𑁭. 𑀦𑀦𑁆𑀤𑀫𑀸𑀡𑀯𑀧𑀼𑀘𑁆𑀙𑀸

𑁧𑁦𑁮𑁩. ‘‘𑀲𑀦𑁆𑀢𑀺 𑀮𑁄𑀓𑁂 𑀫𑀼𑀦𑀬𑁄, (𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄)

𑀚𑀦𑀸 𑀯𑀤𑀦𑁆𑀢𑀺 𑀢𑀬𑀺𑀤𑀁 𑀓𑀣𑀁𑀲𑀼;

𑀜𑀸𑀡𑀽𑀧𑀧𑀦𑁆𑀦𑀁 𑀦𑁄 𑀫𑀼𑀦𑀺𑀁 [𑀫𑀼𑀦𑀺 𑀦𑁄 (𑀲𑁆𑀬𑀸. 𑀓.)] 𑀯𑀤𑀦𑁆𑀢𑀺, 𑀉𑀤𑀸𑀳𑀼 𑀯𑁂 𑀚𑀻𑀯𑀺𑀢𑁂𑀦𑀽𑀧𑀧𑀦𑁆𑀦𑀁’’.

𑁧𑁦𑁮𑁪. ‘‘𑀦 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦, (𑀦 𑀲𑀻𑀮𑀩𑁆𑀩𑀢𑁂𑀦) [( ) 𑀦𑀢𑁆𑀣𑀺 𑀲𑀻.-𑀧𑀻 𑀧𑁄𑀢𑁆𑀣𑀓𑁂𑀲𑀼]

𑀫𑀼𑀦𑀻𑀥 𑀦𑀦𑁆𑀤 𑀓𑀼𑀲𑀮𑀸 𑀯𑀤𑀦𑁆𑀢𑀺;

𑀯𑀺𑀲𑁂𑀦𑀺𑀓𑀢𑁆𑀯𑀸 𑀅𑀦𑀻𑀖𑀸 𑀦𑀺𑀭𑀸𑀲𑀸, 𑀘𑀭𑀦𑁆𑀢𑀺 𑀬𑁂 𑀢𑁂 𑀫𑀼𑀦𑀬𑁄𑀢𑀺 𑀩𑁆𑀭𑀽𑀫𑀺’’.

𑁧𑁦𑁮𑁫. ‘‘𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, (𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄)

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 [𑀤𑀺𑀝𑁆𑀞𑁂𑀦 𑀲𑀼𑀢𑁂𑀦𑀸𑀧𑀺 (𑀲𑀻.), 𑀤𑀺𑀝𑁆𑀞𑁂 𑀲𑀼𑀢𑁂𑀦𑀸𑀧𑀺 (𑀲𑁆𑀬𑀸. 𑀧𑀻. 𑀓.)] 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁, 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀓𑀘𑁆𑀘𑀺𑀲𑁆𑀲𑀼 𑀢𑁂 𑀪𑀕𑀯𑀸 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀸, 𑀅𑀢𑀸𑀭𑀼 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂 𑀢𑀁’’.

𑁧𑁦𑁮𑁬. ‘‘𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, (𑀦𑀦𑁆𑀤𑀸𑀢𑀺 𑀪𑀕𑀯𑀸)

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁, 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀓𑀺𑀜𑁆𑀘𑀸𑀧𑀺 𑀢𑁂 𑀢𑀢𑁆𑀣 𑀬𑀢𑀸 𑀘𑀭𑀦𑁆𑀢𑀺, 𑀦𑀸𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺’’.

𑁧𑁦𑁮𑁭. ‘‘𑀬𑁂 𑀓𑁂𑀘𑀺𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, (𑀇𑀘𑁆𑀘𑀸𑀬𑀲𑁆𑀫𑀸 𑀦𑀦𑁆𑀤𑁄)

𑀤𑀺𑀝𑁆𑀞𑀲𑁆𑀲𑀼𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁, 𑀅𑀦𑁂𑀓𑀭𑀽𑀧𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀢𑁂 𑀘𑁂 𑀫𑀼𑀦𑀺 [𑀲𑀘𑁂 𑀫𑀼𑀦𑀺 (𑀲𑀻.)] 𑀩𑁆𑀭𑀽𑀲𑀺 𑀅𑀦𑁄𑀖𑀢𑀺𑀡𑁆𑀡𑁂, 𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂;

𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂 𑀢𑀁’’.

𑁧𑁦𑁮𑁮. ‘‘𑀦𑀸𑀳𑀁 𑀲𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀲𑁂, (𑀦𑀦𑁆𑀤𑀸𑀢𑀺 𑀪𑀕𑀯𑀸)

𑀚𑀸𑀢𑀺𑀚𑀭𑀸𑀬 𑀦𑀺𑀯𑀼𑀢𑀸𑀢𑀺 𑀩𑁆𑀭𑀽𑀫𑀺;

𑀬𑁂 𑀲𑀻𑀥 𑀤𑀺𑀝𑁆𑀞𑀁𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁;

𑀅𑀦𑁂𑀓𑀭𑀽𑀧𑀫𑁆𑀧𑀺 𑀧𑀳𑀸𑀬 𑀲𑀩𑁆𑀩𑀁, 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸𑀲𑁂;

𑀢𑁂 𑀯𑁂 𑀦𑀭𑀸 𑀑𑀖𑀢𑀺𑀡𑁆𑀡𑀸𑀢𑀺 𑀩𑁆𑀭𑀽𑀫𑀺’’.

𑁧𑁦𑁮𑁯. ‘‘𑀏𑀢𑀸𑀪𑀺𑀦𑀦𑁆𑀤𑀸𑀫𑀺 𑀯𑀘𑁄 𑀫𑀳𑁂𑀲𑀺𑀦𑁄, 𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀁;

𑀬𑁂 𑀲𑀻𑀥 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁;

𑀅𑀦𑁂𑀓𑀭𑀽𑀧𑀫𑁆𑀧𑀺 𑀧𑀳𑀸𑀬 𑀲𑀩𑁆𑀩𑀁, 𑀢𑀡𑁆𑀳𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀲𑀯𑀸𑀲𑁂;

𑀅𑀳𑀫𑁆𑀧𑀺 𑀢𑁂 𑀑𑀖𑀢𑀺𑀡𑁆𑀡𑀸𑀢𑀺 𑀩𑁆𑀭𑀽𑀫𑀻’’𑀢𑀺.

𑀦𑀦𑁆𑀤𑀫𑀸𑀡𑀯𑀧𑀼𑀘𑁆𑀙𑀸 𑀲𑀢𑁆𑀢𑀫𑀸 𑀦𑀺𑀝𑁆𑀞𑀺𑀢𑀸.