𑁭. 𑀯𑀲𑀮𑀲𑀼𑀢𑁆𑀢𑀁

𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑁂 𑀅𑀕𑁆𑀕𑀺 𑀧𑀚𑁆𑀚𑀮𑀺𑀢𑁄 𑀳𑁄𑀢𑀺 𑀆𑀳𑀼𑀢𑀺 𑀧𑀕𑁆𑀕𑀳𑀺𑀢𑀸. 𑀅𑀣 𑀔𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀬𑁂𑀦 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀅𑀤𑁆𑀤𑀲𑀸 𑀔𑁄 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑀢𑁆𑀭𑁂𑀯 [𑀅𑀢𑁆𑀭𑁂𑀯 (𑀲𑁆𑀬𑀸. 𑀓.)], 𑀫𑀼𑀡𑁆𑀟𑀓; 𑀢𑀢𑁆𑀭𑁂𑀯, 𑀲𑀫𑀡𑀓; 𑀢𑀢𑁆𑀭𑁂𑀯, 𑀯𑀲𑀮𑀓 𑀢𑀺𑀝𑁆𑀞𑀸𑀳𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀪𑀕𑀯𑀸 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀚𑀸𑀦𑀸𑀲𑀺 𑀧𑀦 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀯𑀲𑀮𑀁 𑀯𑀸 𑀯𑀲𑀮𑀓𑀭𑀡𑁂 𑀯𑀸 𑀥𑀫𑁆𑀫𑁂’’𑀢𑀺? ‘‘𑀦 𑀔𑁆𑀯𑀸𑀳𑀁, 𑀪𑁄 𑀕𑁄𑀢𑀫, 𑀚𑀸𑀦𑀸𑀫𑀺 𑀯𑀲𑀮𑀁 𑀯𑀸 𑀯𑀲𑀮𑀓𑀭𑀡𑁂 𑀯𑀸 𑀥𑀫𑁆𑀫𑁂; 𑀲𑀸𑀥𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀣𑀸𑀳𑀁 𑀚𑀸𑀦𑁂𑀬𑁆𑀬𑀁 𑀯𑀲𑀮𑀁 𑀯𑀸 𑀯𑀲𑀮𑀓𑀭𑀡𑁂 𑀯𑀸 𑀥𑀫𑁆𑀫𑁂’’𑀢𑀺. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁧𑁧𑁬. ‘‘𑀓𑁄𑀥𑀦𑁄 𑀉𑀧𑀦𑀸𑀳𑀻 𑀘, 𑀧𑀸𑀧𑀫𑀓𑁆𑀔𑀻 𑀘 𑀬𑁄 𑀦𑀭𑁄;

𑀯𑀺𑀧𑀦𑁆𑀦𑀤𑀺𑀝𑁆𑀞𑀺 𑀫𑀸𑀬𑀸𑀯𑀻, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁧𑁭. ‘‘𑀏𑀓𑀚𑀁 𑀯𑀸 𑀤𑁆𑀯𑀺𑀚𑀁 [𑀤𑀺𑀚𑀁 (𑀧𑀻.)] 𑀯𑀸𑀧𑀺, 𑀬𑁄𑀥 𑀧𑀸𑀡𑀁 𑀯𑀺𑀳𑀺𑀁𑀲𑀢𑀺;

𑀬𑀲𑁆𑀲 𑀧𑀸𑀡𑁂 𑀤𑀬𑀸 𑀦𑀢𑁆𑀣𑀺, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁧𑁮. ‘‘𑀬𑁄 𑀳𑀦𑁆𑀢𑀺 𑀧𑀭𑀺𑀭𑀼𑀦𑁆𑀥𑀢𑀺 [𑀉𑀧𑀭𑀼𑀦𑁆𑀥𑁂𑀢𑀺 (𑀲𑁆𑀬𑀸.), 𑀉𑀧𑀭𑀼𑀦𑁆𑀥𑀢𑀺 (𑀓.)], 𑀕𑀸𑀫𑀸𑀦𑀺 𑀦𑀺𑀕𑀫𑀸𑀦𑀺 𑀘;

