑀫𑁂𑀯 𑀇𑀥𑀫𑁂𑀯, 𑀅𑀣 𑀯𑀸𑀧𑀺 𑀅𑀮𑀫𑁂𑀯 𑀅𑀮𑀫𑁂𑀯;

𑀛𑀸𑀬 𑀲𑀼𑀫𑀗𑁆𑀕𑀮 𑀛𑀸𑀬 𑀲𑀼𑀫𑀗𑁆𑀕𑀮, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀭 𑀲𑀼𑀫𑀗𑁆𑀕𑀮𑀸’’𑀢𑀺.

… 𑀲𑀼𑀫𑀗𑁆𑀕𑀮𑁄 𑀣𑁂𑀭𑁄….

𑁪𑁪. [𑀲𑀁. 𑀦𑀺. 𑁧.𑁨𑁩𑁯] ‘‘𑀫𑀢𑀁 𑀯𑀸 𑀅𑀫𑁆𑀫 𑀭𑁄𑀤𑀦𑁆𑀢𑀺, 𑀬𑁄 𑀯𑀸 𑀚𑀻𑀯𑀁 𑀦 𑀤𑀺𑀲𑁆𑀲𑀢𑀺;

𑀚𑀻𑀯𑀦𑁆𑀢𑀁 𑀫𑀁 𑀅𑀫𑁆𑀫 𑀧𑀲𑁆𑀲𑀦𑁆𑀢𑀻, 𑀓𑀲𑁆𑀫𑀸 𑀫𑀁 𑀅𑀫𑁆𑀫 𑀭𑁄𑀤𑀲𑀻’’𑀢𑀺.

… 𑀲𑀸𑀦𑀼𑀢𑁆𑀣𑁂𑀭𑁄….

𑁪𑁫. ‘‘𑀬𑀣𑀸𑀧𑀺 𑀪𑀤𑁆𑀤𑁄 𑀆𑀚𑀜𑁆𑀜𑁄, 𑀔𑀮𑀺𑀢𑁆𑀯𑀸 𑀧𑀢𑀺𑀢𑀺𑀝𑁆𑀞𑀢𑀺;

𑀏𑀯𑀁 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓’’𑀦𑁆𑀢𑀺.

… 𑀭𑀫𑀡𑀻𑀬𑀯𑀺𑀳𑀸𑀭𑀺𑀢𑁆𑀣𑁂𑀭𑁄….

𑁪𑁬. ‘‘𑀲𑀤𑁆𑀥𑀸𑀬𑀸𑀳𑀁 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀲𑀢𑀺 𑀧𑀜𑁆𑀜𑀸 𑀘 𑀫𑁂 𑀯𑀼𑀟𑁆𑀠𑀸, 𑀘𑀺𑀢𑁆𑀢𑀜𑁆𑀘 𑀲𑀼𑀲𑀫𑀸𑀳𑀺𑀢𑀁;

𑀓𑀸𑀫𑀁 𑀓𑀭𑀲𑁆𑀲𑀼 𑀭𑀽𑀧𑀸𑀦𑀺, 𑀦𑁂𑀯 𑀫𑀁 𑀩𑁆𑀬𑀸𑀥𑀬𑀺𑀲𑁆𑀲𑀲𑀻’’𑀢𑀺 [𑀩𑀸𑀥𑀬𑀺𑀲𑁆𑀲𑀲𑀻𑀢𑀺 (𑀲𑀻.), 𑀩𑁆𑀬𑀸𑀣𑀬𑀺𑀲𑁆𑀲𑀲𑀻𑀢𑀺 (?)].

… 𑀲𑀫𑀺𑀤𑁆𑀥𑀺𑀢𑁆𑀣𑁂𑀭𑁄….

𑁪𑁭. ‘‘𑀦𑀫𑁄 𑀢𑁂 𑀩𑀼𑀤𑁆𑀥 𑀯𑀻𑀭𑀢𑁆𑀣𑀼, 𑀯𑀺𑀧𑁆𑀧𑀫𑀼𑀢𑁆𑀢𑁄𑀲𑀺 𑀲𑀩𑁆𑀩𑀥𑀺;

𑀢𑀼𑀬𑁆𑀳𑀸𑀧𑀤𑀸𑀦𑁂 𑀯𑀺𑀳𑀭𑀁, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄’’𑀢𑀺.

