𑁪. 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀁

𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀲𑀼𑀦𑁆𑀤𑀭𑀺𑀓𑀸𑀬 𑀦𑀤𑀺𑀬𑀸 𑀢𑀻𑀭𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀲𑀼𑀦𑁆𑀤𑀭𑀺𑀓𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀅𑀕𑁆𑀕𑀺𑀁 𑀚𑀼𑀳𑀢𑀺, 𑀅𑀕𑁆𑀕𑀺𑀳𑀼𑀢𑁆𑀢𑀁 𑀧𑀭𑀺𑀘𑀭𑀢𑀺. 𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀅𑀕𑁆𑀕𑀺𑀁 𑀚𑀼𑀳𑀺𑀢𑁆𑀯𑀸 𑀅𑀕𑁆𑀕𑀺𑀳𑀼𑀢𑁆𑀢𑀁 𑀧𑀭𑀺𑀘𑀭𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀲𑀺 𑁋 ‘‘𑀓𑁄 𑀦𑀼 𑀔𑁄 𑀇𑀫𑀁 𑀳𑀩𑁆𑀬𑀲𑁂𑀲𑀁 𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺? 𑀅𑀤𑁆𑀤𑀲𑀸 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀲𑀲𑀻𑀲𑀁 𑀧𑀸𑀭𑀼𑀢𑀁 𑀦𑀺𑀲𑀺𑀦𑁆𑀦𑀁; 𑀤𑀺𑀲𑁆𑀯𑀸𑀦 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀳𑀩𑁆𑀬𑀲𑁂𑀲𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀓𑀫𑀡𑁆𑀟𑀮𑀼𑀁 𑀕𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀅𑀣 𑀔𑁄 𑀪𑀕𑀯𑀸 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀤𑀲𑀤𑁆𑀤𑁂𑀦 𑀲𑀻𑀲𑀁 𑀯𑀺𑀯𑀭𑀺. 𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑁋 ‘‘𑀫𑀼𑀡𑁆𑀟𑁄 𑀅𑀬𑀁 𑀪𑀯𑀁, 𑀫𑀼𑀡𑁆𑀟𑀓𑁄 𑀅𑀬𑀁 𑀪𑀯’’𑀦𑁆𑀢𑀺 𑀢𑀢𑁄𑀯 𑀧𑀼𑀦 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀼𑀡𑁆𑀟𑀸𑀧𑀺 𑀳𑀺 𑀇𑀥𑁂𑀓𑀘𑁆𑀘𑁂 𑀩𑁆𑀭𑀸𑀳𑁆𑀫𑀡𑀸 𑀪𑀯𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀸𑀢𑀺𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁𑀚𑀘𑁆𑀘𑁄 𑀪𑀯’’𑀦𑁆𑀢𑀺?

𑀅𑀣 𑀔𑁄 𑀪𑀕𑀯𑀸 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀁 𑀩𑁆𑀭𑀸𑀳𑁆𑀫𑀡𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

𑁪𑁫𑁭. ‘‘𑀦 𑀩𑁆𑀭𑀸𑀳𑁆𑀫𑀡𑁄 𑀦𑁄𑀫𑁆𑀳𑀺 𑀦 𑀭𑀸𑀚𑀧𑀼𑀢𑁆𑀢𑁄, 𑀦 𑀯𑁂𑀲𑁆𑀲𑀸𑀬𑀦𑁄 𑀉𑀤 𑀓𑁄𑀘𑀺 𑀦𑁄𑀫𑁆𑀳𑀺;

𑀕𑁄𑀢𑁆𑀢𑀁 𑀧𑀭𑀺𑀜𑁆𑀜𑀸𑀬 𑀧𑀼𑀣𑀼𑀚𑁆𑀚𑀦𑀸𑀦𑀁, 𑀅𑀓𑀺𑀜𑁆𑀘𑀦𑁄 𑀫𑀦𑁆𑀢 𑀘𑀭𑀸𑀫𑀺 𑀮𑁄𑀓𑁂.

