𑁭. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀁

𑁮𑁨𑁦. ‘‘𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲, (𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑁄 𑀫𑁂𑀢𑁆𑀢𑁂𑀬𑁆𑀬𑁄) 𑀯𑀺𑀖𑀸𑀢𑀁 𑀩𑁆𑀭𑀽𑀳𑀺 𑀫𑀸𑀭𑀺𑀲;

𑀲𑀼𑀢𑁆𑀯𑀸𑀦 𑀢𑀯 𑀲𑀸𑀲𑀦𑀁, 𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂.

𑁮𑁨𑁧. ‘‘𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲, (𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸) 𑀫𑀼𑀲𑁆𑀲𑀢𑁂 𑀯𑀸𑀧𑀺 𑀲𑀸𑀲𑀦𑀁;

𑀫𑀺𑀘𑁆𑀙𑀸 𑀘 𑀧𑀝𑀺𑀧𑀚𑁆𑀚𑀢𑀺, 𑀏𑀢𑀁 𑀢𑀲𑁆𑀫𑀺𑀁 𑀅𑀦𑀸𑀭𑀺𑀬𑀁.

𑁮𑁨𑁨. ‘‘𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦, 𑀫𑁂𑀣𑀼𑀦𑀁 𑀬𑁄 𑀦𑀺𑀲𑁂𑀯𑀢𑀺;

𑀬𑀸𑀦𑀁 𑀪𑀦𑁆𑀢𑀁 𑀯 𑀢𑀁 𑀮𑁄𑀓𑁂, 𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦𑀁.

𑁮𑁨𑁩. ‘‘𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂, 𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀲𑀺𑀓𑁆𑀔𑁂𑀣, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂.

𑁮𑁨𑁪. ‘‘𑀲𑀗𑁆𑀓𑀧𑁆𑀧𑁂𑀳𑀺 𑀧𑀭𑁂𑀢𑁄 𑀲𑁄, 𑀓𑀧𑀡𑁄 𑀯𑀺𑀬 𑀛𑀸𑀬𑀢𑀺;

𑀲𑀼𑀢𑁆𑀯𑀸 𑀧𑀭𑁂𑀲𑀁 𑀦𑀺𑀕𑁆𑀖𑁄𑀲𑀁, 𑀫𑀗𑁆𑀓𑀼 𑀳𑁄𑀢𑀺 𑀢𑀣𑀸𑀯𑀺𑀥𑁄.

𑁮𑁨𑁫. ‘‘𑀅𑀣 𑀲𑀢𑁆𑀣𑀸𑀦𑀺 𑀓𑀼𑀭𑀼𑀢𑁂, 𑀧𑀭𑀯𑀸𑀤𑁂𑀳𑀺 𑀘𑁄𑀤𑀺𑀢𑁄;

𑀏𑀲 𑀔𑁆𑀯𑀲𑁆𑀲 𑀫𑀳𑀸𑀕𑁂𑀥𑁄, 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀺.

𑁮𑁨𑁬. ‘‘𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄, 𑀏𑀓𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄;

𑀅𑀣𑀸𑀧𑀺 [𑀲 𑀘𑀸𑀧𑀺 (𑀦𑀺𑀤𑁆𑀤𑁂𑀲𑁂)] 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄, 𑀫𑀦𑁆𑀤𑁄𑀯 𑀧𑀭𑀺𑀓𑀺𑀲𑁆𑀲𑀢𑀺 [𑀧𑀭𑀺𑀓𑀺𑀮𑀺𑀲𑁆𑀲𑀢𑀺 (𑀲𑀻.)].

𑁮𑁨𑁭. ‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀫𑀼𑀦𑀺 𑀧𑀼𑀩𑁆𑀩𑀸𑀧𑀭𑁂 𑀇𑀥;

𑀏𑀓𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸, 𑀦 𑀦𑀺𑀲𑁂𑀯𑁂𑀣 𑀫𑁂𑀣𑀼𑀦𑀁.

𑁮𑁨𑁮. ‘‘𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀣, 𑀏𑀢𑀤𑀭𑀺𑀬𑀸𑀦𑀫𑀼𑀢𑁆𑀢𑀫𑀁;

𑀦 𑀢𑁂𑀦 𑀲𑁂𑀝𑁆𑀞𑁄 𑀫𑀜𑁆𑀜𑁂𑀣, 𑀲 𑀯𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂.

𑁮𑁨𑁯. ‘‘𑀭𑀺𑀢𑁆𑀢𑀲𑁆𑀲 𑀫𑀼𑀦𑀺𑀦𑁄 𑀘𑀭𑀢𑁄, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑁄;

𑀑𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺, 𑀓𑀸𑀫𑁂𑀲𑀼 𑀕𑀥𑀺𑀢𑀸 [𑀕𑀣𑀺𑀢𑀸 (𑀲𑀻.)] 𑀧𑀚𑀸’’𑀢𑀺.

𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀁 𑀲𑀢𑁆𑀢𑀫𑀁 𑀦𑀺𑀝𑁆𑀞𑀺𑀢𑀁.