𑁧𑁩. 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀲𑀼𑀢𑁆𑀢𑀁

𑁩𑁬𑁧. ‘‘𑀧𑀼𑀘𑁆𑀙𑀸𑀫𑀺 𑀫𑀼𑀦𑀺𑀁 𑀧𑀳𑀽𑀢𑀧𑀜𑁆𑀜𑀁,

𑀢𑀺𑀡𑁆𑀡𑀁 𑀧𑀸𑀭𑀗𑁆𑀕𑀢𑀁 𑀧𑀭𑀺𑀦𑀺𑀩𑁆𑀩𑀼𑀢𑀁 𑀞𑀺𑀢𑀢𑁆𑀢𑀁;

𑀦𑀺𑀓𑁆𑀔𑀫𑁆𑀫 𑀖𑀭𑀸 𑀧𑀦𑀼𑀚𑁆𑀚 𑀓𑀸𑀫𑁂, 𑀓𑀣𑀁 𑀪𑀺𑀓𑁆𑀔𑀼

𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬’’.

𑁩𑁬𑁨. ‘‘𑀬𑀲𑁆𑀲 𑀫𑀗𑁆𑀕𑀮𑀸 𑀲𑀫𑀽𑀳𑀢𑀸, (𑀇𑀢𑀺 𑀪𑀕𑀯𑀸)

𑀉𑀧𑁆𑀧𑀸𑀢𑀸 𑀲𑀼𑀧𑀺𑀦𑀸 𑀘 𑀮𑀓𑁆𑀔𑀡𑀸 𑀘;

𑀲𑁄 𑀫𑀗𑁆𑀕𑀮𑀤𑁄𑀲𑀯𑀺𑀧𑁆𑀧𑀳𑀻𑀦𑁄,

𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁬𑁩. ‘‘𑀭𑀸𑀕𑀁 𑀯𑀺𑀦𑀬𑁂𑀣 𑀫𑀸𑀦𑀼𑀲𑁂𑀲𑀼, 𑀤𑀺𑀩𑁆𑀩𑁂𑀲𑀼 𑀓𑀸𑀫𑁂𑀲𑀼 𑀘𑀸𑀧𑀺 𑀪𑀺𑀓𑁆𑀔𑀼;

𑀅𑀢𑀺𑀓𑁆𑀓𑀫𑁆𑀫 𑀪𑀯𑀁 𑀲𑀫𑁂𑀘𑁆𑀘 𑀥𑀫𑁆𑀫𑀁, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁬𑁪. ‘‘𑀯𑀺𑀧𑀺𑀝𑁆𑀞𑀺𑀓𑀢𑁆𑀯𑀸𑀦 𑀧𑁂𑀲𑀼𑀡𑀸𑀦𑀺, 𑀓𑁄𑀥𑀁 𑀓𑀤𑀭𑀺𑀬𑀁 𑀚𑀳𑁂𑀬𑁆𑀬 𑀪𑀺𑀓𑁆𑀔𑀼;

𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀳𑀻𑀦𑁄, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁬𑁫. ‘‘𑀳𑀺𑀢𑁆𑀯𑀸𑀦 𑀧𑀺𑀬𑀜𑁆𑀘 𑀅𑀧𑁆𑀧𑀺𑀬𑀜𑁆𑀘, 𑀅𑀦𑀼𑀧𑀸𑀤𑀸𑀬 𑀅𑀦𑀺𑀲𑁆𑀲𑀺𑀢𑁄 𑀓𑀼𑀳𑀺𑀜𑁆𑀘𑀺;

𑀲𑀁𑀬𑁄𑀚𑀦𑀺𑀬𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁬𑁬. ‘‘𑀦 𑀲𑁄 𑀉𑀧𑀥𑀻𑀲𑀼 𑀲𑀸𑀭𑀫𑁂𑀢𑀺, 𑀆𑀤𑀸𑀦𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀭𑀸𑀕𑀁;

𑀲𑁄 𑀅𑀦𑀺𑀲𑁆𑀲𑀺𑀢𑁄 𑀅𑀦𑀜𑁆𑀜𑀦𑁂𑀬𑁆𑀬𑁄, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁬𑁭. ‘‘𑀯𑀘𑀲𑀸 𑀫𑀦𑀲𑀸 𑀘 𑀓𑀫𑁆𑀫𑀼𑀦𑀸 𑀘, 𑀅𑀯𑀺𑀭𑀼𑀤𑁆𑀥𑁄 𑀲𑀫𑁆𑀫𑀸 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀁;