𑁪𑁫𑁮. ‘‘𑀲𑀗𑁆𑀖𑀸𑀝𑀺𑀯𑀸𑀲𑀻 𑀅𑀕𑀳𑁄 𑀘𑀭𑀸𑀫𑀺 [𑀅𑀕𑀺𑀳𑁄 (𑀓. 𑀲𑀻. 𑀧𑀻.) 𑀅𑀕𑁂𑀳𑁄 (𑀓𑀢𑁆𑀣𑀘𑀺)], 𑀦𑀺𑀯𑀼𑀢𑁆𑀢𑀓𑁂𑀲𑁄 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄;

𑀅𑀮𑀺𑀧𑁆𑀧𑀫𑀸𑀦𑁄 𑀇𑀥 𑀫𑀸𑀡𑀯𑁂𑀳𑀺, 𑀅𑀓𑀮𑁆𑀮𑀁 𑀫𑀁 𑀩𑁆𑀭𑀸𑀳𑁆𑀫𑀡 𑀧𑀼𑀘𑁆𑀙𑀲𑀺 𑀕𑁄𑀢𑁆𑀢𑀧𑀜𑁆𑀳𑀁’’.

𑁪𑁫𑁯. ‘‘𑀧𑀼𑀘𑁆𑀙𑀦𑁆𑀢𑀺 𑀯𑁂 𑀪𑁄 𑀩𑁆𑀭𑀸𑀳𑁆𑀫𑀡𑀸, 𑀩𑁆𑀭𑀸𑀳𑁆𑀫𑀡𑁂𑀪𑀺 𑀲𑀳 𑀩𑁆𑀭𑀸𑀳𑁆𑀫𑀡𑁄 𑀦𑁄 𑀪𑀯’’𑀦𑁆𑀢𑀺.

𑁪𑁬𑁦. ‘‘𑀩𑁆𑀭𑀸𑀳𑁆𑀫𑀡𑁄 𑀳𑀺 𑀘𑁂 𑀢𑁆𑀯𑀁 𑀩𑁆𑀭𑀽𑀲𑀺, 𑀫𑀜𑁆𑀘 𑀩𑁆𑀭𑀽𑀲𑀺 𑀅𑀩𑁆𑀭𑀸𑀳𑁆𑀫𑀡𑀁;

𑀢𑀁 𑀢𑀁 𑀲𑀸𑀯𑀺𑀢𑁆𑀢𑀺𑀁 𑀧𑀼𑀘𑁆𑀙𑀸𑀫𑀺, 𑀢𑀺𑀧𑀤𑀁 𑀘𑀢𑀼𑀯𑀻𑀲𑀢𑀓𑁆𑀔𑀭𑀁.

𑁪𑁬𑁧. ‘‘𑀓𑀺𑀁 𑀦𑀺𑀲𑁆𑀲𑀺𑀢𑀸 𑀇𑀲𑀬𑁄 𑀫𑀦𑀼𑀚𑀸, 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 [𑀧𑀞𑀫𑀧𑀸𑀤𑀦𑁆𑀢𑁄] 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽 𑀇𑀥 𑀮𑁄𑀓𑁂 [𑀤𑀼𑀢𑀺𑀬𑀧𑀸𑀤𑀦𑁆𑀢𑁄 (𑀲𑀻.)].

𑁪𑁬𑁨. ‘‘𑀬𑀤𑀦𑁆𑀢𑀕𑀽 𑀯𑁂𑀤𑀕𑀽 𑀬𑀜𑁆𑀜𑀓𑀸𑀮𑁂, 𑀬𑀲𑁆𑀲𑀸𑀳𑀼𑀢𑀺𑀁 𑀮𑀪𑁂 𑀢𑀲𑁆𑀲𑀺𑀚𑁆𑀛𑁂𑀢𑀺 𑀩𑁆𑀭𑀽𑀫𑀺’’.