… 𑀉𑀚𑁆𑀚𑀬𑁄 𑀣𑁂𑀭𑁄….

𑁪𑁮. ‘‘𑀬𑀢𑁄 𑀅𑀳𑀁 𑀧𑀩𑁆𑀩𑀚𑀺𑀢𑁄, 𑀅𑀕𑀸𑀭𑀲𑁆𑀫𑀸𑀦𑀕𑀸𑀭𑀺𑀬𑀁;

𑀦𑀸𑀪𑀺𑀚𑀸𑀦𑀸𑀫𑀺 𑀲𑀗𑁆𑀓𑀧𑁆𑀧𑀁, 𑀅𑀦𑀭𑀺𑀬𑀁 𑀤𑁄𑀲𑀲𑀁𑀳𑀺𑀢’’𑀦𑁆𑀢𑀺.

… 𑀲𑀜𑁆𑀚𑀬𑁄 𑀣𑁂𑀭𑁄….

𑁪𑁯. ‘‘𑀘𑀺𑀳𑀘𑀺𑀳𑀸𑀪𑀺𑀦𑀤𑀺𑀢𑁂 [𑀯𑀺𑀳𑀯𑀺𑀳𑀸𑀪𑀺𑀦𑀤𑀺𑀢𑁂 (𑀲𑀻. 𑀲𑁆𑀬𑀸.)], 𑀲𑀺𑀧𑁆𑀧𑀺𑀓𑀸𑀪𑀺𑀭𑀼𑀢𑁂𑀳𑀺 𑀘;

𑀦 𑀫𑁂 𑀢𑀁 𑀨𑀦𑁆𑀤𑀢𑀺 𑀘𑀺𑀢𑁆𑀢𑀁, 𑀏𑀓𑀢𑁆𑀢𑀦𑀺𑀭𑀢𑀁 𑀳𑀺 𑀫𑁂’’𑀢𑀺.

… 𑀭𑀸𑀫𑀡𑁂𑀬𑁆𑀬𑀓𑁄 𑀣𑁂𑀭𑁄….

𑁫𑁦. ‘‘𑀥𑀭𑀡𑀻 𑀘 𑀲𑀺𑀜𑁆𑀘𑀢𑀺 𑀯𑀸𑀢𑀺, 𑀫𑀸𑀮𑀼𑀢𑁄 𑀯𑀺𑀚𑁆𑀚𑀼𑀢𑀸 𑀘𑀭𑀢𑀺 𑀦𑀪𑁂;

𑀉𑀧𑀲𑀫𑀦𑁆𑀢𑀺 𑀯𑀺𑀢𑀓𑁆𑀓𑀸, 𑀘𑀺𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑀁 𑀫𑀫𑀸’’𑀢𑀺.

… 𑀯𑀺𑀫𑀮𑁄 𑀣𑁂𑀭𑁄….

𑀯𑀕𑁆𑀕𑁄 𑀧𑀜𑁆𑀘𑀫𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀺𑀭𑀻𑀯𑀟𑁆𑀠𑁄 𑀭𑁂𑀯𑀢𑁄 𑀣𑁂𑀭𑁄, 𑀲𑀼𑀫𑀗𑁆𑀕𑀮𑁄 𑀲𑀸𑀦𑀼𑀲𑀯𑁆𑀳𑀬𑁄;

𑀭𑀫𑀡𑀻𑀬𑀯𑀺𑀳𑀸𑀭𑀻 𑀘, 𑀲𑀫𑀺𑀤𑁆𑀥𑀺𑀉𑀚𑁆𑀚𑀬𑀲𑀜𑁆𑀚𑀬𑀸;

𑀭𑀸𑀫𑀡𑁂𑀬𑁆𑀬𑁄 𑀘 𑀲𑁄 𑀣𑁂𑀭𑁄, 𑀯𑀺𑀫𑀮𑁄 𑀘 𑀭𑀡𑀜𑁆𑀚𑀳𑁄𑀢𑀺.