𑁧𑁨. 𑀦𑀺𑀕𑁆𑀭𑁄𑀥𑀓𑀧𑁆𑀧𑀲𑀼𑀢𑁆𑀢𑀁

𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀉𑀧𑀚𑁆𑀛𑀸𑀬𑁄 𑀦𑀺𑀕𑁆𑀭𑁄𑀥𑀓𑀧𑁆𑀧𑁄 𑀦𑀸𑀫 𑀣𑁂𑀭𑁄 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀯𑀗𑁆𑀕𑀻𑀲𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀦𑀼 𑀔𑁄 𑀫𑁂 𑀉𑀧𑀚𑁆𑀛𑀸𑀬𑁄 𑀉𑀤𑀸𑀳𑀼 𑀦𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀦𑀼 𑀔𑁄 𑀫𑁂 𑀉𑀧𑀚𑁆𑀛𑀸𑀬𑁄, 𑀉𑀤𑀸𑀳𑀼 𑀦𑁄 𑀧𑀭𑀺𑀦𑀩𑁆𑀩𑀼𑀢𑁄’’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁩𑁪𑁫. ‘‘𑀧𑀼𑀘𑁆𑀙𑀸𑀫 [𑀧𑀼𑀘𑁆𑀙𑀸𑀫𑀺 (𑀓.)] 𑀲𑀢𑁆𑀣𑀸𑀭𑀫𑀦𑁄𑀫𑀧𑀜𑁆𑀜𑀁, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀬𑁄 𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀙𑁂𑀢𑁆𑀢𑀸;

𑀅𑀕𑁆𑀕𑀸𑀴𑀯𑁂 𑀓𑀸𑀮𑀫𑀓𑀸𑀲𑀺 𑀪𑀺𑀓𑁆𑀔𑀼, 𑀜𑀸𑀢𑁄 𑀬𑀲𑀲𑁆𑀲𑀻 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄.

𑁩𑁪𑁬. ‘‘𑀦𑀺𑀕𑁆𑀭𑁄𑀥𑀓𑀧𑁆𑀧𑁄 𑀇𑀢𑀺 𑀢𑀲𑁆𑀲 𑀦𑀸𑀫𑀁, 𑀢𑀬𑀸 𑀓𑀢𑀁 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀲𑁄 𑀢𑀁 𑀦𑀫𑀲𑁆𑀲𑀁 𑀅𑀘𑀭𑀺 𑀫𑀼𑀢𑁆𑀬𑀧𑁂𑀓𑁆𑀔𑁄, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀤𑀴𑁆𑀳𑀥𑀫𑁆𑀫𑀤𑀲𑁆𑀲𑀻.

𑁩𑁪𑁭. ‘‘𑀢𑀁 𑀲𑀸𑀯𑀓𑀁 𑀲𑀓𑁆𑀬 [𑀲𑀓𑁆𑀓 (𑀲𑀻. 𑀲𑁆𑀬𑀸. 𑀧𑀻.)] 𑀫𑀬𑀫𑁆𑀧𑀺 𑀲𑀩𑁆𑀩𑁂, 𑀅𑀜𑁆𑀜𑀸𑀢𑀼𑀫𑀺𑀘𑁆𑀙𑀸𑀫 𑀲𑀫𑀦𑁆𑀢𑀘𑀓𑁆𑀔𑀼;

𑀲𑀫𑀯𑀝𑁆𑀞𑀺𑀢𑀸 𑀦𑁄 𑀲𑀯𑀦𑀸𑀬 𑀲𑁄𑀢𑀸, 𑀢𑀼𑀯𑀁 𑀦𑁄 𑀲𑀢𑁆𑀣𑀸 𑀢𑁆𑀯𑀫𑀦𑀼𑀢𑁆𑀢𑀭𑁄𑀲𑀺.