𑁪𑁬𑁩. ‘‘𑀅𑀤𑁆𑀥𑀸 𑀳𑀺 𑀢𑀲𑁆𑀲 𑀳𑀼𑀢𑀫𑀺𑀚𑁆𑀛𑁂, (𑀇𑀢𑀺 𑀩𑁆𑀭𑀸𑀳𑁆𑀫𑀡𑁄)

𑀬𑀁 𑀢𑀸𑀤𑀺𑀲𑀁 𑀯𑁂𑀤𑀕𑀼𑀫𑀤𑁆𑀤𑀲𑀸𑀫;

𑀢𑀼𑀫𑁆𑀳𑀸𑀤𑀺𑀲𑀸𑀦𑀜𑁆𑀳𑀺 𑀅𑀤𑀲𑁆𑀲𑀦𑁂𑀦, 𑀅𑀜𑁆𑀜𑁄 𑀚𑀦𑁄 𑀪𑀼𑀜𑁆𑀚𑀢𑀺 𑀧𑀽𑀭𑀴𑀸𑀲𑀁’’.

𑁪𑁬𑁪. ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡 𑀅𑀢𑁆𑀣𑁂𑀦, 𑀅𑀢𑁆𑀣𑀺𑀓𑁄 𑀉𑀧𑀲𑀗𑁆𑀓𑀫𑁆𑀫 𑀧𑀼𑀘𑁆𑀙;

𑀲𑀦𑁆𑀢𑀁 𑀯𑀺𑀥𑀽𑀫𑀁 𑀅𑀦𑀻𑀖𑀁 𑀦𑀺𑀭𑀸𑀲𑀁, 𑀅𑀧𑁆𑀧𑁂𑀯𑀺𑀥 𑀅𑀪𑀺𑀯𑀺𑀦𑁆𑀤𑁂 𑀲𑀼𑀫𑁂𑀥𑀁’’.

𑁪𑁬𑁫. ‘‘𑀬𑀜𑁆𑀜𑁂 𑀭𑀢𑁄𑀳𑀁 𑀪𑁄 𑀕𑁄𑀢𑀫, 𑀬𑀜𑁆𑀜𑀁 𑀬𑀺𑀝𑁆𑀞𑀼𑀓𑀸𑀫𑁄 𑀦𑀸𑀳𑀁 𑀧𑀚𑀸𑀦𑀸𑀫𑀺;

𑀅𑀦𑀼𑀲𑀸𑀲𑀢𑀼 𑀫𑀁 𑀪𑀯𑀁, 𑀬𑀢𑁆𑀣 𑀳𑀼𑀢𑀁 𑀇𑀚𑁆𑀛𑀢𑁂 𑀩𑁆𑀭𑀽𑀳𑀺 𑀫𑁂 𑀢𑀁’’.

‘‘𑀢𑁂𑀦 𑀳𑀺 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀑𑀤𑀳𑀲𑁆𑀲𑀼 𑀲𑁄𑀢𑀁; 𑀥𑀫𑁆𑀫𑀁 𑀢𑁂 𑀤𑁂𑀲𑁂𑀲𑁆𑀲𑀸𑀫𑀺 𑁋

𑁪𑁬𑁬. ‘‘𑀫𑀸 𑀚𑀸𑀢𑀺𑀁 𑀧𑀼𑀘𑁆𑀙𑀻 𑀘𑀭𑀡𑀜𑁆𑀘 𑀧𑀼𑀘𑁆𑀙, 𑀓𑀝𑁆𑀞𑀸 𑀳𑀯𑁂 𑀚𑀸𑀬𑀢𑀺 𑀚𑀸𑀢𑀯𑁂𑀤𑁄;

𑀦𑀻𑀘𑀸𑀓𑀼𑀮𑀻𑀦𑁄𑀧𑀺 𑀫𑀼𑀦𑀻 𑀥𑀺𑀢𑀻𑀫𑀸, 𑀆𑀚𑀸𑀦𑀺𑀬𑁄 𑀳𑁄𑀢𑀺 𑀳𑀺𑀭𑀻𑀦𑀺𑀲𑁂𑀥𑁄.

