𑁪. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸

𑁧𑁦𑁫𑁫. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂 𑀢𑀁, (𑀇𑀘𑁆𑀘𑀸𑀬𑀲𑁆𑀫𑀸 𑀫𑁂𑀢𑁆𑀢𑀕𑀽)

𑀫𑀜𑁆𑀜𑀸𑀫𑀺 𑀢𑀁 𑀯𑁂𑀤𑀕𑀼𑀁 𑀪𑀸𑀯𑀺𑀢𑀢𑁆𑀢𑀁;

𑀓𑀼𑀢𑁄 𑀦𑀼 𑀤𑀼𑀓𑁆𑀔𑀸 𑀲𑀫𑀼𑀤𑀸𑀕𑀢𑀸 𑀇𑀫𑁂, 𑀬𑁂 𑀓𑁂𑀘𑀺 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸’’.

𑁧𑁦𑁫𑁬. ‘‘𑀤𑀼𑀓𑁆𑀔𑀲𑁆𑀲 𑀯𑁂 𑀫𑀁 𑀧𑀪𑀯𑀁 𑀅𑀧𑀼𑀘𑁆𑀙𑀲𑀺, (𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸)

𑀢𑀁 𑀢𑁂 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀁;

𑀉𑀧𑀥𑀺𑀦𑀺𑀤𑀸𑀦𑀸 𑀧𑀪𑀯𑀦𑁆𑀢𑀺 𑀤𑀼𑀓𑁆𑀔𑀸, 𑀬𑁂 𑀓𑁂𑀘𑀺 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸.

𑁧𑁦𑁫𑁭. ‘‘𑀬𑁄 𑀯𑁂 𑀅𑀯𑀺𑀤𑁆𑀯𑀸 𑀉𑀧𑀥𑀺𑀁 𑀓𑀭𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀤𑀼𑀓𑁆𑀔𑀫𑀼𑀧𑁂𑀢𑀺 𑀫𑀦𑁆𑀤𑁄;

𑀢𑀲𑁆𑀫𑀸 𑀧𑀚𑀸𑀦𑀁 𑀉𑀧𑀥𑀺𑀁 𑀦 𑀓𑀬𑀺𑀭𑀸, 𑀤𑀼𑀓𑁆𑀔𑀲𑁆𑀲 𑀚𑀸𑀢𑀺𑀧𑁆𑀧𑀪𑀯𑀸𑀦𑀼𑀧𑀲𑁆𑀲𑀻’’.

𑁧𑁦𑁫𑁮. ‘‘𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫 [𑀧𑀼𑀘𑁆𑀙𑀸𑀫𑀺 (𑀲𑀻. 𑀧𑀻.)] 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;

𑀓𑀣𑀁 𑀦𑀼 𑀥𑀻𑀭𑀸 𑀯𑀺𑀢𑀭𑀦𑁆𑀢𑀺 𑀑𑀖𑀁, 𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘;

𑀢𑀁 𑀫𑁂 𑀫𑀼𑀦𑀺 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄’’.

𑁧𑁦𑁫𑁯. ‘‘𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀥𑀫𑁆𑀫𑀁, (𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸)

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁’’.

𑁧𑁦𑁬𑁦. ‘‘𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀺, 𑀫𑀳𑁂𑀲𑀺 𑀥𑀫𑁆𑀫𑀫𑀼𑀢𑁆𑀢𑀫𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁’’.

𑁧𑁦𑁬𑁧. ‘‘𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺, (𑀫𑁂𑀢𑁆𑀢𑀕𑀽𑀢𑀺 𑀪𑀕𑀯𑀸)

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀏𑀢𑁂𑀲𑀼 𑀦𑀦𑁆𑀤𑀺𑀜𑁆𑀘 𑀦𑀺𑀯𑁂𑀲𑀦𑀜𑁆𑀘, 𑀧𑀦𑀼𑀚𑁆𑀚 𑀯𑀺𑀜𑁆𑀜𑀸𑀡𑀁 𑀪𑀯𑁂 𑀦 𑀢𑀺𑀝𑁆𑀞𑁂.

