𑁮. 𑀳𑁂𑀫𑀓𑀫𑀸𑀡𑀯𑀧𑀼𑀘𑁆𑀙𑀸

𑁧𑁦𑁯𑁦. ‘‘𑀬𑁂 𑀫𑁂 𑀧𑀼𑀩𑁆𑀩𑁂 𑀯𑀺𑀬𑀸𑀓𑀁𑀲𑀼, (𑀇𑀘𑁆𑀘𑀸𑀬𑀲𑁆𑀫𑀸 𑀳𑁂𑀫𑀓𑁄)

𑀳𑀼𑀭𑀁 𑀕𑁄𑀢𑀫𑀲𑀸𑀲𑀦𑀸;

𑀇𑀘𑁆𑀘𑀸𑀲𑀺 𑀇𑀢𑀺 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀁 𑀢𑀁 𑀇𑀢𑀺𑀳𑀻𑀢𑀺𑀳𑀁;

𑀲𑀩𑁆𑀩𑀁 𑀢𑀁 𑀢𑀓𑁆𑀓𑀯𑀟𑁆𑀠𑀦𑀁, 𑀦𑀸𑀳𑀁 𑀢𑀢𑁆𑀣 𑀅𑀪𑀺𑀭𑀫𑀺𑀁.

𑁧𑁦𑁯𑁧. ‘‘𑀢𑁆𑀯𑀜𑁆𑀘 𑀫𑁂 𑀥𑀫𑁆𑀫𑀫𑀓𑁆𑀔𑀸𑀳𑀺, 𑀢𑀡𑁆𑀳𑀸𑀦𑀺𑀕𑁆𑀖𑀸𑀢𑀦𑀁 𑀫𑀼𑀦𑀺;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁’’.

𑁧𑁦𑁯𑁨. ‘‘𑀇𑀥 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂𑀲𑀼, 𑀧𑀺𑀬𑀭𑀽𑀧𑁂𑀲𑀼 𑀳𑁂𑀫𑀓;

𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀁, 𑀦𑀺𑀩𑁆𑀩𑀸𑀦𑀧𑀤𑀫𑀘𑁆𑀘𑀼𑀢𑀁.

𑁧𑁦𑁯𑁩. ‘‘𑀏𑀢𑀤𑀜𑁆𑀜𑀸𑀬 𑀬𑁂 𑀲𑀢𑀸, 𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸;

𑀉𑀧𑀲𑀦𑁆𑀢𑀸 𑀘 𑀢𑁂 𑀲𑀤𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑀳𑁂𑀫𑀓𑀫𑀸𑀡𑀯𑀧𑀼𑀘𑁆𑀙𑀸 𑀅𑀝𑁆𑀞𑀫𑀸 𑀦𑀺𑀝𑁆𑀞𑀺𑀢𑀸.