𑁪𑁬𑁭. ‘‘𑀲𑀘𑁆𑀘𑁂𑀦 𑀤𑀦𑁆𑀢𑁄 𑀤𑀫𑀲𑀸 𑀉𑀧𑁂𑀢𑁄, 𑀯𑁂𑀤𑀦𑁆𑀢𑀕𑀽 𑀯𑀽𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄;

𑀓𑀸𑀮𑁂𑀦 𑀢𑀫𑁆𑀳𑀺 𑀳𑀩𑁆𑀬𑀁 𑀧𑀯𑁂𑀘𑁆𑀙𑁂, 𑀬𑁄 𑀩𑁆𑀭𑀸𑀳𑁆𑀫𑀡𑁄 𑀧𑀼𑀜𑁆𑀜𑀧𑁂𑀓𑁆𑀔𑁄 [𑀧𑀼𑀜𑁆𑀜𑀧𑁂𑀔𑁄 (𑀲𑀻. 𑀧𑀻.)] 𑀬𑀚𑁂𑀣.

𑁪𑁬𑁮. ‘‘𑀬𑁂 𑀓𑀸𑀫𑁂 𑀳𑀺𑀢𑁆𑀯𑀸 𑀅𑀕𑀳𑀸 𑀘𑀭𑀦𑁆𑀢𑀺, 𑀲𑀼𑀲𑀜𑁆𑀜𑀢𑀢𑁆𑀢𑀸 𑀢𑀲𑀭𑀁𑀯 𑀉𑀚𑁆𑀚𑀼𑀁;

𑀓𑀸𑀮𑁂𑀦 𑀢𑁂𑀲𑀼 𑀳𑀩𑁆𑀬𑀁 𑀧𑀯𑁂𑀘𑁆𑀙𑁂, 𑀬𑁄 𑀩𑁆𑀭𑀸𑀳𑁆𑀫𑀡𑁄 𑀧𑀼𑀜𑁆𑀜𑀧𑁂𑀓𑁆𑀔𑁄 𑀬𑀚𑁂𑀣.

𑁪𑁬𑁯. ‘‘𑀬𑁂 𑀯𑀻𑀢𑀭𑀸𑀕𑀸 𑀲𑀼𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑀸, 𑀘𑀦𑁆𑀤𑁄𑀯 𑀭𑀸𑀳𑀼𑀕𑁆𑀕𑀳𑀡𑀸 𑀧𑀫𑀼𑀢𑁆𑀢𑀸;

𑀓𑀸𑀮𑁂𑀦 𑀢𑁂𑀲𑀼 𑀳𑀩𑁆𑀬𑀁 𑀧𑀯𑁂𑀘𑁆𑀙𑁂, 𑀬𑁄 𑀩𑁆𑀭𑀸𑀳𑁆𑀫𑀡𑁄 𑀧𑀼𑀜𑁆𑀜𑀧𑁂𑀓𑁆𑀔𑁄 𑀬𑀚𑁂𑀣.

𑁪𑁭𑁦. ‘‘𑀅𑀲𑀚𑁆𑀚𑀫𑀸𑀦𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂, 𑀲𑀤𑀸 𑀲𑀢𑀸 𑀳𑀺𑀢𑁆𑀯𑀸 𑀫𑀫𑀸𑀬𑀺𑀢𑀸𑀦𑀺;

𑀓𑀸𑀮𑁂𑀦 𑀢𑁂𑀲𑀼 𑀳𑀩𑁆𑀬𑀁 𑀧𑀯𑁂𑀘𑁆𑀙𑁂, 𑀬𑁄 𑀩𑁆𑀭𑀸𑀳𑁆𑀫𑀡𑁄 𑀧𑀼𑀜𑁆𑀜𑀧𑁂𑀓𑁆𑀔𑁄 𑀬𑀚𑁂𑀣.