𑀦𑀺𑀩𑁆𑀩𑀸𑀦𑀧𑀤𑀸𑀪𑀺𑀧𑀢𑁆𑀣𑀬𑀸𑀦𑁄, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁬𑁮. ‘‘𑀬𑁄 𑀯𑀦𑁆𑀤𑀢𑀺 𑀫𑀦𑁆𑀢𑀺 𑀦𑀼𑀡𑁆𑀡𑀫𑁂𑀬𑁆𑀬 [𑀦𑀼𑀦𑁆𑀦𑀫𑁂𑀬𑁆𑀬 (?)], 𑀅𑀓𑁆𑀓𑀼𑀝𑁆𑀞𑁄𑀧𑀺 𑀦 𑀲𑀦𑁆𑀥𑀺𑀬𑁂𑀣 𑀪𑀺𑀓𑁆𑀔𑀼;

𑀮𑀤𑁆𑀥𑀸 𑀧𑀭𑀪𑁄𑀚𑀦𑀁 𑀦 𑀫𑀚𑁆𑀚𑁂, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁬𑁯. ‘‘𑀮𑁄𑀪𑀜𑁆𑀘 𑀪𑀯𑀜𑁆𑀘 𑀯𑀺𑀧𑁆𑀧𑀳𑀸𑀬, 𑀯𑀺𑀭𑀢𑁄 𑀙𑁂𑀤𑀦𑀩𑀦𑁆𑀥𑀦𑀸 𑀘 [𑀙𑁂𑀤𑀦𑀩𑀦𑁆𑀥𑀦𑀢𑁄 (𑀲𑀻. 𑀲𑁆𑀬𑀸.)] 𑀪𑀺𑀓𑁆𑀔𑀼;

𑀲𑁄 𑀢𑀺𑀡𑁆𑀡𑀓𑀣𑀁𑀓𑀣𑁄 𑀯𑀺𑀲𑀮𑁆𑀮𑁄, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁭𑁦. ‘‘𑀲𑀸𑀭𑀼𑀧𑁆𑀧𑀁 𑀅𑀢𑁆𑀢𑀦𑁄 𑀯𑀺𑀤𑀺𑀢𑁆𑀯𑀸, 𑀦𑁄 𑀘 𑀪𑀺𑀓𑁆𑀔𑀼 𑀳𑀺𑀁𑀲𑁂𑀬𑁆𑀬 𑀓𑀜𑁆𑀘𑀺 𑀮𑁄𑀓𑁂;

𑀬𑀣𑀸 𑀢𑀣𑀺𑀬𑀁 𑀯𑀺𑀤𑀺𑀢𑁆𑀯𑀸 𑀥𑀫𑁆𑀫𑀁, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁭𑁧. ‘‘𑀬𑀲𑁆𑀲𑀸𑀦𑀼𑀲𑀬𑀸 𑀦 𑀲𑀦𑁆𑀢𑀺 𑀓𑁂𑀘𑀺, 𑀫𑀽𑀮𑀸 𑀘 [𑀫𑀽𑀮𑀸 (𑀲𑀻. 𑀲𑁆𑀬𑀸.)] 𑀅𑀓𑀼𑀲𑀮𑀸 𑀲𑀫𑀽𑀳𑀢𑀸𑀲𑁂;

𑀲𑁄 𑀦𑀺𑀭𑀸𑀲𑁄 [𑀦𑀺𑀭𑀸𑀲𑀬𑁄 (𑀲𑀻.), 𑀦𑀺𑀭𑀸𑀲𑀲𑁄 (𑀲𑁆𑀬𑀸.)] 𑀅𑀦𑀸𑀲𑀺𑀲𑀸𑀦𑁄 [𑀅𑀦𑀸𑀲𑀬𑀸𑀦𑁄 (𑀲𑀻. 𑀧𑀻.), 𑀅𑀦𑀸𑀲𑀲𑀸𑀦𑁄 (𑀲𑁆𑀬𑀸.)], 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁭𑁨. ‘‘𑀆𑀲𑀯𑀔𑀻𑀡𑁄 𑀧𑀳𑀻𑀦𑀫𑀸𑀦𑁄, 𑀲𑀩𑁆𑀩𑀁 𑀭𑀸𑀕𑀧𑀣𑀁 𑀉𑀧𑀸𑀢𑀺𑀯𑀢𑁆𑀢𑁄;

