𑁧𑁪. 𑀥𑀫𑁆𑀫𑀺𑀓𑀲𑀼𑀢𑁆𑀢𑀁

𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀥𑀫𑁆𑀫𑀺𑀓𑁄 𑀉𑀧𑀸𑀲𑀓𑁄 𑀧𑀜𑁆𑀘𑀳𑀺 𑀉𑀧𑀸𑀲𑀓𑀲𑀢𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀥𑀫𑁆𑀫𑀺𑀓𑁄 𑀉𑀧𑀸𑀲𑀓𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

𑁩𑁭𑁮. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀕𑁄𑀢𑀫 𑀪𑀽𑀭𑀺𑀧𑀜𑁆𑀜, 𑀓𑀣𑀁𑀓𑀭𑁄 𑀲𑀸𑀯𑀓𑁄 𑀲𑀸𑀥𑀼 𑀳𑁄𑀢𑀺;

𑀬𑁄 𑀯𑀸 𑀅𑀕𑀸𑀭𑀸 𑀅𑀦𑀕𑀸𑀭𑀫𑁂𑀢𑀺, 𑀅𑀕𑀸𑀭𑀺𑀦𑁄 𑀯𑀸 𑀧𑀦𑀼𑀧𑀸𑀲𑀓𑀸𑀲𑁂.

𑁩𑁭𑁯. ‘‘𑀢𑀼𑀯𑀜𑁆𑀳𑀺 𑀮𑁄𑀓𑀲𑁆𑀲 𑀲𑀤𑁂𑀯𑀓𑀲𑁆𑀲, 𑀕𑀢𑀺𑀁 𑀧𑀚𑀸𑀦𑀸𑀲𑀺 𑀧𑀭𑀸𑀬𑀡𑀜𑁆𑀘;

𑀦 𑀘𑀢𑁆𑀣𑀺 𑀢𑀼𑀮𑁆𑀬𑁄 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀻, 𑀢𑀼𑀯𑀜𑁆𑀳𑀺 𑀩𑀼𑀤𑁆𑀥𑀁 𑀧𑀯𑀭𑀁 𑀯𑀤𑀦𑁆𑀢𑀺.

𑁩𑁮𑁦. ‘‘𑀲𑀩𑁆𑀩𑀁 𑀢𑀼𑀯𑀁 𑀜𑀸𑀡𑀫𑀯𑁂𑀘𑁆𑀘 𑀥𑀫𑁆𑀫𑀁, 𑀧𑀓𑀸𑀲𑁂𑀲𑀺 𑀲𑀢𑁆𑀢𑁂 𑀅𑀦𑀼𑀓𑀫𑁆𑀧𑀫𑀸𑀦𑁄;

𑀯𑀺𑀯𑀝𑁆𑀝𑀘𑁆𑀙𑀤𑁄𑀲𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀯𑀺𑀭𑁄𑀘𑀲𑀺 𑀯𑀺𑀫𑀮𑁄 𑀲𑀩𑁆𑀩𑀮𑁄𑀓𑁂.

𑁩𑁮𑁧. ‘‘𑀆𑀕𑀜𑁆𑀙𑀺 𑀢𑁂 𑀲𑀦𑁆𑀢𑀺𑀓𑁂 𑀦𑀸𑀕𑀭𑀸𑀚𑀸, 𑀏𑀭𑀸𑀯𑀡𑁄 𑀦𑀸𑀫 𑀚𑀺𑀦𑁄𑀢𑀺 𑀲𑀼𑀢𑁆𑀯𑀸;

𑀲𑁄𑀧𑀺 𑀢𑀬𑀸 𑀫𑀦𑁆𑀢𑀬𑀺𑀢𑁆𑀯𑀸𑀚𑁆𑀛𑀕𑀫𑀸, 𑀲𑀸𑀥𑀽𑀢𑀺 𑀲𑀼𑀢𑁆𑀯𑀸𑀦 𑀧𑀢𑀻𑀢𑀭𑀽𑀧𑁄.

