𑁬. 𑀲𑀪𑀺𑀬𑀲𑀼𑀢𑁆𑀢𑀁

𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀪𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀧𑀼𑀭𑀸𑀡𑀲𑀸𑀮𑁄𑀳𑀺𑀢𑀸𑀬 𑀤𑁂𑀯𑀢𑀸𑀬 𑀧𑀜𑁆𑀳𑀸 𑀉𑀤𑁆𑀤𑀺𑀝𑁆𑀞𑀸 𑀳𑁄𑀦𑁆𑀢𑀺 𑁋 ‘‘𑀬𑁄 𑀢𑁂, 𑀲𑀪𑀺𑀬, 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀫𑁂 𑀧𑀜𑁆𑀳𑁂 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑁄𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑁂𑀬𑁆𑀬𑀸𑀲𑀻’’𑀢𑀺.

𑀅𑀣 𑀔𑁄 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀲𑀦𑁆𑀢𑀺𑀓𑁂 𑀢𑁂 𑀧𑀜𑁆𑀳𑁂 𑀉𑀕𑁆𑀕𑀳𑁂𑀢𑁆𑀯𑀸 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀗𑁆𑀖𑀺𑀦𑁄 𑀕𑀡𑀺𑀦𑁄 𑀕𑀡𑀸𑀘𑀭𑀺𑀬𑀸 𑀜𑀸𑀢𑀸 𑀬𑀲𑀲𑁆𑀲𑀺𑀦𑁄 𑀢𑀺𑀢𑁆𑀣𑀓𑀭𑀸 𑀲𑀸𑀥𑀼𑀲𑀫𑁆𑀫𑀢𑀸 𑀩𑀳𑀼𑀚𑀦𑀲𑁆𑀲, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀫𑀓𑁆𑀔𑀮𑀺𑀕𑁄𑀲𑀸𑀮𑁄 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄 𑀧𑀓𑀼𑀥𑁄 [𑀓𑀓𑀼𑀥𑁄 (𑀲𑀻.) 𑀧𑀓𑀼𑀤𑁆𑀥𑁄 (𑀲𑁆𑀬𑀸. 𑀓𑀁.)] 𑀓𑀘𑁆𑀘𑀸𑀦𑁄 𑀲𑀜𑁆𑀘𑀬𑁄 [𑀲𑀜𑁆𑀚𑀬𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 [𑀩𑁂𑀮𑁆𑀮𑀝𑁆𑀞𑀺𑀧𑀼𑀢𑁆𑀢𑁄 (𑀲𑀻. 𑀧𑀻.), 𑀯𑁂𑀴𑀝𑁆𑀞𑀧𑀼𑀢𑁆𑀢𑁄 (𑀲𑁆𑀬𑀸.)] 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 [𑀦𑀸𑀢𑀧𑀼𑀢𑁆𑀢𑁄 (𑀲𑀻. 𑀧𑀻.)], 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀧𑀜𑁆𑀳𑁂 𑀧𑀼𑀘𑁆𑀙𑀢𑀺. 𑀢𑁂 𑀲𑀪𑀺𑀬𑁂𑀦 𑀧𑀭𑀺𑀩𑁆𑀩𑀸𑀚𑀓𑁂𑀦 𑀧𑀜𑁆𑀳𑁂 𑀧𑀼𑀝𑁆𑀞𑀸 𑀦 𑀲𑀫𑁆𑀧𑀸𑀬𑀦𑁆𑀢𑀺; 𑀅𑀲𑀫𑁆𑀧𑀸𑀬𑀦𑁆𑀢𑀸 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀦𑁆𑀢𑀺. 𑀅𑀧𑀺 𑀘 𑀲𑀪𑀺𑀬𑀁 𑀬𑁂𑀯 𑀧𑀭𑀺𑀩𑁆𑀩𑀸𑀚𑀓𑀁 𑀧𑀝𑀺𑀧𑀼𑀘𑁆𑀙𑀦𑁆𑀢𑀺.

