𑁧𑁦. 𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸

𑁧𑁦𑁯𑁮. ‘‘𑀫𑀚𑁆𑀛𑁂 𑀲𑀭𑀲𑁆𑀫𑀺𑀁 𑀢𑀺𑀝𑁆𑀞𑀢𑀁, (𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄)

𑀑𑀖𑁂 𑀚𑀸𑀢𑁂 𑀫𑀳𑀩𑁆𑀪𑀬𑁂;

𑀚𑀭𑀸𑀫𑀘𑁆𑀘𑀼𑀧𑀭𑁂𑀢𑀸𑀦𑀁, 𑀤𑀻𑀧𑀁 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲;

𑀢𑁆𑀯𑀜𑁆𑀘 𑀫𑁂 𑀤𑀻𑀧𑀫𑀓𑁆𑀔𑀸𑀳𑀺, 𑀬𑀣𑀸𑀬𑀺𑀤𑀁 𑀦𑀸𑀧𑀭𑀁 𑀲𑀺𑀬𑀸’’.

𑁧𑁦𑁯𑁯. ‘‘𑀫𑀚𑁆𑀛𑁂 𑀲𑀭𑀲𑁆𑀫𑀺𑀁 𑀢𑀺𑀝𑁆𑀞𑀢𑀁, (𑀓𑀧𑁆𑀧𑀸𑀢𑀺 𑀪𑀕𑀯𑀸)

𑀑𑀖𑁂 𑀚𑀸𑀢𑁂 𑀫𑀳𑀩𑁆𑀪𑀬𑁂;

𑀚𑀭𑀸𑀫𑀘𑁆𑀘𑀼𑀧𑀭𑁂𑀢𑀸𑀦𑀁, 𑀤𑀻𑀧𑀁 𑀧𑀩𑁆𑀭𑀽𑀫𑀺 𑀓𑀧𑁆𑀧 𑀢𑁂.

𑁧𑁧𑁦𑁦. ‘‘𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁, 𑀏𑀢𑀁 𑀤𑀻𑀧𑀁 𑀅𑀦𑀸𑀧𑀭𑀁;

𑀦𑀺𑀩𑁆𑀩𑀸𑀦𑀁 𑀇𑀢𑀺 [𑀦𑀺𑀩𑁆𑀩𑀸𑀦𑀫𑀻𑀢𑀺 (𑀲𑀻.)] 𑀦𑀁 𑀩𑁆𑀭𑀽𑀫𑀺, 𑀚𑀭𑀸𑀫𑀘𑁆𑀘𑀼𑀧𑀭𑀺𑀓𑁆𑀔𑀬𑀁.

𑁧𑁧𑁦𑁧. ‘‘𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸, 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸;

𑀦 𑀢𑁂 𑀫𑀸𑀭𑀯𑀲𑀸𑀦𑀼𑀕𑀸, 𑀦 𑀢𑁂 𑀫𑀸𑀭𑀲𑁆𑀲 𑀧𑀤𑁆𑀥𑀕𑀽’’𑀢𑀺 [𑀧𑀝𑁆𑀞𑀕𑀽𑀢𑀺 (𑀲𑁆𑀬𑀸. 𑀓.)].

𑀓𑀧𑁆𑀧𑀫𑀸𑀡𑀯𑀧𑀼𑀘𑁆𑀙𑀸 𑀤𑀲𑀫𑀸 𑀦𑀺𑀝𑁆𑀞𑀺𑀢𑀸.