𑁯. 𑀢𑁄𑀤𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸

𑁧𑁦𑁯𑁪. ‘‘𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺, (𑀇𑀘𑁆𑀘𑀸𑀬𑀲𑁆𑀫𑀸 𑀢𑁄𑀤𑁂𑀬𑁆𑀬𑁄)

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄, 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀓𑀻𑀤𑀺𑀲𑁄’’.

𑁧𑁦𑁯𑁫. ‘‘𑀬𑀲𑁆𑀫𑀺𑀁 𑀓𑀸𑀫𑀸 𑀦 𑀯𑀲𑀦𑁆𑀢𑀺, (𑀢𑁄𑀤𑁂𑀬𑁆𑀬𑀸𑀢𑀺 𑀪𑀕𑀯𑀸)

𑀢𑀡𑁆𑀳𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀓𑀣𑀁𑀓𑀣𑀸 𑀘 𑀬𑁄 𑀢𑀺𑀡𑁆𑀡𑁄, 𑀯𑀺𑀫𑁄𑀓𑁆𑀔𑁄 𑀢𑀲𑁆𑀲 𑀦𑀸𑀧𑀭𑁄’’.

𑁧𑁦𑁯𑁬. ‘‘𑀦𑀺𑀭𑀸𑀲𑀲𑁄 𑀲𑁄 𑀉𑀤 𑀆𑀲𑀲𑀸𑀦𑁄, 𑀧𑀜𑁆𑀜𑀸𑀡𑀯𑀸 𑀲𑁄 𑀉𑀤 𑀧𑀜𑁆𑀜𑀓𑀧𑁆𑀧𑀻;

𑀫𑀼𑀦𑀺𑀁 𑀅𑀳𑀁 𑀲𑀓𑁆𑀓 𑀬𑀣𑀸 𑀯𑀺𑀚𑀜𑁆𑀜𑀁, 𑀢𑀁 𑀫𑁂 𑀯𑀺𑀬𑀸𑀘𑀺𑀓𑁆𑀔 𑀲𑀫𑀦𑁆𑀢𑀘𑀓𑁆𑀔𑀼’’.

𑁧𑁦𑁯𑁭. ‘‘𑀦𑀺𑀭𑀸𑀲𑀲𑁄 𑀲𑁄 𑀦 𑀘 𑀆𑀲𑀲𑀸𑀦𑁄, 𑀧𑀜𑁆𑀜𑀸𑀡𑀯𑀸 𑀲𑁄 𑀦 𑀘 𑀧𑀜𑁆𑀜𑀓𑀧𑁆𑀧𑀻;

𑀏𑀯𑀫𑁆𑀧𑀺 𑀢𑁄𑀤𑁂𑀬𑁆𑀬 𑀫𑀼𑀦𑀺𑀁 𑀯𑀺𑀚𑀸𑀦, 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢’’𑀦𑁆𑀢𑀺.

𑀢𑁄𑀤𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸 𑀦𑀯𑀫𑀸 𑀦𑀺𑀝𑁆𑀞𑀺𑀢𑀸.