𑁪𑁭𑁧. ‘‘𑀬𑁄 𑀓𑀸𑀫𑁂 𑀳𑀺𑀢𑁆𑀯𑀸 𑀅𑀪𑀺𑀪𑀼𑀬𑁆𑀬𑀘𑀸𑀭𑀻, 𑀬𑁄 𑀯𑁂𑀤𑀺 𑀚𑀸𑀢𑀻𑀫𑀭𑀡𑀲𑁆𑀲 𑀅𑀦𑁆𑀢𑀁;

𑀧𑀭𑀺𑀦𑀺𑀩𑁆𑀩𑀼𑀢𑁄 𑀉𑀤𑀓𑀭𑀳𑀤𑁄𑀯 𑀲𑀻𑀢𑁄, 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.

𑁪𑁭𑁨. ‘‘𑀲𑀫𑁄 𑀲𑀫𑁂𑀳𑀺 𑀯𑀺𑀲𑀫𑁂𑀳𑀺 𑀤𑀽𑀭𑁂, 𑀢𑀣𑀸𑀕𑀢𑁄 𑀳𑁄𑀢𑀺 𑀅𑀦𑀦𑁆𑀢𑀧𑀜𑁆𑀜𑁄;

𑀅𑀦𑀽𑀧𑀮𑀺𑀢𑁆𑀢𑁄 𑀇𑀥 𑀯𑀸 𑀳𑀼𑀭𑀁 𑀯𑀸, 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.

𑁪𑁭𑁩. ‘‘𑀬𑀫𑁆𑀳𑀺 𑀦 𑀫𑀸𑀬𑀸 𑀯𑀲𑀢𑀺 𑀦 𑀫𑀸𑀦𑁄, 𑀬𑁄 𑀯𑀻𑀢𑀮𑁄𑀪𑁄 𑀅𑀫𑀫𑁄 𑀦𑀺𑀭𑀸𑀲𑁄;

𑀧𑀦𑀼𑀡𑁆𑀡𑀓𑁄𑀥𑁄 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄, 𑀬𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄𑀓𑀫𑀮𑀁 𑀅𑀳𑀸𑀲𑀺;

𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.

𑁪𑁭𑁪.

‘‘𑀦𑀺𑀯𑁂𑀲𑀦𑀁 𑀬𑁄 𑀫𑀦𑀲𑁄 𑀅𑀳𑀸𑀲𑀺, 𑀧𑀭𑀺𑀕𑁆𑀕𑀳𑀸 𑀬𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀺;

𑀅𑀦𑀼𑀧𑀸𑀤𑀺𑀬𑀸𑀦𑁄 𑀇𑀥 𑀯𑀸 𑀳𑀼𑀭𑀁 𑀯𑀸, 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.

𑁪𑁭𑁫. ‘‘𑀲𑀫𑀸𑀳𑀺𑀢𑁄 𑀬𑁄 𑀉𑀤𑀢𑀸𑀭𑀺 𑀑𑀖𑀁, 𑀥𑀫𑁆𑀫𑀁 𑀘𑀜𑁆𑀜𑀸𑀲𑀺 𑀧𑀭𑀫𑀸𑀬 𑀤𑀺𑀝𑁆𑀞𑀺𑀬𑀸;

𑀔𑀻𑀡𑀸𑀲𑀯𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻, 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.

𑁪𑁭𑁬. ‘‘𑀪𑀯𑀸𑀲𑀯𑀸 𑀬𑀲𑁆𑀲 𑀯𑀘𑀻 𑀔𑀭𑀸 𑀘, 𑀯𑀺𑀥𑀽𑀧𑀺𑀢𑀸 𑀅𑀢𑁆𑀣𑀕𑀢𑀸 𑀦 𑀲𑀦𑁆𑀢𑀺;

𑀲 𑀯𑁂𑀤𑀕𑀽 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.

