𑁭. 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑀲𑀼𑀢𑁆𑀢𑀁

𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀓𑁄𑀲𑀮𑀓𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀚𑀺𑀡𑁆𑀡𑀸 𑀯𑀼𑀟𑁆𑀠𑀸 𑀫𑀳𑀮𑁆𑀮𑀓𑀸 𑀅𑀤𑁆𑀥𑀕𑀢𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀦𑁆𑀤𑀺𑀲𑁆𑀲𑀦𑁆𑀢𑀺 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀏𑀢𑀭𑀳𑀺 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁂’’𑀢𑀺? ‘‘𑀦 𑀔𑁄, 𑀩𑁆𑀭𑀸𑀳𑁆𑀫𑀡𑀸, 𑀲𑀦𑁆𑀤𑀺𑀲𑁆𑀲𑀦𑁆𑀢𑀺 𑀏𑀢𑀭𑀳𑀺 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁂’’𑀢𑀺. ‘‘𑀲𑀸𑀥𑀼 𑀦𑁄 𑀪𑀯𑀁 𑀕𑁄𑀢𑀫𑁄 𑀧𑁄𑀭𑀸𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀁 𑀪𑀸𑀲𑀢𑀼, 𑀲𑀘𑁂 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀅𑀕𑀭𑀽’’𑀢𑀺. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡𑀸, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁨𑁮𑁬. ‘‘𑀇𑀲𑀬𑁄 𑀧𑀼𑀩𑁆𑀩𑀓𑀸 𑀆𑀲𑀼𑀁, 𑀲𑀜𑁆𑀜𑀢𑀢𑁆𑀢𑀸 𑀢𑀧𑀲𑁆𑀲𑀺𑀦𑁄;

𑀧𑀜𑁆𑀘 𑀓𑀸𑀫𑀕𑀼𑀡𑁂 𑀳𑀺𑀢𑁆𑀯𑀸, 𑀅𑀢𑁆𑀢𑀤𑀢𑁆𑀣𑀫𑀘𑀸𑀭𑀺𑀲𑀼𑀁.

𑁨𑁮𑁭. ‘‘𑀦 𑀧𑀲𑀽 𑀩𑁆𑀭𑀸𑀳𑁆𑀫𑀡𑀸𑀦𑀸𑀲𑀼𑀁, 𑀦 𑀳𑀺𑀭𑀜𑁆𑀜𑀁 𑀦 𑀥𑀸𑀦𑀺𑀬𑀁;

𑀲𑀚𑁆𑀛𑀸𑀬𑀥𑀦𑀥𑀜𑁆𑀜𑀸𑀲𑀼𑀁, 𑀩𑁆𑀭𑀳𑁆𑀫𑀁 𑀦𑀺𑀥𑀺𑀫𑀧𑀸𑀮𑀬𑀼𑀁.

𑁨𑁮𑁮. ‘‘𑀬𑀁 𑀦𑁂𑀲𑀁 𑀧𑀓𑀢𑀁 𑀆𑀲𑀺, 𑀤𑁆𑀯𑀸𑀭𑀪𑀢𑁆𑀢𑀁 𑀉𑀧𑀝𑁆𑀞𑀺𑀢𑀁;

𑀲𑀤𑁆𑀥𑀸𑀧𑀓𑀢𑀫𑁂𑀲𑀸𑀦𑀁, 𑀤𑀸𑀢𑀯𑁂 𑀢𑀤𑀫𑀜𑁆𑀜𑀺𑀲𑀼𑀁.

𑁨𑁮𑁯. ‘‘𑀦𑀸𑀦𑀸𑀭𑀢𑁆𑀢𑁂𑀳𑀺 𑀯𑀢𑁆𑀣𑁂𑀳𑀺, 𑀲𑀬𑀦𑁂𑀳𑀸𑀯𑀲𑀣𑁂𑀳𑀺 𑀘;

𑀨𑀻𑀢𑀸 𑀚𑀦𑀧𑀤𑀸 𑀭𑀝𑁆𑀞𑀸, 𑀢𑁂 𑀦𑀫𑀲𑁆𑀲𑀺𑀁𑀲𑀼 𑀩𑁆𑀭𑀸𑀳𑁆𑀫𑀡𑁂.