𑁩𑁮𑁨. ‘‘𑀭𑀸𑀚𑀸𑀧𑀺 𑀢𑀁 𑀯𑁂𑀲𑁆𑀲𑀯𑀡𑁄 𑀓𑀼𑀯𑁂𑀭𑁄, 𑀉𑀧𑁂𑀢𑀺 𑀥𑀫𑁆𑀫𑀁 𑀧𑀭𑀺𑀧𑀼𑀘𑁆𑀙𑀫𑀸𑀦𑁄;

𑀢𑀲𑁆𑀲𑀸𑀧𑀺 𑀢𑁆𑀯𑀁 𑀧𑀼𑀘𑁆𑀙𑀺𑀢𑁄 𑀩𑁆𑀭𑀽𑀲𑀺 𑀥𑀻𑀭, 𑀲𑁄 𑀘𑀸𑀧𑀺 𑀲𑀼𑀢𑁆𑀯𑀸𑀦 𑀧𑀢𑀻𑀢𑀭𑀽𑀧𑁄.

𑁩𑁮𑁩. ‘‘𑀬𑁂 𑀓𑁂𑀘𑀺𑀫𑁂 𑀢𑀺𑀢𑁆𑀣𑀺𑀬𑀸 𑀯𑀸𑀤𑀲𑀻𑀮𑀸, 𑀆𑀚𑀻𑀯𑀓𑀸 𑀯𑀸 𑀬𑀤𑀺 𑀯𑀸 𑀦𑀺𑀕𑀡𑁆𑀞𑀸;

𑀧𑀜𑁆𑀜𑀸𑀬 𑀢𑀁 𑀦𑀸𑀢𑀺𑀢𑀭𑀦𑁆𑀢𑀺 𑀲𑀩𑁆𑀩𑁂, 𑀞𑀺𑀢𑁄 𑀯𑀚𑀦𑁆𑀢𑀁 𑀯𑀺𑀬 𑀲𑀻𑀖𑀕𑀸𑀫𑀺𑀁.

𑁩𑁮𑁪. ‘‘𑀬𑁂 𑀓𑁂𑀘𑀺𑀫𑁂 𑀩𑁆𑀭𑀸𑀳𑁆𑀫𑀡𑀸 𑀯𑀸𑀤𑀲𑀻𑀮𑀸, 𑀯𑀼𑀤𑁆𑀥𑀸 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑀸 𑀲𑀦𑁆𑀢𑀺 𑀓𑁂𑀘𑀺;

𑀲𑀩𑁆𑀩𑁂 𑀢𑀬𑀺 𑀅𑀢𑁆𑀣𑀩𑀤𑁆𑀥𑀸 𑀪𑀯𑀦𑁆𑀢𑀺, 𑀬𑁂 𑀘𑀸𑀧𑀺 𑀅𑀜𑁆𑀜𑁂 𑀯𑀸𑀤𑀺𑀦𑁄 𑀫𑀜𑁆𑀜𑀫𑀸𑀦𑀸.

𑁩𑁮𑁫. ‘‘𑀅𑀬𑀜𑁆𑀳𑀺 𑀥𑀫𑁆𑀫𑁄 𑀦𑀺𑀧𑀼𑀡𑁄 𑀲𑀼𑀔𑁄 𑀘, 𑀬𑁄𑀬𑀁 𑀢𑀬𑀸 𑀪𑀕𑀯𑀸 𑀲𑀼𑀧𑁆𑀧𑀯𑀼𑀢𑁆𑀢𑁄;

𑀢𑀫𑁂𑀯 𑀲𑀩𑁆𑀩𑁂𑀧𑀺 [𑀲𑀩𑁆𑀩𑁂 𑀫𑀬𑀁 (𑀲𑁆𑀬𑀸.)] 𑀲𑀼𑀲𑁆𑀲𑀽𑀲𑀫𑀸𑀦𑀸, 𑀢𑀁 𑀦𑁄 𑀯𑀤 𑀧𑀼𑀘𑁆𑀙𑀺𑀢𑁄 𑀩𑀼𑀤𑁆𑀥𑀲𑁂𑀝𑁆𑀞.