𑀦𑀺𑀕𑁆𑀕𑀸𑀳𑀓𑁄 [𑀦𑀺𑀕𑁆𑀖𑀸𑀢𑀓𑁄 (?)] 𑀲𑀫𑀜𑁆𑀜𑀸𑀢𑁄, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁧𑁯. ‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸 𑀭𑀜𑁆𑀜𑁂, 𑀬𑀁 𑀧𑀭𑁂𑀲𑀁 𑀫𑀫𑀸𑀬𑀺𑀢𑀁;

𑀣𑁂𑀬𑁆𑀬𑀸 𑀅𑀤𑀺𑀦𑁆𑀦𑀫𑀸𑀤𑁂𑀢𑀺 [𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺 (𑀲𑀻. 𑀧𑀻.)], 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁨𑁦. ‘‘𑀬𑁄 𑀳𑀯𑁂 𑀇𑀡𑀫𑀸𑀤𑀸𑀬, 𑀘𑀼𑀚𑁆𑀚𑀫𑀸𑀦𑁄 [𑀪𑀼𑀜𑁆𑀚𑀫𑀸𑀦𑁄 (?)] 𑀧𑀮𑀸𑀬𑀢𑀺;

𑀦 𑀳𑀺 𑀢𑁂 𑀇𑀡𑀫𑀢𑁆𑀣𑀻𑀢𑀺, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁨𑁧. ‘‘𑀬𑁄 𑀯𑁂 𑀓𑀺𑀜𑁆𑀘𑀺𑀓𑁆𑀔𑀓𑀫𑁆𑀬𑀢𑀸, 𑀧𑀦𑁆𑀣𑀲𑁆𑀫𑀺𑀁 𑀯𑀚𑀦𑁆𑀢𑀁 𑀚𑀦𑀁;

𑀳𑀦𑁆𑀢𑁆𑀯𑀸 𑀓𑀺𑀜𑁆𑀘𑀺𑀓𑁆𑀔𑀫𑀸𑀤𑁂𑀢𑀺, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁨𑁨. ‘‘𑀅𑀢𑁆𑀢𑀳𑁂𑀢𑀼 𑀧𑀭𑀳𑁂𑀢𑀼, 𑀥𑀦𑀳𑁂𑀢𑀼 𑀘 [𑀥𑀦𑀳𑁂𑀢𑀼 𑀯 (𑀓.)] 𑀬𑁄 𑀦𑀭𑁄;

𑀲𑀓𑁆𑀔𑀺𑀧𑀼𑀝𑁆𑀞𑁄 𑀫𑀼𑀲𑀸 𑀩𑁆𑀭𑀽𑀢𑀺, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁨𑁩. ‘‘𑀬𑁄 𑀜𑀸𑀢𑀻𑀦𑀁 𑀲𑀔𑀻𑀦𑀁 𑀯𑀸, 𑀤𑀸𑀭𑁂𑀲𑀼 𑀧𑀝𑀺𑀤𑀺𑀲𑁆𑀲𑀢𑀺;

𑀲𑀸𑀳𑀲𑀸 [𑀲𑀳𑀲𑀸 (𑀲𑀻. 𑀲𑁆𑀬𑀸.)] 𑀲𑀫𑁆𑀧𑀺𑀬𑁂𑀦 𑀯𑀸, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁨𑁪. ‘‘𑀬𑁄 𑀫𑀸𑀢𑀭𑀁 𑀧𑀺𑀢𑀭𑀁 𑀯𑀸, 𑀚𑀺𑀡𑁆𑀡𑀓𑀁 𑀕𑀢𑀬𑁄𑀩𑁆𑀩𑀦𑀁;

𑀧𑀳𑀼 𑀲𑀦𑁆𑀢𑁄 𑀦 𑀪𑀭𑀢𑀺, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁨𑁫. ‘‘𑀬𑁄 𑀫𑀸𑀢𑀭𑀁 𑀧𑀺𑀢𑀭𑀁 𑀯𑀸, 𑀪𑀸𑀢𑀭𑀁 𑀪𑀕𑀺𑀦𑀺𑀁 𑀲𑀲𑀼𑀁;

