𑁯. 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀁

𑁮𑁪𑁧. ‘‘𑀤𑀺𑀲𑁆𑀯𑀸𑀦 𑀢𑀡𑁆𑀳𑀁 𑀅𑀭𑀢𑀺𑀁 𑀭𑀕𑀜𑁆𑀘 [𑀅𑀭𑀢𑀺𑀜𑁆𑀘 𑀭𑀸𑀕𑀁 (𑀲𑁆𑀬𑀸. 𑀓.)], 𑀦𑀸𑀳𑁄𑀲𑀺 𑀙𑀦𑁆𑀤𑁄 𑀅𑀧𑀺 𑀫𑁂𑀣𑀼𑀦𑀲𑁆𑀫𑀺𑀁;

𑀓𑀺𑀫𑁂𑀯𑀺𑀤𑀁 𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑀁, 𑀧𑀸𑀤𑀸𑀧𑀺 𑀦𑀁 𑀲𑀫𑁆𑀨𑀼𑀲𑀺𑀢𑀼𑀁 𑀦 𑀇𑀘𑁆𑀙𑁂’’.

𑁮𑁪𑁨. ‘‘𑀏𑀢𑀸𑀤𑀺𑀲𑀁 𑀘𑁂 𑀭𑀢𑀦𑀁 𑀦 𑀇𑀘𑁆𑀙𑀲𑀺, 𑀦𑀸𑀭𑀺𑀁 𑀦𑀭𑀺𑀦𑁆𑀤𑁂𑀳𑀺 𑀩𑀳𑀽𑀳𑀺 𑀧𑀢𑁆𑀣𑀺𑀢𑀁;

𑀤𑀺𑀝𑁆𑀞𑀺𑀕𑀢𑀁 𑀲𑀻𑀮𑀯𑀢𑀁 𑀦𑀼 𑀚𑀻𑀯𑀺𑀢𑀁 [𑀲𑀻𑀮𑀯𑀢𑀸𑀦𑀼𑀚𑀻𑀯𑀺𑀢𑀁 (𑀲𑀻. 𑀧𑀻. 𑀓.)], 𑀪𑀯𑀽𑀧𑀧𑀢𑁆𑀢𑀺𑀜𑁆𑀘 𑀯𑀤𑁂𑀲𑀺 𑀓𑀻𑀤𑀺𑀲𑀁’’.

𑁮𑁪𑁩. ‘‘𑀇𑀤𑀁 𑀯𑀤𑀸𑀫𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀺, (𑀫𑀸𑀕𑀡𑁆𑀟𑀺𑀬𑀸𑀢𑀺 [𑀫𑀸𑀕𑀦𑁆𑀤𑀺𑀬𑀸𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀪𑀕𑀯𑀸)

𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁;

𑀧𑀲𑁆𑀲𑀜𑁆𑀘 𑀤𑀺𑀝𑁆𑀞𑀻𑀲𑀼 𑀅𑀦𑀼𑀕𑁆𑀕𑀳𑀸𑀬,

𑀅𑀚𑁆𑀛𑀢𑁆𑀢𑀲𑀦𑁆𑀢𑀺𑀁 𑀧𑀘𑀺𑀦𑀁 𑀅𑀤𑀲𑁆𑀲𑀁’’.

𑁮𑁪𑁪. ‘‘𑀯𑀺𑀦𑀺𑀘𑁆𑀙𑀬𑀸 𑀬𑀸𑀦𑀺 𑀧𑀓𑀧𑁆𑀧𑀺𑀢𑀸𑀦𑀺, (𑀇𑀢𑀺 𑀫𑀸𑀕𑀡𑁆𑀟𑀺𑀬𑁄 [𑀫𑀸𑀕𑀦𑁆𑀤𑀺𑀬𑁄 (𑀲𑀻. 𑀲𑁆𑀬𑀸. 𑀧𑀻.)] )

𑀢𑁂 𑀯𑁂 𑀫𑀼𑀦𑀻 𑀩𑁆𑀭𑀽𑀲𑀺 𑀅𑀦𑀼𑀕𑁆𑀕𑀳𑀸𑀬;

𑀅𑀚𑁆𑀛𑀢𑁆𑀢𑀲𑀦𑁆𑀢𑀻𑀢𑀺 𑀬𑀫𑁂𑀢𑀫𑀢𑁆𑀣𑀁,

𑀓𑀣𑀁 𑀦𑀼 𑀥𑀻𑀭𑁂𑀳𑀺 𑀧𑀯𑁂𑀤𑀺𑀢𑀁 𑀢𑀁’’.