𑀅𑀣 𑀔𑁄 𑀲𑀪𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑁂 𑀔𑁄 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀗𑁆𑀖𑀺𑀦𑁄 𑀕𑀡𑀺𑀦𑁄 𑀕𑀡𑀸𑀘𑀭𑀺𑀬𑀸 𑀜𑀸𑀢𑀸 𑀬𑀲𑀲𑁆𑀲𑀺𑀦𑁄 𑀢𑀺𑀢𑁆𑀣𑀓𑀭𑀸 𑀲𑀸𑀥𑀼𑀲𑀫𑁆𑀫𑀢𑀸 𑀩𑀳𑀼𑀚𑀦𑀲𑁆𑀲, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀽𑀭𑀡𑁄 𑀓𑀲𑁆𑀲𑀧𑁄…𑀧𑁂… 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄, 𑀢𑁂 𑀫𑀬𑀸 𑀧𑀜𑁆𑀳𑁂 𑀧𑀼𑀝𑁆𑀞𑀸 𑀦 𑀲𑀫𑁆𑀧𑀸𑀬𑀦𑁆𑀢𑀺, 𑀅𑀲𑀫𑁆𑀧𑀸𑀬𑀦𑁆𑀢𑀸 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀦𑁆𑀢𑀺; 𑀅𑀧𑀺 𑀘 𑀫𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀦𑁆𑀢𑀺. 𑀬𑀦𑁆𑀦𑀽𑀦𑁆𑀦𑀸𑀳𑀁 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀲𑀪𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀫𑁆𑀧𑀺 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀲𑀗𑁆𑀖𑀻 𑀘𑁂𑀯 𑀕𑀡𑀻 𑀘 𑀕𑀡𑀸𑀘𑀭𑀺𑀬𑁄 𑀘 𑀜𑀸𑀢𑁄 𑀬𑀲𑀲𑁆𑀲𑀻 𑀢𑀺𑀢𑁆𑀣𑀓𑀭𑁄 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲; 𑀬𑀁𑀦𑀽𑀦𑀸𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀫𑁂 𑀧𑀜𑁆𑀳𑁂 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀲𑀪𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑁂𑀧𑀺 𑀔𑁄 𑀢𑁂 [𑀬𑁂 𑀔𑁄 𑀢𑁂 (𑀲𑁆𑀬𑀸.), 𑀬𑀁 𑀔𑁄 𑀢𑁂 (𑀓.)] 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀚𑀺𑀡𑁆𑀡𑀸 𑀯𑀼𑀟𑁆𑀠𑀸 𑀫𑀳𑀮𑁆𑀮𑀓𑀸 𑀅𑀤𑁆𑀥𑀕𑀢𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸 𑀣𑁂𑀭𑀸 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀗𑁆𑀖𑀺𑀦𑁄 𑀕𑀡𑀺𑀦𑁄 𑀕𑀡𑀸𑀘𑀭𑀺𑀬𑀸 𑀜𑀸𑀢𑀸 𑀬𑀲𑀲𑁆𑀲𑀺𑀦𑁄 𑀢𑀺𑀢𑁆𑀣𑀓𑀭𑀸 𑀲𑀸𑀥𑀼𑀲𑀫𑁆𑀫𑀢𑀸 𑀩𑀳𑀼𑀚𑀦𑀲𑁆𑀲, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀽𑀭𑀡𑁄 𑀓𑀲𑁆𑀲𑀧𑁄…𑀧𑁂. … 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄, 𑀢𑁂𑀧𑀺 𑀫𑀬𑀸 𑀧𑀜𑁆𑀳𑁂 𑀧𑀼𑀝𑁆𑀞𑀸 𑀦 𑀲𑀫𑁆𑀧𑀸𑀬𑀦𑁆𑀢𑀺, 𑀅𑀲𑀫𑁆𑀧𑀸𑀬𑀦𑁆𑀢𑀸 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀦𑁆𑀢𑀺, 𑀅𑀧𑀺 𑀘 𑀫𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀦𑁆𑀢𑀺; 𑀓𑀺𑀁 𑀧𑀦 𑀫𑁂 𑀲𑀫𑀡𑁄 𑀕𑁄𑀢𑀫𑁄 𑀇𑀫𑁂 𑀧𑀜𑁆𑀳𑁂 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑀺𑀲𑁆𑀲𑀢𑀺! 𑀲𑀫𑀡𑁄 𑀳𑀺 𑀕𑁄𑀢𑀫𑁄 𑀤𑀳𑀭𑁄 𑀘𑁂𑀯 𑀚𑀸𑀢𑀺𑀬𑀸, 𑀦𑀯𑁄 𑀘 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺.

𑀅𑀣 𑀔𑁄 𑀲𑀪𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀫𑀡𑁄 𑀔𑁄 [𑀲𑀫𑀡𑁄 𑀔𑁄 𑀕𑁄𑀢𑀫𑁄 (𑀲𑁆𑀬𑀸. 𑀓.)] 𑀤𑀳𑀭𑁄𑀢𑀺 𑀦 𑀉𑀜𑁆𑀜𑀸𑀢𑀩𑁆𑀩𑁄 𑀦 𑀧𑀭𑀺𑀪𑁄𑀢𑀩𑁆𑀩𑁄. 𑀤𑀳𑀭𑁄𑀧𑀺 𑀘𑁂𑀲 𑀲𑀫𑀡𑁄 𑀕𑁄𑀢𑀫𑁄 𑀫𑀳𑀺𑀤𑁆𑀥𑀺𑀓𑁄 𑀳𑁄𑀢𑀺 𑀫𑀳𑀸𑀦𑀼𑀪𑀸𑀯𑁄, 𑀬𑀁𑀦𑀽𑀦𑀸𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀫𑁂 𑀧𑀜𑁆𑀳𑁂 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀭𑀸𑀚𑀕𑀳𑀁 𑀯𑁂𑀴𑀼𑀯𑀦𑀁 𑀓𑀮𑀦𑁆𑀤𑀓𑀦𑀺𑀯𑀸𑀧𑁄, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁫𑁧𑁫. ‘‘𑀓𑀗𑁆𑀔𑀻 𑀯𑁂𑀘𑀺𑀓𑀺𑀘𑁆𑀙𑀻 𑀆𑀕𑀫𑀁, (𑀇𑀢𑀺 𑀲𑀪𑀺𑀬𑁄)

𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑀼𑀁 𑀅𑀪𑀺𑀓𑀗𑁆𑀔𑀫𑀸𑀦𑁄;

𑀢𑁂𑀲𑀦𑁆𑀢𑀓𑀭𑁄 𑀪𑀯𑀸𑀳𑀺 [𑀪𑀯𑀸𑀳𑀺 𑀫𑁂 (𑀧𑀻. 𑀓.)] 𑀧𑀜𑁆𑀳𑁂 𑀫𑁂 𑀧𑀼𑀝𑁆𑀞𑁄,

𑀅𑀦𑀼𑀧𑀼𑀩𑁆𑀩𑀁 𑀅𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀳𑀺 𑀫𑁂’’.

𑁫𑁧𑁬. ‘‘𑀤𑀽𑀭𑀢𑁄 𑀆𑀕𑀢𑁄𑀲𑀺 𑀲𑀪𑀺𑀬, (𑀇𑀢𑀺 𑀪𑀕𑀯𑀸)

𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑀼𑀁 𑀅𑀪𑀺𑀓𑀗𑁆𑀔𑀫𑀸𑀦𑁄;

𑀢𑁂𑀲𑀦𑁆𑀢𑀓𑀭𑁄 𑀪𑀯𑀸𑀫𑀺 [𑀢𑁂𑀲𑀫𑀦𑁆𑀢𑀓𑀭𑁄𑀫𑀺 𑀢𑁂 (𑀓.)] 𑀧𑀜𑁆𑀳𑁂 𑀢𑁂 𑀧𑀼𑀝𑁆𑀞𑁄,

𑀅𑀦𑀼𑀧𑀼𑀩𑁆𑀩𑀁 𑀅𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀫𑀺 𑀢𑁂.

