𑁮. 𑀦𑀸𑀯𑀸𑀲𑀼𑀢𑁆𑀢𑀁

𑁩𑁧𑁮. 𑀬𑀲𑁆𑀫𑀸 𑀳𑀺 𑀥𑀫𑁆𑀫𑀁 𑀧𑀼𑀭𑀺𑀲𑁄 𑀯𑀺𑀚𑀜𑁆𑀜𑀸, 𑀇𑀦𑁆𑀤𑀁𑀯 𑀦𑀁 𑀤𑁂𑀯𑀢𑀸 𑀧𑀽𑀚𑀬𑁂𑀬𑁆𑀬;

𑀲𑁄 𑀧𑀽𑀚𑀺𑀢𑁄 𑀢𑀲𑁆𑀫𑀺 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀩𑀳𑀼𑀲𑁆𑀲𑀼𑀢𑁄 𑀧𑀸𑀢𑀼𑀓𑀭𑁄𑀢𑀺 𑀥𑀫𑁆𑀫𑀁.

𑁩𑁧𑁯. 𑀢𑀤𑀝𑁆𑀞𑀺𑀓𑀢𑁆𑀯𑀸𑀦 𑀦𑀺𑀲𑀫𑁆𑀫 𑀥𑀻𑀭𑁄, 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀫𑀸𑀦𑁄;

𑀯𑀺𑀜𑁆𑀜𑀽 𑀯𑀺𑀪𑀸𑀯𑀻 𑀦𑀺𑀧𑀼𑀡𑁄 𑀘 𑀳𑁄𑀢𑀺, 𑀬𑁄 𑀢𑀸𑀤𑀺𑀲𑀁 𑀪𑀚𑀢𑀺 𑀅𑀧𑁆𑀧𑀫𑀢𑁆𑀢𑁄.

𑁩𑁨𑁦. 𑀔𑀼𑀤𑁆𑀤𑀜𑁆𑀘 𑀩𑀸𑀮𑀁 𑀉𑀧𑀲𑁂𑀯𑀫𑀸𑀦𑁄, 𑀅𑀦𑀸𑀕𑀢𑀢𑁆𑀣𑀜𑁆𑀘 𑀉𑀲𑀽𑀬𑀓𑀜𑁆𑀘;

𑀇𑀥𑁂𑀯 𑀥𑀫𑁆𑀫𑀁 𑀅𑀯𑀺𑀪𑀸𑀯𑀬𑀺𑀢𑁆𑀯𑀸, 𑀅𑀯𑀺𑀢𑀺𑀡𑁆𑀡𑀓𑀗𑁆𑀔𑁄 𑀫𑀭𑀡𑀁 𑀉𑀧𑁂𑀢𑀺.

𑁩𑁨𑁧. 𑀬𑀣𑀸 𑀦𑀭𑁄 𑀆𑀧𑀕𑀫𑁄𑀢𑀭𑀺𑀢𑁆𑀯𑀸, 𑀫𑀳𑁄𑀤𑀓𑀁 𑀲𑀮𑀺𑀮𑀁 𑀲𑀻𑀖𑀲𑁄𑀢𑀁;

𑀲𑁄 𑀯𑀼𑀬𑁆𑀳𑀫𑀸𑀦𑁄 𑀅𑀦𑀼𑀲𑁄𑀢𑀕𑀸𑀫𑀻, 𑀓𑀺𑀁 𑀲𑁄 𑀧𑀭𑁂 𑀲𑀓𑁆𑀔𑀢𑀺 𑀢𑀸𑀭𑀬𑁂𑀢𑀼𑀁.

