𑁬. 𑀧𑀭𑀸𑀪𑀯𑀲𑀼𑀢𑁆𑀢𑀁

𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

𑁯𑁧. ‘‘𑀧𑀭𑀸𑀪𑀯𑀦𑁆𑀢𑀁 𑀧𑀼𑀭𑀺𑀲𑀁, 𑀫𑀬𑀁 𑀧𑀼𑀘𑁆𑀙𑀸𑀫 𑀕𑁄𑀢𑀫 [𑀕𑁄𑀢𑀫𑀁 (𑀲𑀻. 𑀲𑁆𑀬𑀸.)];

𑀪𑀕𑀯𑀦𑁆𑀢𑀁 [𑀪𑀯𑀦𑁆𑀢𑀁 (𑀲𑁆𑀬𑀸. 𑀓.)] 𑀧𑀼𑀝𑁆𑀞𑀼𑀫𑀸𑀕𑀫𑁆𑀫, 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁯𑁨. ‘‘𑀲𑀼𑀯𑀺𑀚𑀸𑀦𑁄 𑀪𑀯𑀁 𑀳𑁄𑀢𑀺, 𑀲𑀼𑀯𑀺𑀚𑀸𑀦𑁄 [𑀤𑀼𑀯𑀺𑀚𑀸𑀦𑁄 (𑀲𑁆𑀬𑀸. 𑀓.)] 𑀧𑀭𑀸𑀪𑀯𑁄;

𑀥𑀫𑁆𑀫𑀓𑀸𑀫𑁄 𑀪𑀯𑀁 𑀳𑁄𑀢𑀺, 𑀥𑀫𑁆𑀫𑀤𑁂𑀲𑁆𑀲𑀻 𑀧𑀭𑀸𑀪𑀯𑁄’’.

𑁯𑁩. ‘‘𑀇𑀢𑀺 𑀳𑁂𑀢𑀁 𑀯𑀺𑀚𑀸𑀦𑀸𑀫, 𑀧𑀞𑀫𑁄 𑀲𑁄 𑀧𑀭𑀸𑀪𑀯𑁄;

𑀤𑀼𑀢𑀺𑀬𑀁 𑀪𑀕𑀯𑀸 𑀩𑁆𑀭𑀽𑀳𑀺, 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁯𑁪. ‘‘𑀅𑀲𑀦𑁆𑀢𑀲𑁆𑀲 𑀧𑀺𑀬𑀸 𑀳𑁄𑀦𑁆𑀢𑀺, 𑀲𑀦𑁆𑀢𑁂 𑀦 𑀓𑀼𑀭𑀼𑀢𑁂 𑀧𑀺𑀬𑀁;

𑀅𑀲𑀢𑀁 𑀥𑀫𑁆𑀫𑀁 𑀭𑁄𑀘𑁂𑀢𑀺, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁯𑁫. ‘‘𑀇𑀢𑀺 𑀳𑁂𑀢𑀁 𑀯𑀺𑀚𑀸𑀦𑀸𑀫, 𑀤𑀼𑀢𑀺𑀬𑁄 𑀲𑁄 𑀧𑀭𑀸𑀪𑀯𑁄;

𑀢𑀢𑀺𑀬𑀁 𑀪𑀕𑀯𑀸 𑀩𑁆𑀭𑀽𑀳𑀺, 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁯𑁬. ‘‘𑀦𑀺𑀤𑁆𑀤𑀸𑀲𑀻𑀮𑀻 𑀲𑀪𑀸𑀲𑀻𑀮𑀻, 𑀅𑀦𑀼𑀝𑁆𑀞𑀸𑀢𑀸 𑀘 𑀬𑁄 𑀦𑀭𑁄;

𑀅𑀮𑀲𑁄 𑀓𑁄𑀥𑀧𑀜𑁆𑀜𑀸𑀡𑁄, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁯𑁭. ‘‘𑀇𑀢𑀺 𑀳𑁂𑀢𑀁 𑀯𑀺𑀚𑀸𑀦𑀸𑀫, 𑀢𑀢𑀺𑀬𑁄 𑀲𑁄 𑀧𑀭𑀸𑀪𑀯𑁄;

𑀘𑀢𑀼𑀢𑁆𑀣𑀁 𑀪𑀕𑀯𑀸 𑀩𑁆𑀭𑀽𑀳𑀺, 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁯𑁮. ‘‘𑀬𑁄 𑀫𑀸𑀢𑀭𑀁 [𑀬𑁄 𑀫𑀸𑀢𑀭𑀁 𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀺𑀢𑀭𑀁 𑀯𑀸, 𑀚𑀺𑀡𑁆𑀡𑀓𑀁 𑀕𑀢𑀬𑁄𑀩𑁆𑀩𑀦𑀁;

𑀧𑀳𑀼 𑀲𑀦𑁆𑀢𑁄 𑀦 𑀪𑀭𑀢𑀺, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁯𑁯. ‘‘𑀇𑀢𑀺 𑀳𑁂𑀢𑀁 𑀯𑀺𑀚𑀸𑀦𑀸𑀫, 𑀘𑀢𑀼𑀢𑁆𑀣𑁄 𑀲𑁄 𑀧𑀭𑀸𑀪𑀯𑁄;