𑁫𑁧𑁭. ‘‘𑀧𑀼𑀘𑁆𑀙 𑀫𑀁 𑀲𑀪𑀺𑀬 𑀧𑀜𑁆𑀳𑀁, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺;

𑀢𑀲𑁆𑀲 𑀢𑀲𑁆𑀲𑁂𑀯 𑀧𑀜𑁆𑀳𑀲𑁆𑀲, 𑀅𑀳𑀁 𑀅𑀦𑁆𑀢𑀁 𑀓𑀭𑁄𑀫𑀺 𑀢𑁂’’𑀢𑀺.

𑀅𑀣 𑀔𑁄 𑀲𑀪𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄! 𑀬𑀁 𑀯𑀢𑀸𑀳𑀁 𑀅𑀜𑁆𑀜𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀑𑀓𑀸𑀲𑀓𑀫𑁆𑀫𑀫𑀢𑁆𑀢𑀫𑁆𑀧𑀺 [𑀑𑀓𑀸𑀲𑀫𑀢𑁆𑀢𑀫𑁆𑀧𑀺 (𑀲𑀻. 𑀧𑀻.)] 𑀦𑀸𑀮𑀢𑁆𑀣𑀁 𑀢𑀁 𑀫𑁂 𑀇𑀤𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀑𑀓𑀸𑀲𑀓𑀫𑁆𑀫𑀁 𑀓𑀢’’𑀦𑁆𑀢𑀺. 𑀅𑀢𑁆𑀢𑀫𑀦𑁄 𑀧𑀫𑀼𑀤𑀺𑀢𑁄 𑀉𑀤𑀕𑁆𑀕𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

𑁫𑁧𑁮. ‘‘𑀓𑀺𑀁 𑀧𑀢𑁆𑀢𑀺𑀦𑀫𑀸𑀳𑀼 𑀪𑀺𑀓𑁆𑀔𑀼𑀦𑀁, (𑀇𑀢𑀺 𑀲𑀪𑀺𑀬𑁄)

𑀲𑁄𑀭𑀢𑀁 𑀓𑁂𑀦 𑀓𑀣𑀜𑁆𑀘 𑀤𑀦𑁆𑀢𑀫𑀸𑀳𑀼;

𑀩𑀼𑀤𑁆𑀥𑁄𑀢𑀺 𑀓𑀣𑀁 𑀧𑀯𑀼𑀘𑁆𑀘𑀢𑀺,

𑀧𑀼𑀝𑁆𑀞𑁄 𑀫𑁂 𑀪𑀕𑀯𑀸 𑀩𑁆𑀬𑀸𑀓𑀭𑁄𑀳𑀺’’.

𑁫𑁧𑁯. ‘‘𑀧𑀚𑁆𑀚𑁂𑀦 𑀓𑀢𑁂𑀦 𑀅𑀢𑁆𑀢𑀦𑀸, (𑀲𑀪𑀺𑀬𑀸𑀢𑀺 𑀪𑀕𑀯𑀸)

𑀧𑀭𑀺𑀦𑀺𑀩𑁆𑀩𑀸𑀦𑀕𑀢𑁄 𑀯𑀺𑀢𑀺𑀡𑁆𑀡𑀓𑀗𑁆𑀔𑁄;

𑀯𑀺𑀪𑀯𑀜𑁆𑀘 𑀪𑀯𑀜𑁆𑀘 𑀯𑀺𑀧𑁆𑀧𑀳𑀸𑀬,

𑀯𑀼𑀲𑀺𑀢𑀯𑀸 𑀔𑀻𑀡𑀧𑀼𑀦𑀩𑁆𑀪𑀯𑁄 𑀲 𑀪𑀺𑀓𑁆𑀔𑀼.

𑁫𑁨𑁦. ‘‘𑀲𑀩𑁆𑀩𑀢𑁆𑀣 𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸, 𑀦 𑀲𑁄 𑀳𑀺𑀁𑀲𑀢𑀺 𑀓𑀜𑁆𑀘𑀺 𑀲𑀩𑁆𑀩𑀮𑁄𑀓𑁂;

𑀢𑀺𑀡𑁆𑀡𑁄 𑀲𑀫𑀡𑁄 𑀅𑀦𑀸𑀯𑀺𑀮𑁄, 𑀉𑀲𑁆𑀲𑀤𑀸 𑀬𑀲𑁆𑀲 𑀦 𑀲𑀦𑁆𑀢𑀺 𑀲𑁄𑀭𑀢𑁄 𑀲𑁄.

𑁫𑁨𑁧. ‘‘𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺, 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀮𑁄𑀓𑁂;

𑀦𑀺𑀩𑁆𑀩𑀺𑀚𑁆𑀛 𑀇𑀫𑀁 𑀧𑀭𑀜𑁆𑀘 𑀮𑁄𑀓𑀁, 𑀓𑀸𑀮𑀁 𑀓𑀗𑁆𑀔𑀢𑀺 𑀪𑀸𑀯𑀺𑀢𑁄 𑀲 𑀤𑀦𑁆𑀢𑁄.