𑁮𑁪𑁫. ‘‘𑀦 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦, (𑀫𑀸𑀕𑀡𑁆𑀟𑀺𑀬𑀸𑀢𑀺 𑀪𑀕𑀯𑀸)

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀦 𑀲𑀼𑀤𑁆𑀥𑀺𑀫𑀸𑀳;

𑀅𑀤𑀺𑀝𑁆𑀞𑀺𑀬𑀸 𑀅𑀲𑁆𑀲𑀼𑀢𑀺𑀬𑀸 𑀅𑀜𑀸𑀡𑀸,

𑀅𑀲𑀻𑀮𑀢𑀸 𑀅𑀩𑁆𑀩𑀢𑀸 𑀦𑁄𑀧𑀺 𑀢𑁂𑀦;

𑀏𑀢𑁂 𑀘 𑀦𑀺𑀲𑁆𑀲𑀚𑁆𑀚 𑀅𑀦𑀼𑀕𑁆𑀕𑀳𑀸𑀬,

𑀲𑀦𑁆𑀢𑁄 𑀅𑀦𑀺𑀲𑁆𑀲𑀸𑀬 𑀪𑀯𑀁 𑀦 𑀚𑀧𑁆𑀧𑁂’’.

𑁮𑁪𑁬. ‘‘𑀦𑁄 𑀘𑁂 𑀓𑀺𑀭 𑀤𑀺𑀝𑁆𑀞𑀺𑀬𑀸 𑀦 𑀲𑀼𑀢𑀺𑀬𑀸 𑀦 𑀜𑀸𑀡𑁂𑀦, (𑀇𑀢𑀺 𑀫𑀸𑀕𑀡𑁆𑀟𑀺𑀬𑁄)

𑀲𑀻𑀮𑀩𑁆𑀩𑀢𑁂𑀦𑀸𑀧𑀺 𑀦 𑀲𑀼𑀤𑁆𑀥𑀺𑀫𑀸𑀳;

𑀅𑀤𑀺𑀝𑁆𑀞𑀺𑀬𑀸 𑀅𑀲𑁆𑀲𑀼𑀢𑀺𑀬𑀸 𑀅𑀜𑀸𑀡𑀸,

𑀅𑀲𑀻𑀮𑀢𑀸 𑀅𑀩𑁆𑀩𑀢𑀸 𑀦𑁄𑀧𑀺 𑀢𑁂𑀦;

𑀫𑀜𑁆𑀜𑀸𑀫𑀳𑀁 𑀫𑁄𑀫𑀼𑀳𑀫𑁂𑀯 𑀥𑀫𑁆𑀫𑀁,

𑀤𑀺𑀝𑁆𑀞𑀺𑀬𑀸 𑀏𑀓𑁂 𑀧𑀘𑁆𑀘𑁂𑀦𑁆𑀢𑀺 𑀲𑀼𑀤𑁆𑀥𑀺𑀁’’.

𑁮𑁪𑁭. ‘‘𑀤𑀺𑀝𑁆𑀞𑀜𑁆𑀘 𑀦𑀺𑀲𑁆𑀲𑀸𑀬 𑀅𑀦𑀼𑀧𑀼𑀘𑁆𑀙𑀫𑀸𑀦𑁄, (𑀫𑀸𑀕𑀡𑁆𑀟𑀺𑀬𑀸𑀢𑀺 𑀪𑀕𑀯𑀸)

𑀲𑀫𑀼𑀕𑁆𑀕𑀳𑀻𑀢𑁂𑀲𑀼 𑀧𑀫𑁄𑀳𑀫𑀸𑀕𑀸 [𑀲𑀫𑁄𑀳𑀫𑀸𑀕𑀸 (𑀲𑁆𑀬𑀸. 𑀓.)];

𑀇𑀢𑁄 𑀘 𑀦𑀸𑀤𑁆𑀤𑀓𑁆𑀔𑀺 𑀅𑀡𑀼𑀫𑁆𑀧𑀺 𑀲𑀜𑁆𑀜𑀁,

𑀢𑀲𑁆𑀫𑀸 𑀢𑀼𑀯𑀁 𑀫𑁄𑀫𑀼𑀳𑀢𑁄 𑀤𑀳𑀸𑀲𑀺.

𑁮𑁪𑁮. ‘‘𑀲𑀫𑁄 𑀯𑀺𑀲𑁂𑀲𑀻 𑀉𑀤 𑀯𑀸 𑀦𑀺𑀳𑀻𑀦𑁄, 𑀬𑁄 𑀫𑀜𑁆𑀜𑀢𑀻 𑀲𑁄 𑀯𑀺𑀯𑀤𑁂𑀣 𑀢𑁂𑀦;

𑀢𑀻𑀲𑀼 𑀯𑀺𑀥𑀸𑀲𑀼 𑀅𑀯𑀺𑀓𑀫𑁆𑀧𑀫𑀸𑀦𑁄, 𑀲𑀫𑁄 𑀯𑀺𑀲𑁂𑀲𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀺.

𑁮𑁪𑁯. ‘‘𑀲𑀘𑁆𑀘𑀦𑁆𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀓𑀺𑀁 𑀯𑀤𑁂𑀬𑁆𑀬, 𑀫𑀼𑀲𑀸𑀢𑀺 𑀯𑀸 𑀲𑁄 𑀯𑀺𑀯𑀤𑁂𑀣 𑀓𑁂𑀦;

𑀬𑀲𑁆𑀫𑀺𑀁 𑀲𑀫𑀁 𑀯𑀺𑀲𑀫𑀁 𑀯𑀸𑀧𑀺 𑀦𑀢𑁆𑀣𑀺, 𑀲 𑀓𑁂𑀦 𑀯𑀸𑀤𑀁 𑀧𑀝𑀺𑀲𑀁𑀬𑀼𑀚𑁂𑀬𑁆𑀬.