𑁨𑁯𑁦. ‘‘𑀅𑀯𑀚𑁆𑀛𑀸 𑀩𑁆𑀭𑀸𑀳𑁆𑀫𑀡𑀸 𑀆𑀲𑀼𑀁, 𑀅𑀚𑁂𑀬𑁆𑀬𑀸 𑀥𑀫𑁆𑀫𑀭𑀓𑁆𑀔𑀺𑀢𑀸;

𑀦 𑀦𑁂 𑀓𑁄𑀘𑀺 𑀦𑀺𑀯𑀸𑀭𑁂𑀲𑀺, 𑀓𑀼𑀮𑀤𑁆𑀯𑀸𑀭𑁂𑀲𑀼 𑀲𑀩𑁆𑀩𑀲𑁄.

𑁨𑁯𑁧. ‘‘𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀁 𑀯𑀲𑁆𑀲𑀸𑀦𑀺, (𑀓𑁄𑀫𑀸𑀭) 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀁𑀲𑀼 𑀢𑁂;

𑀯𑀺𑀚𑁆𑀚𑀸𑀘𑀭𑀡𑀧𑀭𑀺𑀬𑁂𑀝𑁆𑀞𑀺𑀁, 𑀅𑀘𑀭𑀼𑀁 𑀩𑁆𑀭𑀸𑀳𑁆𑀫𑀡𑀸 𑀧𑀼𑀭𑁂.

𑁨𑁯𑁨. ‘‘𑀦 𑀩𑁆𑀭𑀸𑀳𑁆𑀫𑀡𑀸 𑀅𑀜𑁆𑀜𑀫𑀕𑀫𑀼𑀁, 𑀦𑀧𑀺 𑀪𑀭𑀺𑀬𑀁 𑀓𑀺𑀡𑀺𑀁𑀲𑀼 𑀢𑁂;

𑀲𑀫𑁆𑀧𑀺𑀬𑁂𑀦𑁂𑀯 𑀲𑀁𑀯𑀸𑀲𑀁, 𑀲𑀗𑁆𑀕𑀦𑁆𑀢𑁆𑀯𑀸 𑀲𑀫𑀭𑁄𑀘𑀬𑀼𑀁.

𑁨𑁯𑁩. ‘‘𑀅𑀜𑁆𑀜𑀢𑁆𑀭 𑀢𑀫𑁆𑀳𑀸 𑀲𑀫𑀬𑀸, 𑀉𑀢𑀼𑀯𑁂𑀭𑀫𑀡𑀺𑀁 𑀧𑀢𑀺;

𑀅𑀦𑁆𑀢𑀭𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁, 𑀦𑀸𑀲𑁆𑀲𑀼 𑀕𑀘𑁆𑀙𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸.

𑁨𑁯𑁪. ‘‘𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀲𑀻𑀮𑀜𑁆𑀘, 𑀅𑀚𑁆𑀚𑀯𑀁 𑀫𑀤𑁆𑀤𑀯𑀁 𑀢𑀧𑀁;

𑀲𑁄𑀭𑀘𑁆𑀘𑀁 𑀅𑀯𑀺𑀳𑀺𑀁𑀲𑀜𑁆𑀘, 𑀔𑀦𑁆𑀢𑀺𑀜𑁆𑀘𑀸𑀧𑀺 𑀅𑀯𑀡𑁆𑀡𑀬𑀼𑀁.

𑁨𑁯𑁫. ‘‘𑀬𑁄 𑀦𑁂𑀲𑀁 𑀧𑀭𑀫𑁄 𑀆𑀲𑀺, 𑀩𑁆𑀭𑀳𑁆𑀫𑀸 𑀤𑀴𑁆𑀳𑀧𑀭𑀓𑁆𑀓𑀫𑁄;

𑀲 𑀯𑀸𑀧𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁, 𑀲𑀼𑀧𑀺𑀦𑀦𑁆𑀢𑁂𑀧𑀺 𑀦𑀸𑀕𑀫𑀸.

𑁨𑁯𑁬. ‘‘𑀢𑀲𑁆𑀲 𑀯𑀢𑁆𑀢𑀫𑀦𑀼𑀲𑀺𑀓𑁆𑀔𑀦𑁆𑀢𑀸, 𑀇𑀥𑁂𑀓𑁂 𑀯𑀺𑀜𑁆𑀜𑀼𑀚𑀸𑀢𑀺𑀓𑀸;

𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀲𑀻𑀮𑀜𑁆𑀘, 𑀔𑀦𑁆𑀢𑀺𑀜𑁆𑀘𑀸𑀧𑀺 𑀅𑀯𑀡𑁆𑀡𑀬𑀼𑀁.