𑁫𑁨𑁨. ‘‘𑀓𑀧𑁆𑀧𑀸𑀦𑀺 𑀯𑀺𑀘𑁂𑀬𑁆𑀬 𑀓𑁂𑀯𑀮𑀸𑀦𑀺, 𑀲𑀁𑀲𑀸𑀭𑀁 𑀤𑀼𑀪𑀬𑀁 𑀘𑀼𑀢𑀽𑀧𑀧𑀸𑀢𑀁;

𑀯𑀺𑀕𑀢𑀭𑀚𑀫𑀦𑀗𑁆𑀕𑀡𑀁 𑀯𑀺𑀲𑀼𑀤𑁆𑀥𑀁, 𑀧𑀢𑁆𑀢𑀁 𑀚𑀸𑀢𑀺𑀔𑀬𑀁 𑀢𑀫𑀸𑀳𑀼 𑀩𑀼𑀤𑁆𑀥’’𑀦𑁆𑀢𑀺.

𑀅𑀣 𑀔𑁄 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀅𑀢𑁆𑀢𑀫𑀦𑁄 𑀧𑀫𑀼𑀤𑀺𑀢𑁄 𑀉𑀤𑀕𑁆𑀕𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺𑀁 [𑀉𑀢𑁆𑀢𑀭𑀺 (𑀓.)] 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

𑁫𑁨𑁩. ‘‘𑀓𑀺𑀁 𑀧𑀢𑁆𑀢𑀺𑀦𑀫𑀸𑀳𑀼 𑀩𑁆𑀭𑀸𑀳𑁆𑀫𑀡𑀁, (𑀇𑀢𑀺 𑀲𑀪𑀺𑀬𑁄)

𑀲𑀫𑀡𑀁 𑀓𑁂𑀦 𑀓𑀣𑀜𑁆𑀘 𑀦𑁆𑀳𑀸𑀢𑀓𑁄𑀢𑀺;

𑀦𑀸𑀕𑁄𑀢𑀺 𑀓𑀣𑀁 𑀧𑀯𑀼𑀘𑁆𑀘𑀢𑀺,

𑀧𑀼𑀝𑁆𑀞𑁄 𑀫𑁂 𑀪𑀕𑀯𑀸 𑀩𑁆𑀬𑀸𑀓𑀭𑁄𑀳𑀺’’.

𑁫𑁨𑁪. ‘‘𑀩𑀸𑀳𑀺𑀢𑁆𑀯𑀸 𑀲𑀩𑁆𑀩𑀧𑀸𑀧𑀓𑀸𑀦𑀺, (𑀲𑀪𑀺𑀬𑀸𑀢𑀺 𑀪𑀕𑀯𑀸)

𑀯𑀺𑀫𑀮𑁄 𑀲𑀸𑀥𑀼𑀲𑀫𑀸𑀳𑀺𑀢𑁄 𑀞𑀺𑀢𑀢𑁆𑀢𑁄;

𑀲𑀁𑀲𑀸𑀭𑀫𑀢𑀺𑀘𑁆𑀘 𑀓𑁂𑀯𑀮𑀻 𑀲𑁄,

𑀅𑀲𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸.

𑁫𑁨𑁫. ‘‘𑀲𑀫𑀺𑀢𑀸𑀯𑀺 𑀧𑀳𑀸𑀬 𑀧𑀼𑀜𑁆𑀜𑀧𑀸𑀧𑀁, 𑀯𑀺𑀭𑀚𑁄 𑀜𑀢𑁆𑀯𑀸 𑀇𑀫𑀁 𑀧𑀭𑀜𑁆𑀘 𑀮𑁄𑀓𑀁;

𑀚𑀸𑀢𑀺𑀫𑀭𑀡𑀁 𑀉𑀧𑀸𑀢𑀺𑀯𑀢𑁆𑀢𑁄, 𑀲𑀫𑀡𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸.

𑁫𑁨𑁬. ‘‘𑀦𑀺𑀦𑁆𑀳𑀸𑀬 [𑀦𑀺𑀦𑀳𑀸𑀬 (𑀲𑁆𑀬𑀸.)] 𑀲𑀩𑁆𑀩𑀧𑀸𑀧𑀓𑀸𑀦𑀺, 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀮𑁄𑀓𑁂;

𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀓𑀧𑁆𑀧𑀺𑀬𑁂𑀲𑀼, 𑀓𑀧𑁆𑀧𑀁 𑀦𑁂𑀢𑀺 𑀢𑀫𑀸𑀳𑀼 𑀦𑁆𑀳𑀸𑀢𑀓𑁄’’𑀢𑀺.

𑁫𑁨𑁭. ‘‘𑀆𑀕𑀼𑀁 𑀦 𑀓𑀭𑁄𑀢𑀺 𑀓𑀺𑀜𑁆𑀘𑀺 𑀮𑁄𑀓𑁂, 𑀲𑀩𑁆𑀩𑀲𑀁𑀬𑁄𑀕𑁂 [𑀲𑀩𑁆𑀩𑀬𑁄𑀕𑁂 (𑀓.)] 𑀯𑀺𑀲𑀚𑁆𑀚 𑀩𑀦𑁆𑀥𑀦𑀸𑀦𑀺;

𑀲𑀩𑁆𑀩𑀢𑁆𑀣 𑀦 𑀲𑀚𑁆𑀚𑀢𑀻 𑀯𑀺𑀫𑀼𑀢𑁆𑀢𑁄, 𑀦𑀸𑀕𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸’’𑀢𑀺.

𑀅𑀣 𑀔𑁄 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄…𑀧𑁂… 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

𑁫𑁨𑁮. ‘‘𑀓𑀁 𑀔𑁂𑀢𑁆𑀢𑀚𑀺𑀦𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸, (𑀇𑀢𑀺 𑀲𑀪𑀺𑀬𑁄)

𑀓𑀼𑀲𑀮𑀁 𑀓𑁂𑀦 𑀓𑀣𑀜𑁆𑀘 𑀧𑀡𑁆𑀟𑀺𑀢𑁄𑀢𑀺;

𑀫𑀼𑀦𑀺 𑀦𑀸𑀫 𑀓𑀣𑀁 𑀧𑀯𑀼𑀘𑁆𑀘𑀢𑀺,

𑀧𑀼𑀝𑁆𑀞𑁄 𑀫𑁂 𑀪𑀕𑀯𑀸 𑀩𑁆𑀬𑀸𑀓𑀭𑁄𑀳𑀺’’.

