𑁧. 𑀧𑀞𑀫𑀯𑀕𑁆𑀕𑁄

𑁧. ‘‘𑀙𑀦𑁆𑀦𑀸 𑀫𑁂 𑀓𑀼𑀝𑀺𑀓𑀸 𑀲𑀼𑀔𑀸 𑀦𑀺𑀯𑀸𑀢𑀸, 𑀯𑀲𑁆𑀲 𑀤𑁂𑀯 𑀬𑀣𑀸𑀲𑀼𑀔𑀁;

𑀘𑀺𑀢𑁆𑀢𑀁 𑀫𑁂 𑀲𑀼𑀲𑀫𑀸𑀳𑀺𑀢𑀁 𑀯𑀺𑀫𑀼𑀢𑁆𑀢𑀁, 𑀆𑀢𑀸𑀧𑀻 𑀯𑀺𑀳𑀭𑀸𑀫𑀺 𑀯𑀲𑁆𑀲 𑀤𑁂𑀯𑀸’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 [𑀇𑀢𑁆𑀣𑀁 𑀲𑀼𑀫𑀁 (𑀓. 𑀅𑀝𑁆𑀞.)] 𑀆𑀬𑀲𑁆𑀫𑀸 𑀲𑀼𑀪𑀽𑀢𑀺𑀢𑁆𑀣𑁂𑀭𑁄 𑀕𑀸𑀣𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁨. ‘‘𑀉𑀧𑀲𑀦𑁆𑀢𑁄 𑀉𑀧𑀭𑀢𑁄, 𑀫𑀦𑁆𑀢𑀪𑀸𑀡𑀻 𑀅𑀦𑀼𑀤𑁆𑀥𑀢𑁄;

𑀥𑀼𑀦𑀸𑀢𑀺 𑀧𑀸𑀧𑀓𑁂 𑀥𑀫𑁆𑀫𑁂, 𑀤𑀼𑀫𑀧𑀢𑁆𑀢𑀁𑀯 𑀫𑀸𑀮𑀼𑀢𑁄’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 [𑀫𑀳𑀸𑀓𑁄𑀝𑁆𑀞𑀺𑀢𑁄 (𑀲𑀻. 𑀲𑁆𑀬𑀸.)] 𑀣𑁂𑀭𑁄 𑀕𑀸𑀣𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁩. ‘‘𑀧𑀜𑁆𑀜𑀁 𑀇𑀫𑀁 𑀧𑀲𑁆𑀲 𑀢𑀣𑀸𑀕𑀢𑀸𑀦𑀁, 𑀅𑀕𑁆𑀕𑀺 𑀬𑀣𑀸 𑀧𑀚𑁆𑀚𑀮𑀺𑀢𑁄 𑀦𑀺𑀲𑀻𑀣𑁂;

𑀆𑀮𑁄𑀓𑀤𑀸 𑀘𑀓𑁆𑀔𑀼𑀤𑀤𑀸 𑀪𑀯𑀦𑁆𑀢𑀺, 𑀬𑁂 𑀆𑀕𑀢𑀸𑀦𑀁 𑀯𑀺𑀦𑀬𑀦𑁆𑀢𑀺 𑀓𑀗𑁆𑀔’’𑀦𑁆𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀗𑁆𑀔𑀸𑀭𑁂𑀯𑀢𑁄 𑀣𑁂𑀭𑁄 𑀕𑀸𑀣𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁪. ‘‘𑀲𑀫𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀧𑀡𑁆𑀟𑀺𑀢𑁂𑀳𑀢𑁆𑀣𑀤𑀲𑁆𑀲𑀺𑀪𑀺;

𑀅𑀢𑁆𑀣𑀁 𑀫𑀳𑀦𑁆𑀢𑀁 𑀕𑀫𑁆𑀪𑀻𑀭𑀁, 𑀤𑀼𑀤𑁆𑀤𑀲𑀁 𑀦𑀺𑀧𑀼𑀡𑀁 𑀅𑀡𑀼𑀁;

𑀥𑀻𑀭𑀸 𑀲𑀫𑀥𑀺𑀕𑀘𑁆𑀙𑀦𑁆𑀢𑀺, 𑀅𑀧𑁆𑀧𑀫𑀢𑁆𑀢𑀸 𑀯𑀺𑀘𑀓𑁆𑀔𑀡𑀸’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 [𑀫𑀦𑁆𑀢𑀸𑀦𑀺𑀧𑀼𑀢𑁆𑀢𑁄 (𑀲𑁆𑀬𑀸. 𑀓.)] 𑀣𑁂𑀭𑁄 𑀕𑀸𑀣𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁫. ‘‘𑀬𑁄 𑀤𑀼𑀤𑁆𑀤𑀫𑀺𑀬𑁄 𑀤𑀫𑁂𑀦 𑀤𑀦𑁆𑀢𑁄, 𑀤𑀩𑁆𑀩𑁄 𑀲𑀦𑁆𑀢𑀼𑀲𑀺𑀢𑁄 𑀯𑀺𑀢𑀺𑀡𑁆𑀡𑀓𑀗𑁆𑀔𑁄;

𑀯𑀺𑀚𑀺𑀢𑀸𑀯𑀻 𑀅𑀧𑁂𑀢𑀪𑁂𑀭𑀯𑁄 𑀳𑀺, 𑀤𑀩𑁆𑀩𑁄 𑀲𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀞𑀺𑀢𑀢𑁆𑀢𑁄’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀣𑁂𑀭𑁄 𑀕𑀸𑀣𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁬. ‘‘𑀬𑁄 𑀲𑀻𑀢𑀯𑀦𑀁 𑀉𑀧𑀕𑀸 𑀪𑀺𑀓𑁆𑀔𑀼, 𑀏𑀓𑁄 𑀲𑀦𑁆𑀢𑀼𑀲𑀺𑀢𑁄 𑀲𑀫𑀸𑀳𑀺𑀢𑀢𑁆𑀢𑁄;