𑁩𑁪𑁮. ‘‘𑀙𑀺𑀦𑁆𑀤𑁂𑀯 𑀦𑁄 𑀯𑀺𑀘𑀺𑀓𑀺𑀘𑁆𑀙𑀁 𑀩𑁆𑀭𑀽𑀳𑀺 𑀫𑁂𑀢𑀁, 𑀧𑀭𑀺𑀦𑀺𑀩𑁆𑀩𑀼𑀢𑀁 𑀯𑁂𑀤𑀬 𑀪𑀽𑀭𑀺𑀧𑀜𑁆𑀜;

𑀫𑀚𑁆𑀛𑁂𑀯 [𑀫𑀚𑁆𑀛𑁂 𑀘 (𑀲𑁆𑀬𑀸. 𑀓.)] 𑀦𑁄 𑀪𑀸𑀲 𑀲𑀫𑀦𑁆𑀢𑀘𑀓𑁆𑀔𑀼, 𑀲𑀓𑁆𑀓𑁄𑀯 𑀤𑁂𑀯𑀸𑀦 𑀲𑀳𑀲𑁆𑀲𑀦𑁂𑀢𑁆𑀢𑁄.

𑁩𑁪𑁯. ‘‘𑀬𑁂 𑀓𑁂𑀘𑀺 𑀕𑀦𑁆𑀣𑀸 𑀇𑀥 𑀫𑁄𑀳𑀫𑀕𑁆𑀕𑀸, 𑀅𑀜𑁆𑀜𑀸𑀡𑀧𑀓𑁆𑀔𑀸 𑀯𑀺𑀘𑀺𑀓𑀺𑀘𑁆𑀙𑀞𑀸𑀦𑀸;

𑀢𑀣𑀸𑀕𑀢𑀁 𑀧𑀢𑁆𑀯𑀸 𑀦 𑀢𑁂 𑀪𑀯𑀦𑁆𑀢𑀺, 𑀘𑀓𑁆𑀔𑀼𑀜𑁆𑀳𑀺 𑀏𑀢𑀁 𑀧𑀭𑀫𑀁 𑀦𑀭𑀸𑀦𑀁.

𑁩𑁫𑁦. ‘‘𑀦𑁄 𑀘𑁂 𑀳𑀺 𑀚𑀸𑀢𑀼 𑀧𑀼𑀭𑀺𑀲𑁄 𑀓𑀺𑀮𑁂𑀲𑁂, 𑀯𑀸𑀢𑁄 𑀬𑀣𑀸 𑀅𑀩𑁆𑀪𑀥𑀦𑀁 𑀯𑀺𑀳𑀸𑀦𑁂;

𑀢𑀫𑁄𑀯𑀲𑁆𑀲 𑀦𑀺𑀯𑀼𑀢𑁄 𑀲𑀩𑁆𑀩𑀮𑁄𑀓𑁄, 𑀦 𑀚𑁄𑀢𑀺𑀫𑀦𑁆𑀢𑁄𑀧𑀺 𑀦𑀭𑀸 𑀢𑀧𑁂𑀬𑁆𑀬𑀼𑀁.

𑁩𑁫𑁧. ‘‘𑀥𑀻𑀭𑀸 𑀘 𑀧𑀚𑁆𑀚𑁄𑀢𑀓𑀭𑀸 𑀪𑀯𑀦𑁆𑀢𑀺, 𑀢𑀁 𑀢𑀁 𑀅𑀳𑀁 𑀯𑀻𑀭 [𑀥𑀻𑀭 (𑀲𑀻. 𑀲𑁆𑀬𑀸.)] 𑀢𑀣𑁂𑀯 𑀫𑀜𑁆𑀜𑁂;

𑀯𑀺𑀧𑀲𑁆𑀲𑀺𑀦𑀁 𑀚𑀸𑀦𑀫𑀼𑀧𑀸𑀕𑀫𑀼𑀫𑁆𑀳𑀸 [𑀚𑀸𑀦𑀫𑀼𑀧𑀕𑀫𑀫𑁆𑀳𑀸 (𑀲𑀻. 𑀲𑁆𑀬𑀸.)], 𑀧𑀭𑀺𑀲𑀸𑀲𑀼 𑀦𑁄 𑀆𑀯𑀺𑀓𑀭𑁄𑀳𑀺 𑀓𑀧𑁆𑀧𑀁.