𑁫𑁨𑁯. ‘‘𑀔𑁂𑀢𑁆𑀢𑀸𑀦𑀺 𑀯𑀺𑀘𑁂𑀬𑁆𑀬 𑀓𑁂𑀯𑀮𑀸𑀦𑀺, (𑀲𑀪𑀺𑀬𑀸𑀢𑀺 𑀪𑀕𑀯𑀸)

𑀤𑀺𑀩𑁆𑀩𑀁 𑀫𑀸𑀦𑀼𑀲𑀓𑀜𑁆𑀘 𑀩𑁆𑀭𑀳𑁆𑀫𑀔𑁂𑀢𑁆𑀢𑀁;

𑀲𑀩𑁆𑀩𑀔𑁂𑀢𑁆𑀢𑀫𑀽𑀮𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑁄,

𑀔𑁂𑀢𑁆𑀢𑀚𑀺𑀦𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸.

𑁫𑁩𑁦. ‘‘𑀓𑁄𑀲𑀸𑀦𑀺 𑀯𑀺𑀘𑁂𑀬𑁆𑀬 𑀓𑁂𑀯𑀮𑀸𑀦𑀺, 𑀤𑀺𑀩𑁆𑀩𑀁 𑀫𑀸𑀦𑀼𑀲𑀓𑀜𑁆𑀘 𑀩𑁆𑀭𑀳𑁆𑀫𑀓𑁄𑀲𑀁;

𑀲𑀩𑁆𑀩𑀓𑁄𑀲𑀫𑀽𑀮𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑁄, 𑀓𑀼𑀲𑀮𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸.

𑁫𑁩𑁧. ‘‘𑀤𑀼𑀪𑀬𑀸𑀦𑀺 𑀯𑀺𑀘𑁂𑀬𑁆𑀬 𑀧𑀡𑁆𑀟𑀭𑀸𑀦𑀺, 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀲𑀼𑀤𑁆𑀥𑀺𑀧𑀜𑁆𑀜𑁄;

𑀓𑀡𑁆𑀳𑀁 𑀲𑀼𑀓𑁆𑀓𑀁 𑀉𑀧𑀸𑀢𑀺𑀯𑀢𑁆𑀢𑁄, 𑀧𑀡𑁆𑀟𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸.

𑁫𑁩𑁨. ‘‘𑀅𑀲𑀢𑀜𑁆𑀘 𑀲𑀢𑀜𑁆𑀘 𑀜𑀢𑁆𑀯𑀸 𑀥𑀫𑁆𑀫𑀁, 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀮𑁄𑀓𑁂;

𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀽𑀚𑀦𑀻𑀬𑁄, 𑀲𑀗𑁆𑀕𑀁 𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀻’’𑀢𑀺.

𑀅𑀣 𑀔𑁄 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄…𑀧𑁂… 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

𑁫𑁩𑁩. ‘‘𑀓𑀺𑀁 𑀧𑀢𑁆𑀢𑀺𑀦𑀫𑀸𑀳𑀼 𑀯𑁂𑀤𑀕𑀼𑀁, (𑀇𑀢𑀺 𑀲𑀪𑀺𑀬𑁄)

𑀅𑀦𑀼𑀯𑀺𑀤𑀺𑀢𑀁 𑀓𑁂𑀦 𑀓𑀣𑀜𑁆𑀘 𑀯𑀻𑀭𑀺𑀬𑀯𑀸𑀢𑀺;

𑀆𑀚𑀸𑀦𑀺𑀬𑁄 𑀓𑀺𑀦𑁆𑀢𑀺 𑀦𑀸𑀫 𑀳𑁄𑀢𑀺,

𑀧𑀼𑀝𑁆𑀞𑁄 𑀫𑁂 𑀪𑀕𑀯𑀸 𑀩𑁆𑀬𑀸𑀓𑀭𑁄𑀳𑀺’’.

𑁫𑁩𑁪. ‘‘𑀯𑁂𑀤𑀸𑀦𑀺 𑀯𑀺𑀘𑁂𑀬𑁆𑀬 𑀓𑁂𑀯𑀮𑀸𑀦𑀺, (𑀲𑀪𑀺𑀬𑀸𑀢𑀺 𑀪𑀕𑀯𑀸)

𑀲𑀫𑀡𑀸𑀦𑀁 𑀬𑀸𑀦𑀺𑀥𑀢𑁆𑀣𑀺 [𑀬𑀸𑀦𑀺𑀧𑀢𑁆𑀣𑀺 (𑀲𑀻. 𑀲𑁆𑀬𑀸. 𑀧𑀻.)] 𑀩𑁆𑀭𑀸𑀳𑁆𑀫𑀡𑀸𑀦𑀁;

𑀲𑀩𑁆𑀩𑀯𑁂𑀤𑀦𑀸𑀲𑀼 𑀯𑀻𑀢𑀭𑀸𑀕𑁄,

𑀲𑀩𑁆𑀩𑀁 𑀯𑁂𑀤𑀫𑀢𑀺𑀘𑁆𑀘 𑀯𑁂𑀤𑀕𑀽 𑀲𑁄.

𑁫𑁩𑁫. ‘‘𑀅𑀦𑀼𑀯𑀺𑀘𑁆𑀘 𑀧𑀧𑀜𑁆𑀘𑀦𑀸𑀫𑀭𑀽𑀧𑀁, 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀭𑁄𑀕𑀫𑀽𑀮𑀁;

𑀲𑀩𑁆𑀩𑀭𑁄𑀕𑀫𑀽𑀮𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑁄, 𑀅𑀦𑀼𑀯𑀺𑀤𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸.