𑁨𑁯𑁭. ‘‘𑀢𑀡𑁆𑀟𑀼𑀮𑀁 𑀲𑀬𑀦𑀁 𑀯𑀢𑁆𑀣𑀁, 𑀲𑀧𑁆𑀧𑀺𑀢𑁂𑀮𑀜𑁆𑀘 𑀬𑀸𑀘𑀺𑀬;

𑀥𑀫𑁆𑀫𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸, 𑀢𑀢𑁄 𑀬𑀜𑁆𑀜𑀫𑀓𑀧𑁆𑀧𑀬𑀼𑀁.

𑁨𑁯𑁮. ‘‘𑀉𑀧𑀝𑁆𑀞𑀺𑀢𑀲𑁆𑀫𑀺𑀁 𑀬𑀜𑁆𑀜𑀲𑁆𑀫𑀺𑀁, 𑀦𑀸𑀲𑁆𑀲𑀼 𑀕𑀸𑀯𑁄 𑀳𑀦𑀺𑀁𑀲𑀼 𑀢𑁂;

𑀬𑀣𑀸 𑀫𑀸𑀢𑀸 𑀧𑀺𑀢𑀸 𑀪𑀸𑀢𑀸, 𑀅𑀜𑁆𑀜𑁂 𑀯𑀸𑀧𑀺 𑀘 𑀜𑀸𑀢𑀓𑀸;

𑀕𑀸𑀯𑁄 𑀦𑁄 𑀧𑀭𑀫𑀸 𑀫𑀺𑀢𑁆𑀢𑀸, 𑀬𑀸𑀲𑀼 𑀚𑀸𑀬𑀦𑁆𑀢𑀺 𑀑𑀲𑀥𑀸.

𑁨𑁯𑁯. ‘‘𑀅𑀦𑁆𑀦𑀤𑀸 𑀩𑀮𑀤𑀸 𑀘𑁂𑀢𑀸, 𑀯𑀡𑁆𑀡𑀤𑀸 𑀲𑀼𑀔𑀤𑀸 𑀢𑀣𑀸 [𑀲𑀼𑀔𑀤𑀸 𑀘 𑀢𑀸 (𑀓.)];

𑀏𑀢𑀫𑀢𑁆𑀣𑀯𑀲𑀁 𑀜𑀢𑁆𑀯𑀸, 𑀦𑀸𑀲𑁆𑀲𑀼 𑀕𑀸𑀯𑁄 𑀳𑀦𑀺𑀁𑀲𑀼 𑀢𑁂.

𑁩𑁦𑁦. ‘‘𑀲𑀼𑀔𑀼𑀫𑀸𑀮𑀸 𑀫𑀳𑀸𑀓𑀸𑀬𑀸, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀩𑁆𑀭𑀸𑀳𑁆𑀫𑀡𑀸 𑀲𑁂𑀳𑀺 𑀥𑀫𑁆𑀫𑁂𑀳𑀺, 𑀓𑀺𑀘𑁆𑀘𑀸𑀓𑀺𑀘𑁆𑀘𑁂𑀲𑀼 𑀉𑀲𑁆𑀲𑀼𑀓𑀸;

𑀬𑀸𑀯 𑀮𑁄𑀓𑁂 𑀅𑀯𑀢𑁆𑀢𑀺𑀁𑀲𑀼, 𑀲𑀼𑀔𑀫𑁂𑀥𑀺𑀢𑁆𑀣𑀬𑀁 𑀧𑀚𑀸.

𑁩𑁦𑁧. ‘‘𑀢𑁂𑀲𑀁 𑀆𑀲𑀺 𑀯𑀺𑀧𑀮𑁆𑀮𑀸𑀲𑁄, 𑀤𑀺𑀲𑁆𑀯𑀸𑀦 𑀅𑀡𑀼𑀢𑁄 𑀅𑀡𑀼𑀁;

𑀭𑀸𑀚𑀺𑀦𑁄 𑀘 𑀯𑀺𑀬𑀸𑀓𑀸𑀭𑀁, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸.

𑁩𑁦𑁨. ‘‘𑀭𑀣𑁂 𑀘𑀸𑀚𑀜𑁆𑀜𑀲𑀁𑀬𑀼𑀢𑁆𑀢𑁂, 𑀲𑀼𑀓𑀢𑁂 𑀘𑀺𑀢𑁆𑀢𑀲𑀺𑀩𑁆𑀩𑀦𑁂;

𑀦𑀺𑀯𑁂𑀲𑀦𑁂 𑀦𑀺𑀯𑁂𑀲𑁂 𑀘, 𑀯𑀺𑀪𑀢𑁆𑀢𑁂 𑀪𑀸𑀕𑀲𑁄 𑀫𑀺𑀢𑁂.