𑁩𑁨𑁨. 𑀢𑀣𑁂𑀯 𑀥𑀫𑁆𑀫𑀁 𑀅𑀯𑀺𑀪𑀸𑀯𑀬𑀺𑀢𑁆𑀯𑀸, 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀦𑀺𑀲𑀸𑀫𑀬𑀢𑁆𑀣𑀁;

𑀲𑀬𑀁 𑀅𑀚𑀸𑀦𑀁 𑀅𑀯𑀺𑀢𑀺𑀡𑁆𑀡𑀓𑀗𑁆𑀔𑁄, 𑀓𑀺𑀁 𑀲𑁄 𑀧𑀭𑁂 𑀲𑀓𑁆𑀔𑀢𑀺 𑀦𑀺𑀚𑁆𑀛𑀧𑁂𑀢𑀼𑀁.

𑁩𑁨𑁩. 𑀬𑀣𑀸𑀧𑀺 𑀦𑀸𑀯𑀁 𑀤𑀴𑁆𑀳𑀫𑀸𑀭𑀼𑀳𑀺𑀢𑁆𑀯𑀸, 𑀨𑀺𑀬𑁂𑀦 [𑀧𑀺𑀬𑁂𑀦 (𑀲𑀻. 𑀲𑁆𑀬𑀸.)] 𑀭𑀺𑀢𑁆𑀢𑁂𑀦 𑀲𑀫𑀗𑁆𑀕𑀺𑀪𑀽𑀢𑁄;

𑀲𑁄 𑀢𑀸𑀭𑀬𑁂 𑀢𑀢𑁆𑀣 𑀩𑀳𑀽𑀧𑀺 𑀅𑀜𑁆𑀜𑁂, 𑀢𑀢𑁆𑀭𑀽𑀧𑀬𑀜𑁆𑀜𑀽 𑀓𑀼𑀲𑀮𑁄 𑀫𑀼𑀢𑀻𑀫𑀸 [𑀫𑀢𑀻𑀫𑀸 (𑀲𑁆𑀬𑀸. 𑀓.)].

𑁩𑁨𑁪. 𑀏𑀯𑀫𑁆𑀧𑀺 𑀬𑁄 𑀯𑁂𑀤𑀕𑀼 𑀪𑀸𑀯𑀺𑀢𑀢𑁆𑀢𑁄, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀅𑀯𑁂𑀥𑀥𑀫𑁆𑀫𑁄;

𑀲𑁄 𑀔𑁄 𑀧𑀭𑁂 𑀦𑀺𑀚𑁆𑀛𑀧𑀬𑁂 𑀧𑀚𑀸𑀦𑀁, 𑀲𑁄𑀢𑀸𑀯𑀥𑀸𑀦𑀽𑀧𑀦𑀺𑀲𑀽𑀧𑀧𑀦𑁆𑀦𑁂.

𑁩𑁨𑁫. 𑀢𑀲𑁆𑀫𑀸 𑀳𑀯𑁂 𑀲𑀧𑁆𑀧𑀼𑀭𑀺𑀲𑀁 𑀪𑀚𑁂𑀣, 𑀫𑁂𑀥𑀸𑀯𑀺𑀦𑀜𑁆𑀘𑁂𑀯 𑀩𑀳𑀼𑀲𑁆𑀲𑀼𑀢𑀜𑁆𑀘;

𑀅𑀜𑁆𑀜𑀸𑀬 𑀅𑀢𑁆𑀣𑀁 𑀧𑀝𑀺𑀧𑀚𑁆𑀚𑀫𑀸𑀦𑁄, 𑀯𑀺𑀜𑁆𑀜𑀸𑀢𑀥𑀫𑁆𑀫𑁄 𑀲 𑀲𑀼𑀔𑀁 [𑀲𑁄 𑀲𑀼𑀔𑀁 (𑀲𑀻.)] 𑀮𑀪𑁂𑀣𑀸𑀢𑀺.

𑀦𑀸𑀯𑀸𑀲𑀼𑀢𑁆𑀢𑀁 𑀅𑀝𑁆𑀞𑀫𑀁 𑀦𑀺𑀝𑁆𑀞𑀺𑀢𑀁.