𑀯𑀺𑀚𑀺𑀢𑀸𑀯𑀻 𑀅𑀧𑁂𑀢𑀮𑁄𑀫𑀳𑀁𑀲𑁄, 𑀭𑀓𑁆𑀔𑀁 𑀓𑀸𑀬𑀕𑀢𑀸𑀲𑀢𑀺𑀁 𑀥𑀺𑀢𑀺𑀫𑀸’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀻𑀢𑀯𑀦𑀺𑀬𑁄 𑀣𑁂𑀭𑁄 𑀕𑀸𑀣𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁭. ‘‘𑀬𑁄𑀧𑀸𑀦𑀼𑀤𑀻 𑀫𑀘𑁆𑀘𑀼𑀭𑀸𑀚𑀲𑁆𑀲 𑀲𑁂𑀦𑀁, 𑀦𑀴𑀲𑁂𑀢𑀼𑀁𑀯 𑀲𑀼𑀤𑀼𑀩𑁆𑀩𑀮𑀁 𑀫𑀳𑁄𑀖𑁄;

𑀯𑀺𑀚𑀺𑀢𑀸𑀯𑀻 𑀅𑀧𑁂𑀢𑀪𑁂𑀭𑀯𑁄 𑀳𑀺, 𑀤𑀦𑁆𑀢𑁄 𑀲𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀞𑀺𑀢𑀢𑁆𑀢𑁄’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀪𑀮𑁆𑀮𑀺𑀬𑁄 𑀣𑁂𑀭𑁄 𑀕𑀸𑀣𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁮. ‘‘𑀬𑁄 𑀤𑀼𑀤𑁆𑀤𑀫𑀺𑀬𑁄 𑀤𑀫𑁂𑀦 𑀤𑀦𑁆𑀢𑁄, 𑀯𑀻𑀭𑁄 𑀲𑀦𑁆𑀢𑀼𑀲𑀺𑀢𑁄 𑀯𑀺𑀢𑀺𑀡𑁆𑀡𑀓𑀗𑁆𑀔𑁄;

𑀯𑀺𑀚𑀺𑀢𑀸𑀯𑀻 𑀅𑀧𑁂𑀢𑀮𑁄𑀫𑀳𑀁𑀲𑁄, 𑀯𑀻𑀭𑁄 𑀲𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀞𑀺𑀢𑀢𑁆𑀢𑁄’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀻𑀭𑁄 𑀣𑁂𑀭𑁄 𑀕𑀸𑀣𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁯. ‘‘𑀲𑁆𑀯𑀸𑀕𑀢𑀁 𑀦 𑀤𑀼𑀭𑀸𑀕𑀢𑀁 [𑀦𑀸𑀧𑀕𑀢𑀁 (𑀲𑀻. 𑀲𑁆𑀬𑀸.)], 𑀦𑀬𑀺𑀤𑀁 𑀤𑀼𑀫𑀦𑁆𑀢𑀺𑀢𑀁 𑀫𑀫;

𑀲𑀁𑀯𑀺𑀪𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼, 𑀬𑀁 𑀲𑁂𑀝𑁆𑀞𑀁 𑀢𑀤𑀼𑀧𑀸𑀕𑀫𑀺’’𑀦𑁆𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 [𑀧𑀺𑀮𑀺𑀦𑁆𑀤𑀺𑀯𑀘𑁆𑀙𑁄 (𑀲𑀻.)] 𑀣𑁂𑀭𑁄 𑀕𑀸𑀣𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁧𑁦. ‘‘𑀯𑀺𑀳𑀭𑀺 𑀅𑀧𑁂𑀓𑁆𑀔𑀁 𑀇𑀥 𑀯𑀸 𑀳𑀼𑀭𑀁 𑀯𑀸, 𑀬𑁄 𑀯𑁂𑀤𑀕𑀽 𑀲𑀫𑀺𑀢𑁄 𑀬𑀢𑀢𑁆𑀢𑁄;

𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀽𑀧𑀮𑀺𑀢𑁆𑀢𑁄, 𑀮𑁄𑀓𑀲𑁆𑀲 𑀚𑀜𑁆𑀜𑀸 𑀉𑀤𑀬𑀩𑁆𑀩𑀬𑀜𑁆𑀘𑀸’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀡𑁆𑀡𑀫𑀸𑀲𑁄 𑀣𑁂𑀭𑁄 𑀕𑀸𑀣𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑀕𑁆𑀕𑁄 𑀧𑀞𑀫𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀼𑀪𑀽𑀢𑀺 𑀓𑁄𑀝𑁆𑀞𑀺𑀓𑁄 𑀣𑁂𑀭𑁄, 𑀓𑀗𑁆𑀔𑀸𑀭𑁂𑀯𑀢𑀲𑀫𑁆𑀫𑀢𑁄;

𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀤𑀩𑁆𑀩𑁄 𑀘, 𑀲𑀻𑀢𑀯𑀦𑀺𑀬𑁄 𑀘 𑀪𑀮𑁆𑀮𑀺𑀬𑁄;

𑀯𑀻𑀭𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀘, 𑀧𑀼𑀡𑁆𑀡𑀫𑀸𑀲𑁄 𑀢𑀫𑁄𑀦𑀼𑀤𑁄𑀢𑀺.