𑁪𑁭𑁭. ‘‘𑀲𑀗𑁆𑀕𑀸𑀢𑀺𑀕𑁄 𑀬𑀲𑁆𑀲 𑀦 𑀲𑀦𑁆𑀢𑀺 𑀲𑀗𑁆𑀕𑀸, 𑀬𑁄 𑀫𑀸𑀦𑀲𑀢𑁆𑀢𑁂𑀲𑀼 𑀅𑀫𑀸𑀦𑀲𑀢𑁆𑀢𑁄;

𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀬 𑀲𑀔𑁂𑀢𑁆𑀢𑀯𑀢𑁆𑀣𑀼𑀁, 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.

𑁪𑁭𑁮. ‘‘𑀆𑀲𑀁 𑀅𑀦𑀺𑀲𑁆𑀲𑀸𑀬 𑀯𑀺𑀯𑁂𑀓𑀤𑀲𑁆𑀲𑀻, 𑀧𑀭𑀯𑁂𑀤𑀺𑀬𑀁 𑀤𑀺𑀝𑁆𑀞𑀺𑀫𑀼𑀧𑀸𑀢𑀺𑀯𑀢𑁆𑀢𑁄;

𑀆𑀭𑀫𑁆𑀫𑀡𑀸 𑀬𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀺, 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.

𑁪𑁭𑁯. ‘‘𑀧𑀭𑁄𑀧𑀭𑀸 [𑀧𑀭𑁄𑀯𑀭𑀸 (𑀲𑀻. 𑀧𑀻.)] 𑀬𑀲𑁆𑀲 𑀲𑀫𑁂𑀘𑁆𑀘 𑀥𑀫𑁆𑀫𑀸, 𑀯𑀺𑀥𑀽𑀧𑀺𑀢𑀸 𑀅𑀢𑁆𑀣𑀕𑀢𑀸 𑀦 𑀲𑀦𑁆𑀢𑀺;

𑀲𑀦𑁆𑀢𑁄 𑀉𑀧𑀸𑀤𑀸𑀦𑀔𑀬𑁂 𑀯𑀺𑀫𑀼𑀢𑁆𑀢𑁄, 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.

𑁪𑁮𑁦. ‘‘𑀲𑀁𑀬𑁄𑀚𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀬𑁄𑀧𑀸𑀦𑀼𑀤𑀺 𑀭𑀸𑀕𑀧𑀣𑀁 𑀅𑀲𑁂𑀲𑀁;

𑀲𑀼𑀤𑁆𑀥𑁄 𑀦𑀺𑀤𑁄𑀲𑁄 𑀯𑀺𑀫𑀮𑁄 𑀅𑀓𑀸𑀘𑁄 [𑀅𑀓𑀸𑀫𑁄 (𑀲𑀻. 𑀲𑁆𑀬𑀸.)], 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.

𑁪𑁮𑁧. ‘‘𑀬𑁄 𑀅𑀢𑁆𑀢𑀦𑁄 𑀅𑀢𑁆𑀢𑀸𑀦𑀁 [𑀅𑀢𑁆𑀢𑀦𑀸𑀢𑁆𑀢𑀸𑀦𑀁 (𑀲𑀻. 𑀲𑁆𑀬𑀸.)] 𑀦𑀸𑀦𑀼𑀧𑀲𑁆𑀲𑀢𑀺, 𑀲𑀫𑀸𑀳𑀺𑀢𑁄 𑀉𑀚𑁆𑀚𑀼𑀕𑀢𑁄 𑀞𑀺𑀢𑀢𑁆𑀢𑁄;

𑀲 𑀯𑁂 𑀅𑀦𑁂𑀚𑁄 𑀅𑀔𑀺𑀮𑁄 𑀅𑀓𑀗𑁆𑀔𑁄, 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.