𑀳𑀦𑁆𑀢𑀺 𑀭𑁄𑀲𑁂𑀢𑀺 𑀯𑀸𑀘𑀸𑀬, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁨𑁬. ‘‘𑀬𑁄 𑀅𑀢𑁆𑀣𑀁 𑀧𑀼𑀘𑁆𑀙𑀺𑀢𑁄 𑀲𑀦𑁆𑀢𑁄, 𑀅𑀦𑀢𑁆𑀣𑀫𑀦𑀼𑀲𑀸𑀲𑀢𑀺;

𑀧𑀝𑀺𑀘𑁆𑀙𑀦𑁆𑀦𑁂𑀦 𑀫𑀦𑁆𑀢𑁂𑀢𑀺, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁨𑁭. ‘‘𑀬𑁄 𑀓𑀢𑁆𑀯𑀸 𑀧𑀸𑀧𑀓𑀁 𑀓𑀫𑁆𑀫𑀁, 𑀫𑀸 𑀫𑀁 𑀚𑀜𑁆𑀜𑀸𑀢𑀺 𑀇𑀘𑁆𑀙𑀢𑀺 [𑀯𑀺𑀪. 𑁮𑁯𑁪 𑀧𑀲𑁆𑀲𑀺𑀢𑀩𑁆𑀩𑀁];

𑀬𑁄 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁨𑁮. ‘‘𑀬𑁄 𑀯𑁂 𑀧𑀭𑀓𑀼𑀮𑀁 𑀕𑀦𑁆𑀢𑁆𑀯𑀸, 𑀪𑀼𑀢𑁆𑀯𑀸𑀦 [𑀲𑀼𑀢𑁆𑀯𑀸 𑀘 (𑀲𑁆𑀬𑀸. 𑀓.)] 𑀲𑀼𑀘𑀺𑀪𑁄𑀚𑀦𑀁;

𑀆𑀕𑀢𑀁 𑀦𑀧𑁆𑀧𑀝𑀺𑀧𑀽𑀚𑁂𑀢𑀺, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁨𑁯. ‘‘𑀬𑁄 𑀩𑁆𑀭𑀸𑀳𑁆𑀫𑀡𑀁 𑀲𑀫𑀡𑀁 𑀯𑀸, 𑀅𑀜𑁆𑀜𑀁 𑀯𑀸𑀧𑀺 𑀯𑀦𑀺𑀩𑁆𑀩𑀓𑀁;

𑀫𑀼𑀲𑀸𑀯𑀸𑀤𑁂𑀦 𑀯𑀜𑁆𑀘𑁂𑀢𑀺, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁩𑁦. ‘‘𑀬𑁄 𑀩𑁆𑀭𑀸𑀳𑁆𑀫𑀡𑀁 𑀲𑀫𑀡𑀁 𑀯𑀸, 𑀪𑀢𑁆𑀢𑀓𑀸𑀮𑁂 𑀉𑀧𑀝𑁆𑀞𑀺𑀢𑁂;

𑀭𑁄𑀲𑁂𑀢𑀺 𑀯𑀸𑀘𑀸 𑀦 𑀘 𑀤𑁂𑀢𑀺, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁩𑁧. ‘‘𑀅𑀲𑀢𑀁 𑀬𑁄𑀥 𑀧𑀩𑁆𑀭𑀽𑀢𑀺, 𑀫𑁄𑀳𑁂𑀦 𑀧𑀮𑀺𑀕𑀼𑀡𑁆𑀞𑀺𑀢𑁄;

𑀓𑀺𑀜𑁆𑀘𑀺𑀓𑁆𑀔𑀁 𑀦𑀺𑀚𑀺𑀕𑀻𑀲𑀸𑀦𑁄 [𑀦𑀺𑀚𑀺𑀕𑀺𑀁𑀲𑀸𑀦𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁩𑁨. ‘‘𑀬𑁄 𑀘𑀢𑁆𑀢𑀸𑀦𑀁 𑀲𑀫𑀼𑀓𑁆𑀓𑀁𑀲𑁂, 𑀧𑀭𑁂 𑀘 𑀫𑀯𑀚𑀸𑀦𑀸𑀢𑀺 [𑀫𑀯𑀚𑀸𑀦𑀢𑀺 (𑀲𑀻. 𑀲𑁆𑀬𑀸. 𑀧𑀻.)];