𑁩𑁮𑁬. ‘‘𑀲𑀩𑁆𑀩𑁂𑀧𑀺 𑀫𑁂 𑀪𑀺𑀓𑁆𑀔𑀯𑁄 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀉𑀧𑀸𑀲𑀓𑀸 𑀘𑀸𑀧𑀺 𑀢𑀣𑁂𑀯 𑀲𑁄𑀢𑀼𑀁;

𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀯𑀺𑀫𑀮𑁂𑀦𑀸𑀦𑀼𑀩𑀼𑀤𑁆𑀥𑀁, 𑀲𑀼𑀪𑀸𑀲𑀺𑀢𑀁 𑀯𑀸𑀲𑀯𑀲𑁆𑀲𑁂𑀯 𑀤𑁂𑀯𑀸’’.

𑁩𑁮𑁭. ‘‘𑀲𑀼𑀡𑀸𑀣 𑀫𑁂 𑀪𑀺𑀓𑁆𑀔𑀯𑁄 𑀲𑀸𑀯𑀬𑀸𑀫𑀺 𑀯𑁄, 𑀥𑀫𑁆𑀫𑀁 𑀥𑀼𑀢𑀁 𑀢𑀜𑁆𑀘 𑀘𑀭𑀸𑀣 𑀲𑀩𑁆𑀩𑁂;

𑀇𑀭𑀺𑀬𑀸𑀧𑀣𑀁 𑀧𑀩𑁆𑀩𑀚𑀺𑀢𑀸𑀦𑀼𑀮𑁄𑀫𑀺𑀓𑀁, 𑀲𑁂𑀯𑁂𑀣 𑀦𑀁 𑀅𑀢𑁆𑀣𑀤𑀲𑁄 𑀫𑀼𑀢𑀻𑀫𑀸.

𑁩𑁮𑁮. ‘‘𑀦𑁄 𑀯𑁂 𑀯𑀺𑀓𑀸𑀮𑁂 𑀯𑀺𑀘𑀭𑁂𑀬𑁆𑀬 𑀪𑀺𑀓𑁆𑀔𑀼, 𑀕𑀸𑀫𑁂 𑀘 𑀧𑀺𑀡𑁆𑀟𑀸𑀬 𑀘𑀭𑁂𑀬𑁆𑀬 𑀓𑀸𑀮𑁂;

𑀅𑀓𑀸𑀮𑀘𑀸𑀭𑀺𑀜𑁆𑀳𑀺 𑀲𑀚𑀦𑁆𑀢𑀺 𑀲𑀗𑁆𑀕𑀸, 𑀢𑀲𑁆𑀫𑀸 𑀯𑀺𑀓𑀸𑀮𑁂 𑀦 𑀘𑀭𑀦𑁆𑀢𑀺 𑀩𑀼𑀤𑁆𑀥𑀸.

𑁩𑁮𑁯. ‘‘𑀭𑀽𑀧𑀸 𑀘 𑀲𑀤𑁆𑀤𑀸 𑀘 𑀭𑀲𑀸 𑀘 𑀕𑀦𑁆𑀥𑀸, 𑀨𑀲𑁆𑀲𑀸 𑀘 𑀬𑁂 𑀲𑀫𑁆𑀫𑀤𑀬𑀦𑁆𑀢𑀺 𑀲𑀢𑁆𑀢𑁂;

𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀁, 𑀓𑀸𑀮𑁂𑀦 𑀲𑁄 𑀧𑀯𑀺𑀲𑁂 𑀧𑀸𑀢𑀭𑀸𑀲𑀁.