𑁪𑁮𑁨. ‘‘𑀫𑁄𑀳𑀦𑁆𑀢𑀭𑀸 𑀬𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀺, 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀘 𑀜𑀸𑀡𑀤𑀲𑁆𑀲𑀻;

𑀲𑀭𑀻𑀭𑀜𑁆𑀘 𑀅𑀦𑁆𑀢𑀺𑀫𑀁 𑀥𑀸𑀭𑁂𑀢𑀺, 𑀧𑀢𑁆𑀢𑁄 𑀘 𑀲𑀫𑁆𑀩𑁄𑀥𑀺𑀫𑀦𑀼𑀢𑁆𑀢𑀭𑀁 𑀲𑀺𑀯𑀁;

𑀏𑀢𑁆𑀢𑀸𑀯𑀢𑀸 𑀬𑀓𑁆𑀔𑀲𑁆𑀲 𑀲𑀼𑀤𑁆𑀥𑀺, 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁’’.

𑁪𑁮𑁩. ‘‘𑀳𑀼𑀢𑀜𑁆𑀘 [𑀳𑀼𑀢𑁆𑀢𑀜𑁆𑀘 (𑀲𑀻. 𑀓.)] 𑀫𑀬𑁆𑀳𑀁 𑀳𑀼𑀢𑀫𑀢𑁆𑀣𑀼 𑀲𑀘𑁆𑀘𑀁, 𑀬𑀁 𑀢𑀸𑀤𑀺𑀲𑀁 𑀯𑁂𑀤𑀕𑀼𑀦𑀁 𑀅𑀮𑀢𑁆𑀣𑀁;

𑀩𑁆𑀭𑀳𑁆𑀫𑀸 𑀳𑀺 𑀲𑀓𑁆𑀔𑀺 𑀧𑀝𑀺𑀕𑀡𑁆𑀳𑀸𑀢𑀼 𑀫𑁂 𑀪𑀕𑀯𑀸, 𑀪𑀼𑀜𑁆𑀚𑀢𑀼 𑀫𑁂 𑀪𑀕𑀯𑀸 𑀧𑀽𑀭𑀴𑀸𑀲𑀁’’.

𑁪𑁮𑁪. ‘‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑁂𑀬𑁆𑀬𑀁, 𑀲𑀫𑁆𑀧𑀲𑁆𑀲𑀢𑀁 𑀩𑁆𑀭𑀸𑀳𑁆𑀫𑀡 𑀦𑁂𑀲 𑀥𑀫𑁆𑀫𑁄;

𑀕𑀸𑀣𑀸𑀪𑀺𑀕𑀻𑀢𑀁 𑀧𑀦𑀼𑀤𑀦𑁆𑀢𑀺 𑀩𑀼𑀤𑁆𑀥𑀸, 𑀥𑀫𑁆𑀫𑁂 𑀲𑀢𑀻 𑀩𑁆𑀭𑀸𑀳𑁆𑀫𑀡 𑀯𑀼𑀢𑁆𑀢𑀺𑀭𑁂𑀲𑀸.

𑁪𑁮𑁫. ‘‘𑀅𑀜𑁆𑀜𑁂𑀦 𑀘 𑀓𑁂𑀯𑀮𑀺𑀦𑀁 𑀫𑀳𑁂𑀲𑀺𑀁, 𑀔𑀻𑀡𑀸𑀲𑀯𑀁 𑀓𑀼𑀓𑁆𑀓𑀼𑀘𑁆𑀘𑀯𑀽𑀧𑀲𑀦𑁆𑀢𑀁;

𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑀝𑁆𑀞𑀳𑀲𑁆𑀲𑀼, 𑀔𑁂𑀢𑁆𑀢𑀜𑁆𑀳𑀺 𑀢𑀁 𑀧𑀼𑀜𑁆𑀜𑀧𑁂𑀓𑁆𑀔𑀲𑁆𑀲 𑀳𑁄𑀢𑀺’’.