𑁩𑁦𑁩. ‘‘𑀕𑁄𑀫𑀡𑁆𑀟𑀮𑀧𑀭𑀺𑀩𑁆𑀬𑀽𑀴𑁆𑀳𑀁, 𑀦𑀸𑀭𑀻𑀯𑀭𑀕𑀡𑀸𑀬𑀼𑀢𑀁;

𑀉𑀴𑀸𑀭𑀁 𑀫𑀸𑀦𑀼𑀲𑀁 𑀪𑁄𑀕𑀁, 𑀅𑀪𑀺𑀚𑁆𑀛𑀸𑀬𑀺𑀁𑀲𑀼 𑀩𑁆𑀭𑀸𑀳𑁆𑀫𑀡𑀸.

𑁩𑁦𑁪. ‘‘𑀢𑁂 𑀢𑀢𑁆𑀣 𑀫𑀦𑁆𑀢𑁂 𑀕𑀦𑁆𑀣𑁂𑀢𑁆𑀯𑀸, 𑀑𑀓𑁆𑀓𑀸𑀓𑀁 𑀢𑀤𑀼𑀧𑀸𑀕𑀫𑀼𑀁;

𑀧𑀳𑀽𑀢𑀥𑀦𑀥𑀜𑁆𑀜𑁄𑀲𑀺, 𑀬𑀚𑀲𑁆𑀲𑀼 𑀩𑀳𑀼 𑀢𑁂 𑀯𑀺𑀢𑁆𑀢𑀁;

𑀬𑀚𑀲𑁆𑀲𑀼 𑀩𑀳𑀼 𑀢𑁂 𑀥𑀦𑀁.

𑁩𑁦𑁫. ‘‘𑀢𑀢𑁄 𑀘 𑀭𑀸𑀚𑀸 𑀲𑀜𑁆𑀜𑀢𑁆𑀢𑁄, 𑀩𑁆𑀭𑀸𑀳𑁆𑀫𑀡𑁂𑀳𑀺 𑀭𑀣𑁂𑀲𑀪𑁄;

𑀅𑀲𑁆𑀲𑀫𑁂𑀥𑀁 𑀧𑀼𑀭𑀺𑀲𑀫𑁂𑀥𑀁, 𑀲𑀫𑁆𑀫𑀸𑀧𑀸𑀲𑀁 𑀯𑀸𑀚𑀧𑁂𑀬𑁆𑀬𑀁 𑀦𑀺𑀭𑀕𑁆𑀕𑀴𑀁;

𑀏𑀢𑁂 𑀬𑀸𑀕𑁂 𑀬𑀚𑀺𑀢𑁆𑀯𑀸𑀦, 𑀩𑁆𑀭𑀸𑀳𑁆𑀫𑀡𑀸𑀦𑀫𑀤𑀸 𑀥𑀦𑀁.

𑁩𑁦𑁬. ‘‘𑀕𑀸𑀯𑁄 𑀲𑀬𑀦𑀜𑁆𑀘 𑀯𑀢𑁆𑀣𑀜𑁆𑀘, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀭𑀣𑁂 𑀘𑀸𑀚𑀜𑁆𑀜𑀲𑀁𑀬𑀼𑀢𑁆𑀢𑁂, 𑀲𑀼𑀓𑀢𑁂 𑀘𑀺𑀢𑁆𑀢𑀲𑀺𑀩𑁆𑀩𑀦𑁂.

𑁩𑁦𑁭. ‘‘𑀦𑀺𑀯𑁂𑀲𑀦𑀸𑀦𑀺 𑀭𑀫𑁆𑀫𑀸𑀦𑀺, 𑀲𑀼𑀯𑀺𑀪𑀢𑁆𑀢𑀸𑀦𑀺 𑀪𑀸𑀕𑀲𑁄;

𑀦𑀸𑀦𑀸𑀥𑀜𑁆𑀜𑀲𑁆𑀲 𑀧𑀽𑀭𑁂𑀢𑁆𑀯𑀸, 𑀩𑁆𑀭𑀸𑀳𑁆𑀫𑀡𑀸𑀦𑀫𑀤𑀸 𑀥𑀦𑀁.