𑀦𑀺𑀳𑀻𑀦𑁄 𑀲𑁂𑀦 𑀫𑀸𑀦𑁂𑀦, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁩𑁩. ‘‘𑀭𑁄𑀲𑀓𑁄 𑀓𑀤𑀭𑀺𑀬𑁄 𑀘, 𑀧𑀸𑀧𑀺𑀘𑁆𑀙𑁄 𑀫𑀘𑁆𑀙𑀭𑀻 𑀲𑀞𑁄;

𑀅𑀳𑀺𑀭𑀺𑀓𑁄 𑀅𑀦𑁄𑀢𑁆𑀢𑀧𑁆𑀧𑀻, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁩𑁪. ‘‘𑀬𑁄 𑀩𑀼𑀤𑁆𑀥𑀁 𑀧𑀭𑀺𑀪𑀸𑀲𑀢𑀺, 𑀅𑀣 𑀯𑀸 𑀢𑀲𑁆𑀲 𑀲𑀸𑀯𑀓𑀁;

𑀧𑀭𑀺𑀩𑁆𑀩𑀸𑀚𑀁 [𑀧𑀭𑀺𑀩𑁆𑀩𑀚𑀁 (𑀓.), 𑀧𑀭𑀺𑀩𑁆𑀩𑀸𑀚𑀓𑀁 (𑀲𑁆𑀬𑀸. 𑀓𑀁.)] 𑀕𑀳𑀝𑁆𑀞𑀁 𑀯𑀸, 𑀢𑀁 𑀚𑀜𑁆𑀜𑀸 𑀯𑀲𑀮𑁄 𑀇𑀢𑀺.

𑁧𑁩𑁫. ‘‘𑀬𑁄 𑀯𑁂 𑀅𑀦𑀭𑀳𑀁 [𑀅𑀦𑀭𑀳𑀸 (𑀲𑀻. 𑀧𑀻.)] 𑀲𑀦𑁆𑀢𑁄, 𑀅𑀭𑀳𑀁 𑀧𑀝𑀺𑀚𑀸𑀦𑀸𑀢𑀺 [𑀧𑀝𑀺𑀚𑀸𑀦𑀢𑀺 (𑀲𑀻. 𑀲𑁆𑀬𑀸. 𑀧𑀻.)];

𑀘𑁄𑀭𑁄 𑀲𑀩𑁆𑀭𑀳𑁆𑀫𑀓𑁂 𑀮𑁄𑀓𑁂, 𑀏𑀲𑁄 𑀔𑁄 𑀯𑀲𑀮𑀸𑀥𑀫𑁄.

𑁧𑁩𑁬. ‘‘𑀏𑀢𑁂 𑀔𑁄 𑀯𑀲𑀮𑀸 𑀯𑀼𑀢𑁆𑀢𑀸, 𑀫𑀬𑀸 𑀬𑁂𑀢𑁂 𑀧𑀓𑀸𑀲𑀺𑀢𑀸;

𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀺, 𑀦 𑀚𑀘𑁆𑀘𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀓𑀫𑁆𑀫𑀼𑀦𑀸 [𑀓𑀫𑁆𑀫𑀦𑀸 (𑀲𑀻. 𑀧𑀻.)] 𑀯𑀲𑀮𑁄 𑀳𑁄𑀢𑀺, 𑀓𑀫𑁆𑀫𑀼𑀦𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄.