𑀤𑀦𑁆𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀞𑀺𑀢𑀢𑁆𑀢𑁄, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁭𑁩. ‘‘𑀲𑀤𑁆𑀥𑁄 𑀲𑀼𑀢𑀯𑀸 𑀦𑀺𑀬𑀸𑀫𑀤𑀲𑁆𑀲𑀻, 𑀯𑀕𑁆𑀕𑀕𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀺 𑀥𑀻𑀭𑁄;

𑀮𑁄𑀪𑀁 𑀤𑁄𑀲𑀁 𑀯𑀺𑀦𑁂𑀬𑁆𑀬 𑀧𑀝𑀺𑀖𑀁, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁭𑁪. ‘‘𑀲𑀁𑀲𑀼𑀤𑁆𑀥𑀚𑀺𑀦𑁄 𑀯𑀺𑀯𑀝𑁆𑀝𑀘𑁆𑀙𑀤𑁄, 𑀥𑀫𑁆𑀫𑁂𑀲𑀼 𑀯𑀲𑀻 𑀧𑀸𑀭𑀕𑀽 𑀅𑀦𑁂𑀚𑁄;

𑀲𑀗𑁆𑀔𑀸𑀭𑀦𑀺𑀭𑁄𑀥𑀜𑀸𑀡𑀓𑀼𑀲𑀮𑁄, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁭𑁫. ‘‘𑀅𑀢𑀻𑀢𑁂𑀲𑀼 𑀅𑀦𑀸𑀕𑀢𑁂𑀲𑀼 𑀘𑀸𑀧𑀺, 𑀓𑀧𑁆𑀧𑀸𑀢𑀻𑀢𑁄 𑀅𑀢𑀺𑀘𑁆𑀘𑀲𑀼𑀤𑁆𑀥𑀺𑀧𑀜𑁆𑀜𑁄;

𑀲𑀩𑁆𑀩𑀸𑀬𑀢𑀦𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬.

𑁩𑁭𑁬. ‘‘𑀅𑀜𑁆𑀜𑀸𑀬 𑀧𑀤𑀁 𑀲𑀫𑁂𑀘𑁆𑀘 𑀥𑀫𑁆𑀫𑀁, 𑀯𑀺𑀯𑀝𑀁 𑀤𑀺𑀲𑁆𑀯𑀸𑀦 𑀧𑀳𑀸𑀦𑀫𑀸𑀲𑀯𑀸𑀦𑀁;

𑀲𑀩𑁆𑀩𑀼𑀧𑀥𑀻𑀦𑀁 𑀧𑀭𑀺𑀓𑁆𑀔𑀬𑀸𑀦𑁄 [𑀧𑀭𑀺𑀓𑁆𑀔𑀬𑀸 (𑀧𑀻.)], 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬’’.

𑁩𑁭𑁭. ‘‘𑀅𑀤𑁆𑀥𑀸 𑀳𑀺 𑀪𑀕𑀯𑀸 𑀢𑀣𑁂𑀯 𑀏𑀢𑀁, 𑀬𑁄 𑀲𑁄 𑀏𑀯𑀁𑀯𑀺𑀳𑀸𑀭𑀻 𑀤𑀦𑁆𑀢𑁄 𑀪𑀺𑀓𑁆𑀔𑀼;

𑀲𑀩𑁆𑀩𑀲𑀁𑀬𑁄𑀚𑀦𑀬𑁄𑀕𑀯𑀻𑀢𑀺𑀯𑀢𑁆𑀢𑁄 [𑀲𑀩𑁆𑀩𑀲𑀁𑀬𑁄𑀚𑀦𑀺𑀬𑁂 𑀘 𑀯𑀻𑀢𑀺𑀯𑀢𑁆𑀢𑁄 (𑀲𑀻. 𑀲𑁆𑀬𑀸. 𑀧𑀻.)], 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬𑀸’’𑀢𑀺.

𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀻𑀬𑀲𑀼𑀢𑁆𑀢𑀁 𑀢𑁂𑀭𑀲𑀫𑀁 𑀦𑀺𑀝𑁆𑀞𑀺𑀢𑀁.