𑁩𑁦𑁮. ‘‘𑀢𑁂 𑀘 𑀢𑀢𑁆𑀣 𑀥𑀦𑀁 𑀮𑀤𑁆𑀥𑀸, 𑀲𑀦𑁆𑀦𑀺𑀥𑀺𑀁 𑀲𑀫𑀭𑁄𑀘𑀬𑀼𑀁;

𑀢𑁂𑀲𑀁 𑀇𑀘𑁆𑀙𑀸𑀯𑀢𑀺𑀡𑁆𑀡𑀸𑀦𑀁, 𑀪𑀺𑀬𑁆𑀬𑁄 𑀢𑀡𑁆𑀳𑀸 𑀧𑀯𑀟𑁆𑀠𑀣;

𑀢𑁂 𑀢𑀢𑁆𑀣 𑀫𑀦𑁆𑀢𑁂 𑀕𑀦𑁆𑀣𑁂𑀢𑁆𑀯𑀸, 𑀑𑀓𑁆𑀓𑀸𑀓𑀁 𑀧𑀼𑀦𑀫𑀼𑀧𑀸𑀕𑀫𑀼𑀁.

𑁩𑁦𑁯. ‘‘𑀬𑀣𑀸 𑀆𑀧𑁄 𑀘 𑀧𑀣𑀯𑀻 𑀘, 𑀳𑀺𑀭𑀜𑁆𑀜𑀁 𑀥𑀦𑀥𑀸𑀦𑀺𑀬𑀁;

𑀏𑀯𑀁 𑀕𑀸𑀯𑁄 𑀫𑀦𑀼𑀲𑁆𑀲𑀸𑀦𑀁, 𑀧𑀭𑀺𑀓𑁆𑀔𑀸𑀭𑁄 𑀲𑁄 𑀳𑀺 𑀧𑀸𑀡𑀺𑀦𑀁;

𑀬𑀚𑀲𑁆𑀲𑀼 𑀩𑀳𑀼 𑀢𑁂 𑀯𑀺𑀢𑁆𑀢𑀁, 𑀬𑀚𑀲𑁆𑀲𑀼 𑀩𑀳𑀼 𑀢𑁂 𑀥𑀦𑀁.

𑁩𑁧𑁦. ‘‘𑀢𑀢𑁄 𑀘 𑀭𑀸𑀚𑀸 𑀲𑀜𑁆𑀜𑀢𑁆𑀢𑁄, 𑀩𑁆𑀭𑀸𑀳𑁆𑀫𑀡𑁂𑀳𑀺 𑀭𑀣𑁂𑀲𑀪𑁄;

𑀦𑁂𑀓𑀸 𑀲𑀢𑀲𑀳𑀲𑁆𑀲𑀺𑀬𑁄, 𑀕𑀸𑀯𑁄 𑀬𑀜𑁆𑀜𑁂 𑀅𑀖𑀸𑀢𑀬𑀺.

𑁩𑁧𑁧. ‘‘𑀦 𑀧𑀸𑀤𑀸 𑀦 𑀯𑀺𑀲𑀸𑀡𑁂𑀦, 𑀦𑀸𑀲𑁆𑀲𑀼 𑀳𑀺𑀁𑀲𑀦𑁆𑀢𑀺 𑀓𑁂𑀦𑀘𑀺;

𑀕𑀸𑀯𑁄 𑀏𑀴𑀓𑀲𑀫𑀸𑀦𑀸, 𑀲𑁄𑀭𑀢𑀸 𑀓𑀼𑀫𑁆𑀪𑀤𑀽𑀳𑀦𑀸;

𑀢𑀸 𑀯𑀺𑀲𑀸𑀡𑁂 𑀕𑀳𑁂𑀢𑁆𑀯𑀸𑀦, 𑀭𑀸𑀚𑀸 𑀲𑀢𑁆𑀣𑁂𑀦 𑀖𑀸𑀢𑀬𑀺.

𑁩𑁧𑁨. ‘‘𑀢𑀢𑁄 𑀤𑁂𑀯𑀸 𑀧𑀺𑀢𑀭𑁄 𑀘 [𑀢𑀢𑁄 𑀘 𑀤𑁂𑀯𑀸 𑀧𑀺𑀢𑀭𑁄 (𑀲𑀻. 𑀲𑁆𑀬𑀸.)], 𑀇𑀦𑁆𑀤𑁄 𑀅𑀲𑀼𑀭𑀭𑀓𑁆𑀔𑀲𑀸;

𑀅𑀥𑀫𑁆𑀫𑁄 𑀇𑀢𑀺 𑀧𑀓𑁆𑀓𑀦𑁆𑀤𑀼𑀁, 𑀬𑀁 𑀲𑀢𑁆𑀣𑀁 𑀦𑀺𑀧𑀢𑀻 𑀕𑀯𑁂.