𑁩𑁯𑁦. ‘‘𑀧𑀺𑀡𑁆𑀟𑀜𑁆𑀘 𑀪𑀺𑀓𑁆𑀔𑀼 𑀲𑀫𑀬𑁂𑀦 𑀮𑀤𑁆𑀥𑀸, 𑀏𑀓𑁄 𑀧𑀝𑀺𑀓𑁆𑀓𑀫𑁆𑀫 𑀭𑀳𑁄 𑀦𑀺𑀲𑀻𑀤𑁂;

𑀅𑀚𑁆𑀛𑀢𑁆𑀢𑀘𑀺𑀦𑁆𑀢𑀻 𑀦 𑀫𑀦𑁄 𑀩𑀳𑀺𑀤𑁆𑀥𑀸, 𑀦𑀺𑀘𑁆𑀙𑀸𑀭𑀬𑁂 𑀲𑀗𑁆𑀕𑀳𑀺𑀢𑀢𑁆𑀢𑀪𑀸𑀯𑁄.

𑁩𑁯𑁧. ‘‘𑀲𑀘𑁂𑀧𑀺 𑀲𑁄 𑀲𑀮𑁆𑀮𑀧𑁂 𑀲𑀸𑀯𑀓𑁂𑀦, 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀯𑀸;

𑀥𑀫𑁆𑀫𑀁 𑀧𑀡𑀻𑀢𑀁 𑀢𑀫𑀼𑀤𑀸𑀳𑀭𑁂𑀬𑁆𑀬, 𑀦 𑀧𑁂𑀲𑀼𑀡𑀁 𑀦𑁄𑀧𑀺 𑀧𑀭𑀽𑀧𑀯𑀸𑀤𑀁.

𑁩𑁯𑁨. ‘‘𑀯𑀸𑀤𑀜𑁆𑀳𑀺 𑀏𑀓𑁂 𑀧𑀝𑀺𑀲𑁂𑀦𑀺𑀬𑀦𑁆𑀢𑀺, 𑀦 𑀢𑁂 𑀧𑀲𑀁𑀲𑀸𑀫 𑀧𑀭𑀺𑀢𑁆𑀢𑀧𑀜𑁆𑀜𑁂;

𑀢𑀢𑁄 𑀢𑀢𑁄 𑀦𑁂 𑀧𑀲𑀚𑀦𑁆𑀢𑀺 𑀲𑀗𑁆𑀕𑀸, 𑀘𑀺𑀢𑁆𑀢𑀜𑁆𑀳𑀺 𑀢𑁂 𑀢𑀢𑁆𑀣 𑀕𑀫𑁂𑀦𑁆𑀢𑀺 𑀤𑀽𑀭𑁂.

𑁩𑁯𑁩. ‘‘𑀧𑀺𑀡𑁆𑀟𑀁 𑀯𑀺𑀳𑀸𑀭𑀁 𑀲𑀬𑀦𑀸𑀲𑀦𑀜𑁆𑀘, 𑀆𑀧𑀜𑁆𑀘 𑀲𑀗𑁆𑀖𑀸𑀝𑀺𑀭𑀚𑀽𑀧𑀯𑀸𑀳𑀦𑀁;

𑀲𑀼𑀢𑁆𑀯𑀸𑀦 𑀥𑀫𑁆𑀫𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢𑀁, 𑀲𑀗𑁆𑀔𑀸𑀬 𑀲𑁂𑀯𑁂 𑀯𑀭𑀧𑀜𑁆𑀜𑀲𑀸𑀯𑀓𑁄.

