𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧𑁧. ‘‘𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀪𑀺𑀓𑁆𑀔𑀼, 𑀥𑀫𑁆𑀫𑁂 𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁂;

𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀁, 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔’’𑀦𑁆𑀢𑀺.

… 𑀘𑀽𑀴𑀯𑀘𑁆𑀙𑁄 [𑀘𑀽𑀮𑀕𑀯𑀘𑁆𑀙𑁄 (𑀲𑀻.)] 𑀣𑁂𑀭𑁄….

𑁧𑁨. ‘‘𑀧𑀜𑁆𑀜𑀸𑀩𑀮𑀻 𑀲𑀻𑀮𑀯𑀢𑀽𑀧𑀧𑀦𑁆𑀦𑁄, 𑀲𑀫𑀸𑀳𑀺𑀢𑁄 𑀛𑀸𑀦𑀭𑀢𑁄 𑀲𑀢𑀻𑀫𑀸;

𑀬𑀤𑀢𑁆𑀣𑀺𑀬𑀁 𑀪𑁄𑀚𑀦𑀁 𑀪𑀼𑀜𑁆𑀚𑀫𑀸𑀦𑁄, 𑀓𑀗𑁆𑀔𑁂𑀣 𑀓𑀸𑀮𑀁 𑀇𑀥 𑀯𑀻𑀢𑀭𑀸𑀕𑁄’’𑀢𑀺.

… 𑀫𑀳𑀸𑀯𑀘𑁆𑀙𑁄 [𑀫𑀳𑀸𑀕𑀯𑀘𑁆𑀙𑁄 (𑀲𑀻.)] 𑀣𑁂𑀭𑁄….

𑁧𑁩. ‘‘𑀦𑀻𑀮𑀩𑁆𑀪𑀯𑀡𑁆𑀡𑀸 𑀭𑀼𑀘𑀺𑀭𑀸, 𑀲𑀻𑀢𑀯𑀸𑀭𑀻 𑀲𑀼𑀘𑀺𑀦𑁆𑀥𑀭𑀸;

𑀇𑀦𑁆𑀤𑀕𑁄𑀧𑀓𑀲𑀜𑁆𑀙𑀦𑁆𑀦𑀸, 𑀢𑁂 𑀲𑁂𑀮𑀸 𑀭𑀫𑀬𑀦𑁆𑀢𑀺 𑀫’’𑀦𑁆𑀢𑀺.

… 𑀯𑀦𑀯𑀘𑁆𑀙𑁄 𑀣𑁂𑀭𑁄….

𑁧𑁪. ‘‘𑀉𑀧𑀚𑁆𑀛𑀸𑀬𑁄 𑀫𑀁 𑀅𑀯𑀘, 𑀇𑀢𑁄 𑀕𑀘𑁆𑀙𑀸𑀫 𑀲𑀻𑀯𑀓;

𑀕𑀸𑀫𑁂 𑀫𑁂 𑀯𑀲𑀢𑀺 𑀓𑀸𑀬𑁄, 𑀅𑀭𑀜𑁆𑀜𑀁 𑀫𑁂 𑀕𑀢𑁄 𑀫𑀦𑁄;

𑀲𑁂𑀫𑀸𑀦𑀓𑁄𑀧𑀺 𑀕𑀘𑁆𑀙𑀸𑀫𑀺, 𑀦𑀢𑁆𑀣𑀺 𑀲𑀗𑁆𑀕𑁄 𑀯𑀺𑀚𑀸𑀦𑀢’’𑀦𑁆𑀢𑀺.

… 𑀲𑀺𑀯𑀓𑁄 𑀲𑀸𑀫𑀡𑁂𑀭𑁄….

𑁧𑁫. ‘‘𑀧𑀜𑁆𑀘 𑀙𑀺𑀦𑁆𑀤𑁂 𑀧𑀜𑁆𑀘 𑀚𑀳𑁂, 𑀧𑀜𑁆𑀘 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂;

𑀧𑀜𑁆𑀘𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼, 𑀑𑀖𑀢𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

… 𑀓𑀼𑀡𑁆𑀟𑀥𑀸𑀦𑁄 𑀣𑁂𑀭𑁄….

𑁧𑁬. ‘‘𑀬𑀣𑀸𑀧𑀺 𑀪𑀤𑁆𑀤𑁄 𑀆𑀚𑀜𑁆𑀜𑁄, 𑀦𑀗𑁆𑀕𑀮𑀸𑀯𑀢𑁆𑀢𑀦𑀻 𑀲𑀺𑀔𑀻;

𑀕𑀘𑁆𑀙𑀢𑀺 𑀅𑀧𑁆𑀧𑀓𑀲𑀺𑀭𑁂𑀦, 𑀏𑀯𑀁 𑀭𑀢𑁆𑀢𑀺𑀦𑁆𑀤𑀺𑀯𑀸 𑀫𑀫;

𑀕𑀘𑁆𑀙𑀦𑁆𑀢𑀺 𑀅𑀧𑁆𑀧𑀓𑀲𑀺𑀭𑁂𑀦, 𑀲𑀼𑀔𑁂 𑀮𑀤𑁆𑀥𑁂 𑀦𑀺𑀭𑀸𑀫𑀺𑀲𑁂’’𑀢𑀺.

… 𑀩𑁂𑀮𑀝𑁆𑀞𑀲𑀻𑀲𑁄 𑀣𑁂𑀭𑁄….