𑁧𑁦𑁬𑁨. ‘‘𑀏𑀯𑀁𑀯𑀺𑀳𑀸𑀭𑀻 𑀲𑀢𑁄 𑀅𑀧𑁆𑀧𑀫𑀢𑁆𑀢𑁄, 𑀪𑀺𑀓𑁆𑀔𑀼 𑀘𑀭𑀁 𑀳𑀺𑀢𑁆𑀯𑀸 𑀫𑀫𑀸𑀬𑀺𑀢𑀸𑀦𑀺;

𑀚𑀸𑀢𑀺𑀁 𑀚𑀭𑀁 𑀲𑁄𑀓𑀧𑀭𑀺𑀤𑁆𑀤𑀯𑀜𑁆𑀘, 𑀇𑀥𑁂𑀯 𑀯𑀺𑀤𑁆𑀯𑀸 𑀧𑀚𑀳𑁂𑀬𑁆𑀬 𑀤𑀼𑀓𑁆𑀔𑀁’’.

𑁧𑁦𑁬𑁩. ‘‘𑀏𑀢𑀸𑀪𑀺𑀦𑀦𑁆𑀤𑀸𑀫𑀺 𑀯𑀘𑁄 𑀫𑀳𑁂𑀲𑀺𑀦𑁄, 𑀲𑀼𑀓𑀺𑀢𑁆𑀢𑀺𑀢𑀁 𑀕𑁄𑀢𑀫𑀦𑀽𑀧𑀥𑀻𑀓𑀁;

𑀅𑀤𑁆𑀥𑀸 𑀳𑀺 𑀪𑀕𑀯𑀸 𑀧𑀳𑀸𑀲𑀺 𑀤𑀼𑀓𑁆𑀔𑀁, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄.

𑁧𑁦𑁬𑁪. ‘‘𑀢𑁂 𑀘𑀸𑀧𑀺 𑀦𑀽𑀦𑀧𑁆𑀧𑀚𑀳𑁂𑀬𑁆𑀬𑀼 𑀤𑀼𑀓𑁆𑀔𑀁, 𑀬𑁂 𑀢𑁆𑀯𑀁 𑀫𑀼𑀦𑀺 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑁂𑀘𑁆𑀘 𑀦𑀸𑀕, 𑀅𑀧𑁆𑀧𑁂𑀯 𑀫𑀁 𑀪𑀕𑀯𑀸 𑀅𑀝𑁆𑀞𑀺𑀢𑀁 𑀑𑀯𑀤𑁂𑀬𑁆𑀬’’.

𑁧𑁦𑁬𑁫. ‘‘𑀬𑀁 𑀩𑁆𑀭𑀸𑀳𑁆𑀫𑀡𑀁 𑀯𑁂𑀤𑀕𑀼𑀫𑀸𑀪𑀺𑀚𑀜𑁆𑀜𑀸, 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢𑀁;

𑀅𑀤𑁆𑀥𑀸 𑀳𑀺 𑀲𑁄 𑀑𑀖𑀫𑀺𑀫𑀁 𑀅𑀢𑀸𑀭𑀺, 𑀢𑀺𑀡𑁆𑀡𑁄 𑀘 𑀧𑀸𑀭𑀁 𑀅𑀔𑀺𑀮𑁄 𑀅𑀓𑀗𑁆𑀔𑁄.

𑁧𑁦𑁬𑁬. ‘‘𑀯𑀺𑀤𑁆𑀯𑀸 𑀘 𑀬𑁄 [𑀲𑁄 (𑀲𑀻. 𑀲𑁆𑀬𑀸. 𑀧𑀻.)] 𑀯𑁂𑀤𑀕𑀽 𑀦𑀭𑁄 𑀇𑀥, 𑀪𑀯𑀸𑀪𑀯𑁂 𑀲𑀗𑁆𑀕𑀫𑀺𑀫𑀁 𑀯𑀺𑀲𑀚𑁆𑀚;

𑀲𑁄 𑀯𑀻𑀢𑀢𑀡𑁆𑀳𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻’’𑀢𑀺.

𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸 𑀘𑀢𑀼𑀢𑁆𑀣𑀻 𑀦𑀺𑀝𑁆𑀞𑀺𑀢𑀸.