𑁩. 𑀤𑀼𑀝𑁆𑀞𑀝𑁆𑀞𑀓𑀲𑀼𑀢𑁆𑀢𑀁

𑁭𑁮𑁬. 𑀯𑀤𑀦𑁆𑀢𑀺 𑀯𑁂 𑀤𑀼𑀝𑁆𑀞𑀫𑀦𑀸𑀧𑀺 𑀏𑀓𑁂, 𑀅𑀣𑁄𑀧𑀺 𑀯𑁂 𑀲𑀘𑁆𑀘𑀫𑀦𑀸 𑀯𑀤𑀦𑁆𑀢𑀺;

𑀯𑀸𑀤𑀜𑁆𑀘 𑀚𑀸𑀢𑀁 𑀫𑀼𑀦𑀺 𑀦𑁄 𑀉𑀧𑁂𑀢𑀺, 𑀢𑀲𑁆𑀫𑀸 𑀫𑀼𑀦𑀻 𑀦𑀢𑁆𑀣𑀺 𑀔𑀺𑀮𑁄 𑀓𑀼𑀳𑀺𑀜𑁆𑀘𑀺.

𑁭𑁮𑁭. 𑀲𑀓𑀜𑁆𑀳𑀺 𑀤𑀺𑀝𑁆𑀞𑀺𑀁 𑀓𑀣𑀫𑀘𑁆𑀘𑀬𑁂𑀬𑁆𑀬, 𑀙𑀦𑁆𑀤𑀸𑀦𑀼𑀦𑀻𑀢𑁄 𑀭𑀼𑀘𑀺𑀬𑀸 𑀦𑀺𑀯𑀺𑀝𑁆𑀞𑁄;

𑀲𑀬𑀁 𑀲𑀫𑀢𑁆𑀢𑀸𑀦𑀺 𑀧𑀓𑀼𑀩𑁆𑀩𑀫𑀸𑀦𑁄, 𑀬𑀣𑀸 𑀳𑀺 𑀚𑀸𑀦𑁂𑀬𑁆𑀬 𑀢𑀣𑀸 𑀯𑀤𑁂𑀬𑁆𑀬.

𑁭𑁮𑁮. 𑀬𑁄 𑀅𑀢𑁆𑀢𑀦𑁄 𑀲𑀻𑀮𑀯𑀢𑀸𑀦𑀺 𑀚𑀦𑁆𑀢𑀼, 𑀅𑀦𑀸𑀦𑀼𑀧𑀼𑀝𑁆𑀞𑁄𑀯 𑀧𑀭𑁂𑀲 [𑀧𑀭𑀲𑁆𑀲 (𑀓.)] 𑀧𑀸𑀯 [𑀧𑀸𑀯𑀸 (𑀲𑀻. 𑀲𑁆𑀬𑀸. 𑀧𑀻.)];

𑀅𑀦𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀢𑀫𑀸𑀳𑀼, 𑀬𑁄 𑀆𑀢𑀼𑀫𑀸𑀦𑀁 𑀲𑀬𑀫𑁂𑀯 𑀧𑀸𑀯.

𑁭𑁮𑁯. 𑀲𑀦𑁆𑀢𑁄 𑀘 𑀪𑀺𑀓𑁆𑀔𑀼 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄, 𑀇𑀢𑀺𑀳𑀦𑁆𑀢𑀺 𑀲𑀻𑀮𑁂𑀲𑀼 𑀅𑀓𑀢𑁆𑀣𑀫𑀸𑀦𑁄;

𑀢𑀫𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀬𑀲𑁆𑀲𑀼𑀲𑁆𑀲𑀤𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂.

𑁭𑁯𑁦. 𑀧𑀓𑀧𑁆𑀧𑀺𑀢𑀸 𑀲𑀗𑁆𑀔𑀢𑀸 𑀬𑀲𑁆𑀲 𑀥𑀫𑁆𑀫𑀸, 𑀧𑀼𑀭𑀓𑁆𑀔𑀢𑀸 [𑀧𑀼𑀭𑁂𑀓𑁆𑀔𑀢𑀸 (𑀲𑀻.)] 𑀲𑀦𑁆𑀢𑀺 𑀅𑀯𑀻𑀯𑀤𑀸𑀢𑀸;

𑀬𑀤𑀢𑁆𑀢𑀦𑀺 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁, 𑀢𑀁 𑀦𑀺𑀲𑁆𑀲𑀺𑀢𑁄 𑀓𑀼𑀧𑁆𑀧𑀧𑀝𑀺𑀘𑁆𑀘 𑀲𑀦𑁆𑀢𑀺𑀁.

𑁭𑁯𑁧. 𑀤𑀺𑀝𑁆𑀞𑀻𑀦𑀺𑀯𑁂𑀲𑀸 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁;

𑀢𑀲𑁆𑀫𑀸 𑀦𑀭𑁄 𑀢𑁂𑀲𑀼 𑀦𑀺𑀯𑁂𑀲𑀦𑁂𑀲𑀼, 𑀦𑀺𑀭𑀲𑁆𑀲𑀢𑀻 𑀆𑀤𑀺𑀬𑀢𑀻 𑀘 𑀥𑀫𑁆𑀫𑀁.

𑁭𑁯𑁨. 𑀥𑁄𑀦𑀲𑁆𑀲 𑀳𑀺 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂, 𑀧𑀓𑀧𑁆𑀧𑀺𑀢𑀸 𑀤𑀺𑀝𑁆𑀞𑀺 𑀪𑀯𑀸𑀪𑀯𑁂𑀲𑀼;

𑀫𑀸𑀬𑀜𑁆𑀘 𑀫𑀸𑀦𑀜𑁆𑀘 𑀧𑀳𑀸𑀬 𑀥𑁄𑀦𑁄, 𑀲 𑀓𑁂𑀦 𑀕𑀘𑁆𑀙𑁂𑀬𑁆𑀬 𑀅𑀦𑀽𑀧𑀬𑁄 𑀲𑁄.

𑁭𑁯𑁩. 𑀉𑀧𑀬𑁄 𑀳𑀺 𑀥𑀫𑁆𑀫𑁂𑀲𑀼 𑀉𑀧𑁂𑀢𑀺 𑀯𑀸𑀤𑀁, 𑀅𑀦𑀽𑀧𑀬𑀁 𑀓𑁂𑀦 𑀓𑀣𑀁 𑀯𑀤𑁂𑀬𑁆𑀬;

𑀅𑀢𑁆𑀢𑀸 𑀦𑀺𑀭𑀢𑁆𑀢𑀸 [𑀅𑀢𑁆𑀢𑀁 𑀦𑀺𑀭𑀢𑁆𑀢𑀁 (𑀩𑀳𑀽𑀲𑀼)] 𑀦 𑀳𑀺 𑀢𑀲𑁆𑀲 𑀅𑀢𑁆𑀣𑀺, 𑀅𑀥𑁄𑀲𑀺 𑀲𑁄 𑀤𑀺𑀝𑁆𑀞𑀺𑀫𑀺𑀥𑁂𑀯 𑀲𑀩𑁆𑀩𑀦𑁆𑀢𑀺.

𑀤𑀼𑀝𑁆𑀞𑀝𑁆𑀞𑀓𑀲𑀼𑀢𑁆𑀢𑀁 𑀢𑀢𑀺𑀬𑀁 𑀦𑀺𑀝𑁆𑀞𑀺𑀢𑀁.