𑁧𑁭. ‘‘𑀫𑀺𑀤𑁆𑀥𑀻 𑀬𑀤𑀸 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘, 𑀦𑀺𑀤𑁆𑀤𑀸𑀬𑀺𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻;

𑀫𑀳𑀸𑀯𑀭𑀸𑀳𑁄𑀯 𑀦𑀺𑀯𑀸𑀧𑀧𑀼𑀝𑁆𑀞𑁄, 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄’’𑀢𑀺.

… 𑀤𑀸𑀲𑀓𑁄 𑀣𑁂𑀭𑁄….

𑁧𑁮. ‘‘𑀅𑀳𑀼 𑀩𑀼𑀤𑁆𑀥𑀲𑁆𑀲 𑀤𑀸𑀬𑀸𑀤𑁄, 𑀪𑀺𑀓𑁆𑀔𑀼 𑀪𑁂𑀲𑀓𑀴𑀸𑀯𑀦𑁂;

𑀓𑁂𑀯𑀮𑀁 𑀅𑀝𑁆𑀞𑀺𑀲𑀜𑁆𑀜𑀸𑀬, 𑀅𑀨𑀭𑀻 𑀧𑀣𑀯𑀺𑀁 [𑀧𑀞𑀯𑀺𑀁 (𑀲𑀻. 𑀲𑁆𑀬𑀸.)] 𑀇𑀫𑀁;

𑀫𑀜𑁆𑀜𑁂𑀳𑀁 𑀓𑀸𑀫𑀭𑀸𑀕𑀁 𑀲𑁄, 𑀔𑀺𑀧𑁆𑀧𑀫𑁂𑀯 𑀧𑀳𑀺𑀲𑁆𑀲𑀢𑀻’’𑀢𑀺 [𑀧𑀳𑀻𑀬𑀪𑀺 (𑀲𑀩𑁆𑀩𑀢𑁆𑀣 𑀧𑀸𑀴𑀺𑀬𑀁)].

… 𑀲𑀺𑀗𑁆𑀕𑀸𑀮𑀧𑀺𑀢𑀸 [𑀲𑀻𑀕𑀸𑀮𑀧𑀺𑀢𑀸 (𑀲𑀻.)] 𑀣𑁂𑀭𑁄….

𑁧𑁯. [𑀥. 𑀧. 𑁮𑁦, 𑁧𑁪𑁫 𑀥𑀫𑁆𑀫𑀧𑀤𑁂𑀧𑀺] ‘‘𑀉𑀤𑀓𑀁 𑀳𑀺 𑀦𑀬𑀦𑁆𑀢𑀺 𑀦𑁂𑀢𑁆𑀢𑀺𑀓𑀸, 𑀉𑀲𑀼𑀓𑀸𑀭𑀸 𑀦𑀫𑀬𑀦𑁆𑀢𑀺 [𑀤𑀫𑀬𑀦𑁆𑀢𑀺 (𑀓.)] 𑀢𑁂𑀚𑀦𑀁;

𑀤𑀸𑀭𑀼𑀁 𑀦𑀫𑀬𑀦𑁆𑀢𑀺 𑀢𑀘𑁆𑀙𑀓𑀸, 𑀅𑀢𑁆𑀢𑀸𑀦𑀁 𑀤𑀫𑀬𑀦𑁆𑀢𑀺 𑀲𑀼𑀩𑁆𑀩𑀢𑀸’’𑀢𑀺.

… 𑀓𑀼𑀮𑁄 [𑀓𑀼𑀡𑁆𑀟𑀮𑁄 (𑀲𑀻.), 𑀓𑀼𑀴𑁄 (𑀲𑁆𑀬𑀸. 𑀓.)] 𑀣𑁂𑀭𑁄….

𑁨𑁦. ‘‘𑀫𑀭𑀡𑁂 𑀫𑁂 𑀪𑀬𑀁 𑀦𑀢𑁆𑀣𑀺, 𑀦𑀺𑀓𑀦𑁆𑀢𑀺 𑀦𑀢𑁆𑀣𑀺 𑀚𑀻𑀯𑀺𑀢𑁂;

𑀲𑀦𑁆𑀤𑁂𑀳𑀁 𑀦𑀺𑀓𑁆𑀔𑀺𑀧𑀺𑀲𑁆𑀲𑀸𑀫𑀺, 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄’’𑀢𑀺 [𑀧𑀢𑀺𑀲𑁆𑀲𑀢𑁄𑀢𑀺 (𑀲𑀻. 𑀲𑁆𑀬𑀸.)].

… 𑀅𑀚𑀺𑀢𑁄 𑀣𑁂𑀭𑁄 ….

𑀯𑀕𑁆𑀕𑁄 𑀤𑀼𑀢𑀺𑀬𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀘𑀽𑀴𑀯𑀘𑁆𑀙𑁄 𑀫𑀳𑀸𑀯𑀘𑁆𑀙𑁄, 𑀯𑀦𑀯𑀘𑁆𑀙𑁄 𑀘 𑀲𑀻𑀯𑀓𑁄;

𑀓𑀼𑀡𑁆𑀟𑀥𑀸𑀦𑁄 𑀘 𑀩𑁂𑀮𑀝𑁆𑀞𑀺, 𑀤𑀸𑀲𑀓𑁄 𑀘 𑀢𑀢𑁄𑀧𑀭𑀺;

𑀲𑀺𑀗𑁆𑀕𑀸𑀮𑀧𑀺𑀢𑀺𑀓𑁄 𑀣𑁂𑀭𑁄, 𑀓𑀼𑀮𑁄 𑀘 𑀅𑀚𑀺𑀢𑁄 𑀤𑀲𑀸𑀢𑀺.