𑁩𑁯𑁪. ‘‘𑀢𑀲𑁆𑀫𑀸 𑀳𑀺 𑀧𑀺𑀡𑁆𑀟𑁂 𑀲𑀬𑀦𑀸𑀲𑀦𑁂 𑀘, 𑀆𑀧𑁂 𑀘 𑀲𑀗𑁆𑀖𑀸𑀝𑀺𑀭𑀚𑀽𑀧𑀯𑀸𑀳𑀦𑁂;

𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀽𑀧𑀮𑀺𑀢𑁆𑀢𑁄, 𑀪𑀺𑀓𑁆𑀔𑀼 𑀬𑀣𑀸 𑀧𑁄𑀓𑁆𑀔𑀭𑁂 𑀯𑀸𑀭𑀺𑀩𑀺𑀦𑁆𑀤𑀼.

𑁩𑁯𑁫. ‘‘𑀕𑀳𑀝𑁆𑀞𑀯𑀢𑁆𑀢𑀁 𑀧𑀦 𑀯𑁄 𑀯𑀤𑀸𑀫𑀺, 𑀬𑀣𑀸𑀓𑀭𑁄 𑀲𑀸𑀯𑀓𑁄 𑀲𑀸𑀥𑀼 𑀳𑁄𑀢𑀺;

𑀦 𑀳𑁂𑀲 [𑀦 𑀳𑁂𑀲𑁄 (𑀲𑀻.)] 𑀮𑀩𑁆𑀪𑀸 𑀲𑀧𑀭𑀺𑀕𑁆𑀕𑀳𑁂𑀦, 𑀨𑀲𑁆𑀲𑁂𑀢𑀼𑀁 𑀬𑁄 𑀓𑁂𑀯𑀮𑁄 𑀪𑀺𑀓𑁆𑀔𑀼𑀥𑀫𑁆𑀫𑁄.

𑁩𑁯𑁬. ‘‘𑀧𑀸𑀡𑀁 𑀦 𑀳𑀦𑁂 [𑀦 𑀳𑀸𑀦𑁂 (𑀲𑀻.)] 𑀦 𑀘 𑀖𑀸𑀢𑀬𑁂𑀬𑁆𑀬, 𑀦 𑀘𑀸𑀦𑀼𑀚𑀜𑁆𑀜𑀸 𑀳𑀦𑀢𑀁 𑀧𑀭𑁂𑀲𑀁;

𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀬𑁂 𑀣𑀸𑀯𑀭𑀸 𑀬𑁂 𑀘 𑀢𑀲𑀸 𑀲𑀦𑁆𑀢𑀺 [𑀢𑀲𑀦𑁆𑀢𑀺 (𑀲𑀻. 𑀧𑀻.)] 𑀮𑁄𑀓𑁂.

𑁩𑁯𑁭. ‘‘𑀢𑀢𑁄 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑁂𑀬𑁆𑀬, 𑀓𑀺𑀜𑁆𑀘𑀺 𑀓𑁆𑀯𑀘𑀺 𑀲𑀸𑀯𑀓𑁄 𑀩𑀼𑀚𑁆𑀛𑀫𑀸𑀦𑁄;

𑀦 𑀳𑀸𑀭𑀬𑁂 𑀳𑀭𑀢𑀁 𑀦𑀸𑀦𑀼𑀚𑀜𑁆𑀜𑀸, 𑀲𑀩𑁆𑀩𑀁 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑁂𑀬𑁆𑀬.

𑁩𑁯𑁮. ‘‘𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀭𑀺𑀯𑀚𑁆𑀚𑀬𑁂𑀬𑁆𑀬, 𑀅𑀗𑁆𑀕𑀸𑀭𑀓𑀸𑀲𑀼𑀁 𑀚𑀮𑀺𑀢𑀁𑀯 𑀯𑀺𑀜𑁆𑀜𑀽;

𑀅𑀲𑀫𑁆𑀪𑀼𑀡𑀦𑁆𑀢𑁄 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀧𑀭𑀲𑁆𑀲 𑀤𑀸𑀭𑀁 𑀦 𑀅𑀢𑀺𑀓𑁆𑀓𑀫𑁂𑀬𑁆𑀬.