𑁩𑁫𑁨. ‘‘𑀔𑀺𑀧𑁆𑀧𑀁 𑀕𑀺𑀭𑀁 𑀏𑀭𑀬 𑀯𑀕𑁆𑀕𑀼 𑀯𑀕𑁆𑀕𑀼𑀁, 𑀳𑀁𑀲𑁄𑀯 𑀧𑀕𑁆𑀕𑀬𑁆𑀳 𑀲𑀡𑀺𑀓𑀁 [𑀲𑀡𑀺𑀁 (𑀲𑁆𑀬𑀸. 𑀧𑀻.)] 𑀦𑀺𑀓𑀽𑀚;

𑀩𑀺𑀦𑁆𑀤𑀼𑀲𑁆𑀲𑀭𑁂𑀦 𑀲𑀼𑀯𑀺𑀓𑀧𑁆𑀧𑀺𑀢𑁂𑀦, 𑀲𑀩𑁆𑀩𑁂𑀯 𑀢𑁂 𑀉𑀚𑁆𑀚𑀼𑀕𑀢𑀸 𑀲𑀼𑀡𑁄𑀫.

𑁩𑁫𑁩. ‘‘𑀧𑀳𑀻𑀦𑀚𑀸𑀢𑀺𑀫𑀭𑀡𑀁 𑀅𑀲𑁂𑀲𑀁, 𑀦𑀺𑀕𑁆𑀕𑀬𑁆𑀳 𑀥𑁄𑀦𑀁 [𑀥𑁄𑀢𑀁 (𑀲𑀻.)] 𑀯𑀤𑁂𑀲𑁆𑀲𑀸𑀫𑀺 𑀥𑀫𑁆𑀫𑀁;

𑀦 𑀓𑀸𑀫𑀓𑀸𑀭𑁄 𑀳𑀺 𑀧𑀼𑀣𑀼𑀚𑁆𑀚𑀦𑀸𑀦𑀁, 𑀲𑀗𑁆𑀔𑁂𑀬𑁆𑀬𑀓𑀸𑀭𑁄 𑀘 [𑀲𑀗𑁆𑀔𑀬𑁆𑀬𑀓𑀸𑀭𑁄𑀯 (𑀓.)] 𑀢𑀣𑀸𑀕𑀢𑀸𑀦𑀁.

𑁩𑁫𑁪. ‘‘𑀲𑀫𑁆𑀧𑀦𑁆𑀦𑀯𑁂𑀬𑁆𑀬𑀸𑀓𑀭𑀡𑀁 𑀢𑀯𑁂𑀤𑀁, 𑀲𑀫𑀼𑀚𑁆𑀚𑀼𑀧𑀜𑁆𑀜𑀲𑁆𑀲 [𑀲𑀫𑀼𑀚𑁆𑀚𑀧𑀜𑁆𑀜𑀲𑁆𑀲 (𑀲𑁆𑀬𑀸. 𑀓.)] 𑀲𑀫𑀼𑀕𑁆𑀕𑀳𑀻𑀢𑀁;

𑀅𑀬𑀫𑀜𑁆𑀚𑀮𑀻 𑀧𑀘𑁆𑀙𑀺𑀫𑁄 𑀲𑀼𑀧𑁆𑀧𑀡𑀸𑀫𑀺𑀢𑁄, 𑀫𑀸 𑀫𑁄𑀳𑀬𑀻 𑀚𑀸𑀦𑀫𑀦𑁄𑀫𑀧𑀜𑁆𑀜.

𑁩𑁫𑁫. ‘‘𑀧𑀭𑁄𑀯𑀭𑀁 [𑀯𑀭𑀸𑀯𑀭𑀁 (𑀓𑀢𑁆𑀣𑀘𑀺)] 𑀅𑀭𑀺𑀬𑀥𑀫𑁆𑀫𑀁 𑀯𑀺𑀤𑀺𑀢𑁆𑀯𑀸, 𑀫𑀸 𑀫𑁄𑀳𑀬𑀻 𑀚𑀸𑀦𑀫𑀦𑁄𑀫𑀯𑀻𑀭;

𑀯𑀸𑀭𑀺𑀁 𑀬𑀣𑀸 𑀖𑀫𑁆𑀫𑀦𑀺 𑀖𑀫𑁆𑀫𑀢𑀢𑁆𑀢𑁄, 𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀺 𑀲𑀼𑀢𑀁 𑀧𑀯𑀲𑁆𑀲 [𑀲𑀼𑀢𑀲𑁆𑀲 𑀯𑀲𑁆𑀲 (𑀲𑁆𑀬𑀸.)].