𑀧𑀜𑁆𑀘𑀫𑀁 𑀪𑀕𑀯𑀸 𑀩𑁆𑀭𑀽𑀳𑀺, 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁦𑁦. ‘‘𑀬𑁄 𑀩𑁆𑀭𑀸𑀳𑁆𑀫𑀡𑀁 [𑀬𑁄 𑀩𑁆𑀭𑀸𑀳𑁆𑀫𑀡𑀁 𑀯𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀫𑀡𑀁 𑀯𑀸, 𑀅𑀜𑁆𑀜𑀁 𑀯𑀸𑀧𑀺 𑀯𑀦𑀺𑀩𑁆𑀩𑀓𑀁;

𑀫𑀼𑀲𑀸𑀯𑀸𑀤𑁂𑀦 𑀯𑀜𑁆𑀘𑁂𑀢𑀺, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁦𑁧. ‘‘𑀇𑀢𑀺 𑀳𑁂𑀢𑀁 𑀯𑀺𑀚𑀸𑀦𑀸𑀫, 𑀧𑀜𑁆𑀘𑀫𑁄 𑀲𑁄 𑀧𑀭𑀸𑀪𑀯𑁄;

𑀙𑀝𑁆𑀞𑀫𑀁 𑀪𑀕𑀯𑀸 𑀩𑁆𑀭𑀽𑀳𑀺, 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁦𑁨. ‘‘𑀧𑀳𑀽𑀢𑀯𑀺𑀢𑁆𑀢𑁄 𑀧𑀼𑀭𑀺𑀲𑁄, 𑀲𑀳𑀺𑀭𑀜𑁆𑀜𑁄 𑀲𑀪𑁄𑀚𑀦𑁄;

𑀏𑀓𑁄 𑀪𑀼𑀜𑁆𑀚𑀢𑀺 𑀲𑀸𑀤𑀽𑀦𑀺, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁦𑁩. ‘‘𑀇𑀢𑀺 𑀳𑁂𑀢𑀁 𑀯𑀺𑀚𑀸𑀦𑀸𑀫, 𑀙𑀝𑁆𑀞𑀫𑁄 𑀲𑁄 𑀧𑀭𑀸𑀪𑀯𑁄;

𑀲𑀢𑁆𑀢𑀫𑀁 𑀪𑀕𑀯𑀸 𑀩𑁆𑀭𑀽𑀳𑀺, 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁦𑁪. ‘‘𑀚𑀸𑀢𑀺𑀢𑁆𑀣𑀤𑁆𑀥𑁄 𑀥𑀦𑀢𑁆𑀣𑀤𑁆𑀥𑁄, 𑀕𑁄𑀢𑁆𑀢𑀢𑁆𑀣𑀤𑁆𑀥𑁄 𑀘 𑀬𑁄 𑀦𑀭𑁄;

𑀲𑀜𑁆𑀜𑀸𑀢𑀺𑀁 𑀅𑀢𑀺𑀫𑀜𑁆𑀜𑁂𑀢𑀺, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁦𑁫. ‘‘𑀇𑀢𑀺 𑀳𑁂𑀢𑀁 𑀯𑀺𑀚𑀸𑀦𑀸𑀫, 𑀲𑀢𑁆𑀢𑀫𑁄 𑀲𑁄 𑀧𑀭𑀸𑀪𑀯𑁄;

𑀅𑀝𑁆𑀞𑀫𑀁 𑀪𑀕𑀯𑀸 𑀩𑁆𑀭𑀽𑀳𑀺, 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁦𑁬. ‘‘𑀇𑀢𑁆𑀣𑀺𑀥𑀼𑀢𑁆𑀢𑁄 𑀲𑀼𑀭𑀸𑀥𑀼𑀢𑁆𑀢𑁄, 𑀅𑀓𑁆𑀔𑀥𑀼𑀢𑁆𑀢𑁄 𑀘 𑀬𑁄 𑀦𑀭𑁄;

𑀮𑀤𑁆𑀥𑀁 𑀮𑀤𑁆𑀥𑀁 𑀯𑀺𑀦𑀸𑀲𑁂𑀢𑀺, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁦𑁭. ‘‘𑀇𑀢𑀺 𑀳𑁂𑀢𑀁 𑀯𑀺𑀚𑀸𑀦𑀸𑀫, 𑀅𑀝𑁆𑀞𑀫𑁄 𑀲𑁄 𑀧𑀭𑀸𑀪𑀯𑁄;