𑁮𑁫𑁦. ‘‘𑀑𑀓𑀁 𑀧𑀳𑀸𑀬 𑀅𑀦𑀺𑀓𑁂𑀢𑀲𑀸𑀭𑀻, 𑀕𑀸𑀫𑁂 𑀅𑀓𑀼𑀩𑁆𑀩𑀁 𑀫𑀼𑀦𑀺 𑀲𑀦𑁆𑀣𑀯𑀸𑀦𑀺 [𑀲𑀦𑁆𑀥𑀯𑀸𑀦𑀺 (𑀓.)];

𑀓𑀸𑀫𑁂𑀳𑀺 𑀭𑀺𑀢𑁆𑀢𑁄 𑀅𑀧𑀼𑀭𑁂𑀓𑁆𑀔𑀭𑀸𑀦𑁄, 𑀓𑀣𑀁 𑀦 𑀯𑀺𑀕𑁆𑀕𑀬𑁆𑀳 𑀚𑀦𑁂𑀦 𑀓𑀬𑀺𑀭𑀸.

𑁮𑁫𑁧. ‘‘𑀬𑁂𑀳𑀺 𑀯𑀺𑀯𑀺𑀢𑁆𑀢𑁄 𑀯𑀺𑀘𑀭𑁂𑀬𑁆𑀬 𑀮𑁄𑀓𑁂, 𑀦 𑀢𑀸𑀦𑀺 𑀉𑀕𑁆𑀕𑀬𑁆𑀳 𑀯𑀤𑁂𑀬𑁆𑀬 𑀦𑀸𑀕𑁄;

𑀚𑀮𑀫𑁆𑀩𑀼𑀚𑀁 [𑀏𑀮𑀫𑁆𑀩𑀼𑀚𑀁 (𑀲𑀻. 𑀲𑁆𑀬𑀸.)] 𑀓𑀡𑁆𑀟𑀓𑀁 𑀯𑀸𑀭𑀺𑀚𑀁 𑀬𑀣𑀸, 𑀚𑀮𑁂𑀦 𑀧𑀗𑁆𑀓𑁂𑀦 𑀘𑀦𑀽𑀧𑀮𑀺𑀢𑁆𑀢𑀁;

𑀏𑀯𑀁 𑀫𑀼𑀦𑀻 𑀲𑀦𑁆𑀢𑀺𑀯𑀸𑀤𑁄 𑀅𑀕𑀺𑀤𑁆𑀥𑁄, 𑀓𑀸𑀫𑁂 𑀘 𑀮𑁄𑀓𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄.

𑁮𑁫𑁨. ‘‘𑀦 𑀯𑁂𑀤𑀕𑀽 𑀤𑀺𑀝𑁆𑀞𑀺𑀬𑀸𑀬𑀓𑁄 [𑀦 𑀯𑁂𑀤𑀕𑀽 𑀤𑀺𑀝𑁆𑀞𑀺𑀬𑀸 (𑀓. 𑀲𑀻. 𑀲𑁆𑀬𑀸. 𑀧𑀻.)] 𑀦 𑀫𑀼𑀢𑀺𑀬𑀸, 𑀲 𑀫𑀸𑀦𑀫𑁂𑀢𑀺 𑀦 𑀳𑀺 𑀢𑀫𑁆𑀫𑀬𑁄 𑀲𑁄;

𑀦 𑀓𑀫𑁆𑀫𑀼𑀦𑀸 𑀦𑁄𑀧𑀺 𑀲𑀼𑀢𑁂𑀦 𑀦𑁂𑀬𑁆𑀬𑁄, 𑀅𑀦𑀽𑀧𑀦𑀻𑀢𑁄 𑀲 𑀦𑀺𑀯𑁂𑀲𑀦𑁂𑀲𑀼.

𑁮𑁫𑁩. ‘‘𑀲𑀜𑁆𑀜𑀸𑀯𑀺𑀭𑀢𑁆𑀢𑀲𑁆𑀲 𑀦 𑀲𑀦𑁆𑀢𑀺 𑀕𑀦𑁆𑀣𑀸, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑁆𑀲 𑀦 𑀲𑀦𑁆𑀢𑀺 𑀫𑁄𑀳𑀸;

𑀲𑀜𑁆𑀜𑀜𑁆𑀘 𑀤𑀺𑀝𑁆𑀞𑀺𑀜𑁆𑀘 𑀬𑁂 𑀅𑀕𑁆𑀕𑀳𑁂𑀲𑀼𑀁, 𑀢𑁂 𑀖𑀝𑁆𑀝𑀬𑀦𑁆𑀢𑀸 [𑀖𑀝𑁆𑀝𑀫𑀸𑀦𑀸 (𑀲𑁆𑀬𑀸. 𑀓.)] 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂’’𑀢𑀺.

𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀁 𑀦𑀯𑀫𑀁 𑀦𑀺𑀝𑁆𑀞𑀺𑀢𑀁.