𑁩𑁫𑁬. ‘‘𑀬𑀤𑀢𑁆𑀣𑀺𑀓𑀁 [𑀬𑀤𑀢𑁆𑀣𑀺𑀬𑀁 (𑀧𑀻.), 𑀬𑀤𑀢𑁆𑀣𑀺𑀢𑀁 (𑀓.)] 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀻, 𑀓𑀧𑁆𑀧𑀸𑀬𑀦𑁄 𑀓𑀘𑁆𑀘𑀺𑀲𑁆𑀲 𑀢𑀁 𑀅𑀫𑁄𑀖𑀁;

𑀦𑀺𑀩𑁆𑀩𑀸𑀬𑀺 𑀲𑁄 𑀆𑀤𑀼 𑀲𑀉𑀧𑀸𑀤𑀺𑀲𑁂𑀲𑁄, 𑀬𑀣𑀸 𑀯𑀺𑀫𑀼𑀢𑁆𑀢𑁄 𑀅𑀳𑀼 𑀢𑀁 𑀲𑀼𑀡𑁄𑀫’’.

𑁩𑁫𑁭. ‘‘𑀅𑀘𑁆𑀙𑁂𑀘𑁆𑀙𑀺 [𑀅𑀙𑁂𑀚𑁆𑀚𑀺 (𑀓.)] 𑀢𑀡𑁆𑀳𑀁 𑀇𑀥 𑀦𑀸𑀫𑀭𑀽𑀧𑁂, (𑀇𑀢𑀺 𑀪𑀕𑀯𑀸)

𑀓𑀡𑁆𑀳𑀲𑁆𑀲 [𑀢𑀡𑁆𑀳𑀸𑀬 (𑀓.)] 𑀲𑁄𑀢𑀁 𑀤𑀻𑀖𑀭𑀢𑁆𑀢𑀸𑀦𑀼𑀲𑀬𑀺𑀢𑀁;

𑀅𑀢𑀸𑀭𑀺 𑀚𑀸𑀢𑀺𑀁 𑀫𑀭𑀡𑀁 𑀅𑀲𑁂𑀲𑀁,’’

𑀇𑀘𑁆𑀘𑀩𑁆𑀭𑀯𑀻 𑀪𑀕𑀯𑀸 𑀧𑀜𑁆𑀘𑀲𑁂𑀝𑁆𑀞𑁄.

𑁩𑁫𑁮. ‘‘𑀏𑀲 𑀲𑀼𑀢𑁆𑀯𑀸 𑀧𑀲𑀻𑀤𑀸𑀫𑀺, 𑀯𑀘𑁄 𑀢𑁂 𑀇𑀲𑀺𑀲𑀢𑁆𑀢𑀫;

𑀅𑀫𑁄𑀖𑀁 𑀓𑀺𑀭 𑀫𑁂 𑀧𑀼𑀝𑁆𑀞𑀁, 𑀦 𑀫𑀁 𑀯𑀜𑁆𑀘𑁂𑀲𑀺 𑀩𑁆𑀭𑀸𑀳𑁆𑀫𑀡𑁄.

𑁩𑁫𑁯. ‘‘𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀅𑀳𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀅𑀘𑁆𑀙𑀺𑀤𑀸 𑀫𑀘𑁆𑀘𑀼𑀦𑁄 𑀚𑀸𑀮𑀁, 𑀢𑀢𑀁 𑀫𑀸𑀬𑀸𑀯𑀺𑀦𑁄 𑀤𑀴𑁆𑀳𑀁.

𑁩𑁬𑁦. ‘‘𑀅𑀤𑁆𑀤𑀲𑀸 𑀪𑀕𑀯𑀸 𑀆𑀤𑀺𑀁, 𑀉𑀧𑀸𑀤𑀸𑀦𑀲𑁆𑀲 𑀓𑀧𑁆𑀧𑀺𑀬𑁄;

𑀅𑀘𑁆𑀘𑀕𑀸 𑀯𑀢 𑀓𑀧𑁆𑀧𑀸𑀬𑀦𑁄, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭’’𑀦𑁆𑀢𑀺.

𑀦𑀺𑀕𑁆𑀭𑁄𑀥𑀓𑀧𑁆𑀧𑀲𑀼𑀢𑁆𑀢𑀁 𑀤𑁆𑀯𑀸𑀤𑀲𑀫𑀁 𑀦𑀺𑀝𑁆𑀞𑀺𑀢𑀁.