𑁩𑁯𑁯. ‘‘𑀲𑀪𑀕𑁆𑀕𑀢𑁄 𑀯𑀸 𑀧𑀭𑀺𑀲𑀕𑁆𑀕𑀢𑁄 𑀯𑀸, 𑀏𑀓𑀲𑁆𑀲 𑀯𑁂𑀓𑁄 [𑀘𑁂𑀢𑁄 (𑀲𑀻. 𑀲𑁆𑀬𑀸.)] 𑀦 𑀫𑀼𑀲𑀸 𑀪𑀡𑁂𑀬𑁆𑀬;

𑀦 𑀪𑀸𑀡𑀬𑁂 𑀪𑀡𑀢𑀁 𑀦𑀸𑀦𑀼𑀚𑀜𑁆𑀜𑀸, 𑀲𑀩𑁆𑀩𑀁 𑀅𑀪𑀽𑀢𑀁 𑀧𑀭𑀺𑀯𑀚𑁆𑀚𑀬𑁂𑀬𑁆𑀬.

𑁪𑁦𑁦. ‘‘𑀫𑀚𑁆𑀚𑀜𑁆𑀘 𑀧𑀸𑀦𑀁 𑀦 𑀲𑀫𑀸𑀘𑀭𑁂𑀬𑁆𑀬, 𑀥𑀫𑁆𑀫𑀁 𑀇𑀫𑀁 𑀭𑁄𑀘𑀬𑁂 𑀬𑁄 𑀕𑀳𑀝𑁆𑀞𑁄;

𑀦 𑀧𑀸𑀬𑀬𑁂 𑀧𑀺𑀯𑀢𑀁 𑀦𑀸𑀦𑀼𑀚𑀜𑁆𑀜𑀸, 𑀉𑀫𑁆𑀫𑀸𑀤𑀦𑀦𑁆𑀢𑀁 𑀇𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸.

𑁪𑁦𑁧. ‘‘𑀫𑀤𑀸 𑀳𑀺 𑀧𑀸𑀧𑀸𑀦𑀺 𑀓𑀭𑁄𑀦𑁆𑀢𑀺 𑀩𑀸𑀮𑀸, 𑀓𑀸𑀭𑁂𑀦𑁆𑀢𑀺 𑀘𑀜𑁆𑀜𑁂𑀧𑀺 𑀚𑀦𑁂 𑀧𑀫𑀢𑁆𑀢𑁂;

𑀏𑀢𑀁 𑀅𑀧𑀼𑀜𑁆𑀜𑀸𑀬𑀢𑀦𑀁 𑀯𑀺𑀯𑀚𑁆𑀚𑀬𑁂, 𑀉𑀫𑁆𑀫𑀸𑀤𑀦𑀁 𑀫𑁄𑀳𑀦𑀁 𑀩𑀸𑀮𑀓𑀦𑁆𑀢𑀁.

𑁪𑁦𑁨. ‘‘𑀧𑀸𑀡𑀁 𑀦 𑀳𑀦𑁂 𑀦 𑀘𑀸𑀤𑀺𑀦𑁆𑀦𑀫𑀸𑀤𑀺𑀬𑁂, 𑀫𑀼𑀲𑀸 𑀦 𑀪𑀸𑀲𑁂 𑀦 𑀘 𑀫𑀚𑁆𑀚𑀧𑁄 𑀲𑀺𑀬𑀸;

𑀅𑀩𑁆𑀭𑀳𑁆𑀫𑀘𑀭𑀺𑀬𑀸 𑀯𑀺𑀭𑀫𑁂𑀬𑁆𑀬 𑀫𑁂𑀣𑀼𑀦𑀸, 𑀭𑀢𑁆𑀢𑀺𑀁 𑀦 𑀪𑀼𑀜𑁆𑀚𑁂𑀬𑁆𑀬 𑀯𑀺𑀓𑀸𑀮𑀪𑁄𑀚𑀦𑀁.