𑁫𑁩𑁬. ‘‘𑀯𑀺𑀭𑀢𑁄 𑀇𑀥 𑀲𑀩𑁆𑀩𑀧𑀸𑀧𑀓𑁂𑀳𑀺, 𑀦𑀺𑀭𑀬𑀤𑀼𑀓𑁆𑀔𑀁 𑀅𑀢𑀺𑀘𑁆𑀘 𑀯𑀻𑀭𑀺𑀬𑀯𑀸 𑀲𑁄;

𑀲𑁄 𑀯𑀻𑀭𑀺𑀬𑀯𑀸 𑀧𑀥𑀸𑀦𑀯𑀸, 𑀥𑀻𑀭𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸.

𑁫𑁩𑁭. ‘‘𑀬𑀲𑁆𑀲𑀲𑁆𑀲𑀼 𑀮𑀼𑀦𑀸𑀦𑀺 𑀩𑀦𑁆𑀥𑀦𑀸𑀦𑀺, 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀲𑀗𑁆𑀕𑀫𑀽𑀮𑀁;

𑀲𑀩𑁆𑀩𑀲𑀗𑁆𑀕𑀫𑀽𑀮𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑁄, 𑀆𑀚𑀸𑀦𑀺𑀬𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸’’𑀢𑀺.

𑀅𑀣 𑀔𑁄 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄…𑀧𑁂… 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

𑁫𑁩𑁮. ‘‘𑀓𑀺𑀁 𑀧𑀢𑁆𑀢𑀺𑀦𑀫𑀸𑀳𑀼 𑀲𑁄𑀢𑁆𑀢𑀺𑀬𑀁, (𑀇𑀢𑀺 𑀲𑀪𑀺𑀬𑁄)

𑀅𑀭𑀺𑀬𑀁 𑀓𑁂𑀦 𑀓𑀣𑀜𑁆𑀘 𑀘𑀭𑀡𑀯𑀸𑀢𑀺;

𑀧𑀭𑀺𑀩𑁆𑀩𑀸𑀚𑀓𑁄 𑀓𑀺𑀦𑁆𑀢𑀺 𑀦𑀸𑀫 𑀳𑁄𑀢𑀺,

𑀧𑀼𑀝𑁆𑀞𑁄 𑀫𑁂 𑀪𑀕𑀯𑀸 𑀩𑁆𑀬𑀸𑀓𑀭𑁄𑀳𑀺’’.

𑁫𑁩𑁯. ‘‘𑀲𑀼𑀢𑁆𑀯𑀸 𑀲𑀩𑁆𑀩𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀮𑁄𑀓𑁂, (𑀲𑀪𑀺𑀬𑀸𑀢𑀺 𑀪𑀕𑀯𑀸)

𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀬𑀤𑀢𑁆𑀣𑀺 𑀓𑀺𑀜𑁆𑀘𑀺;

𑀅𑀪𑀺𑀪𑀼𑀁 𑀅𑀓𑀣𑀁𑀓𑀣𑀺𑀁 𑀯𑀺𑀫𑀼𑀢𑁆𑀢𑀁,

𑀅𑀦𑀺𑀖𑀁 𑀲𑀩𑁆𑀩𑀥𑀺𑀫𑀸𑀳𑀼 𑀲𑁄𑀢𑁆𑀢𑀺𑀬𑁄𑀢𑀺.

𑁫𑁪𑁦. ‘‘𑀙𑁂𑀢𑁆𑀯𑀸 𑀆𑀲𑀯𑀸𑀦𑀺 𑀆𑀮𑀬𑀸𑀦𑀺, 𑀯𑀺𑀤𑁆𑀯𑀸 𑀲𑁄 𑀦 𑀉𑀧𑁂𑀢𑀺 𑀕𑀩𑁆𑀪𑀲𑁂𑀬𑁆𑀬𑀁;

𑀲𑀜𑁆𑀜𑀁 𑀢𑀺𑀯𑀺𑀥𑀁 𑀧𑀦𑀼𑀚𑁆𑀚 𑀧𑀗𑁆𑀓𑀁, 𑀓𑀧𑁆𑀧𑀁 𑀦𑁂𑀢𑀺 𑀢𑀫𑀸𑀳𑀼 𑀅𑀭𑀺𑀬𑁄𑀢𑀺.

𑁫𑁪𑁧. ‘‘𑀬𑁄 𑀇𑀥 𑀘𑀭𑀡𑁂𑀲𑀼 𑀧𑀢𑁆𑀢𑀺𑀧𑀢𑁆𑀢𑁄, 𑀓𑀼𑀲𑀮𑁄 𑀲𑀩𑁆𑀩𑀤𑀸 𑀆𑀚𑀸𑀦𑀸𑀢𑀺 [𑀆𑀚𑀸𑀦𑀺 (𑀲𑁆𑀬𑀸.)] 𑀥𑀫𑁆𑀫𑀁;

𑀲𑀩𑁆𑀩𑀢𑁆𑀣 𑀦 𑀲𑀚𑁆𑀚𑀢𑀺 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 [𑀯𑀺𑀫𑀼𑀢𑁆𑀢𑁄 (𑀲𑀻.)], 𑀧𑀝𑀺𑀖𑀸 𑀬𑀲𑁆𑀲 𑀦 𑀲𑀦𑁆𑀢𑀺 𑀘𑀭𑀡𑀯𑀸 𑀲𑁄.