𑁪𑁮𑁬. ‘‘𑀲𑀸𑀥𑀸𑀳𑀁 𑀪𑀕𑀯𑀸 𑀢𑀣𑀸 𑀯𑀺𑀚𑀜𑁆𑀜𑀁, 𑀬𑁄 𑀤𑀓𑁆𑀔𑀺𑀡𑀁 𑀪𑀼𑀜𑁆𑀚𑁂𑀬𑁆𑀬 𑀫𑀸𑀤𑀺𑀲𑀲𑁆𑀲;

𑀬𑀁 𑀬𑀜𑁆𑀜𑀓𑀸𑀮𑁂 𑀧𑀭𑀺𑀬𑁂𑀲𑀫𑀸𑀦𑁄, 𑀧𑀧𑁆𑀧𑀼𑀬𑁆𑀬 𑀢𑀯 𑀲𑀸𑀲𑀦𑀁’’.

𑁪𑁮𑁭. ‘‘𑀲𑀸𑀭𑀫𑁆𑀪𑀸 𑀬𑀲𑁆𑀲 𑀯𑀺𑀕𑀢𑀸, 𑀘𑀺𑀢𑁆𑀢𑀁 𑀬𑀲𑁆𑀲 𑀅𑀦𑀸𑀯𑀺𑀮𑀁;

𑀯𑀺𑀧𑁆𑀧𑀫𑀼𑀢𑁆𑀢𑁄 𑀘 𑀓𑀸𑀫𑁂𑀳𑀺, 𑀣𑀺𑀦𑀁 𑀬𑀲𑁆𑀲 𑀧𑀦𑀽𑀤𑀺𑀢𑀁.

𑁪𑁮𑁮. ‘‘𑀲𑀻𑀫𑀦𑁆𑀢𑀸𑀦𑀁 𑀯𑀺𑀦𑁂𑀢𑀸𑀭𑀁, 𑀚𑀸𑀢𑀺𑀫𑀭𑀡𑀓𑁄𑀯𑀺𑀤𑀁;

𑀫𑀼𑀦𑀺𑀁 𑀫𑁄𑀦𑁂𑀬𑁆𑀬𑀲𑀫𑁆𑀧𑀦𑁆𑀦𑀁, 𑀢𑀸𑀤𑀺𑀲𑀁 𑀬𑀜𑁆𑀜𑀫𑀸𑀕𑀢𑀁.

𑁪𑁮𑁯. ‘‘𑀪𑀓𑀼𑀝𑀺𑀁 [𑀪𑀽𑀓𑀼𑀝𑀺𑀁 (𑀓. 𑀲𑀻.), 𑀪𑀸𑀓𑀼𑀝𑀺𑀁 (𑀓. 𑀲𑀻., 𑀫. 𑀦𑀺. 𑁧.𑁨𑁨𑁬)] 𑀯𑀺𑀦𑀬𑀺𑀢𑁆𑀯𑀸𑀦, 𑀧𑀜𑁆𑀚𑀮𑀺𑀓𑀸 𑀦𑀫𑀲𑁆𑀲𑀣;

𑀧𑀽𑀚𑁂𑀣 𑀅𑀦𑁆𑀦𑀧𑀸𑀦𑁂𑀦, 𑀏𑀯𑀁 𑀇𑀚𑁆𑀛𑀦𑁆𑀢𑀺 𑀤𑀓𑁆𑀔𑀺𑀡𑀸.

𑁪𑁯𑁦. ‘‘𑀩𑀼𑀤𑁆𑀥𑁄 𑀪𑀯𑀁 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁, 𑀧𑀼𑀜𑁆𑀜𑀔𑁂𑀢𑁆𑀢𑀫𑀦𑀼𑀢𑁆𑀢𑀭𑀁;

𑀆𑀬𑀸𑀕𑁄 𑀲𑀩𑁆𑀩𑀮𑁄𑀓𑀲𑁆𑀲, 𑀪𑁄𑀢𑁄 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺.

𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺; 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀮𑀪𑁂𑀬𑁆𑀬𑀸𑀳𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺. 𑀅𑀮𑀢𑁆𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄…𑀧𑁂… 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺.

𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀁 𑀘𑀢𑀼𑀢𑁆𑀣𑀁 𑀦𑀺𑀝𑁆𑀞𑀺𑀢𑀁.