𑁩. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸

𑁧𑁦𑁪𑁯. ‘‘𑀅𑀦𑁂𑀚𑀁 𑀫𑀽𑀮𑀤𑀲𑁆𑀲𑀸𑀯𑀺𑀁, (𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄)

𑀅𑀢𑁆𑀣𑀺 [𑀅𑀢𑁆𑀣𑀻 (𑀲𑁆𑀬𑀸.)] 𑀧𑀜𑁆𑀳𑁂𑀦 𑀆𑀕𑀫𑀁;

𑀓𑀺𑀁 𑀦𑀺𑀲𑁆𑀲𑀺𑀢𑀸 𑀇𑀲𑀬𑁄 𑀫𑀦𑀼𑀚𑀸, 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂 𑀢𑀁’’.

𑁧𑁦𑁫𑁦. ‘‘𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸, (𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸)

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀆𑀲𑀻𑀲𑀫𑀸𑀦𑀸 𑀧𑀼𑀡𑁆𑀡𑀓 𑀇𑀢𑁆𑀣𑀢𑁆𑀢𑀁 [𑀇𑀢𑁆𑀣𑀪𑀸𑀯𑀁 (𑀲𑀻. 𑀲𑁆𑀬𑀸.)];

𑀚𑀭𑀁 𑀲𑀺𑀢𑀸 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼’’.

𑁧𑁦𑁫𑁧. ‘‘𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸, (𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄)

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀓𑀘𑁆𑀘𑀺𑀲𑁆𑀲𑀼 𑀢𑁂 𑀪𑀕𑀯𑀸 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸;

𑀅𑀢𑀸𑀭𑀼𑀁 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂 𑀢𑀁’’.

𑁧𑁦𑁫𑁨. ‘‘𑀆𑀲𑀻𑀲𑀦𑁆𑀢𑀺 𑀣𑁄𑀫𑀬𑀦𑁆𑀢𑀺, 𑀅𑀪𑀺𑀚𑀧𑁆𑀧𑀦𑁆𑀢𑀺 𑀚𑀼𑀳𑀦𑁆𑀢𑀺; (𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸)

𑀓𑀸𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀧𑀝𑀺𑀘𑁆𑀘 𑀮𑀸𑀪𑀁, 𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸;

𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺’’.

𑁧𑁦𑁫𑁩. ‘‘𑀢𑁂 𑀘𑁂 𑀦𑀸𑀢𑀭𑀺𑀁𑀲𑀼 𑀬𑀸𑀚𑀬𑁄𑀕𑀸, (𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄)

𑀬𑀜𑁆𑀜𑁂𑀳𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂 𑀢𑀁’’.

𑁧𑁦𑁫𑁪. ‘‘𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺 𑀧𑀭𑁄𑀧𑀭𑀸𑀦𑀺 [𑀧𑀭𑁄𑀯𑀭𑀸𑀦𑀺 (𑀲𑀻. 𑀲𑁆𑀬𑀸.)], (𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸)

𑀬𑀲𑁆𑀲𑀺𑀜𑁆𑀚𑀺𑀢𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂;

𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻’’𑀢𑀺.

𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸 𑀢𑀢𑀺𑀬𑀸 𑀦𑀺𑀝𑁆𑀞𑀺𑀢𑀸.