𑁫𑁪𑁨. ‘‘𑀤𑀼𑀓𑁆𑀔𑀯𑁂𑀧𑀓𑁆𑀓𑀁 𑀬𑀤𑀢𑁆𑀣𑀺 𑀓𑀫𑁆𑀫𑀁, 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀯𑀸𑀧𑀺 [𑀢𑀺𑀭𑀺𑀬𑀜𑁆𑀘𑀸𑀧𑀺 (𑀲𑁆𑀬𑀸.)] 𑀫𑀚𑁆𑀛𑁂;

𑀧𑀭𑀺𑀩𑁆𑀩𑀸𑀚𑀬𑀺𑀢𑁆𑀯𑀸 𑀧𑀭𑀺𑀜𑁆𑀜𑀘𑀸𑀭𑀻, 𑀫𑀸𑀬𑀁 𑀫𑀸𑀦𑀫𑀣𑁄𑀧𑀺 𑀮𑁄𑀪𑀓𑁄𑀥𑀁;

𑀧𑀭𑀺𑀬𑀦𑁆𑀢𑀫𑀓𑀸𑀲𑀺 𑀦𑀸𑀫𑀭𑀽𑀧𑀁, 𑀢𑀁 𑀧𑀭𑀺𑀩𑁆𑀩𑀸𑀚𑀓𑀫𑀸𑀳𑀼 𑀧𑀢𑁆𑀢𑀺𑀧𑀢𑁆𑀢’’𑀦𑁆𑀢𑀺.

𑀅𑀣 𑀔𑁄 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀅𑀢𑁆𑀢𑀫𑀦𑁄 𑀧𑀫𑀼𑀤𑀺𑀢𑁄 𑀉𑀤𑀕𑁆𑀕𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺 𑁋

𑁫𑁪𑁩. ‘‘𑀬𑀸𑀦𑀺 𑀘 𑀢𑀻𑀡𑀺 𑀬𑀸𑀦𑀺 𑀘 𑀲𑀝𑁆𑀞𑀺, 𑀲𑀫𑀡𑀧𑁆𑀧𑀯𑀸𑀤𑀲𑀺𑀢𑀸𑀦𑀺 [𑀲𑀫𑀡𑀧𑁆𑀧𑀯𑀸𑀤𑀦𑀺𑀲𑁆𑀲𑀺𑀢𑀸𑀦𑀺 (𑀲𑁆𑀬𑀸. 𑀓.)] 𑀪𑀽𑀭𑀺𑀧𑀜𑁆𑀜;

𑀲𑀜𑁆𑀜𑀓𑁆𑀔𑀭𑀲𑀜𑁆𑀜𑀦𑀺𑀲𑁆𑀲𑀺𑀢𑀸𑀦𑀺, 𑀑𑀲𑀭𑀡𑀸𑀦𑀺 𑀯𑀺𑀦𑁂𑀬𑁆𑀬 𑀑𑀖𑀢𑀫𑀕𑀸.

𑁫𑁪𑁪. ‘‘𑀅𑀦𑁆𑀢𑀕𑀽𑀲𑀺 𑀧𑀸𑀭𑀕𑀽 [𑀧𑀸𑀭𑀕𑀽𑀲𑀺 (𑀲𑁆𑀬𑀸. 𑀧𑀻. 𑀓.)] 𑀤𑀼𑀓𑁆𑀔𑀲𑁆𑀲, 𑀅𑀭𑀳𑀸𑀲𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑀻𑀡𑀸𑀲𑀯𑀁 𑀢𑀁 𑀫𑀜𑁆𑀜𑁂;

𑀚𑀼𑀢𑀺𑀫𑀸 𑀫𑀼𑀢𑀺𑀫𑀸 𑀧𑀳𑀽𑀢𑀧𑀜𑁆𑀜𑁄, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑀁 𑀅𑀢𑀸𑀭𑁂𑀲𑀺 𑀫𑀁.

𑁫𑁪𑁫. ‘‘𑀬𑀁 𑀫𑁂 𑀓𑀗𑁆𑀔𑀺𑀢𑀫𑀜𑁆𑀜𑀸𑀲𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀫𑀁 𑀢𑀸𑀭𑀬𑀺 𑀦𑀫𑁄 𑀢𑁂;

𑀫𑀼𑀦𑀺 𑀫𑁄𑀦𑀧𑀣𑁂𑀲𑀼 𑀧𑀢𑁆𑀢𑀺𑀧𑀢𑁆𑀢, 𑀅𑀔𑀺𑀮 𑀆𑀤𑀺𑀘𑁆𑀘𑀩𑀦𑁆𑀥𑀼 𑀲𑁄𑀭𑀢𑁄𑀲𑀺.

𑁫𑁪𑁬. ‘‘𑀬𑀸 𑀫𑁂 𑀓𑀗𑁆𑀔𑀸 𑀧𑀼𑀭𑁂 𑀆𑀲𑀺, 𑀢𑀁 𑀫𑁂 𑀩𑁆𑀬𑀸𑀓𑀸𑀲𑀺 𑀘𑀓𑁆𑀔𑀼𑀫𑀸;

𑀅𑀤𑁆𑀥𑀸 𑀫𑀼𑀦𑀻𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀦𑀢𑁆𑀣𑀺 𑀦𑀻𑀯𑀭𑀡𑀸 𑀢𑀯.

𑁫𑁪𑁭. ‘‘𑀉𑀧𑀸𑀬𑀸𑀲𑀸 𑀘 𑀢𑁂 𑀲𑀩𑁆𑀩𑁂, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀴𑀻𑀓𑀢𑀸;

𑀲𑀻𑀢𑀺𑀪𑀽𑀢𑁄 𑀤𑀫𑀧𑁆𑀧𑀢𑁆𑀢𑁄, 𑀥𑀺𑀢𑀺𑀫𑀸 𑀲𑀘𑁆𑀘𑀦𑀺𑀓𑁆𑀓𑀫𑁄.

𑁫𑁪𑁮. ‘‘𑀢𑀲𑁆𑀲 𑀢𑁂 𑀦𑀸𑀕𑀦𑀸𑀕𑀲𑁆𑀲, 𑀫𑀳𑀸𑀯𑀻𑀭𑀲𑁆𑀲 𑀪𑀸𑀲𑀢𑁄;

𑀲𑀩𑁆𑀩𑁂 𑀤𑁂𑀯𑀸𑀦𑀼𑀫𑁄𑀤𑀦𑁆𑀢𑀺, 𑀉𑀪𑁄 𑀦𑀸𑀭𑀤𑀧𑀩𑁆𑀩𑀢𑀸.