𑁪𑁦𑁩. ‘‘𑀫𑀸𑀮𑀁 𑀦 𑀥𑀸𑀭𑁂 𑀦 𑀘 𑀕𑀦𑁆𑀥𑀫𑀸𑀘𑀭𑁂, 𑀫𑀜𑁆𑀘𑁂 𑀙𑀫𑀸𑀬𑀁 𑀯 𑀲𑀬𑁂𑀣 𑀲𑀦𑁆𑀣𑀢𑁂;

𑀏𑀢𑀜𑁆𑀳𑀺 𑀅𑀝𑁆𑀞𑀗𑁆𑀕𑀺𑀓𑀫𑀸𑀳𑀼𑀧𑁄𑀲𑀣𑀁, 𑀩𑀼𑀤𑁆𑀥𑁂𑀦 𑀤𑀼𑀓𑁆𑀔𑀦𑁆𑀢𑀕𑀼𑀦𑀸 𑀧𑀓𑀸𑀲𑀺𑀢𑀁.

𑁪𑁦𑁪. ‘‘𑀢𑀢𑁄 𑀘 𑀧𑀓𑁆𑀔𑀲𑁆𑀲𑀼𑀧𑀯𑀲𑁆𑀲𑀼𑀧𑁄𑀲𑀣𑀁, 𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀜𑁆𑀘 𑀅𑀝𑁆𑀞𑀫𑀺𑀁;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘 𑀧𑀲𑀦𑁆𑀦𑀫𑀸𑀦𑀲𑁄, 𑀅𑀝𑁆𑀞𑀗𑁆𑀕𑀼𑀧𑁂𑀢𑀁 𑀲𑀼𑀲𑀫𑀢𑁆𑀢𑀭𑀽𑀧𑀁.

𑁪𑁦𑁫. ‘‘𑀢𑀢𑁄 𑀘 𑀧𑀸𑀢𑁄 𑀉𑀧𑀯𑀼𑀢𑁆𑀣𑀼𑀧𑁄𑀲𑀣𑁄, 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀘 𑀪𑀺𑀓𑁆𑀔𑀼𑀲𑀗𑁆𑀖𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀦𑀼𑀫𑁄𑀤𑀫𑀸𑀦𑁄, 𑀬𑀣𑀸𑀭𑀳𑀁 𑀲𑀁𑀯𑀺𑀪𑀚𑁂𑀣 𑀯𑀺𑀜𑁆𑀜𑀽.

𑁪𑁦𑁬. ‘‘𑀥𑀫𑁆𑀫𑁂𑀦 𑀫𑀸𑀢𑀸𑀧𑀺𑀢𑀭𑁄 𑀪𑀭𑁂𑀬𑁆𑀬, 𑀧𑀬𑁄𑀚𑀬𑁂 𑀥𑀫𑁆𑀫𑀺𑀓𑀁 𑀲𑁄 𑀯𑀡𑀺𑀚𑁆𑀚𑀁;

𑀏𑀢𑀁 𑀕𑀺𑀳𑀻 𑀯𑀢𑁆𑀢𑀬𑀫𑀧𑁆𑀧𑀫𑀢𑁆𑀢𑁄, 𑀲𑀬𑀫𑁆𑀧𑀪𑁂 𑀦𑀸𑀫 𑀉𑀧𑁂𑀢𑀺 𑀤𑁂𑀯𑁂’’𑀢𑀺.

𑀥𑀫𑁆𑀫𑀺𑀓𑀲𑀼𑀢𑁆𑀢𑀁 𑀘𑀼𑀤𑁆𑀤𑀲𑀫𑀁 𑀦𑀺𑀝𑁆𑀞𑀺𑀢𑀁.

𑀘𑀽𑀴𑀯𑀕𑁆𑀕𑁄 𑀤𑀼𑀢𑀺𑀬𑁄 𑀦𑀺𑀝𑁆𑀞𑀺𑀢𑁄.