𑁩𑁧𑁩. ‘‘𑀢𑀬𑁄 𑀭𑁄𑀕𑀸 𑀧𑀼𑀭𑁂 𑀆𑀲𑀼𑀁, 𑀇𑀘𑁆𑀙𑀸 𑀅𑀦𑀲𑀦𑀁 𑀚𑀭𑀸;

𑀧𑀲𑀽𑀦𑀜𑁆𑀘 𑀲𑀫𑀸𑀭𑀫𑁆𑀪𑀸, 𑀅𑀝𑁆𑀞𑀸𑀦𑀯𑀼𑀢𑀺𑀫𑀸𑀕𑀫𑀼𑀁.

𑁩𑁧𑁪. ‘‘𑀏𑀲𑁄 𑀅𑀥𑀫𑁆𑀫𑁄 𑀤𑀡𑁆𑀟𑀸𑀦𑀁, 𑀑𑀓𑁆𑀓𑀦𑁆𑀢𑁄 𑀧𑀼𑀭𑀸𑀡𑁄 𑀅𑀳𑀼;

𑀅𑀤𑀽𑀲𑀺𑀓𑀸𑀬𑁄 𑀳𑀜𑁆𑀜𑀦𑁆𑀢𑀺, 𑀥𑀫𑁆𑀫𑀸 𑀥𑀁𑀲𑀦𑁆𑀢𑀺 [𑀥𑀁𑀲𑁂𑀦𑁆𑀢𑀺 (𑀲𑀻. 𑀧𑀻.)] 𑀬𑀸𑀚𑀓𑀸.

𑁩𑁧𑁫. ‘‘𑀏𑀯𑀫𑁂𑀲𑁄 𑀅𑀡𑀼𑀥𑀫𑁆𑀫𑁄, 𑀧𑁄𑀭𑀸𑀡𑁄 𑀯𑀺𑀜𑁆𑀜𑀼𑀕𑀭𑀳𑀺𑀢𑁄;

𑀬𑀢𑁆𑀣 𑀏𑀤𑀺𑀲𑀓𑀁 𑀧𑀲𑁆𑀲𑀢𑀺, 𑀬𑀸𑀚𑀓𑀁 𑀕𑀭𑀳𑀢𑀻 [𑀕𑀭𑀳𑀻 (𑀓.)] 𑀚𑀦𑁄.

𑁩𑁧𑁬. ‘‘𑀏𑀯𑀁 𑀥𑀫𑁆𑀫𑁂 𑀯𑀺𑀬𑀸𑀧𑀦𑁆𑀦𑁂, 𑀯𑀺𑀪𑀺𑀦𑁆𑀦𑀸 𑀲𑀼𑀤𑁆𑀤𑀯𑁂𑀲𑁆𑀲𑀺𑀓𑀸;

𑀧𑀼𑀣𑀽 𑀯𑀺𑀪𑀺𑀦𑁆𑀦𑀸 𑀔𑀢𑁆𑀢𑀺𑀬𑀸, 𑀧𑀢𑀺𑀁 𑀪𑀭𑀺𑀬𑀸𑀯𑀫𑀜𑁆𑀜𑀣.

𑁩𑁧𑁭. ‘‘𑀔𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀩𑀦𑁆𑀥𑀽 𑀘, 𑀬𑁂 𑀘𑀜𑁆𑀜𑁂 𑀕𑁄𑀢𑁆𑀢𑀭𑀓𑁆𑀔𑀺𑀢𑀸;

𑀚𑀸𑀢𑀺𑀯𑀸𑀤𑀁 𑀦𑀺𑀭𑀁𑀓𑀢𑁆𑀯𑀸 [𑀦𑀺𑀭𑀸𑀓𑀢𑁆𑀯𑀸 (?) 𑀬𑀣𑀸 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄𑀢𑀺], 𑀓𑀸𑀫𑀸𑀦𑀁 𑀯𑀲𑀫𑀦𑁆𑀯𑀕𑀼’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀢𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂. … 𑀉𑀧𑀸𑀲𑀓𑁂 𑀦𑁄 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 𑀲𑀭𑀡𑀁 𑀕𑀢𑁂’’𑀢𑀺.

𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑀲𑀼𑀢𑁆𑀢𑀁 𑀲𑀢𑁆𑀢𑀫𑀁 𑀦𑀺𑀝𑁆𑀞𑀺𑀢𑀁.