𑁧𑁧. 𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀧𑀼𑀘𑁆𑀙𑀸

𑁧𑁧𑁦𑁨. ‘‘𑀲𑀼𑀢𑁆𑀯𑀸𑀦𑀳𑀁 𑀯𑀻𑀭𑀫𑀓𑀸𑀫𑀓𑀸𑀫𑀺𑀁, (𑀇𑀘𑁆𑀘𑀸𑀬𑀲𑁆𑀫𑀸 𑀚𑀢𑀼𑀓𑀡𑁆𑀡𑀺)

𑀑𑀖𑀸𑀢𑀺𑀕𑀁 𑀧𑀼𑀝𑁆𑀞𑀼𑀫𑀓𑀸𑀫𑀫𑀸𑀕𑀫𑀁;

𑀲𑀦𑁆𑀢𑀺𑀧𑀤𑀁 𑀩𑁆𑀭𑀽𑀳𑀺 𑀲𑀳𑀚𑀦𑁂𑀢𑁆𑀢, 𑀬𑀣𑀸𑀢𑀘𑁆𑀙𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂 𑀢𑀁.

𑁧𑁧𑁦𑁩. ‘‘𑀪𑀕𑀯𑀸 𑀳𑀺 𑀓𑀸𑀫𑁂 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺, 𑀆𑀤𑀺𑀘𑁆𑀘𑁄𑀯 𑀧𑀣𑀯𑀺𑀁 𑀢𑁂𑀚𑀻 𑀢𑁂𑀚𑀲𑀸;

𑀧𑀭𑀺𑀢𑁆𑀢𑀧𑀜𑁆𑀜𑀲𑁆𑀲 𑀫𑁂 𑀪𑀽𑀭𑀺𑀧𑀜𑁆𑀜, 𑀆𑀘𑀺𑀓𑁆𑀔 𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀚𑀸𑀢𑀺𑀚𑀭𑀸𑀬 𑀇𑀥 𑀯𑀺𑀧𑁆𑀧𑀳𑀸𑀦𑀁’’.

𑁧𑁧𑁦𑁪. ‘‘𑀓𑀸𑀫𑁂𑀲𑀼 𑀯𑀺𑀦𑀬 𑀕𑁂𑀥𑀁, (𑀚𑀢𑀼𑀓𑀡𑁆𑀡𑀻𑀢𑀺 𑀪𑀕𑀯𑀸) 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄;

𑀉𑀕𑁆𑀕𑀳𑀻𑀢𑀁 𑀦𑀺𑀭𑀢𑁆𑀢𑀁 𑀯𑀸, 𑀫𑀸 𑀢𑁂 𑀯𑀺𑀚𑁆𑀚𑀺𑀢𑁆𑀣 𑀓𑀺𑀜𑁆𑀘𑀦𑀁.

𑁧𑁧𑁦𑁫. ‘‘𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺, 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀁;

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺.

𑁧𑁧𑁦𑁬. ‘‘𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀯𑀻𑀢𑀕𑁂𑀥𑀲𑁆𑀲 𑀩𑁆𑀭𑀸𑀳𑁆𑀫𑀡;

𑀆𑀲𑀯𑀸𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺, 𑀬𑁂𑀳𑀺 𑀫𑀘𑁆𑀘𑀼𑀯𑀲𑀁 𑀯𑀚𑁂’’𑀢𑀺.

𑀚𑀢𑀼𑀓𑀡𑁆𑀡𑀺𑀫𑀸𑀡𑀯𑀧𑀼𑀘𑁆𑀙𑀸 𑀏𑀓𑀸𑀤𑀲𑀫𑀸 𑀦𑀺𑀝𑁆𑀞𑀺𑀢𑀸.