𑁫𑁪𑁯. ‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀢𑁂 𑀧𑀝𑀺𑀧𑀼𑀕𑁆𑀕𑀮𑁄.

𑁫𑁫𑁦. ‘‘𑀢𑀼𑀯𑀁 𑀩𑀼𑀤𑁆𑀥𑁄 𑀢𑀼𑀯𑀁 𑀲𑀢𑁆𑀣𑀸, 𑀢𑀼𑀯𑀁 𑀫𑀸𑀭𑀸𑀪𑀺𑀪𑀽 𑀫𑀼𑀦𑀺;

𑀢𑀼𑀯𑀁 𑀅𑀦𑀼𑀲𑀬𑁂 𑀙𑁂𑀢𑁆𑀯𑀸, 𑀢𑀺𑀡𑁆𑀡𑁄 𑀢𑀸𑀭𑁂𑀲𑀺 𑀫𑀁 𑀧𑀚𑀁.

𑁫𑁫𑁧. ‘‘𑀉𑀧𑀥𑀻 𑀢𑁂 𑀲𑀫𑀢𑀺𑀓𑁆𑀓𑀦𑁆𑀢𑀸, 𑀆𑀲𑀯𑀸 𑀢𑁂 𑀧𑀤𑀸𑀮𑀺𑀢𑀸;

𑀲𑀻𑀳𑁄𑀲𑀺 𑀅𑀦𑀼𑀧𑀸𑀤𑀸𑀦𑁄, 𑀧𑀳𑀻𑀦𑀪𑀬𑀪𑁂𑀭𑀯𑁄.

𑁫𑁫𑁨. ‘‘𑀧𑀼𑀡𑁆𑀟𑀭𑀻𑀓𑀁 𑀬𑀣𑀸 𑀯𑀕𑁆𑀕𑀼, 𑀢𑁄𑀬𑁂 𑀦 𑀉𑀧𑀮𑀺𑀫𑁆𑀧𑀢𑀺 [𑀢𑁄𑀬𑁂𑀦 𑀦 𑀉𑀧𑀮𑀺𑀧𑁆𑀧𑀢𑀺 (𑀲𑀻.), 𑀢𑁄𑀬𑁂 𑀦 𑀉𑀧𑀮𑀺𑀧𑁆𑀧𑀢𑀺 (𑀧𑀻.), 𑀢𑁄𑀬𑁂𑀦 𑀦 𑀉𑀧𑀮𑀺𑀫𑁆𑀧𑀢𑀺 (𑀓.)];

𑀏𑀯𑀁 𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘, 𑀉𑀪𑀬𑁂 𑀢𑁆𑀯𑀁 𑀦 𑀮𑀺𑀫𑁆𑀧𑀲𑀺;

𑀧𑀸𑀤𑁂 𑀯𑀻𑀭 𑀧𑀲𑀸𑀭𑁂𑀳𑀺, 𑀲𑀪𑀺𑀬𑁄 𑀯𑀦𑁆𑀤𑀢𑀺 𑀲𑀢𑁆𑀣𑀼𑀦𑁄’’𑀢𑀺.

𑀅𑀣 𑀔𑁄 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂…𑀧𑁂… 𑀏𑀲𑀸𑀳𑀁 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘; 𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺.

‘‘𑀬𑁄 𑀔𑁄, 𑀲𑀪𑀺𑀬, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀢𑀺 𑀧𑀩𑁆𑀩𑀚𑁆𑀚𑀁, 𑀆𑀓𑀗𑁆𑀔𑀢𑀺 𑀉𑀧𑀲𑀫𑁆𑀧𑀤𑀁, 𑀲𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀲𑀢𑀺; 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑀸 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀦𑁆𑀢𑀺, 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑀸𑀬. 𑀅𑀧𑀺 𑀘 𑀫𑁂𑀢𑁆𑀣 𑀧𑀼𑀕𑁆𑀕𑀮𑀯𑁂𑀫𑀢𑁆𑀢𑀢𑀸 𑀯𑀺𑀤𑀺𑀢𑀸’’𑀢𑀺.

‘‘𑀲𑀘𑁂, 𑀪𑀦𑁆𑀢𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀦𑁆𑀢𑀸 𑀧𑀩𑁆𑀩𑀚𑁆𑀚𑀁, 𑀆𑀓𑀗𑁆𑀔𑀦𑁆𑀢𑀸 𑀉𑀧𑀲𑀫𑁆𑀧𑀤𑀁 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀲𑀦𑁆𑀢𑀺, 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑀸 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀦𑁆𑀢𑀺, 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑀸𑀬, 𑀅𑀳𑀁 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀧𑀭𑀺𑀯𑀲𑀺𑀲𑁆𑀲𑀸𑀫𑀺; 𑀘𑀢𑀼𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑀸 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀦𑁆𑀢𑀼 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀼 𑀪𑀺𑀓𑁆𑀔𑀼𑀪𑀸𑀯𑀸𑀬𑀸’’𑀢𑀺. 𑀅𑀮𑀢𑁆𑀣 𑀔𑁄 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁…𑀧𑁂… 𑀅𑀜𑁆𑀜𑀢𑀭𑁄 𑀔𑁄 𑀧𑀦𑀸𑀬𑀲𑁆𑀫𑀸 𑀲𑀪𑀺𑀬𑁄 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺.

𑀲𑀪𑀺𑀬𑀲𑀼𑀢𑁆𑀢𑀁 𑀙𑀝𑁆𑀞𑀁 𑀦𑀺𑀝𑁆𑀞𑀺𑀢𑀁.