𑀦𑀯𑀫𑀁 𑀪𑀕𑀯𑀸 𑀩𑁆𑀭𑀽𑀳𑀺, 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁦𑁮. ‘‘𑀲𑁂𑀳𑀺 𑀤𑀸𑀭𑁂𑀳𑀺 𑀅𑀲𑀦𑁆𑀢𑀼𑀝𑁆𑀞𑁄 [𑀤𑀸𑀭𑁂𑀳𑁆𑀬𑀲𑀦𑁆𑀢𑀼𑀝𑁆𑀞𑁄 (𑀓.)], 𑀯𑁂𑀲𑀺𑀬𑀸𑀲𑀼 𑀧𑀤𑀼𑀲𑁆𑀲𑀢𑀺 [𑀧𑀤𑀺𑀲𑁆𑀲𑀢𑀺 (𑀲𑀻.)];

𑀤𑀼𑀲𑁆𑀲𑀢𑀺 [𑀤𑀺𑀲𑁆𑀲𑀢𑀺 (𑀲𑀻. 𑀧𑀻.)] 𑀧𑀭𑀤𑀸𑀭𑁂𑀲𑀼, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁦𑁯. ‘‘𑀇𑀢𑀺 𑀳𑁂𑀢𑀁 𑀯𑀺𑀚𑀸𑀦𑀸𑀫, 𑀦𑀯𑀫𑁄 𑀲𑁄 𑀧𑀭𑀸𑀪𑀯𑁄;

𑀤𑀲𑀫𑀁 𑀪𑀕𑀯𑀸 𑀩𑁆𑀭𑀽𑀳𑀺, 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁧𑁦. ‘‘𑀅𑀢𑀻𑀢𑀬𑁄𑀩𑁆𑀩𑀦𑁄 𑀧𑁄𑀲𑁄, 𑀆𑀦𑁂𑀢𑀺 𑀢𑀺𑀫𑁆𑀩𑀭𑀼𑀢𑁆𑀣𑀦𑀺𑀁;

𑀢𑀲𑁆𑀲𑀸 𑀇𑀲𑁆𑀲𑀸 𑀦 𑀲𑀼𑀧𑀢𑀺, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁧𑁧. ‘‘𑀇𑀢𑀺 𑀳𑁂𑀢𑀁 𑀯𑀺𑀚𑀸𑀦𑀸𑀫, 𑀤𑀲𑀫𑁄 𑀲𑁄 𑀧𑀭𑀸𑀪𑀯𑁄;

𑀏𑀓𑀸𑀤𑀲𑀫𑀁 𑀪𑀕𑀯𑀸 𑀩𑁆𑀭𑀽𑀳𑀺, 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁧𑁨. ‘‘𑀇𑀢𑁆𑀣𑀺𑀁 𑀲𑁄𑀡𑁆𑀟𑀺𑀁 𑀯𑀺𑀓𑀺𑀭𑀡𑀺𑀁, 𑀧𑀼𑀭𑀺𑀲𑀁 𑀯𑀸𑀧𑀺 𑀢𑀸𑀤𑀺𑀲𑀁;

𑀇𑀲𑁆𑀲𑀭𑀺𑀬𑀲𑁆𑀫𑀺𑀁 𑀞𑀧𑁂𑀢𑀺 [𑀞𑀸𑀧𑁂𑀢𑀺 (𑀲𑀻. 𑀧𑀻.), 𑀣𑀧𑁂𑀢𑀺 (𑀓.)], 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁧𑁩. ‘‘𑀇𑀢𑀺 𑀳𑁂𑀢𑀁 𑀯𑀺𑀚𑀸𑀦𑀸𑀫, 𑀏𑀓𑀸𑀤𑀲𑀫𑁄 𑀲𑁄 𑀧𑀭𑀸𑀪𑀯𑁄;

𑀤𑁆𑀯𑀸𑀤𑀲𑀫𑀁 𑀪𑀕𑀯𑀸 𑀩𑁆𑀭𑀽𑀳𑀺, 𑀓𑀺𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁧𑁪. ‘‘𑀅𑀧𑁆𑀧𑀪𑁄𑀕𑁄 𑀫𑀳𑀸𑀢𑀡𑁆𑀳𑁄, 𑀔𑀢𑁆𑀢𑀺𑀬𑁂 𑀚𑀸𑀬𑀢𑁂 𑀓𑀼𑀮𑁂;

𑀲𑁄 𑀘 𑀭𑀚𑁆𑀚𑀁 𑀧𑀢𑁆𑀣𑀬𑀢𑀺, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁’’.

𑁧𑁧𑁫. ‘‘𑀏𑀢𑁂 𑀧𑀭𑀸𑀪𑀯𑁂 𑀮𑁄𑀓𑁂, 𑀧𑀡𑁆𑀟𑀺𑀢𑁄 𑀲𑀫𑀯𑁂𑀓𑁆𑀔𑀺𑀬;

𑀅𑀭𑀺𑀬𑁄 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄, 𑀲 𑀮𑁄𑀓𑀁 𑀪𑀚𑀢𑁂 𑀲𑀺𑀯’’𑀦𑁆𑀢𑀺.

𑀧𑀭𑀸𑀪𑀯𑀲𑀼𑀢𑁆𑀢𑀁 𑀙𑀝𑁆𑀞𑀁 𑀦𑀺𑀝𑁆𑀞𑀺𑀢𑀁.