𑁧𑁩𑁭. ‘‘𑀢𑀤𑀫𑀺𑀦𑀸𑀧𑀺 𑀚𑀸𑀦𑀸𑀣, 𑀬𑀣𑀸𑀫𑁂𑀤𑀁 [𑀬𑀣𑀸𑀧𑁂𑀤𑀁 (𑀓.)] 𑀦𑀺𑀤𑀲𑁆𑀲𑀦𑀁;

𑀘𑀡𑁆𑀟𑀸𑀮𑀧𑀼𑀢𑁆𑀢𑁄 𑀲𑁄𑀧𑀸𑀓𑁄 [𑀲𑀧𑀸𑀓𑁄 (?)], 𑀫𑀸𑀢𑀗𑁆𑀕𑁄 𑀇𑀢𑀺 𑀯𑀺𑀲𑁆𑀲𑀼𑀢𑁄.

𑁧𑁩𑁮. ‘‘𑀲𑁄 𑀬𑀲𑀁 𑀧𑀭𑀫𑀁 𑀧𑀢𑁆𑀢𑁄 [𑀲𑁄 𑀬𑀲𑀧𑁆𑀧𑀭𑀫𑀧𑁆𑀧𑀢𑁆𑀢𑁄 (𑀲𑁆𑀬𑀸. 𑀓.)], 𑀫𑀸𑀢𑀗𑁆𑀕𑁄 𑀬𑀁 𑀲𑀼𑀤𑀼𑀮𑁆𑀮𑀪𑀁;

𑀆𑀕𑀘𑁆𑀙𑀼𑀁 𑀢𑀲𑁆𑀲𑀼𑀧𑀝𑁆𑀞𑀸𑀦𑀁, 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀩𑀳𑀽.

𑁧𑁩𑁯. ‘‘𑀤𑁂𑀯𑀬𑀸𑀦𑀁 𑀅𑀪𑀺𑀭𑀼𑀬𑁆𑀳, 𑀯𑀺𑀭𑀚𑀁 𑀲𑁄 𑀫𑀳𑀸𑀧𑀣𑀁;

𑀓𑀸𑀫𑀭𑀸𑀕𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑀼;

𑀦 𑀦𑀁 𑀚𑀸𑀢𑀺 𑀦𑀺𑀯𑀸𑀭𑁂𑀲𑀺, 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸.

𑁧𑁪𑁦. ‘‘𑀅𑀚𑁆𑀛𑀸𑀬𑀓𑀓𑀼𑀮𑁂 𑀚𑀸𑀢𑀸, 𑀩𑁆𑀭𑀸𑀳𑁆𑀫𑀡𑀸 𑀫𑀦𑁆𑀢𑀩𑀦𑁆𑀥𑀯𑀸;

𑀢𑁂 𑀘 𑀧𑀸𑀧𑁂𑀲𑀼 𑀓𑀫𑁆𑀫𑁂𑀲𑀼, 𑀅𑀪𑀺𑀡𑁆𑀳𑀫𑀼𑀧𑀤𑀺𑀲𑁆𑀲𑀭𑁂.

𑁧𑁪𑁧. ‘‘𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀕𑀸𑀭𑀬𑁆𑀳𑀸, 𑀲𑀫𑁆𑀧𑀭𑀸𑀬𑁂 𑀘 𑀤𑀼𑀕𑁆𑀕𑀢𑀺;

𑀦 𑀦𑁂 𑀚𑀸𑀢𑀺 𑀦𑀺𑀯𑀸𑀭𑁂𑀢𑀺, 𑀤𑀼𑀕𑁆𑀕𑀢𑁆𑀬𑀸 [𑀤𑀼𑀕𑁆𑀕𑀘𑁆𑀘𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀕𑀭𑀳𑀸𑀬 𑀯𑀸.

𑁧𑁪𑁨. ‘‘𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀺, 𑀦 𑀚𑀘𑁆𑀘𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀓𑀫𑁆𑀫𑀼𑀦𑀸 𑀯𑀲𑀮𑁄 𑀳𑁄𑀢𑀺, 𑀓𑀫𑁆𑀫𑀼𑀦𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀅𑀕𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.

𑀯𑀲𑀮𑀲𑀼𑀢𑁆𑀢𑀁 𑀲𑀢𑁆𑀢𑀫𑀁 𑀦𑀺𑀝𑁆𑀞𑀺𑀢𑀁.